Ma Suhmuhslah
2 Nephi 5


Sapta 5

Mwet Nephi elos sifacna som liki mwet Laman, liyacacng masap lal Moses, ac muhsahelah sie tempuhl—Ke srihpen suhlahlahlfongi lalos, mwet Laman elos lihsyucklac liki ye muhtuhn Leum, selngawiyucki, ac in mwe ahkkweok nuh sin mwet Nephi. Sahp ke yac 588–559 Met Liki Kraist.

1 Liye, tukun ma inge nga, Nephi, tuh pruhe yohk nuh sin Leum God luhk, ke srihpen kasrkuhsrak luhn tamuhlwel wiyuck.

2 Tuhsruhk liye, kasrkuhsrak lalos nuh sihk yohkwaclihk, yohk na oruh elos tuh suk in eislah moul luhk.

3 Ahok, elos tuh tohrkahskahs lainyuc, fahk: Tamuhlwel fuhsr wiyacsr el inge nuhnkuh in kol kuht; ac kuht kweoklacna ke srihpacl; ohinge, lwelah kuht in unilyac, tuh kuht in tiac sifilpac kweok ke srihpen kahs lal. Tuh liye, kuht ac fah tiac lwelah elan mwet kol lasr; tuh ma lasr, suc tamuhlwel mahtuh, in kol mwet inge.

4 Inge nga tiac suhmuhslah ke plwet inge nohfohn kahs ma elos tohrkahskahs sang lainyuc kac. Tuhsruhk fal nga in fahk, lah elos tuh suk in eislah moul luhk.

5 Ac tukun ma inge Leum El sensenkackihn nuh sihk, lah nga, Nephi, enenuh in som luhkwelos ac kahinglac nuh yen mwesis, ac elos nuhkwewa suc ke wi yuc som.

6 Ohinge, tukun ma inge nga, Nephi, eis sucu luhk, ac oacyacpac Zoram ac sucu lal, ac Sam, tamuhlwel mahtuh se wiyuck ac sucu lal, ac Jacob ac Joseph, tamuhlwel fuhsr wiyuck, ac oacyacpac tahmtahel wiyuck, ac elos kwewa suc ke wi yuc som. Ac elos kwewa suc ke wi yuc som pa elos suc luhlahlfongi kahs in sensenkackihn ac fwackyuck luhn God; ohinge, elos tuh porongo kahs luhk.

7 Ac kuht us lohm nuknuk sesr ac kuhtwena ma kuht kuh in us, ac kuht fuhfahsryucsr ke innimac ke lusen lwen pucspucs. Ac tukun kuht fuhfahsryucsr ke lusen lwen pucspucs kuht tulohkohnwack lohm nuknuk sesr.

8 Ac mwet luhk ke tuh kuht in pahngon inen acn sac Nephi; ohinge, kuht tuh pahngon acn sac Nephi.

9 Ac elos kwewa suc wiyuc ah eis nuh faclos in pahnglolos sifacna muh mwet lal Nephi.

10 Ac kuht karihngihn in liyacacng nuhnuhnkuh, ac masap akwucki, ac masap luhn Leum ke ma nuhkwewa, in oacna nuh ke masap lal Moses.

11 Ac Leum El wi kuht; ac kuht arulacna kapwack; tuh kuht ukwiyac fihtac, ac kuht sifilpacna kosrwacni yohk. Ac kuht muhtwacwacack in tuhf sip, ac kaho, ac kain in kosro nuhkwewa.

12 Ac nga, Nephi, oacyacpac us ma sihmlac ma taflweyucklac ke plwet prahs; ac oacyacpac pohl sac, kuh kampahs, ma tuh ahkoeyucklac nuh sin pahpah tuhmuhk ke poun Leum, in oacna nuh ke ma sihmihsyucklac uh.

13 Ac tukun ma inge na kuht muhtwacwacack in arulacna kapwack, ac puhseni fin acn uh.

14 Ac nga, Nephi, tuh eis katlas nahtuhl Laban, ac etahi atac ah in oraclah katlas pucspucs, fin ke kuhtwena ohiyac ma mwet suc tuh pahngpahng mwet Laman elos ac tuhkuh ac kuhnauskuhtlac; tuh nga etuh kasrkuhsrak lalos nuh sihk ac tuhlihk nuhtihk ac elos suc pahngpahng mwet luhk.

15 Ac nga luti mwet luhk in muhsah lohm, ac in orekma ke kain in ohiyac nuhkwewa ke sahk, ac ke osra, ac ke copper, ac ke prahs, ac ke stil, ac ke kol, ac ke selfuh, ac ke ohr sacohk, ma puhkantwen.

16 Ac nga, Nephi, tuh muhsahelah sie tempuhl; ac nga tuh muhsahelah in oacna atacn tempuhl lal Solomon tuhsruhk tiac na muhsahiyucklac ke ma sacohk pucspucs; tuh ma ingacn tiac kuh in sukokyak fin acn uh, ohinge, tiac kuh in muhsahiyucklac in oacna tempuhl lal Solomon. Tuhsruhk atacn muhsah sac oacna tempuhl lal Solomon ah; ac kamtuhiyac ah arulacna wo na pwacye.

17 Ac tukun ma inge nga, Nephi, oruh tuh mwet luhk in oaru in orekma, ac in orekma ke paholos.

18 Ac tukun ma inge na elos kena tuh nga in tohkohsrah lalos. Tuhsruhk nga, Nephi, kena tuh in wacngihn tohkohsrah lalos; ne ohinge, nga tuh orekma nuh selos fal nuh ke kuhiyuck.

19 Ac liye, kahs luhn Leum tuh ahkpwacyeiyucklac nuh sin mwet wiyuck, suc El sramsram kaclos, tuh nga in mwet kol ac mwet luti lalos. Ohinge, nga tuh mwet kol ac mwet luti lalos, oacna nuh ke masap luhn Leum, ne ke na pacl se elos tuh suk in eislah moul luhk ah.

20 Ohinge, kahs luhn Leum tuh ahkpwacyeiyuck ke El kahskahs nuh sihk, fahk lah: Yohk na ke elos ac fah tiac na porongo kahs lom elos ac fah lihsyucklac liki ye muhtuhn Leum. Ac liye, elos lihsyucklac liki ye Muhtahl.

21 Ac El tuh oruh sie selnga in tuhkuh nuh faclos, ahok, finne selnga na upac se, ke srihpen ma koluk lalos. Tuh liye, elos tuh ahkkwekweye insiaclos lainuhl, tuh elos oacna sie yot kwekwe; ohinge, ke eltahl tuh fasrfasr, ac arulacna oaskuh ac kahto, tuh elos in tiac eyeinse nuh sin mwet luhk Leum God El oraclah mahno sralsral se in tuhkuh nuh faclos.

22 Ac ohinge Leum God El fahk: Nga ac fah oruh tuh elos in sruhngwacyuck sin mwet lom, sahyacn na elos in auliyak liki ma koluk lalos.

23 Ac selnga fah oan fin fihtac lal suc akuhlamihsi nuh ke fihtac lalos; tuh elos fah selngawi ke selnga se inge pacna. Ac Leum El fahk ma inge, ac oreklac.

24 Ac ke srihpen selnga se lalos ma oan faclos elos ekihn mwet alsruhngwesr, sesseslah ke lokoalok ac kuhtasrihk, ac tuh sukok kosro lwemnak ke innimac.

25 Ac Leum God El fahk nuh sihk: Elos fah sie mwe kweok nuh sin fihtac lom, in pihrakwacltahlwack in esamyuc; ac yohk na ke elos fin tiac esamyuc, ac porongo kahs luhk, elos ac fah ahkkweokyaclos finne nuh ke kuhnausyucklac.

26 Ac tukun ma inge nga, Nephi, tuh mosrwacllah Jacob ac Joseph, tuh elos in mwet tolac mwet luti fin acn sin mwet luhk.

27 Ac tukun ma inge kuht moulkihn engan.

28 Ac yac tolngoul somlah ke pacl se kuht som liki acn Jerusalem.

29 Ac nga, Nephi, tuh karuhnguhnwacng ma sihmlac fin plwet luhk, ma nga oraclah, ke mwet luhk ne ke pacl se inge.

30 Ac tukun ma inge Leum God El fahk nuh sihk: Oraclah kuhtuh pac plwet sahyac; ac kom fah taflwelah ma pucspucs fin ma inge suc ma wo ye muhtuhk, nuh ke kapkapwack luhn mwet lom.

31 Ohinge, nga, Nephi, in ahkostwen nuh ke masap luhn Leum, tuh som ac oraclah plwet inge ma nga taflwelah ma inge fac.

32 Ac nga taflwelah ma suc insewowo nuh sin God. Ac mwet luhk fin insewowo ke ma luhn God elos ac fah insewowo ke tuhfahlfahl luhk inge ma oasr ke plwet inge.

33 Ac mwet luhk fin kena etuh inkaiyacn sramsram mahtuh ke mwet luhk elos enenuh in suk ke plwet luhk sahyac uh.

34 Ac fal nuh sihk in fahk lah yac angngaul somlah, ac kuht sun tari mweun ac lokoalok nuh sin tamuhlwel wiyacsr.