1 Ma sa oo ina ua uma ona fofogaina e Iesu o nei upu, sa ia fetalai atu i ona soo taitoatasi, ma faapea atu ia te i latou: O le a se mea tou te mananao i ai mai ia te au, pe a mavae ona ou alu a’e i le Tamā.

2 Ma sa latou tautatala atu uma, vagana ai le toatolu, ua fai atu: Matou te mananao ia mafai ona matou o atu vave ia te oe i lou malo, pe a uma ona matou ola e tusa ma tausaga o le tagata, pe a iu la matou auaunaga, lea ua e valaauina i ai i matou.

3 Ma sa ia fetalai atu ia te i latou: Amuia outou ona ua outou mananao i lenei mea mai ia te au; o lea, a mavae le fitusefulu ma le lua tausaga o lo outou soifua o le a outou o mai ia te au i lo’u malo; ma o le a outou maua le ^amalologa faatasi ma a’u.

4 Ma ina ua uma ona ia fetalai atu ia te i latou, sa liliu atu o ia i le toatolu, ma fetalai atu ia te i latou: O le a se mea tou te mananao ou te faia mo outou pe a ou alu atu i le Tamā?

5 Ma sa faanoanoa i latou i o latou loto, ona sa latou fefefe e ta’u atu ia te ia le mea sa latou mananao i ai.

6 Ma sa ia fetalai atu ia te i latou: Faauta, ua ou ^ailoa o outou mafaufauga, ma ua outou mananao i le mea na manao i ai ^eIoane, la’u pele, mai ia te au, o le na faatasi ma a’u i la’u galuega, ae lei siitia a’e a’u i luga e tagata Iutaia.

7 O le mea lea, ua sili ona amuia o outou, ona o le a outou ^ale tofo lava i le ^eoti; ae o le a outou ola e vaai i mea uma e faia e le Tamā i le fanauga a tagata, seia oo lava ina faataunuuina mea uma e tusa ma le finagalo o le Tamā, pe a ou sau i lo’u mamalu faatasi ma ⁱmana o le lagi.

8 Ma o le a le oo lava ia te outou tiga o le oti; ae a ou sau i lo’u mamalu o le a liua outou e pei o le emo o le mata mai le ^atino faaletino i le ^etino ola pea; ona faamanuiaina ai lea o outou i le malo o lo’u Tamā.

9 Ma ou te toe fai atu, o le a le oo ia te outou le tiga a o outou ola ai i la le tino, po o le faanoanoa, vagana ai ona o agasala a le lalolagi; ma o nei mea uma o le a ou faia ona o le mea ua outou mananao i ai mai ia te au, ona ua outou mananao ia mafai ona outou ^aaumai o agaga o tagata ia te au, a o i ai pea le lalolagi.

10 Ma ona o lenei pogai o le a outou maua ai le ^aatoatoa o le olioli; ma o le a outou nonofo ai i lalo i le malo o lo’u Tamā; ioe, o le a atoatoa lo outou olioli, e pei lava o le atoatoa o le olioli ua tuuina mai e le Tamā ia te au; ma o le a avea outou e pei lava o a’u, ma ua pei lava a’u o le Tamā; ma o le Tamā ma a’u ua ^etasi;

11 Ma o le ^aAgaga Paia e molimauina le Tamā ma a’u; ma e tuu mai e le Tamā le Agaga Paia i le fanauga a tagata, ona o a’u.

12 Ma sa oo ina ua uma ona fetalai e Iesu o nei upu, sa ia pa’i atu ia te i latou uma taitoatasi i lona tamatamaiaao vagana ai le toatolu o ē o le a nonofo pea, ona maliu ese ai lea o ia.

13 Faauta foi, sa tatalaina le lagi, ma sa ^asegia a’e i latou i le lagi, ma vaai ma faalogo i mea ua le faamatalatalaina.

14 Ma sa ^avavao i latou ina ia le magagana; sa lei tuu mai foi ia te i latou se mana latou te tautatala ai i mea sa latou vaai ma faalogo i ai;

15 Ma pe sa i ai i latou i le tino pe le o le tino sa latou le iloa; ona sa foliga mai ia te i latou e pei o se ^aliliuga o i latou, lea sa suia ai i latou mai lenei tino o aano i se tulaga ola pea, ina ia mafai ona latou vaai i mea a le Atua.

16 Peitai sa oo ina latou toe auauna i luga o le fogaeleele; ae ui i lea sa latou le a’oa’o atu e uiga i mea ia sa latou faalogo ma vaai i ai, ona o le poloaiga na tuuina mai ia te i latou i le lagi.

17 Ma o lenei, pe o i latou o ni tagata faaletino po o ni tagata ola pea, mai le aso o lo latou liuga, ou te le iloa;

18 Ae o le tele lenei o le mea ua ou iloa, e tusa ma le talafaamaumau ua tuuina mai—sa latou o atu i luga o le laueleele, ma auauna atu i tagata uma, ma auai mai i le ekalesia le toatele o e sa talitonu i la latou talaiga; ma papatiso i latou, ma o le toatele o i latou sa papatiso sa latou maua le Agaga Paia.

19 Ma sa lafo i latou i totonu o le falepuipui e i latou o e sa le auai i le ekalesia. Ma sa le mafai e ^afalepuipui ona taofi i latou, ona sa vaeluaina i latou.

20 Ma sa lafoina i latou i totonu o le eleele; peitai sa latou taiaina le eleele i le afioga a le Atua, sa oo ina laveaiina i latou mai le loloto o le eleele e lona ^amana; ma o lea sa le mafai ai ona latou elia ni lua e mafai ona taofi ai i latou.

21 Ma sa faatolu ona lafoina i latou i se ^aogaumu ma sa le afaina ai lava.

22 Ma sa faalua ona lafoina i latou i se ^aana o manu feai; ma faauta sa latou taaalo ma manu feai e pei ona taaalo o se tamaitiiti ma se tamai mamoe e lei te’a ma le susu, ma le afaina ai.

23 Ma sa oo ina faapea ona latou o atu i totonu o le nuu atoa o Nifae, ma tala’i atu le ^atalalelei a Keriso i tagata uma i luga o le laueleele; ma sa liliu atu i latou i le Alii, ma faatasia i le ekalesia a Keriso, ma sa faapea ona faamanuiaina o tagata o ^elena tupulaga, e tusa ai ma le fetalaiga a Iesu.

24 Ma o lenei, o a’u, o Mamona, ou te faaiu le tautala atu e faatatau i nei mea mo se taimi.

25 Faauta, sa fai o le a ou tusia ^asuafa o i latou o ē o le a le oo i ai le oti, peitai sa faasaina e le Alii; o lea ou te le tusia ai i latou, ona ua natia i latou mai le lalolagi.

26 Ae faauta, ua ou vaai ia te i latou, ma sa latou auauna mai ia te au.

27 Ma faauta o le a i ai i latou i totonu o Nuuese, ae o le a le iloa i latou e Nuuese.

28 O le a i ai foi i latou i totonu o tagata Iutaia, ae o le a le iloa i latou e tagata Iutaia.

29 Ma o le a oo mai foi, pe a silafia e le Alii i lona poto latou te auauna atu i ituaiga uma o Isaraelu ua ^afaataapeapeina, ma i atunuu uma, ituaiga, gagana ma nuu, ma aumai ai mai ia te i latou ni agaga e toatele ia Iesu, ina ia faataunuuina lo latou manao, ma ona o le mana faatalitonu foi o le Atua ua i totonu o i latou.

30 Ma ua pei i latou o ^aagelu a le Atua, ma afai latou te tatalo atu i le Tamā i le suafa o Iesu e mafai ona latou faaali atu o i latou lava i soo se tagata e manatu ua lelei ia te i latou.

31 O lea, o le a latou faia galuega tetele ma le ofoofogia, ae lei oo mai le aso ^atele ma ua latalata mai o le a laulaututu ai tagata uma lava i luma o le nofoa-faamasino o Keriso;

32 Ioe, o le a faia lava e i latou i totonu o Nuuese se galuega ^atele ma le ofoofogia, ae lei oo mai lena aso faamasino.

33 Ma a na fai ua outou maua tusitusiga paia uma ia ua tuu mai ai se tala i galuega ofoofogia uma a Keriso, o le a outou iloa, e tusa ai ma fetalaiga a Keriso, o nei mea e mautinoa lava ona oo mai.

34 Ma oi talofa ia te ia o le a ^alē fia faalogo i fetalaiga a Iesu, ma ia i ^elatou foi o e na ia filifilia ma auina atu i totonu ia te i latou; ona o soo se tasi e le taliaina fetalaiga a Iesu ma upu a i latou ua ia auina atu, ua latou le talia o ia; ma o lea o le a le talia ai e ia i latou i le aso gataaga;

35 Ma sa sili ona lelei mo i latou pe a na fai latou te le fananau mai. Aua pe tou te manatu ea e mafai ona outou aveese o le faamasinotonu a se Atua ua toatamai, o lē ua ^asoli i lalo o vae o tagata, ina ia mafai ona oo mai o le faaolataga?

36 Ma o lenei faauta, e pei ona ou tautala atu e uiga ia te i latou o e na filifilia e le Alii, ioe, e oo i le toatolu o e na segia a’e i luga i le lagi, e faapea sa ou le iloa pe sa faamamaina i latou mai le faaletino i le ola pea—

37 Ae faauta, mai le taimi na ou tusi ai, sa ou ole atu i le Alii, ma sa ia faaali mai ia te au e tatau ona i ai se suiga e faia i o latou tino, a leai e tatau ona latou tofo i le oti;

38 O lea, ina ia le tofo i latou i le oti, o lea na faia ai se ^asuiga i o latou tino, ina ia latou le mafatia i le tiga po o le faanoanoa vagana ai mo agasala a le lalolagi.

39 O lea o lenei suiga ua le tutusa ma lena o le a oo mai i le aso gataaga; ae e i ai se suiga sa faia i luga o i latou, sa oo ina le mafai e Satani ona maua o se mana i o latou luga, sa le mafai ai ona ia ^afaaosooso i latou; ma sa ^efaapaiaina i latou i le tino, sa ⁱpaia ai i latou, ma sa le mafai e mana o le lalolagi ona taofi i latou.

40 Ma o le a latou tumau i lenei tulaga seia oo i le aso faamasino o Keriso; ma i lena aso e faapea o le a oo mai ai ia te i latou se suiga tele atu, ma talia i totonu o le malo o le Tamā e le toe o ese atu, ae mau faatasi ma le Atua e faavavau i le lagi.