1 Ioe, ona ua faapea ona fetalai mai o le Alii: Po ua Ou tuueseina ea oe, po ua Ou lafoaiina ese ea oe e faavavau? Ona ua faapea ona fetalai mai o le Alii: O fea le tusi ’alei o le faateaga o lou tinā? O ai ua Ou tuu ese atu i ai oe, po o le tagata ua Ou aitalafu ai ua Ou faatau atu i ai oe? Ioe, o ai ea ua Ou faatau atu i ai oe? Faauta, ua outou ^afaatau atu outou lava ona o a outou amioletonu, ma ua tuu ese lo outou tinā ona o a outou solitulafono.

2 O le mea lea, ina ua Ou sau, sa leai se tagata; ina ua Ou ^avalaau atu, ioe, sa leai se tasi e tali mai. E, le aiga e o Isaraelu, pe ua faapuupuu ea lo’u lima ua lē mafai ai ona togiola, ma pe ua leai ea se mana ia te a’u e laveai ai? Faauta, o la’u a’oa’iga Ou te faapa’umātuina ai le ^esami, ma Ou faia ai o latou ⁱvaitafe o se vao ma o latou ^oi’a ia elo ona ua faamatutuina le vai, ma mamate ai i latou ona o le fia feinu.

3 Ua Ou faaofuina le lagi i le ^apogisa, ma Ou faia le ^eie talatala mo o latou ufiufi.

4 Ua tuuina mai ia te a’u e le Alii le Atua le ^alaulaufaiva o lē ua aoaoina, ina ia Ou iloa le ala e fai atu ai se upu ia te oe i le taimi e tatau ai, E, le aiga e o Isaraelu. Pe a outou vaivai e maleifua mai o ia i lea taeao i lea taeao. E fagua e ia lo’u taliga ia faalogo e pei o lē ua aoaoina.

5 O le Alii le Atua na tatalaina lo’u ^ataliga, ma sa Ou lē fouvale, pe liliu ese i tua.

6 Sa Ou tuu atu lo’u tua i ^alē e sasaina, ma o’u alafau ia i latou o e e futi ese le fulufulu. Sa Ou lē natia o’u mata mai le maasiasi ma le tuufeanu.

7 Ona o le a fesoasoani mai le Alii le Atua ia te a’u, o le mea lea o le a Ou lē maasiasi ai. O le mea lea ua Ou faia ia tumau ai o’u mata ia pei o se maa malō, ma ua Ou iloa o le a Ou lē maasiasi lava.

8 Ma ua lata mai le Alii, ma ua ia ta’umamāina a’u. O ai se e finau ma a’u? Inā tatou tutu faatasi ia. O ai ea lo’u fili? Ia tuu o ia e sau faalatalata mai ia te a’u, ma o le a Ou taia o ia i le malosi o a’u upu.

9 Ona o le a fesoasoani mai le Alii le Atua ia te a’u. Ma o i latou uma o e latou te ^atausalaina a’u, faauta, o i latou uma o le a faasolo ina pala e pei o se ofu, ma o le a ’aina i latou e mogamoga.

10 O ai ea o i totonu o outou ua mata’u i le Alii, ua usiusitai i le ^asiufofoga o lana auauna, ua savali i le pouliuli ma ua leai se malamalama?

11 Faauta outou uma o e ua faamumūina afi, outou ua outou si’o faataamilo outou lava i aloiafi, savavali i le malamalama o a ^aoutou afi ma aloiafi ua outou faamumūina. O le mea lenei o le a outou maua mai lo’u lima—o le a outou taooto ifo i le faanoanoa.