1 Oh met kedekedeo mie pokon lap ehu kohpene, sang aramas en Nihpai kan, me kin mih limwahn tehnpas sarawi me mih nan sahpw en Sapwen Rahk; oh irail wie pwurupwuriamweiki oh medemedewe nan pwungarail, oh wie kasakasalepene nan pwungarail wekidekla lap oh kapwuriamwei me wiawihong wasahu.

2 Oh irail pil wie koasokoasoia duwen Sises Krais menet, me kilel kan kasaledahr sapwellime pwoulao.

3 Kedekedeo ni ahnsou me irail wie koasoakoasoipene nanpwungarail, irail rongada ngihl ieu peido sang nanleng; oh irail kilengseli, pwehki irail sohte wehwehki ngihlo me irail rongadahr; oh e sohte wia ngihlen lemei, de pil ngihl laud; ahpw, oh mendahte e wia ngihl tikitik e pwarirail oh sair nan loalerail, kahrehda sohte wasa nan paliwerarail me sohte mwekidkihda; ei, e sair palingenarail ni mehlel, oh kahrehiong mohngiongarail kan karakarkihda.

4 Kedekedeo irail pwurehng rong ngihlo, oh irail sohte wehwehki.

5 Oh kesilipak en ahnsou, irail ahpw rongada ngihlo, oh irail kihpeseng salengarail kan pwe irail en kak rongada; oh masarail kan kilenglahng wasa ngihlo peidohsang; oh irail kilikilengdahla nanleng, wasa me ngihlo kohdosang.

6 Oh kilang, kesilipak en ahnsouo, irail ahpw wehwehkida ngihl me irail rongadao; oh e mahsanihong irail:

7 Kilang nei Pwutak Kempoake, me I kin popohlki, me I kalinganahkihla edei—kumwail rong ih.

8 Kedekedeo, ni ahnsou me irail wehwehkihda irail pwurehng kilengdahla nanleng; oh kilang, irail kilangada Ohl men ketketkohdi sang nanleng; oh e ketin likawih likou pwupw pwetepwet ehu; oh e ketidihdo oh ninlengihda nan pwungarail; oh mesen pokono pwon sohpeilahng, oh sohte emen irail men koasoi, de pil koasoipene nanpwungarail, sohte ese ia wehweh, pwe irail wiahki me tohnleng men me pwarohng irail.

9 Kedekedeo e ahpw kapahwei limeh kan oh mahsanihong aramas kan, ketihtihki:

10 Kilang, Ngehi iei Sises Krais, me soukohp kan kadehdehki pahn ketido sampah.

11 Oh kilang, Ngehi me marain oh mour en sampah; oh I tungoalehr sang nan dahl katiko me Sahmo ketikihong ie, oh kalinganalahr Sahmo nan ei patohwandahr dihp akan en sampah, me I lokolongki kupwuren Sahmo nan soahng koaros sangete nin tapio.

12 Kedekedeo ahnsou me Sises mahsaniher mahsen pwukat pokono pwonte pwupwidi nan pwehlo; pwe irail tamanda me e kokohpda rehrail me Krais pahn ketin kasalehiong irail pein ih mwurin e pahn ketdahla nanleng.

13 Kedekedeo Kauno mahseniong irail ketihtihki:

14 Kesihnenda oh kohdo rehi, pwe kumwail en kak doahkehdi pehmwail kan pengepengeiet, oh kumwail en pil kak kehn lipwen mete kan nan pehi kat oh pohn nehi, pwe kumwail en kak ese me Ngehi iei Koht en Israel, oh Koht en sampah pwon, oh kamakamalahr pwehki dihp akan en sampah.

15 Kedekedeo pokono ahpw kohla, oh doahkehki pehrail kan ni pengepengehu, oh kehn lipwen mete kan nin lime kan oh ni alualuwe kan; oh met irail wia, ni arail kohwei wad emen lao irail koaros kohla, oh kilangki mesarail kan oh dehmki pehrail kan, oh ese ni mehlel oh kadehdehki, me iei ih, me soukohp kan ntingihdi duwen ih me pahn ketido.

16 Oh ahnsou me irail koaros kohlahr oh pein kadehdehier, irail ahpw werikihla ni ngihl ehute, ndinda:

17 Kepinga Kauno! Meid pai mwaren Koht Wasalapap! Oh irail poaridi ni alualuwen Sises ko, oh pwongih ih.

18 Kedekedeo e ahpw mahsanihong Nihpai (pwe Nihpai iang mihmi nanpwungen pokono) oh e mahsanihong ih en patohdo.

19 Oh Nihpai kesihnenda oh kohla, oh poaridi mwohn Kauno oh mitik alualuwe kan.

20 Oh Kauno mahsanihong ih en patohda. Oh e kesihnenda oh uhda mwowe.

21 Oh Kauno mahsanihong ih: I kihong uhk manaman pwe ke en papidaisihla aramas pwukat ahnsou me I pahn pwurehng ketidahla nanleng.

22 Oh Kauno ahpw pwurehng malipe ekei, oh mahsanihong irail duwehte; oh e ketikihong irail manaman en papidais. Oh e mahsanihong irail: Ni wiepe wet me kumwail pahn papidais; oh sohte akupwung pahn wiawi nanpwungamwail.

23 Mehlel I ndaiong kumwail, me mehmen me pahn koluhkihla dipe kan sang ni amwail kaweid kan, oh inangih en papidaisla ni mwarei, ni wiepe wet me kumwail pahn papidaisihla irail—Kilang, kumwail pahn kohdihla oh kesihnenda nan pihlo, oh ni mwarei me kumwail pahn papidaisihla irail.

24 Oh met kilang, iet mahsen kan me kumwail pahn nda, ni amwail pahn eker adarail, oh ndinda:

25 Sang ni mweimwei me Sises Krais ketikihong ie, I papidaisihukla ni mwaren Sahm, oh Nah, oh Ngehn Sarawi. Ahmen.

26 Oh kumwail ahpw pahn kaduhdi irail nan pihlo, oh pwurehng kapwurehda sang nan pihlo.

27 Oh ih mwomwen koasondi wet me kumwail pahn papidais ni mwarei; pwe kilang, mehlel I ndaiong kumwail, me Sahmo, oh Nah, oh Ngehn Sarawi ehu; oh I mih rehn Sahmo, oh Sahm ketiket rehi, oh Sahmo oh ngehi ehu.

28 Oh nin duwen ei mahsanihong kumwail iei me kumwail pahn wia ni amwail pahn papidaiski. Oh e sohte pahn mie akupwung nan pwungamwail, nin duwen me kin wiawiher; oh e sohte pahn mie akupwung nan pwungamwail duwen padahk kan en ei rongamwahu, nin duwen me kin wiahwiher.

29 Pwe mehlel, mehlel I ndaiong kumwail, mehmen me kin ahneki ngehn en akamai kaidehn nei, ahpw nein tepilo, me iei pahpahn akamai, oh e kin kamwakidada mohngiong en aramas akan re en lingeringerda, nanpwungarail.

30 Kilang, met kaidehn ei padahk, en kamwakidada mohngiong en aramas en lingeringer, nanpwungarail; ahpw iet ei padahk, soahng wet en uhdihsang wiawi.

31 Kilang, mehlel, mehlel, I ndaiong kumwail, I pahn padahkihong kumwail ei padahk.

32 Oh iet ei padahken, oh iei ih sapwellimen Sahme padahk me e ketikihong ie; oh kadehdehki Sahmo, oh Sahmo kadehdehkin ie, oh Ngehn Sarawi kadehdehki Sahmo oh ngehi; oh I kadehdehki me Sahmo mahsanihong aramas koaros, wasa koaros, en koluhla oh kamehlele ie.

33 Oh mehmen me pahn kamehlele ie, oh papidaisla, e pahn komourla; oh iei irail me pahn sohsohki wehin Koht.

34 Oh mehmen me sohte pahn kamehlele ie, oh sohte papidaisla, e pahn lekidekla.

35 Mehlel, mehlel, I ndaiong kumwail, me iei met ei padahk, oh I kadehdehki me e sang rehn Sahmo; oh mehmen me pahn kamehlele ie pahn pil kamehlele Sahmo; oh Sahmo pahn ketin kadehdehiong ih duwen ngehi, pwe e pahn ketikihong ih kisiniei oh iangahki Ngehn Sarawi.

36 Oh Sahmo pahn ketin kadehdehkin ie, oh Ngehn Sarawi pahn kadehdehkihong ih duwen Sahmo oh ngehi; pwe Sahmo, oh ngehi, oh Ngehn Sarawi ehu.

37 Oh I pwurehng ndaiong kumwail, kumwail koluhla, oh duwehla kisin seri men, oh papidaisla ni mwarei, ma soh kumwail sohte pahn alehdi mepwukat.

38 Oh I pwurehng ndaiong kumwail, kumwail koluhla, oh papidaisla ni mwarei, oh duwehla kisin seri men, ma soh kumwail sohte pahn sohsoki wehin Koht.

39 Mehlel, mehlel, I pwurehng ndaiong kumwail, me iei met ei padahk, oh mehmen me pahn kokouda powe iei e kokouda pohn ei paip, oh kehl en ehl kan sohte pahn kak kalowehdi irail.

40 Oh mehmen me pahn kalohngki laud sang de tikitik sang met, oh koasonehdi me iei ei padahk, aramaso suwed, oh e sohte kokouda pohn ei paip; ahpw e kokouda pohn poahson en pihk, oh kehl en ehl kan ritidahr pwe en alehdi soahng wet ahnsou me lapake pahn kohdo oh kisinieng pahn ipir irail.

41 Eri, kohwei rehn aramas pwukat, oh kalohngki mahsen kan me I koasoiahier, ong wasa koaros nan sampah.