1 Ket napasamak a binilinna ida a rumbeng nga isuratda dagiti balikas nga inted ti Ama ken ni Malakias, a nasken nga ibagana kadakuada. Ket napasamak nga impalawagna kadakuada kalpasan ti pannakaisuratda. Ket dagitoy ti balikas nga imbagana kadakuada, a kinunana: Kastoy ti imbaga ti Ama ken ni Malakias—Adtoy, ibaonkonto ti ^amensaherok, ket isaganananto ti dalanko, ket ti Apo a birokenyo kellaatto a dumteng iti templona, uray ti mensahero ti katulagan, a kalikagumanyo; adtoy, umayto, kinuna ti Apo ti Pangen.

2 Ngem asino ti ^amakaandur agingga iti aldaw ti yaayna, ket asinonto ti makalasat inton agparang? Ta mayarigto a kas ^bapuy a manggugor, ken kaslanto naingel a sabon.

3 Ket agtugawto a mangpasileng ken mangpatarnaw iti pirak; ket patarnawennanto dagiti lallaki nga ^aannak ni Levi, ket dalusannanto ida a kas iti balitok ken pirak; tapno ^bmakaidatagdanto iti Apo iti daton ti kinalinteg.

4 Iti kasta makaay-ayonto iti Apo ti daton ti Juda ken ti Jerusalem, a kas kadagiti aldaw idi ugma ken kas kadagiti tawen idi punganay.

5 Ket umasidegakto kadakayo iti panangukom; ken naalibtakakto a saksi a maibusor kadagiti manggagamud, ken maibusor kadagiti mannakikamalala, ken maibusor kadagiti naulbod a managsapata, ken maibusor kadagiti mangilupit iti mangmangged kadakuada, iti balo a babbai ken kadagiti ^aawanan ama, ken kadagiti di mangpasangbay iti ganggannaet ken saan nga agbuteng kaniak, kinuna ti Apo ti Pangen.

6 Ta siak ti Apo, diak agbaliw; ngarud saankayo a maungaw nga annak ni Jacob.

7 Uray pay kadagidi aldaw dagiti ammayo ^atinallikudanyon dagiti pagannurotak, ket saanyo a tinungpal ida. ^bAgsublikayo kaniak, ket agsubliakto kadakayo, kinuna ti Apo ti Pangen. Ngem kunayo: Ania ti pagsublianminto?

8 Takawan kadi ti tao ti Dios? Nupay kasta tinakawandak. Ngem kunayo: Iti ania ti nangtakawanmi kenka? Kadagiti ^aapagkapullo ken ^bdatdaton.

9 Nailunodkayo iti lunod, ta tinakawandak, uray pay daytoy sibubukel a pagilian.

10 Yegyo ti amin nga ^aapagkapullo iti kamalig, tapno mapaadda ti karne iti balayko; ket padasendak ita iti daytoy, kinuna ti Apo ti Pangen, no diakto lukatan kadakayo dagiti tawa ti langit, ket ibuyatko kadakayo ti ^bparabur, nga awanto ti umdas a siled a manglaon.

11 Ket ungtakto ti manangdadael para iti pagimbaganyo, ket dinanto dadaelen dagiti bunga dagiti dagayo; uray ti ubasyo dinanto regregen dagiti bungana iti kinelleng sakbay ti umno a panawen, kinuna ti Apo ti Pangen.

12 Ket amin a pagilian naganandakayto iti nagasat, ta dakayto ti namayengmeng a daga, kinuna ti Apo ti Pangen.

13 Nadagsen dagiti balikasyo a maibusor kaniak, kinuna ti Apo. Nupay kasta kunayo: Ania ti insaomi a maikaniwas kenka?

14 Kinunayo: Ubbaw ti panagserbi iti Dios, ket ania ti gunggonami iti panangaywanmi iti ordinansana, ken iti pannagnami a silaladingit iti saklang ti Apo ti Pangen?

15 Ket ita ibagatayo a naragsak dagiti natangsit; wen, dagiti agar-aramid iti kinadangkes ti narang-ay; wen, naisalakan dagiti nangsulisog iti Dios.

16 Kalpasanna masansan a ^anagsasarita dagiti nagbuteng iti Apo, ket ti Apo dimngeg ken nangipangag; ket maysa a ^blibro a pakalaglagipan ti naisurat iti saklangna nga agpaay kadagiti nagbuteng iti Apo, ken dagiti nanglagip iti naganna.

17 Ket kukuakto ida, kinuna ti Apo ti Pangen, iti aldaw nga ^aaramidekto dagiti alahasko; ket igagakto ida a kas iti panangigaga ti tao iti anakna a nagserbi kenkuana.

18 Kalpasanna agsublikayto ket ^amabigbigyonto ti paggidiatan dagiti nalinteg ken nadangkes, ti paggidiatan ti agserbi iti Dios ken ti saan nga agserbi kenkuana.