Guruy Ni 18
Yesus e tabolngin nag fare sacrament nga fithikʼ fapi Nephites—Nni chiyliy ngoraed ni nga ur meybil gaed ni gubin e ngiyalʼ u Fithingan—Piʼin ra kay Doewngin mar unumed Rachaʼen ni de kolfal e yaedra gafgow—Fapi gachalpen e ni piiʼ gelingraed ni ngar piiʼed fare Kan ni Thothup. Napʼan T.Y. 34.
1 Ere yibi buch ni yoeg Yesus ngakʼ fa piʼin gachalpen ni ngar feked boech e flowa nge waeyin iyaen ngakʼ.
2 Ma napʼan ni ka ranoed ni ngar feked e flowa nge waeyin, me yoeg ko fare ulung i gidiiʼ ni ngar pired nga butʼ.
3 Ma napʼan ni sul fa piʼin gachalpen ni kar feked e flowa nge waeyin, me fek e flowa nge tetʼaer nge yibliy; me piiʼ ngakʼ pi gachalpen me yoeg ngoraed ni ngar kayed.
4 Ma napʼan ni kar kayed mar sug gaed, me yoeg ngoraed ni ngar piiʼed ngakʼ fare ulung i gidiiʼ.
5 Ma napʼan ni kay fare ulung i gidiiʼ mar sug gaed, me gaʼar ngakʼ pi gachalpen: Musap gaed, bay beeʼ ni bay ni yibliy u fithikʼ med, niʼir e bay gupiiʼ gelingin ni nge tetʼaer e flowa nge yibliy me piiʼ ngakʼ e gidiiʼ ko galasia rog, ni gubin e piʼin nra michaenʼraed min tawfe nagraed u fithingag.
6 Ma rennʼey e nga um rinʼed ni gubin e ngiyalʼ, ni boed ni kug rinʼ, ni boed ni kug tetʼaer e flowa mug yibliy nggu piiʼ ngomed.
7 Ma rennʼey e ngam rinʼed ni nge puguran doewag, niʼir e kug dag ngomed. Ma nge yaeni aw nib mich riy ngakʼ e en Chitamangiy ni gubin e ngiyalʼ ma gubay u wunʼmed. Ma faʼanra gubin e ngiyalʼ ni gubay u wunʼmed ma arame bay i paer e Kan ni Thothup rog romed.
8 Me yibi buch u napʼan ni yoeg e pi thin ney, me chiyliy ngakʼ pi gachalpen ni ngar feked boech fare waeyin u kap ngar unumed, ma ngkur piiʼed ngakʼ fare ulung i gidiiʼ ni ngar unumed.
9 Me yibi buch ni rrinʼed ni aram rogon, mar unumed boech mar sug gaed; mar piiʼed ngakʼ fare ulung i gidiiʼ, mar unumed ngar sug gaed.
10 Ma napʼan ni rinʼ fapi gachalpen e rennʼey, me gaʼar Yesus ngoraed: Nge felʼ waʼathmed ni fan ko rennʼey ni kam rinʼed, ya rennʼey e be muguʼuliy e pi motochiyel rog, ma rennʼey e be micheg ngakʼ e en Chitamangiy nib mʼagaenʼmed ngay ni ngam rinʼed e nʼen ni kug chiyliy ngomed.
11 Ma rennʼey e ngar um rinʼed ngakʼ e piʼin nra kalngaenʼ min tawfe nag u fithingag; ma ngam rinʼed ning i puguran rachaʼeg, ni kug pag ke mapʼ ni fan ngomed, ni nge yog ni ngam micheged ngakʼ e en Chitamangiy ni gubin e ngiyalʼ ma gubay u wunʼmed. Ma faʼanra gubin e ngiyalʼ ni gubay u wunʼmed ma bay i paer e Kan ni Thothup rog romed.
12 Ma kug piiʼ ngomed ba motochiyel ni thingar mu rinʼed e pinnʼey. Ma faʼanra gubin e ngiyalʼ ni gimed be rinʼ e pinnʼey ma ra felʼ waʼathmed, ya kam dumow gaed nga dakean e war rog.
13 Machane piʼin bay u fithikʼmed ni yaedra rinʼ nib yoʼor ara balich ko tiney e darur dumow gaed nga dakean e war rog, ya yaed be dumow nga dakean e dayif ni yigoʼ yanʼ; ma napʼan nra awe nʼuw, me yib e day, me thow e nifeng, nge aw ngoraed, ma yaedra thig nga butʼ, ma fare garog nu infierno e ba mab nge paer nibe soen ni nge fekraed.
14 Ere nge felʼ waʼathmed ni faʼan gimed ra fol ko pi motochiyel rog, niʼir e ke chiyliy e en Chitamangiy ngog ni thingar gupiiʼ ngomed.
15 Rriyulʼ, nriyulʼ, gube yoeg ngomed, ni thingar mu uthumed oewchmed magmed meybil ni gubin e ngiyalʼ, ni nge siyi lumel nagmed fare moʼoniyanʼ, magmed mang sib rokʼ.
16 Ma rogon ni kug meybil u fithikʼmed e aram rogon ni ngam meybil gaed u lan e galasia rog, u fithikʼ e gidiiʼ ni kar kalgaed ngaenʼraed ma kan tawfe nagraed u fithingag. Musap gaed, i gag fare tamilang; kug dag ba wok nib felʼ ni fan ngomed.
17 Me yibi buch u napʼan ni yoeg Yesus e pi thin ney ngakʼ pi gachalpen, me chel bayay ngakʼ fare ulung i gidiiʼ me gaʼar ngoraed:
18 Musap gaed, rriyulʼ, nriyulʼ, gube yoeg ngomed, thingar mu uthumed oewchmed mi gimed meybil ni gubin e ngiyalʼ ni nge siy mmul gaed nga fithikʼ e lumel; ya moʼoniyanʼ e ri baʼadag ni ngam yog gaed ngakʼ, ni nge yog ni kiiʼegmed ni boed ni yima rinʼ ko wheat.
19 Ere thingar um meybil gaed ni gubin e ngiyalʼ ngakʼ e en Chitamangiy u fithingag;
20 Ma demutrug e re nʼen ni gimed ra ning ngakʼ e en Chitamangiy u fithingag, ni banʼen nib matʼaw, nib mich u wunʼmed ni rayog ngomed, ma musap gaed, yira piiʼ ngomed.
21 Mmeybil gaed u lan e tabinaew romed ngakʼ e en Chitamangiy, ni gubin e ngiyalʼ u fithingag, ni nge yog ni felʼ waʼathan e pi leʼengimed nge pi bitir romed.
22 Musap gaed, nga um moʼolung gaed ni gubin e ngiyalʼ; ma dab mu tileged e gidiiʼ ni nge dabiyib ngomed u napʼan ni gimed be moʼolung, ya ngam paged ngar baed ngomed ma dab mu siyeged raed;
23 Machane ngam meybil gaed ni fan ngoraed, ma dab mu yinʼed raed nga wean; ma faʼanra bay ur baed ngomed ni gubin e ngiyalʼ ma ngam meybil gaed ni fan ngoraed, ngakʼ e en Chitamangiy, u fithingag.
24 Ere, mu tininged e magael romed ngalang ni nge yog ni gaelʼ e fayleng. Musap gaed i gag e tamilang niʼir e gimed ra tining ngalang—niʼir e kam guyed gag ni kug rinʼ. Musap gaed kam guyed gag ni kug meybil ngakʼ e en Chitamangiy, ma gimed gubin ni mich riy.
25 Ma kam nanged ni kug chiyliy ni dariy bi gimed ni nge yaen ngab yang, ya kug chiyliy ni ngam baed ngog, ni nge yog ni ngam thamiyed magmed guy; ere aray rogon ni ngam rinʼed ko gidiiʼ u fayleng; ma enra thʼaeb e ra motochiyel ney e ke pag ir ngan wawliy iyaen nga fithikʼ e lumel.
26 Me yibi buch u napʼan ni ke yoeg Yesus e pi thin ney, me sap bayay ngakʼ fa piʼin gachalpen ni ke melʼeg raed, me gaʼar ngoraed:
27 Musap gaed, rriyulʼ, nriyulʼ, gube yoeg ngomed, kug piiʼ rebe motochiyel ngomed, ma arame ngguwon ngakʼ e Chitamag ni nge yog nug muguʼuliy boech e motochiyel ni ke piiʼ ngog.
28 Ere chiney e musap gaed, baʼaray e re motochiyel ni kug piiʼ ngomed, ni dab mu paged beeʼ nge kay doewngig me unum rachaʼeg ni manang ni de kol fal, u napʼan ni gimed ra piiʼ;
29 Ya enra kay doewngig me unum rachaʼeg ma de kol fal, e ke gafgow nag e yaʼel rokʼ; ere faʼan gimed manang beeʼ ni be yaen ni nge kay doewngig me unum rachaʼeg ni de kol fal, ma ngam siyeged riy.
30 Machane, dab mu chuweged u fithikʼmed, ya ngam machib niged magmed meybil ngakʼ e en Chitamangiy ni fan ngakʼ, u fithingag; ma faʼanra ke kalngaenʼ min tawfe nag u fithingag; ma arame ngam feked, magmed piiʼ ngakʼ doewngig nge rachaʼeg.
31 Machane faʼanra dabi kalngaenʼ ma dab mu uneged ko mathaʼeg nga fithikʼ e gidiiʼ rog, ni nge siyi gatheaye gidiiʼ rog, ya musap gaed gumnang e saaf rog, ma kug thiʼeg raed.
32 Machane, dab mu yinʼed nga wuruʼ e pi tagilʼ e moʼolung romed, ara tagilʼ e meybil romed, ya piʼin ni aram rogon e ngam ululiyed e machib ni fan ngoraed; ya dam nanged ma richey me rebo rran mar suloed ngar kalgaed ngaenʼraed, marbaed ngog u poloʼ i gumʼirchaʼaraed, mug ggol nagraed; me yaeni aw ni gimed tapgin me yog ni ngar thap gaed ko yafos.
33 Ere, mu fol gaed ko pi thin ney ni kug chiyliy ngomed me siy ni gechig nagmed; ya rra gafgow e chaʼ ni en Chitamangiy e ra gechig nag.
34 Kug piiʼ e pi motochiyel ngomed ni bachan e leleʼeg thin ni kuʼum tayed u fithikʼmed. Ma ra felʼ waʼathmed ni faʼanra dariy e maleʼeg thin u fithikʼmed.
35 Ere chiney e ngguwon ngakʼ e en Chitamangiy, ya ba tʼuf ni thingar guwaen ngakʼ e en Chitamangiy ni fan ngomed.
36 Me yibi buch u napʼan ni muʼ Yesus i yoeg e pi thin ney, me matheg paʼ ngakʼ fa piʼin gachalpen ni ke melʼeg raed, ni tataʼabeeʼ, nge yaeni madaʼ ko ngiyalʼ ni ke math ngoraed ni yaed gubin, ma be non ngoraed u napʼan nibe math ngoraed.
37 Ma fare ulung i gidiiʼ e dar rungʼaged e pi thin ni weliy, ere dar yoloeyed e chep riy; machane fa piʼin gachalpen e ra yoloeyed e chep riy ni piiʼ ngoraed e gelingin ni ngar piiʼed fare Kan ni Thothup. Ma bay gu dag ngomed u boech nga mʼon ni re chep ney e ba riyulʼ.
38 Me yibi buch u napʼan ni math Yesus ngoraed ni yaed gubin, me yib bangi manileng nge upnguy fare ulung i gidiiʼ ma arame dakur guyed Yesus.
39 Ma napʼan ni kan upnguy raed me yaen nge chuw roraed, me yaen ngalang nga tharmiy. Ma fa piʼin gachalpen e ra guyed mar yoloeyed e chep riy ni ke yaen bayay nga tharmiy.