წმინდა წერილი
3 ნეფი 11


იესო ქრისტე გამოეცხადა ნეფის ხალხს, როდესაც მიწა ბარაქიანზე მრავალნი შეიკრიბნენ და მათ ემსახურა; ასე რომ, იგი მათ გამოეცხადათ.

იწყება მე-11 თავით.

თავი 11

მამა მოწმობს თავის საყვარელ ძეზე. ქრისტე განცხადდება და გამოაცხადებს თავისი გამოსყიდვის შესახებ. ხალხი ეხება მის ჭრილობებს ხელებზე, ტერფებსა და ნეკნებზე. ისინი შეჰღაღადებენ „ოსანა“. იგი განმარტავს ნათლობის ადათ-წესს. განხეთქილების სული ეშმაკისეულია. ქრისტეს მოძღვრება მდგომარეობს იმაში, რომ ადამიანმა უნდა იწამოს, მოინათლოს და მიიღოს სულიწმინდა. დაახლოებით 34 წ. ჩვენი წელთაღრიცხვით.

1 და ახლა, იყო ასე, რომ ნეფის ხალხთაგან იქ მრავალნი ერთად შეიკრიბნენ ტაძრის გარშემო, რომელიც იყო მიწა ბარაქიანზე; და ისინი გაოცებულნი და გაკვირვებულნი უჩვენებდნენ ერთმანეთს იმ დიდ და საოცარ ცვლილებას, რომელიც მოხდა.

2 და ასევე საუბრობდნენ იესო ქრისტეზე, რომლის სიკვდილის შესახებაც ნიშანი იქნა მოცემული.

3 და იყო ასე, რომ იმ დროს, როდესაც ამგვარად ერთმანეთში საუბრობდნენ, მოესმათ ხმა, თითქოს ზეციდან წამოსული; და მათ გარშემო მიმოიხედეს, რადგან ვერ ჩასწვდნენ ხმას, რომელიც მოესმათ; და ის ხმა არ იყო უხეში, არც ხმამაღალი ხმა არ იყო; მაგრამ, მიუხედავად იმისა, რომ ეს იყო დაბალი ხმა, იგი მათ სიღრმეში ჩასწვდა ისე, რომ არ დარჩა მათი სხეულის არცერთი ნაწილი, რომ არ აეთრთოლებინა; დიახ, ის სულშიც კი ჩასწვდა მათ და გული დაუნთო.

4 და იყო ასე: მათ კვლავ მოესმათ ხმა, და მას ვერ ჩასწვდნენ.

5 და კვლავ, მესამეჯერ, მოესმათ ხმა და გახსნეს ყურები, რათა ის გაეგონათ; და მზერა ხმისკენ ჰქონდათ მიპყრობილი; და მტკიცედ შესცქეროდნენ ზეცას, საიდანაც ხმა მოდიოდა.

6 და აჰა, მესამე ჯერზე, ჩასწვდნენ ხმას, რომელიც ესმოდათ; და მან უთხრა მათ:

7 აჰა, ჩემი საყვარელი ძე, რომელიც მოვიწონე, რომელშიც ვადიდე სახელი ჩემი – უსმინეთ მას.

8 და იყო ასე: როგორც კი მათ ეს გაიგეს, კვლავ ზეცისკენ მიაპყრეს მზერა; და აჰა, მათ იხილეს ზეციდან ჩამომავალი ადამიანი; და იგი შემოსილი იყო თეთრი სამოსელით; და იგი დაეშვა და მათ შორის დადგა; და მთელ შეკრებილთა მზერა მისკენ იყო მიპყრობილი და ვერ ბედავდნენ ბაგეთა გახსნას, ერთმანეთის მიმართაც კი და არ იცოდნენ, რას ნიშნავდა ეს, რადგან ეგონათ, რომ მათ ანგელოზი გამოეცხადათ.

9 და იყო ასე, რომ გაიწოდა ხელი და ხალხს მიმართა სიტყვებით:

10 აჰა, მე ვარ იესო ქრისტე, რომლის ამქვეყნად მოსვლაზე წინასწარმეტყველები მოწმობდნენ.

11 და აჰა, მე ვარ ამქვეყნის სინათლე და სიცოცხლე; და შევსვი ის მწარე თასი, რომელიც მამამ მიბოძა და განვადიდე მამა, ავიღე რა ამა ქვეყნის ცოდვები, რითიც აღვასრულე მამის ნება ყოველივე ამაში დასაბამიდან.

12 და იყო ასე, რომ როდესაც იესომ თქვა ეს სიტყვები, ყველა შეკრებილი მიწაზე დაემხო, რადგან გაახსენდათ, რომ ნაწინასწარმეტყველები იყო მათში, რომ ქრისტე გამოეცხადებოდათ ზეცაში ამაღლების შემდეგ.

13 და იყო ასე, რომ უფალმა მიმართა მათ სიტყვებით:

14 ადექით და ჩემთან მოდით, რათა შეძლოთ ჩემს ნეკნებზე ხელის შეხება, ასევე, რომ იგრძნოთ ლურსმნების კვალი ჩემს ხელებსა და ტერფებზე, რათა იცოდეთ, რომ ვარ ღმერთი ისრაელისა და ღმერთი მთელი დედამიწის; და მომკლეს ამა ქვეყნის ცოდვებისთვის.

15 და იყო ასე, რომ შეკრებილები წინ მივიდნენ და მას ნეკნებზე შეეხნენ და იგრძნეს ლურსმნების კვალი მის ხელებსა და ტერფებზე; და ასე იქცეოდნენ, მიდიოდნენ რა სათითაოდ, სანამ ყოველმა არ იხილა საკუთარი თვალით და არ იგრძნო საკუთარი ხელით და ნამდვილად სცნო და დაამოწმა, რომ ეს არის ის, რომელზეც წერდნენ წინასწარმეტყველები, რომელიც უნდა მოსულიყო.

16 და როდესაც ყველანი მივიდნენ და საკუთარი თვალით იხილეს, მათ ერთხმად შეჰღაღადეს სიტყვებით:

17 ოსანა! კურთხეული იყოს უზენაესი ღმერთის სახელი! და ისინი იესოს ფერხთით დაეცნენ და თაყვანი სცეს მას.

18 და იყო ასე, რომ მან მიმართა ნეფის (რადგან ნეფი იყო შეკრებილთა შორის) და უბრძანა მას, წინ გამოსულიყო.

19 და ნეფი წამოდგა და წინ გამოვიდა, მუხლი მოიყარა უფლის წინაშე და ტერფებზე ეამბორა.

20 და უფალმა უბრძანა, რომ წამომდგარიყო. და იგი წამოდგა და მის წინაშე დადგა.

21 და უფალმა მას უთხრა: მე გაძლევ ძალაუფლებას, მონათლო ეს ხალხი, როდესაც მე კვლავ ზეცაში ავალ.

22 და უფალმა კვლავ სხვებს მოუხმო და იგივე უთხრა მათ; და უბოძა მათ ნათლობის ძალაუფლება. და მათ უთხრა: ასე მონათლავთ და არ იქნება თქვენ შორის არანაირი კამათი.

23 ჭეშმარიტად გეუბნებით, რომელიც მოინანიებს ცოდვებს თქვენი სიტყვების მეშვეობით და მოისურვებს ჩემი სახელით ნათლობას, თქვენ მას მონათლავთ ამგვარად: აჰა, წყალში ჩახვალთ, დადგებით და ჩემი სახელით მონათლავთ მათ.

24 და ახლა, აჰა, ეს არის სიტყვები, რომლებსაც თქვენ იტყვით, მიმართავთ რა მათ საკუთარი სახელით, იტყვით:

25 იესო ქრისტესგან მონიჭებული უფლებამოსილებით, გნათლავ მამისა და ძისა და სულიწმინდის სახელით. ამინ.

26 და შემდეგ, წყალში ჩაუშვებთ მათ და ამოიყვანთ წყლიდან.

27 და ამგვარად, თქვენ მონათლავთ ჩემი სახელით; რადგან, აჰა, ჭეშმარიტად გეუბნებით, რომ მამა, ძე და სულიწმინდა არის ერთი; და მე ვარ მამაში და მამა არის ჩემში და მამა და მე ვართ ერთნი.

28 და მონათლავთ იმისდა მიხედვით, როგორც გიბრძანეთ. და თქვენ შორის არ იქნება დაპირისპირება, როგორც ეს იყო აქამდე; თქვენ შორის არ იქნება დაპირისპირება ჩემი მოძღვრების საკითხებზეც, როგორც ეს იყო აქამდე.

29 რადგან ჭეშმარიტად, ჭეშმარიტად გეუბნებით, რომ ის, ვისაც აქვს განხეთქილების სული, არ არის ჩემგან, არამედ არის ეშმაკისეული, რომელიც არის მამა განხეთქილებისა და უბიძგებს ადამიანთა გულებს, წყრომით დაუპირისპირდნენ ერთმანეთს.

30 აჰა, ეს არ არის ჩემი მოძღვრება – ვუბიძგო ადამიანთა გულებს ერთმანეთის მიმართ წყრომისკენ, არამედ ჩემი მოძღვრებაა – ასეთი რამ უნდა შეწყდეს.

31 აჰა, ჭეშმარიტად, ჭეშმარიტად გეუბნებით, მე გამოგიცხადებთ ჩემს მოძღვრებას.

32 და ეს არის ჩემი მოძღვრება, და ეს არის მოძღვრება, რომელიც მამამ მომცა; და ვმოწმობ მამაზე და ჩემზე მოწმობს მამა და სულიწმინდა მოწმობს მამაზე და ჩემზე; და მე ვმოწმობ, რომ მამა უბრძანებს ყოველ ადამიანს, ყველგან, მოინანიოს და იწამოს ჩემი.

33 და გადარჩება, რომელიც მე მიწამებს და მოინათლება; და ესენი არიან, რომლებიც ღვთის სასუფეველს დაიმკვიდრებენ.

34 და რომელიც არ მიწამებს და არ მოინათლება, იქნება განწირული.

35 ჭეშმარიტად, ჭეშმარიტად გეუბნებით, რომ ეს არის ჩემი მოძღვრება და ვმოწმობ: ის არის მამისგან და ვინც მიწამებს, იწამებს ასევე მამას; და მას ჩემზე დაუმოწმებს მამა, რადგან მოევლინება მას ცეცხლითა და სულიწმინდით.

36 და ასე დაამოწმებს მამა ჩემზე და სულიწმინდა დაუმოწმებს მას მამისა და ჩემ შესახებ, რადგან მამა, მე და სულიწმინდა ვართ ერთნი.

37 და კვლავ გეუბნებით: უნდა მოინანიოთ და პატარა ბავშვებად იქცეთ და მოინათლოთ ჩემი სახელით, სხვაგვარად ყოველივე ამას ვერ მიიღებთ.

38 და კვლავ, მე გეუბნებით: უნდა მოინანიოთ და მოინათლოთ ჩემი სახელით და პატარა ბავშვებად იქცეთ, თორემ სხვაგვარად, ვერაფრით ვერ დაიმკვიდრებთ ღვთის სასუფეველს.

39 ჭეშმარიტად, ჭეშმარიტად გეუბნებით: ეს არის ჩემი მოძღვრება და რომელიც მასზე ააშენებს, ჩემს კლდეზე ააშენებს და ვერ დასძლევენ მას ჯოჯოხეთის ბჭენი.

40 და ყოველი, ვინც გამოაცხადებს ამაზე მეტს ან ნაკლებს და ჩემს მოძღვრებად წარმოადგენს – ბოროტისგანაა და არ არის ჩემს კლდეზე აშენებული, არამედ აშენებულია ქვიშის საძირკველზე და ჯოჯოხეთის ბჭენი არის ღია, რათა მიიღოს ასეთი, როდესაც მოვა წყალდიდობა და მათზედ დაჰკრავს ქარი.

41 ამიტომ, მიდით ამ ხალხთან და გამოუცხადეთ სიტყვები, რომლებიც მე გითხარით, დედამიწის კიდით კიდემდე.