1 Faauta, sa oo ina tagi tele atu a’u, o Nifae, i le Alii lo’u Atua, ona o le ^aita o o’u uso.

2 Ae faauta, sa faateteleina lo latou ita faasaga mai ia te a’u, sa oo ina latou saili e aveese lo’u ola.

3 Ioe, sa latou muimui faasaga mai ia te a’u, fai mai: Ua manatu lo tatou uso laitiiti ia ^apule o ia iā i tatou; ma ua oo mai faalavelave e tele ia te i tatou ona o ia; o le mea lea, ia tatou fasioti nei o ia, ina ia tatou lē toe tigaina ona o ana upu. Aua faauta, tatou te lē avea o ia e fai ma o tatou pule; ona e ā i tatou, o uso matutua, ia pule i luga o lenei nuu.

4 O lenei ou te lē tusia i papatusi nei upu uma sa latou muimui faasaga mai ai ia te a’u. Ae ua lava ona ou fai atu, sa latou saili e aveese lo’u ola.

5 Ma sa oo ina ^alapataiina a’u e le Alii, e tatau ia te a’u, o ^eNifae, ona ou alu ese mai ia te i latou ma ou sola i le vao, faatasi ma i latou uma o e sa fia o faatasi ma a’u.

6 O le mea lea, sa oo ina ave e a’u, o Nifae, lo’u aiga, ma ^aSorama foi ma lona aiga, ma Sama, lo’u uso matua ma lona aiga, ma Iakopo ma Iosefa, o’u uso laiti, ma o’u tuafafine foi, ma i latou uma o e sa fia o faatasi ma a’u. Ma o i latou uma sa fia o faatasi ma a’u o i latou ia o e sa talitonu i ^elapataiga ma faaaliga a le Atua; o le mea lea, sa latou faalogo ai i a’u upu.

7 Ma sa matou ave o matou faleie ma mea uma sa mafai ona matou ave, ma malaga i le vao mo le va o aso e tele. Ma ina ua mavae ona matou malaga mo le va o aso e tele sa matou faatutu o matou faleie.

8 Ma sa mananao o’u tagata ia matou faaigoaina le nofoaga ia ^aNifae; o le mea lea, na matou faaigoaina ai o Nifae.

9 Ma o i latou uma o e sa faatasi ma a’u sa latou ave i o latou lava luga ia ta’ua i latou o le ^anuu o Nifae.

10 Ma sa matou taumafai e tausi faamasinoga, ma tulafono, ma poloaiga a le Alii i mea uma, e tusa ma le ^atulafono a Mose.

11 Ma sa faatasi mai le Alii ia te i matou; ma sa matou manuia tele; ona sa matou totoina fatu o laau, ma sa matou toe selesele mai i le mau tele. Ma sa amata ona matou fafaga o lafu, ma fagaga, ma manu o ituaiga eseese uma.

12 Ma o a’u, o Nifae, sa ’ou aumai foi talafaamaumau sa togitogia i luga o ^apapatusi apamemea; ma le ^epolo foi, po o le ⁱtapasa, lea na saunia e le aao o le Alii mo lo’u tamā, e tusa ma mea ua tusia.

13 Ma sa oo ina amata ona matou manuia tele, ma uluuluola i le laueleele.

14 Ma o a’u, o Nifae, sa ou ave le ^apelu a Lapana, ma faia faatusatusa i lona gaosiga ni isi pelu e tele, ne’i o mai i luga o i matou tagata ua ta’ua nei o sa ^eLamanā ma faaumatia i matou, ona sa ou iloa lo latou inoino faasaga mai ia te a’u ma la’u fanau ma i latou o e na ta’ua o o’u tagata.

15 Ma sa ou aoaoina o’u tagata e fau fale, ma galulue i ituaiga o laau eseese, ma le ^au’amea, ma le kopa, ma le apamemea, ma le sila, ma le auro, ma le ario, ma ’oa taugata, sa matua tele lava.

16 Ma o a’u, o Nifae, sa ou fauina se ^amalumalu; ma sa ou fauina e pei o le ^emalumalu o Solomona vagana ai sa lei fauina i le tele na’uā o mea ⁱtaugata; ona sa le maua ia mea i le laueleele, o le mea lea, sa le mafai ai ona fauina e pei o le malumalu o Solomona. Ae o le ala o le faiga sa pei lava o le malumalu o Solomona; ma o lona fausaga sa matua lelei lava.

17 Ma sa oo ina faia e a’u, o Nifae, ia ^ama’ele’elegā o’u tagata, ma ia galulue i o latou lava lima.

18 Ma sa oo ina latou mananao ia avea a’u ma o latou ^atupu. Peitai o a’u, o Nifae, sa ou manao ia lē i ai so latou tupu; ae ui i lea, sa ou faia mea mo i latou e tusa ai ma lo’u malosi.

19 Ma faauta, sa faataunuuina lava afioga a le Alii i o’u uso, ia na fetalai mai ai o ia e uiga ia te i latou e faapea, o le a avea a’u ma o latou ^apule ma o latou ^eaoao. O le mea lea, sa avea lava a’u ma o latou pule ma o latou aoao, e tusa ma poloaiga a le Alii, seia oo i le taimi na latou saili ai e aveese lo’u ola.

20 O le mea lea, sa faataunuuina lava le afioga a le Alii lea sa ia fetalai mai ia te a’u, e faapea: E tusa ai ma lo latou ^alē faalogo i au upu o le a vavae ese i latou mai luma o le Alii. Ma faauta, sa ^evavae ese lava i latou mai ona luma.

21 Ma sa faia e ia ia oo mai se ^afetuu i luga o i latou, ioe, o se fetuu tiga lava, ona o lo latou amioletonu. Aua faauta, sa latou faamaaa o latou loto faasaga mai ia te ia, ua avea ai i latou e pei o se maa malō; o le mea lea, ona sa papa’e i latou, ma matua lalelei ma ^emoomia, o lea na faia ai e le Alii le Atua ia oo mai i o latou luga se ⁱpa’u uliuli, ina ia lē faatosina i latou i o’u tagata.

22 Ma ua faapea ona fetalai mai o le Alii le Atua: O le a Ou faia ina ia ^ainosia i latou e ou tagata, vagana ai ua latou salamo ia latou amioletonu.

23 Ma o le a fetuuina fanau a ia o lē e ^afefaaipoipoai ma a latou fanau; ona o le a fetuuina i latou i lea lava fetuu e tasi. Ma sa fetalaia e le Alii lenei mea, ma sa faapea lava ona fai.

24 Ma ona o lo latou fetuu lea sa i luga o i latou, sa avea lava i latou ma ^atagata paie, ua tumu i le ulavavale ma le faitogafifiti, ma sa latou saili i le vao mo manu ’ai manu.

25 Ma sa fetalai mai le Alii le Atua ia te a’u: O le a fai i latou ma sasa i au fanau, e faaoso ai i latou ia latou manatua a’u; e tusa ai ma lo latou lē manatuaina o a’u, ma lē faalogo mai i a’u upu, o le a latou saua ia te i latou e oo lava i le faaumatiaina.

26 Ma sa oo ina ^afaapaia e a’u, o Nifae, ia Iakopo ma Iosefa, e avea ma faitaulaga ma aoao i luga o le laueleele o lo’u nuu.

27 Ma sa oo ina matou ola e tusa ma le ala o le fiafia.

28 Ma ua mavae atu le tolu sefulu tausaga talu ona matou tuua o Ierusalema.

29 Ma o a’u, o Nifae, sa ou tausia talafaamaumau o o’u tagata e oo mai i le taimi lea, i luga o a’u papatusi, ia na ou faia.

30 Ma sa oo ina fetalai mai le Alii le Atua ia te a’u: Ia faia ^ani isi papatusi; ma ia e togitogia ai i luga o i latou le tele o mea ua lelei i la’u vaai, mo le manuia o lou nuu.

31 O le mea lea, o a’u, o Nifae, ina ia usiusitai i poloaiga a le Alii, o lea na ou alu atu ai ma faia ^apapatusi nei ua ou togitogia ai i luga nei mea.

32 Ma ua ou togitogia mea ua fiafia i ai le Atua. Ma afai e fiafia o’u tagata i mea a le Atua o le a latou fiafia i a’u togitogiga ua i luga o papatusi nei.

33 Ma afai e fia iloa e o’u tagata le vaega tele faapitoa o le talafaasolopito o lo’u nuu e ao ina latou suesue i isi a’u papatusi.

34 Ma ua lava ia te a’u ona fai atu e faapea ua fa sefulu tausaga ua mavae atu, ma ua uma ona matou faia o taua ma finauga ma o matou uso.