1 Ket ita, ay-ayatek a kakabsatko a lallaki, binasak dagitoy a banag tapno ^amaammuanyo dagiti katulagan ti Apo nga intulagna kadagiti amin a balay ti Israel—

2 A nakisao isuna kadagiti Hudio, babaen kadagiti nasantuan a propetana, uray pay idi punganay, manipud iti nagsasaruno a henerasion, agingga a dumteng ti panawen a ^amaisublidanto iti pudno a simbaan ken pangen ti Dios; inton ^bmaummongdanto kadagiti pagtaenganda kadagiti daga a tinawidda, ken maibangondanto iti amin a ^cdaga a naikari kadakuada.

3 Kitaen, ay-ayatek a kakabsatko, Isaok kadakayo dagitoy a bambanag tapno agrag-okayo, ket ^ayangadyo ti uloyo iti agnanayon, gapu kadagiti itedto kadakayo a bendision ti Apo a Dios kadagiti annakyo.

4 Ta ammok nga inggaedyo ti panagsapulyo, adu kadakayo, a maammuan dagiti bambanag a mapasamak; gapuna ammok nga ammoyo a nasken nga agrakaya ken matay ti lasagtayo; nupay kasta, iti ^abagbagitayo makitatayonto ti Dios.

5 Wen, ammok nga ammoyo nga ipakitananto ti bagina kadagiti adda iti Jerusalem, a naggapuantayo; ta nasken a mapasamak daytoy kadakuada; ta nasken nga ipalubos ti naindaklan a ^aNamarsua nga agbalin a sakup ti nainlasagan a bagi ti tao, ken matay para iti ^bamin a tao, tapno agbalin a sakupna ti nainlasagan a bagi ti tao.

6 Ta kas mapasamak a matay amin a tao, tapno matungpal ti manangngaasi a ^aplano ti maindaklan a Namarsua, nasken nga adda bileg ti ^bpanagungar, ken nasken a mapasamak iti tao ti panagungar gapu iti ^cpannakatnag; ta immay ti pannakatnag gapu iti panaglabsing; ket gapu ta nagbalin a natnag ti tao ^dnailaksidda manipud iti imatang ti Apo.

7 Gapuna, nasken nga ^aagnanayon ti ^bpannakasubbot—malaksid no agnanayonto ti pannakasubbot awanto ti bileg daytoy a panagrupsa a makawesan iti saan a panagrupsa. Gapuna, ti ^cimmuna a panangukom nga immay iti tao nasken nga ^dagtaginayon koma nga awan ti patinggana. Ket no kasta, sigurado a malungsot daytoy a nainlasagan a bagi ken agrupsa iti daga, tapno saanen a bumangon.

8 O ti ^akinasirib ti Dios, ti ^basi ken ^cparaburna! Ta kitaen, no saanen a bumangon ti ^dnainlasagan a bagi nasken nga maiturayan dagiti espiritutayo iti dayta nga anghel a ^enatnag manipud iti sidong ti Agnanayon a Dios, ket nagbalin a ^fsairo, tapno saanen a bumangon.

9 Ket nasken nga agbalin dagiti espiritutayo a kas kenkuana, ket agbalintayo a sairo, ^adagiti anghel ti sairo, a ^bmailaksid manipud iti immatang ti Diostayo, ket makipagnaed iti ama ti ^ckinaulbod, iti panagrigat, a kas kenkuana; wen, iti dayta parsua a ^dnangallilaw kadagiti immuna a nagannaktayo, a ^emabalbaliwanna ti bagina a kas ^fanghel ti silaw, ket kiburenna ti sangkataw-an babaen ^gkadagiti panagkukunsaba ti pammapatay ken amin a kita ti nalimed nga aramid ti kinasipnget.

10 O, anian ti kinaindaklan ti kinaimbag ti Diostayo, a nangisagana iti wagas para iti panaglibastayo manipud iti gemgem iti daytoy nakabutbuteng nga ulimaw; wen, dayta nga ulimaw, ^aipapatay ken ^bimpierno, nga awagak a pannakatay iti bagi, ken kasta met iti pannakatay t ti espiritu.

11 Ket gapu iti wagas ti ^apanangsubbot ti Diostayo, ti Nasantuan ti Israel, yawatto daytoy nga ^bipapatay, a nasaok, a naindagaan, dagiti minatayna; a ti ipapatay isu ti tanem.

12 Ket yawatnanto daytoy nasaok a ^apatay, daytoy naespirituan nga patay, dagiti minatayna; daytoy naespirituan nga patay ti ^bimpierno; gapuna, nasken a yawat ti patay ken impierno dagiti minatayda, ket nasken a yawat ti impierno dagiti espiritu nga adipenna, ket nasken a yawat ti tanem dagiti bagi nga adipenna, ket dagiti bagi ken dagiti ^cespiritu ti tattao ket ^dmaisublinto iti tunggal maysa; ket babaen daytoy iti pannakabalin ti panagungar ti Nasantuan ti Israel.

13 O, anian a kinaindaklan ti ^aplano ti Diostayo! Ta iti sabali a bangir, nasken a yawatna ti ^bparaiso ti Dios dagiti espiritu ti nalinteg, ken yawatna ti tanem dagiti bagi a nalinteg; ket ^cmaisubli manen ti espiritu ken ti bagi ti tunggal maysa, ket agbalin amin a tao a saan nga agrupsa, ken ^dsaan a matay, ket sibibiagda a kararua, nga addaan iti ^enaan-anay a ^fpannakaammo a kas kadatayo iti nainlasagan a bagi, malaksid laeng ta naan-anayto ti pannakaammotayo.

14 Gapuna, maaddaantayonto iti naan-anay a ^apannakaammo kadagiti amin a ^bnagbasolantayo, ken dagiti kinarugittayo, ken ti ^ckinalamolamotayo; ket maaddaanto dagiti nalinteg iti naan-anay a pannakaammo iti panagrag-oda, ket ti ^dkinalintegda, a ^enakawesan iti ^fkinadalus, wen, uray pay iti ^gkawes ti kinalinteg.

15 Ket mapasamakto nga inton makalasaten amin a tao manipud iti daytoy umuna a pannakatay nga agturong iti biag, agsipud ta nagbalinda nga imortal, nasken nga agparangda iti sango ti ^atugaw a pangukoman ti Nasantuan ti Israel; ket kalpasanna dumtengto ti ^bpanangukom, ket kalpasanna nasken a maukomda a mayannurot iti nasantuan a panangukom ti Dios.

16 Ket naipatalged, iti panagbiag ti Apo, a kas sibibiag ti Apo, ta insao ti Apo a Dios daytoy, ken isu ti agnanayon a ^asaona, a saan a ^bmapukaw, ta dagiti nalinteg nalintegdanto latta, ken dagiti ^cnarugit ket ^dnarugitdanto latta; gapuna, dagiti narugit isuda ti ^esairo ken dagiti anghelna, ket maitapuakda iti ^fagnanayon nga apuy; a naisagana para kadakuada; ket kas ^gdan-aw ti apuy ken asupre ti pannakatutuokda, a ti gil-ayabna agpangato nga agnanayon ken awan patinggana.

17 O ti kinaindaklan ken ^akinalinteg ti Diostayo! Agsipud ta aramidenna amin a balikasna, a nagtaud iti ngiwatna, ket nasken a matungpal ti paglinteganna.

18 Ngem, kitaen, dagiti nalinteg, ^adagiti santo ti Nasantuan ti Israel, isuda a namati iti Nasantuan ti Israel, isuda a nakaibtur ^bkadagiti krus iti lubong, ken nangumsi iti pannakaibabain daytoy, ^ctawidendanto ti ^dpagarian ti Dios, a naisagana para kadakuada ^emanipud iti pannakaparsua ti lubong, ken naan-anayto ti rag-oda iti ^fagnanayon.

19 O ti kinaindaklan nga asi ti Diostayo, ti Nasantuan ti Israel! Agsipud ta ^ainsalakanna dagiti santona manipud iti ^bnakabutbuteng nga olimaw a sairo, ken ipapatay, ken ^cimpierno, ken ti dan-aw ti apuy ken asupre, nga isu ti awan patinggana a panagtutuok.

20 O anian a kinaindaklan ti ^akinasanto ti Diostayo! Ta ^bammona amin a banag, ket awan ti uray ania a banag a saanna nga ammo.

21 Ket umayto isuna ditoy lubong tapno ^aisalakanna ti amin a tao no dumngegda iti timekna; ta kitaen, ibturanna dagiti rigat ti amin a tao, wen, ^bdagiti ut-ot ti amin a sibibiag a naparsua, agpapada a lallaki, babbai, ken ubbing, a kameng ti pamilia ni ^cAdan.

22 Ket ibturanna daytoy tapno mapasamak ti panagungar iti amin a tattao, tapno agtakder ti amin iti sangona iti naindaklan nga aldaw ti panangukom.

23 Ket imbilinna kadagiti amin a tao a nasken nga ^aagbabawida, ken ^bmabuniaganda iti naganna, nga addaan naan-anay a pammati iti Nasantuan ti Israel, wenno saanda a maisalakan iti pagarian ti Dios.

24 Ket no saanda nga agbabawi ken mamati iti ^anaganna, ken mabuniagan iti naganna, ken ^bagibtur agingga iti panungpalan, nasken a ^cmadusada; agsipud ta kinuna ti Apo a Dios, ti Nasantuan ti Israel.

25 Gapuna, nangted isuna iti ^apaglintegan; ket no ^bawan ti naited a paglintegan awan ti pannusa; ket no awan ti pannusa awan ti panangeddeng; ket no awan ti panangeddeng dagiti asi ti Nasantuan ti Israel ti mangtunton kadakuada, gapu iti pannakasubbot, agsipud ta naisalakanda babaen ti bilegna.

26 Ta tungpalen ti ^apannakasubbot ti kasapulan ti ^bhustisiana kadagiti amin ^cnga awan ti naited a ^dlinteg, ta naisalakanda manipud iti dayta nakabutbuteng nga olimaw, a patay ken impierno, ken iti sairo, ken iti dan-aw ti apuy ken asupre, nga isu ti awan patinggana a panagtutuok; ket naisublida iti Dios a nangted iti ^eangesda, nga isu ti Nasantuan ti Israel.

27 Ngem ay-ay pay ti tao a ti ^alinteg ket nakaitedan, wen, nga addaan amin dagiti bilin ti Dios, a kas kadatayo, ket sumukir kadagitoy, ken sayangenna dagiti aldaw ti pannakapadasna, ta nakaay-ay-ay ti kasasaadna!

28 O dayta a nasikap a ^aplano ti sairo! O ti ^bkinapasindayag, ken kinarukop, ken kinamaag ti tao! Ipagarupda a no ^caddaan adalda ket ^dmasiribda, ket saanda a dumngeg iti ^epammagbaga ti Dios, gapu ta dida ikankano, agsipud ta panunotenda nga ammoda babaen iti bukodda, gapuna, kinamaag ti kinasiribda ket saanda a magunggonaan iti daytoy. Ket maungawdanto.

29 Ngem nasayaat ti maaddaan iti adal no ^adumngegda kadagiti ^bpammagbaga ti Dios.

30 Ngem ay-ay pay dagiti ^abaknang, a nabaknang kadagiti bambanag iti lubong. Ta agsipud ta baknangda ket lalaisenda ti ^bmarigrigat, ken idadanesda ti napakumbaba, ket adda kadagiti gamengda ti puspusoda; gapuna, ti gamengda ti diosda. Ket kitaen, madadaeldanto met a kas ti gamengda.

31 Ken ay-ay pay dagiti tuleng a saan a ^adumngeg; agsipud ta maungawdanto.

32 Ay-ay pay dagiti bulsek a saan a makakita; gapu ta maungawdanto met.

33 Ay-ay pay dagiti nasukir ti panagpuspusona, gapu ta tinto pannakaammoda iti kinamanagbasolda ti mangdadael kadakuada iti maudi nga aldaw.

34 Ay-ay pay ti ^aulbod, agsipud ta maitappuakdanto iti ^bimpierno.

35 Ay-ay pay ti mammapatay nga irantana ti ^apumatay, agsipud ta ^bmatayto.

36 Ay-ay pay dagiti agaramid ti ^akinabalangkantis, agsipud ta maitapuakdanto iti impierno.

37 Wen, ay-ay pay dagiti ^aagdaydayaw kadagiti didiosen, gapu ta ti sairo iti amin a sairo agragsak gapu kadakuada.

38 Ket, kas pakagupgopan, ay-ay pay dagiti amin a matay a sibabasol; agsipud ta ^aagsublidanto iti Dios, ket makitadanto ti rupana, ket agtalinaeddanto kadagiti basbasolda.

39 O, patpatgek a kakabsatko, laglagipenyo ti kinaalingget ti panaglabsing a maibusor iti dayta Nasantuan a Dios, ket kasta met ti kinaalingget ti agpabus-oy kadagiti awis iti dayta maysa a ^anasikap. Laglagipenyo, a ti ^bnailubongan a pampanunot ket ^cipapatay, ken ti naespirituan a pampanunot ket ^dbiag nga ^eagnanayon.

40 O, patpatgek a kakabsatko, denggenyo dagiti balikasko. Laglagipenyo ti kinaindaklan ti Nasantuan ti Israel. Saanyo a kunaen a nagsaoak iti nadagsen a bambanag a maibusor kadakayo; agsipud ta no aramidenyo, lalaisenyonto ti ^akinapudno; gapu ta nasaok dagiti balikas ti Namarsua kadakayo. Ammok a ^bnadagsen dagiti sasao ti kinapudno kadagiti amin a narugit; ngem saan nga agdanag dagiti nalinteg kadagitoy, gapu ta ay-ayatenda ti kinapudno ket saanda a mariribukan.

41 O ngarud, patpatgek a kakabsatko, ^aumaykayo iti Apo, ti Nasantuan. Laglagipenyo a nalinteg ti dalanna. Kitaen, ti ^bdalan para iti tao ket ^cakikid, ngem deretso nga agturong daytoy iti imatangna, ket ti agbantay iti ^druangan isu ti Nasantuan ti Israel; ket awan ti tinangdananna a katulongan sadiay, ket awan ti sabali a dalan malaksid ti ruangan; agsipud ta saan a maallilaw isuna, gapu ta Apo a Dios ti naganna.

42 Ket ilukatannanto ti siasino man nga agtuktok kenkuana; ket dagiti ^amasirib, ken dagiti nangato ti adal, ken dagiti nabaknang, a ^bmanagpannakkel gapu iti adalda, ken kinasiribda, ken kinabaknangda—wen, isuda dagiti baybay-anna; ket malaksid no iwaksida dagitoy a bambanag, ket ibilangda dagiti bagida a ^cmaag iti sango ti Dios, ket agtamedda a ^dsipapakumbaba, saannanto a ilukatan ida.

43 Ngem ti adda kadagiti masirib ken manakem ^amailimedto kadakuada iti agnanayon—wen, dayta kinaragsak a naisagana para kadagiti santo.

44 O, patpatgek a kakabsatko, laglagipenyo dagiti balikasko. Kitaen, uksobek dagiti kawesko, ket iwagwagko ida iti sangoyo; ikararagko iti Dios ti pannakaisalakanko ta kitaennak babaen iti ^anasiput a matana; gapuna, maammuanyonto iti maudi nga aldaw, inton maukomto amin a tao kadagiti aramidda, a sinaksian ti Dios ti Israel ti ^bpanangiwagsakko kadagiti basolyo manipud iti kaunggak, ket agtakderak a silalawag iti sangona, ket ^cnailisiak iti darayo.

45 O, ay-ayatek a kakabsatko, tallikudanyo dagiti basolyo; iwaksiyo dagiti ^akawar a nangpungo kadakayo; umasidegkayo iti Dios a ^bpundasion ti pannakaisalakanyo.

46 Isaganayo dagiti kararuayo iti dayta nadayag nga aldaw a pannakaipaay ti ^alinteg kadagiti nalinteg, uray pay iti aldaw ti ^bpanangukom, tapno saankayo nga agarigenggen iti nakaal-aliingget a panagbuteng; tapno saanyo a malagip dagiti nakaay-ay-ay a ^cpanagbasol iti kinaan-anay, ket mapilitkayo nga agkuna: Nasantuan, nasantuan dagiti panangukomyo, O Apo Dios a ^dMannakabalin-amin—ngem ammok ti nagbasolak; linabsingko ti lintegmo, ket bukodko dagiti labsingko; ket inikutannak ti sairo, ta biktimaak ti nakaal-alingget a kinaleddaangna.

47 Ngem kitaen, kakabsatko, masapul kadi a riingenkayo ti nakaal-alingget a kinapudno dagitoy a banag? Riribukek kadi ti kaungganyo no natarnaw ti kapanunotanyo? Agbalinak kadi a napudno kadakayo a mayannurot iti kinalawag ti kinapudno no nawayawayaankayo iti basol?

48 Kitaen, no nasantuankayo isaok kadakayo ti maipanggep iti kinasanto; ngem gapu ta saankayo a nasantuan, ken bigbigendak a kas mannursuro, nasken unay nga ^aisurok kadakayo dagiti bunga ti ^bbasol.

49 Kitaen, kagura ti kaunggak ti basol, ket pagragsakan ti pusok ti kinalinteg; ket ^adayawekto ti nasantuan a nagan ti Diosko.

50 Umaykayo, kakabsatko, tunggal maysa a mawaw, umaykayo iti ^adandanum; ken ti asino man nga awanan iti kuarta, umaykayo gumatang ken mangan; wen, umaykayo gumatang iti arak ken gatas nga awanan ^bkuarta ken awanan gatad.

51 Gapuna, saankayo nga agbusbos iti kuarta iti awan pategna, wenno ti ^abannogyo para iti saan makapennek. Dumngegkayo a sireregta kaniak, ket laglagipenyo dagiti naibalikasko; ket umasidegkayo iti Nasantuan ti Israel, ket ^bagbussogkayo kadagiti saan a maungaw, wenno marupsa, ket paragsakenyo dagiti kararuayo iti kinaadu iti kaimasan a makan.

52 Kitaen, patpatgek a kakabsatko, laglagipenyo dagiti balikas ti Diosyo; agkararagkayo kenkuana iti inaldaw, ket ^aagyamankayo iti nasantuan a naganna iti rabii. Pagraksakenyo dagiti pusoyo.

53 Ket kitaen, anian a kinaindaklan dagiti ^akatulagan ti Apo, ken anian a kinaindaklan ti pannakipulapolna kadagiti sangkataw-an; ket gapu iti kinaimbagna, ken parabur ken ^basina, inkarina kadatayo a saan a madadael amin dagiti kaputotantayo, a mayannurot ti lasag, ngem taginayonennanto ida; ket agbalindanto a nalinteg a ^csanga iti balay ti Israel kadagiti sumaruno a henerasion.

54 Ket ita, kakabsatko, adu pay ti kayatko nga ibaga kadakayo; ngem ipalawagkonto kadakayo iti masakbayan ti nabati kadagiti balikasko. Amen.