Pukfel
2 Nifai 28


Sopun 28

Chommong mwichefen mi chofona repwe kauuta non ekkewe ranin soponon—Repwe asukuna mettoch mi muan, namotongaw, me nongonong mi puch—Fansoun rochopwak epwe cheewno pokiten ekkewe sense mi chofona—Ewe tefin epwe fori osukosuk non netipen aramas—I epwe asukuna ekkewe nongonong mi chofona. Arap ngeni 559–545 Ier Mwen Kraist.

1 Iwe iei, nengeni, ami pwi, ua fen kapas ngenikemi, anongonong won an ewe Ngun peseiei; ina minne, ua sinei pwe repwe fokkun fisino.

2 Iwe ekkewe mettoch minne repwe makkeno seni ewe puk epwe napanap auchear ngeni ekkewe noun aramas, iwe akkaewin ngeni mwirimwirich kewe, minne ir nussun ewe imwen Israel.

3 Pun ewe fansoun epwe feito non ena ran pwe ekkewe mwichefen minne ra kauuta, nge esap ngeni ewe Samon, nupwen ewe ew epwe apasa ngeni ewe pwan ew: Nengeni, ngang, ngang an ewe Samon; iwe ekkewe ekkoch repwe apasa: Ngang, ngang an ewe Samon; iwe iei met meinisin repwe apasa ir ekkewe ra aueta ekkewe mwichefen, nge esap ngeni ewe Samon—

4 Iwe repwe anini fengen nefiner; iwe nour kewe pris repwe anini fengen nefiner, iwe repwe assukun ren ar sinei, me amam ewe Ngun mi Fel, ewe a auroura ngenikich met sipwe apasa.

5 Iwe ra amam ewe manamanen Kot, ewe Emon mi Fel re Israel; iwe ra apasa ngeni ekkewe aramas: Ausening ngenikem, me rongorong ngeni am annuk; pun nengeni ese wor Kot ikenai, pun ewe Samon me ewe Chon Angasano a wesino an angang, iwe i a ngeni an manaman ngeni aramas;

6 Nengeni, ausening ami ngeni ai annuk; ika repwe apasa pwe mi wor ew manaman a fisino seni poun ewe Samon, ousap nuku; pun non ei ran i esap emon Kot a fori manaman; i a fen awesano an angang.

7 Ewer, iwe epwe chommong ekkewe repwe apasa: Mwongo, un, me pwapwa, pun nesor sipwene mano; iwe epwe murino ngeni kich.

8 Iwe epwe pwan chommong ekkewe repwe apasa: Mwongo, un, me pwapwa; nge inamo, sufonuti Kot—i epwe epichakono ren om fori ekkoch chok tipis; ewer, ekis chofona, kopwe angei tufich seni emon pokiten an kewe kapas, tueta ew pwang fan iten chon orum; ese wor met mi ngaw ren om fori ei; me fori ekkei mettoch meinisin, pun nesor sipwene mano; iwe ika pwe sia tipis, Kot epwe opunikich ren fite chok wichiwich, iwe nesoponon sipwe manau non ewe muun Kot.

9 Ewer, epwe chommong ekkewe minne repwe assukun non ei sokkun napanap, muan me namotongaw me nongonong mi puch, me repwe nuapas non netiper, me repwe kutta ar repwe opaochueno ar kewe aurour seni ewe Samon; iwe ar kewe angang repwe fis non rochopwak.

10 Iwe chan ekkewe souneng repwe kapaseu seni ewe puun pwe epwe ungeni ir.

11 Ewer, ra fen tawaneno seni ewe aan; ra fen ngaweno.

12 Pokiten namanam tekia, me pokiten ekkewe sense mi chofona, me nongonong mi chofona, ar kewe mwichefen ra fen ngaweno, iwe ar kewe mwichefen ra nuapas; pokiten namanam tekia ra nuapas.

13 Ra sona seni ekkewe mi woungaw pokiten ar kewe imwenipin mi murino; ra sona seni ekkewe mi woungaw pokiten ufer kewe mi murino; iwe ra ariaffou ekkewe mi tipetekison me ekkewe mi woungaw non netiper, pokiten non ar namanam tekia ra nuapas.

14 Ra pwarano uwer mi kum me achifata chamwer; ewer, iwe pokiten ar namanam tekia, me fofforungaw, me angang mi anieput, me nisou, ra fen monucheno tiwenon chok fitemon, ir ra tipetekisonun chon tapweno mwirin Kraist; nge inamo, ra emmwenino, pwe non chommong fansoun ra fori mi muan pokiten ra kaeo me ren ekkewe annukun aramas.

15 O ewe mi mirit, me ewe mi tipachem, me ewe mi pisekisek, ekkewe ra nuapas non namanam tekian netiper, me meinisin ekkewe ra afanafana nongonong mi chofona, me meinisin ekkewe ra fori nisou, me angawano ewe aanen ewe Samon, riaffou, riaffou, riaffou epwe ngeni ir, anon ewe Samon Kot mi Napanap, pun repwe koturutiw ngeni hell!

16 Riaffou ngeni ir ekkewe ra akunnano ekkewe mi pung pokiten ew mettoch ese wor namotan me kapas mi ngaw ngeni ewe minne mi och, me apasa pwe ese wor auchean! Pun ewe ran epwe feito pwe ewe Samon Kot epwe mwitir churi ekkewe aramasen fonufan; iwe non ena ran pwe ra mwukono non angangangaw repwe mano.

17 Nge nengeni, ika ekkewe aramasen ewe fonufan repwe aier seni ar kewe fofforungaw me angang mi anieput resap ninnino, anon ewe Samonun Mwicheichen Aramas.

18 Nge nengeni, ena pochokunen me anieputen mwichefen, ewe fin nisou won unusen ewe fonufan, epwe turuno ngeni ewe puun, iwe epwe fokkun wachimuk an turutiw.

19 Pun ewe muun ewe tefin epwe chechech, iwe ir ekkewe ra choni repwe mwasangeta ar repwe aier, are ewe tefin epwe kamwochuno ir me ren an kewe senimecha feinfeino chok, iwe repwe mwasangeta ar repwe song, me mano non ngun;

20 Pun nengeni, atun ena ran i epwe fori osukosuk non netipen ekkewe noun aramas, me amwasangereta ar repwe song ngeni minne mi och.

21 Iwe ekkoch i epwe chachari, me emichireno ngeni tumunun mochenin fonufan, pwe repwe apasa: Meinisin mi murino non Zion; ewer, Zion a feioch, meinisin mi murino—iwe iei ewe tefin a otupano ngunur, me emmwenireno ekis me ekisitiw ngeni hell.

22 Iwe nengeni, ekkoch i a otupureno, iwe i a ereni ir pwe ese wor hell; me a apasa ngeni ir: Esap ngang emon tefin, pun ese wor emon—iwe iei i a mongunungun non seninger, tori an a kamwochuno ir ren an kewe senimecha mi anoninen, seni ikewe ese wor ngaseno.

23 Ewer, repwe kamwochuno non mano, me hell; me mano, me hell, me ewe tefin, me ir meinisin ekkewe ra fen tupuno seni ir repwe uta me mwen ewe nenien mwottun king an Kot, iwe repwe kapung anongonong won ar kewe angang, seni ikewe repwe feino ngeni ewe neni mi monneta fan iter, pwan mwo ew noomun ekkei me brimstone, minne mi riaffou esemuch.

24 Iei minne, riaffou ngeni i ewe a mefi kinamwe non Zion!

25 Riaffou epwe ngeni i ewe a afanafana: Meinisin mi murino!

26 Ewer, riaffou epwe ngeni i ewe a ausening ngeni ekkewe annukun aramas, me amam ewe manamanen Kot, me ewe niffangen Ngun mi Fel!

27 Ewer, riaffou epwe ngeni i ewe a apasa: Am aua angei, iwe am ause chiwen mochen pwan ekkoch!

28 Iwe amuchunon, riaffou ngeni meinisin ekkewe repwe chechech, me ra song pokiten ewe ennet an Kot! Pun nengeni, i ewe a aueta won ewe fau a etiwa ren pwapwa; iwe i ewe a aueta won ew nongonongen pii a chechech pokiten i epwe turutiw.

29 Riaffou ngeni i ewe a apasa: Am aua angei ewe kapasen Kot, iwe am ause chiwen mochen pwan ekkoch kapasen Kot, pun a naf!

30 Pun nengeni, iei anon ewe Samon Kot: Upwe ngeni ekkewe noun aramas kinikinin kapas won kinikinin kapas, annuk won annuk, iei ekis me pwan ina ekis; iwe ra feioch ir ekkewe ra rongorongoch ngeni ai kewe annuk, me ausening ngeni ai aurour, pun repwe kaeo mirit; pun ren i ewe a angei upwe ngeni i pwan och; me angei seni ir ekkewe ra apasa, A naf met a wor rem, seni ir ewe Samon epwe angeireno pwan mwo ewe minne mi wor rer.

31 A anumamau i ewe a wanong an apinukunuk non aramas, are fori aion pwe poun, are repwe ausening ngeni ekkewe annukun aramas, tiwenon chok ika ar kewe annuk repwe kawor seni ewe manamanen ewe Ngun mi Fel.

32 Riaffou epwe ngeni ekkewe chon Gentile, anon ewe Samon Koten Mwicheichen Aramas! Pun inamo upwe attamau pei ngeni ir seni ran me ran, repwe amam ngang; nge inamo upwe umoumoch ngeni ir, anon ewe Samon Kot, ika repwe aier me feito ngeniei; pun pei a tameu unusen ewe ran, anon ewe Samon Koten Mwicheichen Aramas.