1 Liye, na tukun ma inge ke Jisus El tuh fahklah kahs inge El sifilpac ngwetngwet raunweack liye un mwet pucspucs sac, ac El fahk nuh selos: Liye, pacl Luhk apkuhran me.

2 Nga puhlakihn lah kowos muhnahs, lah kowos tiacna kahlwem ke kahs nuhkwewa Luhk ma Nga sapkihnyuck sin Pahpah in sramsramkihn nuh suwos ke pacl se inge.

3 Ke ma inge, kowos som nuh ke lohm suwos, ac motko ke ma Nga fahk uh, ac siyuck sin Pahpah, ke Inek, tuh kowos in kuh in kahlwem kac, ac ahkolah nuhnak lowos an nuh lutu, ac Nga fah sifilpac tuhkuh nuh yuruwos.

4 Tuhsruhk inge Nga som nuh yohrohl Pahpah, ac oacyacpac in ahkkahlwemyeyuc sifacna nuh sin sruf tuhlac luhn Israel, tuh elos tiacna tuhlac sin Pahpah, tuh El etuh acn ma El usacloslac nuh we.

5 Ac tukun ma inge ke Jisus El tuh sramsram ohinge, El sifilpac ngwetngwet raunweack un mwet pucspucs sac, ac liye elos tuhng, ac ngwetwacng silyac oacna fin muh elos kena siyuck Sel in muhta wun weluhlos kuhtuh srihsrihk.

6 Ac El fahk nuh selos: Liye, insiuck sesseslah ke pahkotwen nuh suwos.

7 Yac oasr kuhtwena mwet mas inmahsrlowos? Usaclos me nuh inse. Yac oasr kuhtwena mwet ma ul, kuh kun, kuh maskihn niyac, kuh suhkahpahs, kuh lepa, kuh ma lacpo na kuh lacne na, kuh ma sohlohng kahs, kuh ma kweok ke kuhtwena ohiyac? Usaclos me nuh inse ac Nga fah unweloslac, tuh Nga pahkomotowos; insiuck sesseslah ke pahkotwen.

8 Tuh Nga puhlakihn lah kowos kena tuh Nga in ahkkahlwemye nuh suwos ma Nga tuh oruh nuh sin mwet wiyowos fin acn Jerusalem, tuh Nga liye lah luhlahlfongi lowos an fal tuh Nga in unwekowoslac.

9 Ac tukun ma inge ke El tuh sramsram ohinge, nohfohn un mwet pucspucs sac, tuhkweni na, tuh som wi mwet mas lalos ac mwet kweok lalos, ac mwet ul lalos, ac wi mwet kun lalos, ac wi mwet koflah kahskahs lalos, ac weluhlos nuhkwewa suc kweok ke kuhtwena ohiyac; ac El tuh unweloslac kais sie mwet nuhkwewa ke elos utuckuh nuh Yohrohl.

10 Ac elos oraclah ma nuhkwewa, kwewana elos suc unweyucklac ac elos suc kuh na, epahsrlah nuh ten ke niyacl, ac tuh alu nuh Sel; ac elos suc kuh tuh tuhkuh finne arulacna puhslac mwet tuh ngok niyacl, yohkna oruh elos tuh twacnlah niyacl ke sroninmuhtahlos.

11 Ac tukun ma inge El sapkihn tuh tuhlihk srihsrihk nahtuhlos in utuckuh.

12 Na elos uslah tuhlihk srihsrihk nahtuhlos ac fihlilosi nuh ten fin fohk uh raunwellah, ac Jisus El tu inmahsrlolos; ac un mwet pucspucs sac sackuhnlah inkacnek uh ne ke na elos nuhkwewa utuckuh nuh Yohrohl.

13 Ac tukun ma inge ke elos nuhkwewa utuckuh, ac Jisus El tulac inmahsrlolos, El sapkihn nuh sin un mwet pucspucs sac tuh elos in sikuckmuhtuhnte fin fohk uh.

14 Ac tukun ma inge ke elos tuh sikuckmuhtuhnte fin fohk uh, Jisus El oelac insiacl, ac fahk: Pahpah, Nga fosrngah ke srihpen orekma koluk luhn mwet luhn mwet Israel.

15 Ac ke El tuh fahklah kahs inge, El sifacna oacyacpac sikuckmuhtuhnte nuh infohk uh; ac liye El pruhe nuh sin Pahpah, ac ma El pruhe kac tiacna kuh in sihmihsyucklac, ac un mwet pucspucs sac tuh fahkwack kac suc tuh lohngohl.

16 Ac tukun ohiyac se inge elos fahkwack: Sie muhta soenna liye, kuh insrac soenna lohng, met, ma na yohk srihpac ac wolacna oacna ke kuht tuh liye ac lohng ke Jisus El sramsram nuh sin Pahpah;

17 Ac wacngihn lohoh kuh in sramsram, tiac pac kuh in sihmihsyucklac sin kuhtwena mwet, insiacn mwet uh tiac pac kuh in nuhnkuh ma na yohk srihpac ac wolacna oacna ke kuht kwewa tuh liye ac lohng ke Jisus El sramsram; ac wacngihn sie mwet kuh in nuhnkuh ke engan ma nwacklah nguhnasr ke pacl se ma kuht lohng ke El pruhe kacsr nuh sin Pahpah.

18 Ac tukun ma inge ke Jisus El tuh ahksahfyelah in pruhe nuh sin Pahpah, El tuyak; tuhsruhk arulacna yohk engan luhn un mwet pucspucs sac oruh wacngihnlac kuhiyaclos.

19 Ac tukun ma inge ke Jisus El sramsram nuh selos, ac fahk nuh selos in tuyak.

20 Ac elos tuyak liki infohk uh, ac El fahk nuh selos: Kowos insewowo ke srihpen luhlahlfongi lowos. Ac inge liye, engan Luhk fohnlah.

21 Ac ke El tuh fahklah kahs inge, El tuhng, ac un mwet pucspucs sac fahkwack ke ma inge, ac El eis tuhlihk srihsrihk nahtuhlos, sie sin sie, ac ahkinsewowoyaclos, ac pruhe nuh sin Pahpah kaclos.

22 Ac ke El tuh oraclah ma inge El sifilpac tuhng;

23 Ac El sramsram nuh sin un mwet pucspucs sac, ac fahk nuh selos: Liye tuhlihk srihsrihk nuhtuwos.

24 Ac ke elos ngwetlah in liye elos ngwetwack nuh inkuhsrao, ac elos liye inkuhsrao ikacklah, ac elos liye lipufacn oactui liki inkuhsrao oacna in muh elos rauniyucklac ke e; ac elos tuhkuh nuh ten ac raunwelah tuhlihk srihsrihk ah, ac elos rauniyucklac ke e; ac lipufacn ah tuh luti nuh selos.

25 Ac un mwet pucspucs sac tuh liye ac lohng ac fahkwack; ac elos etuh lah ma sihmlac lalos uh pwacye tuh elos nuhkwewa tuh liye ac lohng, mwet nuhkwewa nuh sel sifacna; ac elos oekyucklac sun luhpah tausin luo ac lamfoko mwet; ac elos inge pa mukul, muhtwacn, ac tuhlihk.