1 ’E i teienei, e tō’u mau taea’e here, ’ua tai’o vau i teie mau mea, ’ia ’ite ’outou i te mau fafaura’a a te Fatu o tāna i fafau atu i te ’utuāfare pā’āto’a o ’Īserā’ela—

2 ’O tāna ho’i i parau atu i te ’āti Iuda ra, nā roto i te vaha o tōna ra mau peropheta mo’a, mai te mātāmua mai ā, mai terā u’i i terā u’i, ē tae noa atu i te tau e fa’aho’ihia ai rātou i roto i te ’ēkālesia mau ’e i te nana a te Atua ra ; ’ia ha’aputuputuhia rātou i tō rātou ’utuāfare i te mau fenua ’āi’a nō rātou ra, ’e e ha’apārahihia rātou i tō rātou mau fenua ato’a i parauhia ra.

3 Inaha, e tō’u mau taea’e here, tē parau atu nei au i teie mau mea ia ’outou ’ia ’oa’oa ’outou, ’e ’ia fa’ateitei ’outou i tō ’outou upo’o ē a muri noa atu, nō te mau ha’amaita’ira’a tā te Fatu te Atua e nīni’i mai i ni’a iho i tā ’outou mau tamari’i.

4 ’E ’ua ’ite ho’i au ē, ’ua ’imi māite ’outou, e rave rahi o ’outou, ’ia ’ite i te mau mea e tupu a muri a’e ; nō reira ’ua ’ite au ē, ’ua ’ite ’outou ē, e pe tō tātou tino i te pohe ; noa atu rā e ’ite atu tātou i te Atua i roto i tō tātou nei mau tino.

5 ’Oia ïa, ’ua ’ite au ē, ’ua ’ite ’outou ē, e fa’a’ite mai ’oia iāna iho i roto i te tino i tō Ierusalema ra, i te vāhi nō reira mai tātou ra ; ’e e mea ti’a roa ho’i ’ia tae mai ’oia i rotopū ia rātou ra ; ’e e mea ti’a roa ho’i i Tei Hamani i te mau mea ato’a ra ’ia fa’ati’a iāna iho ’ia tu’u-ha’eha’a-hia i raro a’e i te ta’ata i te tino nei, ’e ’ia pohe ho’i nō te mau ta’ata ato’a, ’e ’ia auraro te mau ta’ata ato’a iāna.

6 ’E nō te mea ’ua tae mai te pohe i ni’a iho i te mau ta’ata ato’a, nō te fa’ati’a i te ’ōpuara’a aroha a Tei Hamani i te mau mea ato’a, ’ia tae mai ïa te mana nō te ti’afa’ahoura’a e ti’a ai, ’e ’ia tae mai ho’i te ti’afa’ahoura’a o te ta’ata nei e ti’a ai nō te hi’ara’a ; ’e ’ua tae mai te hi’ara’a nō te ’ōfatira’a i te ture ; ’e nō te hi’ara’a ho’i o te ta’ata nei i tāpū-’ē-hia ai rātou mai mua atu i te aro o te Fatu.

7 Nō reira, e mea ti’a roa ’ia vai te hō’ē tāra’ehara mure ’ore—’e ’āhiri ’aita te reira tāra’ehara mure ’ore, e ’ore roa ïa e ti’a i teie nei tino tāhuti ’ia riro ’ei tino tāhuti ’ore. Nō reira, e mea ti’a roa i te ha’avāra’a mātāmua i tae mai i ni’a i te ta’ata nei ’e ’ia vai noa ē a muri noa atu. ’E ’āhiri ē ’oia mau ra, e vai noa ïa teie tino i raro ’e ’ia pē ’e ’ia marua noa atu i roto i te repo ra, ’e e ’ore roa ïa e ti’afa’ahou mai.

8 ’Auē te pa’ari o te Atua ē, tōna aroha ’e tōna maita’i ē ! Inaha ho’i, ’āhiri ē ’aita te tino e ti’afa’ahou mai, e riro ïa tō tātou mau vārua i taua melahi ra ’o tei ma’iri mai mua mai i te aro o te Atua mure ’ore, ’e tei riro ho’i ’ei diabolo, ’e e ’ore ho’i ’oia e ti’afa’ahou mai.

9 ’E ’ua riro tō tātou vārua mai iāna te huru, ’e ’ua riro tātou ’ei mau diabolo, ’ei mau melahi nā te diabolo, ’ia tāpū-’ē-hia i te aro o tō tātou Atua, ’e ’ia pārahi i pīha’i iho i te metua o te mau ha’avare, i roto i te mamae mai tōna ra te huru ; ’oia ïa, i pīha’i iho iāna ’o tei ha’avare i tō tātou nā metua mātāmua ra, ’e tei fa’ariro iāna iho fātata mai te melahi o te māramarama ra, ’e tei fa’ati’arepu i te mau tamari’i a te ta’ata nei ’ia tomo atu i roto i te mau pupu ’ohipa huna nō te taparahi ta’ata, ’e te mau huru ’ohipa huna ato’a nō te pōiri.

10 ’Auē ho’i te rahi o te maita’i o tō tātou Atua ē, ’o tei fa’aineine i te rāve’a e ora ai tātou i te harura’a a teie teni ri’ari’a rahi ; ’oia ïa, taua teni ra, ’o te pohe ’e ’o hade, ’o tā’u i parau te pohe o te tino, ’e te pohe ato’a ho’i o te vārua.

11 ’E nō te rāve’a fa’aora a tō tātou Atua ra, a Tei Mo’a i ’Īserā’ela nei, e tu’u mai ïa teie pohe ’o tā’u i parau ra, ’oia ho’i, te pohe pae tino nei, i tōna ra feiā pohe ; e taua pohe ra, ’o te mēnema ïa.

12 E tu’u mai teie pohe ’o tā’u e parau nei, ’oia ho’i, te pohe pae vārua i tōna ra feiā pohe ; e taua pohe pae vārua ra, ’o hade ïa ; nō reira, e mea ti’a roa i te pohe ’e ia hade ’ia tu’u mai i tō rāua feiā pohe, ’e e mea ti’a roa ho’i ia hade ’ia tu’u mai i tōna ra mau vārua fa’atītīhia, ’e e mea ti’a roa ho’i i te mēnema ’ia tu’u mai i tōna ra mau tino fa’atītīhia, ’e e fa’aho’ihia ho’i te mau tino ’e te mau vārua o te ta’ata nei i te tahi ’e i te tahi ; ’e e tupu ho’i te reira nā roto i te mana ’o tē ti’afa’ahoura’a o Tei Mo’a i ’Īserā’ela nei.

13 ’Auē ho’i te rahi o te ’ōpuara’a a tō tātou Atua ! Nō te mea i te tahi pae e tu’u mai te pāradaiso o te Atua i te mau vārua o te feiā parauti’a, ’e e tu’u mai ho’i te mēnema i te tino o te feiā parauti’a ; ’e e fa’aho’ihia te vārua ’e te tino i te tahi ’e i te tahi, ’e e riro te mau ta’ata ato’a ’ei mea pohe ’ore ’e ’ei mea tāhuti ’ore, ’e e mau vārua ora rātou, ma te fāri’i i te ’ite ti’a mau mai ia tātou i te tino nei, ’e ’āhiri ē mea tāhuti ’ore tātou e riro ïa tō tātou ’ite ’ei ’ite ti’a mau.

14 Nō reira, e fāri’i tātou i te ’ite ti’a mau nō tā tātou mau ’ohipa hape ato’a, ’e tō tātou vi’ivi’i, ’e tō tātou vai-taha’a-noa-ra’a ; ’e e fāri’i te feiā parauti’a i te ’ite ti’a mau nō tō rātou ’oa’oa, ’e tō rātou parauti’a, ma te fa’a’ahuhia i te vi’ivi’i ’ore, ’oia ïa, i te ’ahu nō te parauti’a.

15 ’E a muri a’era, ’ia ti’a mai te ta’ata ato’a mai te pohe mātāmua mai i te ora, ’e ’ia riro rātou ’ei mea tāhuti ’ore, e mea ti’a ia rātou ’ia ti’a atu i mua i te ha’avāra’a a Tei Mo’a i ’Īserā’ela ; ’e i reira e tae mai ai te ha’avāra’a, ’e ’ia ha’avāhia rātou mai te au i te ha’avāra’a mo’a a te Atua e ti’a ai.

16 ’E ’oia mau, mai te Fatu e ora ra, e tupu iho ā ïa tei parauhia e te Fatu te Atua, ’e ’o tāna parau mure ’ore ho’i te reira, ’o tē ’ore roa e mou, ’oia ho’i, ’ia parauti’a ā te feiā parauti’a ra, ’e ’ia vi’ivi’i ā ho’i te feiā vi’ivi’i ra ; nō reira, ’o tei vi’ivi’i ra, ’o te diabolo ïa ’e tāna ra mau melahi ; ’e e haere atu rātou i roto i te auahi mure ’ore i fa’aineinehia nō rātou ; ’e tō rātou māuiui mai tō te roto auahi ïa ’e te gopheri, ’o tē pe’e noa atu tōna ura i ni’a ē a muri ē a muri noa atu, ’e ’aita roa e hope’a.

17 ’Auē ho’i te mana rahi ’e te parauti’a o tō tātou Atua ē ! E fa’atupu ho’i ’oia i tāna mau parau ato’a, ’e ’ua haere atu te reira mai roto mai i tōna vaha, ’e ’ia fa’atupuhia tāna ture e ti’a ai.

18 Inaha rā, te feiā parauti’a, ’o te feiā mo’a a Tei Mo’a i ’Īserā’ela nei, ’o tei ti’aturi i Tei Mo’a i ’Īserā’ela nei, ’o tei fa’a’oroma’i i te mau hāmani-’ino-ra’a a te ao nei, ’e tei ’ore ho’i i ha’apa’o i te fa’aha’amāra’a a te reira, e fāri’i ïa rātou i te bāsileia o te Atua, ’o tei fa’aineinehia nō rātou mai te ha’amatara’a mai ā o te ao nei, ’e e ’ī ho’i rātou i te ’oa’oa ē a muri noa atu.

19 ’Auē ho’i te rahi o te aroha o tō tātou Atua ē, Tei Mo’a i ’Īserā’ela nei ! E fa’aora ho’i ’oia i tōna ra feiā mo’a i taua teni ri’ari’a rahi ra, ’oia ho’i te diabolo, ’e te pohe, ’e ’o hade, ’e i taua roto auahi ’e te gopheri ra, ’oia ho’i te māuiui hope ’ore ra.

20 ’Auē ho’i te rahi o te mo’ara’a o tō tātou Atua ē ! ’Ua ’ite ho’i ’oia i te mau mea ato’a, ’e ’aore roa te hō’ē mea tei ’ore i ’itea iāna.

21 E tae mai ’oia i te ao nei ’ia ti’a iāna ’ia fa’aora i te mau ta’ata ato’a, mai te mea e ha’apa’o rātou i tōna ra reo ; inaha ho’i, ’ua fa’a’oroma’i ’oia i te mau māuiui o te mau ta’ata ato’a, ’oia ïa, te mau māuiui o te mau ta’ata ato’a, te mau tāne, te mau vahine, ’e te mau tamari’i ato’a ho’i, i roto i te ’utuāfare o Adamu ra.

22 ’Ua fa’a’oroma’i ’oia i te reira ’ia tae mai te ti’afa’ahoura’a i ni’a i te mau ta’ata ato’a, ’ia ti’a ia rātou ato’a ’ia ti’a atu i mua iāna i te mahana rahi nō te ha’avāra’a.

23 ’E ’ua fa’aue mai ho’i ’oia ’ia tātarahapa te mau ta’ata ato’a e ti’a ai, ’e ’ia bāpetizohia i roto i tōna ra i’oa, ma te fa’aro’o pāpū i Tei Mo’a i ’Īserā’ela nei, ’e ’ia ’ore rātou ’ia nā reira, e ’ore roa rātou e fa’aorahia i roto i te bāsileia o te Atua.

24 ’E ’ia ’ore rātou e tātarahapa ’e ’ia ti’aturi i tōna ra i’oa, ’e ’ia bāpetizohia i tōna ra i’oa, ’e ’ia fa’aitoito noa ē tae noa atu i te hope’a ra, e fa’ahapahia ïa rātou ; tē nā reira mai ra ho’i te Fatu te Atua, ’o Tei Mo’a i ’Īserā’ela nei.

25 Nō reira, ’ua hōro’a mai ’oia i te ture ; ’e mai te mea ’aita e ture, ’aita ato’a ïa e utu’a ; ’e mai te mea ’aita e utu’a, ’aita ato’a ïa e fa’ahapara’a ; ’e mai te mea ’aita e fa’ahapara’a, e tae mai ïa te aroha rahi o Tei Mo’a i ’Īserā’ela nei i ni’a ia rātou, nā roto i te tāra’ehara ; ’ua fa’aorahia ho’i rātou e tōna ra mana.

26 ’Ua fa’a’ore ho’i te tāra’ehara i te utu’a o tāna ra parauti’a i ni’a i te mau ta’ata ato’a ’o tei ore i ’ite i te ture, ’ia fa’aorahia rātou i taua teni rahi ri’ari’a ra, ’oia ho’i te pohe ’e ’o hade, ’e te diabolo, ’e te roto auahi ’e te gopheri ra ; ’oia ho’i te māuiui hope ’ore ; ’e e fa’aho’ihia rātou i te Atua ’o tei hōro’a mai i te aho nō rātou ra, i Tei Mo’a i ’Īserā’ela nei.

27 ’Auē ho’i ’oia ’o tei ’ite i te ture, ’oia ïa, ’o tei fāri’i i te mau fa’auera’a ato’a a te Atua, mai ia tātou nei, ’e ’ua ’ōfati i te reira, ’e ’ua ha’amāu’a i te mau mahana nō tōna orara’a i te tino nei, e ti’ara’a ri’ari’a ho’i ïa tōna !

28 ’Auē ho’i te ’ōpuara’a ha’avare a te diabolo ra ē ! ’Auē ho’i te te’ote’o, ’e te mau vāhi paruparu, ’e te ma’ama’a o te ta’ata nei ē ! ’ia māramarama rātou, ’ua mana’o rātou ē, e feiā ’aravihi rātou, ’e ’aita rātou e ha’apa’o i te a’o a te Atua, nō te mea ’ua vaiiho rātou i te reira, i te mana’ora’a e ’ite rātou nā roto ia rātou iho, ’e nō reira, e mea ma’ama’a tō rātou pa’ari ’e ’aore ho’i a rātou e faufa’a i te reira. ’E e pohe ho’i rātou.

29 ’Āre’a rā e mea maita’i te ’ite mai te mea e ha’apa’o rātou i te a’o a te Atua.

30 ’Auē ho’i te feiā tao’a ē, te feiā tao’a i te mau mea nō teie nei ao. Nō tā rātou ho’i tao’a i vahavaha ai rātou i te feiā veve ra, ’e ’ua hāmani ’ino rātou i te feiā ha’eha’a, ’e tē vai noa nei ā tō rātou ’ā’au i ni’a i tā rātou mau tao’a rahi ; nō reira i riro ai tā rātou tao’a rahi ’ei atua nō rātou. ’E inaha, e mou tā rātou tao’a ’e rātou ato’a ho’i.

31 ’Auē ho’i te tari’a turi ’o tē ’ore e fa’aro’o ; e pohe ho’i rātou.

32 ’Auē ho’i te matapō ’o tē ’ore e ’ite ; e pohe ho’i rātou.

33 ’Auē ho’i te feiā parauti’a ’ore i te ’ā’au ē ; nā te ’ite i tā rātou iho mau ’ohipa ’ī’ino e tā’iri ia rātou i te mahana hope’a ra.

34 ’Auē ho’i te ta’ata ha’avare ē ; e hurihia ho’i ’oia i raro i hade ra.

35 ’Auē ho’i te taparahi ta’ata ē, ’o tei ’ōpua i te taparahi i te ta’ata nei, e pohe ho’i ’oia.

36 ’Auē ho’i te feiā tai’ata ē, e hurihia ho’i rātou i raro i hade ra.

37 ’Oia ïa, ’auē ho’i te feiā ha’amori ’īdolo ē, e ’oa’oa te diabolo o te mau diabolo ato’a ia rātou ra.

38 ’Oia mau, ’auē ho’i te feiā ato’a e pohe i roto i tā rātou mau hara e ; e ho’i atu rātou i te Atua, ’e e hi’o ho’i i tōna ra mata, ’e e vai noa i roto i tā rātou ra mau hara.

39 ’E tō’u mau taea’e here, ’a ha’amana’o ’outou i te ri’ari’a rahi ’ia ’ōfati i te ture a te Atua Mo’a, ’e te ri’ari’a rahi ho’i i te pe’era’a atu i te mau fa’ahemara’a a taua ta’ata ha’avare ra. ’A ha’amana’o, ’o te ha’apa’o tāmau i te mau mea o te tino nei, ’o te pohe ïa ; ’e ’o te ha’apa’o tāmau i te mau mea pae vārua ra, ’o te ora mure ’ore ïa.

40 E tō’u mau taea’e here, ’a fa’aro’o mai na i tā’u nei mau parau. ’A ha’amana’o na i te mana rahi o Tei Mo’a i ’Īserā’ela nei. ’Eiaha e parau ē, ’ua parau atu vau i te mau mea teiaha nō ni’a ia ’outou na ; nō te mea, ’ia nā reira ’outou, tē fa’a’ino ra ïa ’outou i te parau mau ; ’ua parau ho’i au i te parau a Tei Hamani ia ’outou na. ’Ua ’ite ho’i au ē ’ua fa’ahapa ’ū’ana te parau mau i te mau mea vi’ivi’i ato’a ra ; ’aita rā te feiā parauti’a e mata’u i te reira, nō te mea ’ua hina’aro rātou i te parau mau ’e ’aore rātou e ’āueue.

41 ’E i teienei, e tō’u mau taea’e here, ’a haere mai i te Fatu, i Tei Mo’a. ’A ha’amana’o e mea tītī’aifaro tōna mau haere’a. Inaha, e mea oaoa te ’ē’a o te ta’ata nei, ’e tei mua ti’a te reira iāna iho, ’e ’ua tītī’aifaro ho’i, ’e te tīa’i ’ūputa ra, ’o Tei Mo’a ïa i ’Īserā’ela nei ; e ’aore ho’i ’oia i tārahu mai i te tāvini i reira ; e ’aore ho’i e ’ē’a ’ē atu maori rā nā taua ’ūputa ra ; e ’ore roa ho’i ’oia e vare i te ha’avare, nō te mea, ’o te Fatu te Atua tōna i’oa.

42 ’E ’o tē pātōtō ra, e ’īritihia ïa iāna ; ’e te feiā ’aravihi, ’e te feiā ’ite, ’e tei tao’ahia ra, ’e ’o tei te’ote’o nō tō rātou ’ite, ’e tō rātou ’aravihi, ’e tā rātou mau tao’a—’oia ïa, ’o rātou ïa tāna e vahavaha atu ; ’e ’ia ’ore rātou e fa’aru’e i te te’ote’o i roto i teie mau mea, ’e ’ia fa’ariro ia rātou iho ’ei feiā ma’ama’a i mua i te Atua, ’e ’ia fa’aha’eha’a roa ho’i ia rātou iho, e ’ore roa ïa ’oia e ’īriti mai nō rātou.

43 E hunahia te mau mea o te feiā ’aravihi ’e te feiā ha’apa’o ia rātou ē a muri noa atu—’oia ïa, te ’oao’a i fa’aineinehia nō te feiā mo’a ra.

44 E tō’u mau taea’e here, ’a ha’amana’o i tā’u nei mau parau. Inaha, tē ’īriti nei au i tō’u nei mau ’ahu, ’e te ueue nei au i te reira i mua ia ’outou na ; ’e tē ti’aoro nei au i te Atua nō tō’u nei fa’aorara’a ’ia hi’o mai ’oia iā’u i tōna mata ha’avā ; nō reira, i te mahana hope’a ra, ’ia ha’avāhia te mau ta’ata ato’a i tā rātou ihora mau ’ohipa, e ’ite mai ’outou ē, ’ua ’ite mai te Atua nō ’Īserā’ela ē, ’ua ueue au i tā ’outou mau ’ohipa ’ī’ino i tō’u nei vārua, ’e te ti’a nei au i mua iāna ma te anaana, ’e ’ua mā ho’i au i tō ’outou toto.

45 E tō’u mau taea’e here, ’a fāriu ’ē atu i tā ’outou mau hara ; ’a ueue atu na i te mau fifi nōna ’o tei hina’aro ’ia tāpe’a tāmau ia ’outou ; ’a haere mai na i te Atua, ’oia te papa o tō ’outou fa’aorara’a.

46 ’A fa’aineine i tō ’outou vārua nō taua mahana hanahana ra, e tu’uhia mai ai te parauti’a i te feiā parauti’a ra, ’oia ho’i, te mahana ha’avāra’a ra, ’ia ’ore ’outou ’ia rurutaina ma te mata’u rahi ra ; ’ia ’ore ho’i ’outou ’ia ha’amana’o ma te pāpū rahi i tā ’outou mau hara ri’ari’a ; ’ia ’ore ’outou ’ia parau i te nā-’ō-ra’a ē : ’Ua mo’a, ’ua mo’a, tā ’oe ra mau ha’avāra’a, e te Fatu te Atua Manahope—’ua ’ite rā vau i tā’u nei hapa ; ’ua ’ōfati ho’i au i tā ’oe ra ture ; ’e nā’u iho nei tā’u mau hapa ra ; ’e ’ua riro vau i te diabolo, ’e ’ua riro ho’i au ’ei tao’a pau nō tōna mamae rahi.

47 Inaha rā, e tō’u mau taea’e, e mea ti’a ānei ’ia fa’aara atu vau ia ’outou ’ia ’ite i te reira mau mea ri’ari’a ra ? E fa’aahoaho ānei au i tō ’outou vārua mai te mea ē, ’ua mā tō ’outou ’ā’au ? E parau pāpū ānei au ia ’outou ’ia au i te parau pāpū nō te parau mau ’āhiri ē ’aita tā ’outou e hara ?

48 Inaha, ’āhiri e mea mo’a ’outou e parau atu ïa vau ia ’outou i te mau mea mo’a ; ’e nō te mea ho’i e ’ere ’outou i te mea mo’a, ’e ’ua fa’ariro ’outou iā’u ’ei ’orometua, e mea ti’a roa ïa iā’u ’ia ha’api’i atu ia ’outou i te mau utu’a nō te hara.

49 Inaha, e mea au ’ore te hara i tō’u nei vārua, ’e ’ua ’oa’oa ho’i tō’u ’ā’au i te parauti’a ra ; ’e e ’ārue au i te i’oa mo’a o tō’u ra Atua.

50 ’A haere mai na, e tō’u mau taea’e, ’outou ato’a tei po’ihā, ’a haere mai i te mau pape nei ; ’e te ta’ata moni ’ore ato’a, ’a haere mai na e ho’o ’e e ’amu ; ’oia ïa, ’a haere mai na e ho’o i te uaina ’e te ū ma te moni ’ore ’e te tārahu ’ore.

51 Nō reira, ’eiaha e ha’amāu’a i te moni nō te mea faufa’a ’ore, e tā ’outou ’ohipa nō te mea e ’ore e ha’amāuruuru ia ’outou ra. ’A fa’aro’o māite mai na ’outou iā’u, ’e ’a ha’amana’o ho’i i te mau parau tā’u i parau atu ; ’e ’a haere mai i Tei Mo’a i ’Īserā’ela nei, ’e ’a rave i te fa’a’amu’a i te mea e ’ore e pau, ’e e ’ore ho’i e ’ino, ’e ’ia ’oa’oa tō ’outou vārua i te maita’i ra.

52 Inaha, e tō’u mau taea’e here, ’a ha’amana’o i te mau parau a tō ’outou Atua ; ’a pure tāmau atu iāna i te ao, ’e ’a ha’amaita’i atu i tōna ra i’oa mo’a i te ru’i. ’Ia ’oa’oa tō ’outou ’ā’au.

53 ’E inaha, ’auē ho’i te rahi o te mau fafaura’a a te Fatu ra ē, e ’auē ho’i te rahi o tōna mau aroha rahi i te mau tamari’i a te ta’ata nei ē ; ’e nō tōna mana rahi, ’e tōna maita’i ’e te aroha, ’ua fafau mai ’oia ē, ’aita tō tātou hua’ai e ha’amou-roa-hia i te tino nei ; e fa’aora rā ’oia ia rātou ; ’e i te mau u’i i mua nei e riro mai rātou ’ei ’āma’a parauti’a i roto i te ’utuāfare o ’Īserā’ela.

54 ’E i teienei, e tō’u mau taea’e, ’ua hina’aro vau ’ia parau atu ā ia ’outou i teie nei ; ananahi rā e fa’a’ite atu vau ia ’outou i te toe’a o tā’u ra mau parau. ’Āmene.