ບົດທີ 7
ຢາໂຄບອ່ານຈາກໜັງສືເອຊາຢາຕໍ່: ເອຊາຢາກ່າວກ່ຽວກັບພຣະເມຊີອາ—ພຣະເມຊີອາຈະມີລີ້ນຂອງນັກປາດ—ພຣະອົງຈະຫັນຫລັງໃຫ້ຜູ້ຂ້ຽນຕີ—ພຣະອົງຈະບໍ່ຍອມຈຳນົນ—ປຽບທຽບກັບ ເອຊາຢາ 50. ປະມານ 559–545 ປີ ກ່ອນ ຄ.ສ.
1 ແທ້ຈິງແລ້ວ, ເພາະພຣະຜູ້ເປັນເຈົ້າໄດ້ກ່າວດັ່ງນີ້: ເຮົາໄດ້ແຍກເຈົ້າອອກໄປ ຫລື ວ່າເຮົາໄດ້ປະຖິ້ມເຈົ້າຕະຫລອດໄປບໍ? ເພາະພຣະຜູ້ເປັນເຈົ້າໄດ້ກ່າວດັ່ງນີ້: ໜັງສືຢ່າຮ້າງຂອງແມ່ເຈົ້າຢູ່ໃສ? ເຮົາໄດ້ແຍກເຈົ້າໃຫ້ອອກໄປກັບໃຜ? ຫລື ວ່າເຮົາໄດ້ຂາຍເຈົ້າໃຫ້ເຈົ້າໜີ້ຄົນໃດຂອງເຮົາ? ແທ້ຈິງແລ້ວ, ເຮົາໄດ້ຂາຍເຈົ້າໃຫ້ຜູ້ໃດ? ຈົ່ງເບິ່ງ, ເພາະຄວາມຊົ່ວຮ້າຍຂອງເຈົ້າ, ເຈົ້າຈຶ່ງ ກຂາຍຕົວຂອງເຈົ້າເອງ, ແລະ ເພາະການລ່ວງລະເມີດຂອງເຈົ້າ ແມ່ຂອງເຈົ້າຈຶ່ງຖືກໄລ່ອອກໄປ.
2 ດັ່ງນັ້ນ, ເວລາເຮົາມາບໍ່ມີຜູ້ໃດຢູ່; ເວລາເຮົາ ກເອີ້ນ, ແທ້ຈິງແລ້ວ, ບໍ່ມີຜູ້ໃດຂານຕອບ. ໂອ້ ເຊື້ອສາຍອິດສະຣາເອນເອີຍ ມືຂອງເຮົາສັ້ນໄປຈົນວ່າບໍ່ສາມາດຈະໄຖ່ບໍ? ຫລື ວ່າເຮົາບໍ່ມີອຳນາດທີ່ຈະປົດປ່ອຍພວກເຈົ້າບໍ? ຈົ່ງເບິ່ງ, ໂດຍການຕິຕຽນຂອງເຮົາ, ເຮົາຈຶ່ງເຮັດໃຫ້ ຂນ້ຳທະເລແຫ້ງລົງ, ແລະ ເຮົາເຮັດໃຫ້ ຄແມ່ນ້ຳເປັນຖິ່ນແຫ້ງແລ້ງກັນດານ ແລະ ງປາຂອງພວກເຂົາສົ່ງກິ່ນເໝັນເພາະວ່ານ້ຳແຫ້ງ ແລະ ມັນໄດ້ຕາຍເພາະຄວາມຂາດນ້ຳ.
3 ເຮົາຫົ່ມຟ້າສະຫວັນໄວ້ດ້ວຍ ກຄວາມມືດ ແລະ ເອົາ ຂຜ້າກະສອບມາຄຸມ.
4 ອົງພຣະຜູ້ເປັນເຈົ້າໄດ້ປະທານ ກລີ້ນຂອງນັກປາດໃຫ້ເຮົາ, ເພື່ອເຮົາຈະຮູ້ຈັກວ່າຈະເວົ້າແນວໃດໃຫ້ເໝາະສົມກັບພວກທ່ານ, ໂອ້ ເຊື້ອສາຍອິດສະຣາເອນເອີຍ. ເວລາພວກທ່ານອິດເມື່ອຍ ພຣະອົງໄດ້ປຸກພວກທ່ານລຸກທຸກໆເຊົ້າ. ພຣະອົງເຮັດໃຫ້ຫູຂອງເຮົາໄວເພື່ອຈະໄດ້ຍິນດີຄືນັກປາດ.
5 ອົງພຣະຜູ້ເປັນເຈົ້າໄດ້ເປີດ ກຫູຂອງເຮົາ, ແລະ ເຮົາບໍ່ໄດ້ກະບົດ, ທັງບໍ່ໄດ້ຫັນໜ້າໜີ.
6 ເຮົາຫັນຫລັງໃຫ້ ກຜູ້ຂ້ຽນຕີ ແລະ ຫັນແກ້ມຂອງເຮົາໃຫ້ຜູ້ທີ່ດຶງຜົມ. ແລະ ເຮົາບໍ່ໄດ້ເຊື່ອງໜ້າຈາກຄວາມອັບອາຍ ແລະ ການຖົ່ມນ້ຳລາຍໃສ່.
7 ເພາະອົງພຣະຜູ້ເປັນເຈົ້າຈະຊ່ວຍເຮົາ, ສະນັ້ນເຮົາຈະບໍ່ຍອມຈຳນົນ. ດັ່ງນັ້ນ ເຮົາໄດ້ເຮັດໜ້າຂອງເຮົາຄືຫີນເຫລັກໄຟ, ແລະ ເຮົາຮູ້ວ່າເຮົາຈະບໍ່ອາຍ.
8 ແລະ ພຣະຜູ້ເປັນເຈົ້າຢູ່ໃກ້, ແລະ ພຣະອົງຮັບຮອງເຮົາ. ແມ່ນໃຜຈະຕໍ່ສູ້ກັບເຮົາ? ກໍໃຫ້ພວກເຮົາຢືນຢູ່ດ້ວຍກັນ. ແມ່ນໃຜຈະເປັນຜູ້ປໍລະປັກຂອງເຮົາ? ກໍໃຫ້ເຂົາເຂົ້າມາໃກ້ເຮົາ ແລະ ເຮົາຈະຂ້ຽນຕີເຂົາດ້ວຍພະລັງປາກຂອງເຮົາ.
9 ແລະ ອົງພຣະຜູ້ເປັນເຈົ້າຈະຊ່ວຍເຮົາ. ແລະ ຜູ້ໃດທີ່ຈະ ກກ່າວໂທດເຮົານັ້ນ, ຈົ່ງເບິ່ງເຂົາຈະເກົ່າຄືກັນກັບເສື້ອຜ້າ, ແລະ ຕົວແມງຈະກັດກິນມັນຈົນໝົດ.
10 ມີຜູ້ໃດໃນບັນດາພວກເຈົ້າທີ່ຢ້ານກົວພຣະຜູ້ເປັນເຈົ້າ, ແລະ ເຊື່ອຟັງ ກສຽງຂອງຜູ້ຮັບໃຊ້ຂອງພຣະອົງ, ທີ່ດຳເນີນໃນຄວາມມືດ ແລະ ບໍ່ມີຄວາມສະຫວ່າງ?
11 ຈົ່ງເບິ່ງ ເຈົ້າທັງຫລາຍຜູ້ກໍ່ໄຟ, ທີ່ອ້ອມຮອບຕົວເຈົ້າດ້ວຍແສງໄຟ, ໄດ້ເດີນຢູ່ໃນຄວາມສະຫວ່າງຂອງໄຟ ກຂອງເຈົ້າ ຊຶ່ງເຈົ້າໄດ້ກໍ່. ເຈົ້າຈະໄດ້ຮັບຢ່າງນີ້ຈາກມືຂອງເຮົາຄື—ເຈົ້າຈະຕ້ອງນອນລົງໃນຄວາມທໍລະມານ.