1 ’E i muri a’era, ’ia oti a’era tā Iesu paraura’a atu i teie mau parau, ’ua parau atu ra ’oia i tāna mau pipi, te tahi i te tahi, i te nā-’ō-ra’a atu ia rātou : E aha tā ’outou i hina’aro iā’u nei, ’ia tae atu vau i te Metua ?

2 ’E ’ua parau mai ra rātou pā’āto’a, maori rā e to’otoru, i te nā-’ō-ra’a mai ē : Tē hina’aro nei mātou ’ia tae i te matahiti pa’ari o te ta’ata nei, ’e ’ia fa’aotihia tā mātou nei ’ohipa i parauhia ai mātou e ’oe ra, ’ia tae vave atu mātou ia ’oe i roto i tō ’oe ra bāsileia.

3 ’E ’ua nā ’ō atu ra ’oia ia rātou : E ao tō ’outou nō te mea ’ua hina’aro ’outou i taua mea nei iā’u ; nō reira, ’ia tae’ahia tō ’outou matahiti i te hitu ’ahuru ’e ma piti, e tae mai ’outou iā’u nei i roto i tō’u bāsileia ; ’e iā’u nei e fāri’i ai ’outou i te hau.

4 ’E ’ia oti a’era tāna paraura’a atu ia rātou, ’ua fāriu atu ra ’oia i ni’a i te to’otoru ra, ’e ’ua nā ’ō atu ra ia rātou : E aha tā ’outou i hina’aro iā’u ’ia rave nō ’outou ’ia tae atu vau i te Metua ?

5 ’E ’ua ’oto ihora tō rātou ’ā’au, nō te mea ’ua mata’u rātou ’ia parau atu iāna i te mea tā rātou i hina’aro.

6 ’E ’ua nā ’ō atu ra ’oia ia rātou : Inaha, ’ua ’ite au i tō ’outou mau mana’o, ’e i hina’aro na ho’i ’outou i te mea tā Ioane, tā’u pipi here, i hina’aro iā’u nei, ’e i fa’aea na ’oia i pīha’i iho iā’u ’a tāvini ai au, hou vau i fa’ateiteihia ai ’e te mau ’āti Iuda.

7 Nō reira, ’ia ha’amaita’i-rahi-hia atu ā ’outou, ’e e ’ore roa ho’i ’outou e ’ite i te pohe ; ’āre’a rā e ora noa ’outou nō te ’ite atu i te mau ’ohipa ato’a a te Metua i te mau tamari’i a te ta’ata nei, ē tae noa atu ho’i ’ua fa’atupuhia te mau mea ato’a mai te au i te hina’aro o te Metua, i te taime au e tae mai ai i roto i tō’u ra hanahana ma te mau mana nō te ra’i mai.

8 ’E e ’ore roa ’outou e ’ite i te mau māuiui nō te pohe ; ’ia tae mai rā vau i roto i tō’u ra hanahana, e fa’ahuru-’ē-hia ’outou mai te amora’a mata, mai te tino tāhuti noa ’ia riro ’ei tino tāhuti ’ore ; ’e i reira ’outou e ha’amaita’ihia ai i roto i te bāsileia o tō’u ra Metua.

9 ’E teie fa’ahou ā, e ’ore roa ’outou e ’ite i te māuiui ’a pārahi ai ’outou i te tino nei, e ’ore ato’a i te ’oto, maori rā nō te mau hara a tō te ao nei ; ’e teie mau mea ato’a ’o tā’u ïa e rave, nō te mea ’ua hina’aro mai ’outou i te reira iā’u nei, ’e i hina’aro na ho’i ’outou ’ia ’āfa’i mai i te mau vārua o te ta’ata iā’u nei, ’a vai a’e ai te ao nei.

10 ’E nō te reira ho’i e fāri’i ’outou i te ’īra’a nō te ’oa’oa ; ’e e pārahi ho’i ’outou i raro i roto i te bāsileia o tō’u ra Metua ; ’oia ïa, e ’ī ’outou i te ’oa’oa, mai tā te Metua i hōro’a mai iā’u i te ’īra’a nō te ’oa’oa ; ’e e riro mau ho’i ’outou mai iā’u nei te huru, ’e ’o vau nei ho’i mai te Metua ra ; ’e te Metua ’e ’o vau nei hō’ē ā ïa.

11 ’E tē fa’a’ite pāpū nei te Vārua Maita’i nō ni’a i te Metua ’e iā’u nei ; ’e te hōro’a mai ra te Metua i te Vārua Maita’i i te mau tamari’i a te ta’ata nei, nō’u nei.

12 ’E i muri a’era, ’ia fa’aoti a’era Iesu i te parau i teie mau parau, ’ua tāpe’a atu ra ’oia ia rātou tāta’itahi i tōna rima, maori rā i nā pipi e to’otoru ’o tē pārahi mai, ’e ’ua reva atu ra ’oia.

13 ’E inaha, ’ua vētea a’era te mau ra’i, ’e ’ua hōpoihia atu ra rātou i ni’a i te ra’i, ’e ’ua hi’o atu ra ’e ’ua fa’aro’o atu ra ho’i i te mau mea ’aore e au i te ta’ata ’ia parau.

14 ’E ’ua ’ōpanihia rātou ’ia fa’ahiti ; ’e ’aita roa ho’i i hōro’ahia te mana ia rātou ’ia fa’ahiti i te mau mea tā rātou i ’ite ’e i fa’aro’o.

15 ’E tei roto ānei rātou i te tino ’e ’aore tei rāpae ānei i te tino, ’aita rātou i ’ite ; ’e mai te mea ra ho’i ia rātou ē, ’ua fa’ahuru-’ē-hia rātou, ’oia ho’i ’ua fa’ahuru-’ē-hia mai teie tino ’i’o ’ei tino tāhuti ’ore, ’ia ti’a ia rātou ’ia ’ite atu i te mau ’ohipa a te Atua.

16 ’E i muri a’era, ’ua rave fa’ahou rātou i te ’ohipa i ni’a i te fenua nei ; ’aita rā rātou i fa’a’ite i te mau mea tā rātou i fa’aro’o ’e i hi’o, nō te fa’auera’a i hōro’ahia mai ia rātou i ni’a i te ra’i.

17 ’E i teienei, e tino tāhuti ānei ’e ’aore rā e tino tāhuti ’ore ānei tō rātou mai te mahana mai nō tō rātou fa’ahuru-’ē-ra’a-hia, ’aita vau i ’ite.

18 ’Āre’a rā teie tā’u i ’ite, mai te au i te pāpa’a parau i pāpa’ihia—’ua hāhaere rātou nā ni’a i te fenua nei, ’e ’ua tāvini atu ra i te mau ta’ata pā’āto’a, ma te tāhō’ē mai ia rātou e rave rahi ’o tei ti’aturi i tā rātou parau i te ’ēkālesia ; ’e ma te bāpetizo ia rātou ; ’e ’ua fāri’i rātou e rave rahi ’o tei bāpetizohia i te Vārua Maita’i.

19 ’E ’ua hurihia rātou i roto i te fare tāpe’ara’a e te mau ta’ata e ’ere nō te ’ēkālesia. ’E ’aita atu ra i ti’a i te mau fare tāpe’ara’a ’ia tāpe’a ia rātou, nō te mea ’ua pararī te reira nā te ’āfara’a.

20 ’E ’ua hurihia rātou i roto i te fenua ; ’āre’a rā ’ua tā’iri rātou i te fenua i te parau a te Atua, ’e nō reira ho’i nā tōna mana i fa’aora mai ia rātou mai roto mai i te mau ’āpo’o hōhonu o te fenua ; ’e nō reira ’aita i ti’a i taua feiā ra ’ia ’ō i te mau ’āpo’o hōhonu nō te tāpe’a noa ia rātou.

21 E toru taime tō rātou hurira’ahia i roto i te umu auahi ’e ’aita roa rātou i fāri’i i te hō’ē pēpē.

22 E piti taime tō rātou hurira’ahia i roto i te ’āpo’o rahi o te mau ’ānimara ’ōviri ra ; ’e inaha ’ua ha’uti noa rātou i te mau ’ānimara mai te tamari’i e ha’uti noa ra i te fanau’a māmoe ra, ’e ’aita roa i fāri’i i te hō’ē pēpē.

23 ’E i muri a’era, ’ua haere atu ra rātou i rotopū i te mau ta’ata ato’a o Nephi, ’e ’ua poro haere atu ra i te ’evanelia a te Mesia i te mau ta’ata ato’a i ni’a i te fenua ; ’e ’ua fa’afāriuhia mai rātou i te Fatu, ’e ’ua tāhō’ēhia mai i te ’ēkālesia a te Mesia, ’e ’ua nā reira te mau ta’ata nō taua u’i ra i te ha’amaita’ihia, mai te au i te parau a Iesu.

24 ’E i teienei, tē fa’aoti nei au, ’o Moromona, i te parau i teie mau mea i teie nei taime.

25 Inaha, ’ua fātata roa vau i te pāpa’i i te mau i’oa o te mau ta’ata ’o tē ’ore e tāota i te pohe, ’āre’a rā ’ua ’ōpani te Fatu iā’u, nō reira ’aita vau e pāpa’i i te reira, ’e ’ua hunahia ho’i te reira i tō te ao nei.

26 Inaha rā, i ’ite na vau ia rātou, ’e i tāvini mai na ho’i rātou iā’u.

27 ’E inaha, e tae atu rātou i rotopū i te mau ’Ētene, ’e ’aita roa ho’i te mau ’Ētene e ’ite ē ’o vai rātou.

28 E tae ato’a atu rātou i rotopū i te mau ’āti Iuda, ’e ’aita roa ho’i te mau ’āti Iuda e ’ite ē ’o vai rātou.

29 ’E a muri a’era, ’ia tae i te tau e au i tā te Fatu ’ōpuara’a pa’ari, ’e e riro rātou i te tāvini i tō te mau ’ōpū ato’a nō ’Īserā’ela i ha’apurarahia, ’e i tō te mau nūna’a ato’a, tō te mau ’ōpū ato’a, tō te mau reo ato’a ’e te mau ta’ata ato’a, ’e nā rātou e arata’i mai mai roto ia rātou ra i te mau ta’ata e rave rahi ia Iesu, ’ia fa’ati’ahia tō rātou ra hina’aro, ’e ’oia ato’a nō te mana o te Atua i roto ia rātou ra e ti’a ai ia rātou ’ia fa’a’ite pāpū atu i te ta’ata.

30 ’E ’ua riro rātou mai te mau melahi a te Atua ra, ’e ’ia pure atu rātou i te Metua nā roto i te i’oa o Iesu, e ti’a ia rātou ’ia fa’a’ite atu ia rātou iho i te ta’ata mai te au i tō rātou ra mana’o.

31 Nō reira, e mau ’ohipa rahi ’e te māere tē ravehia e rātou hou te mahana rahi e tae mai ai, ’e e ti’a māite atu ai te mau ta’ata ato’a i mua i te vāhi ha’avāra’a a te Mesia.

32 ’Oia ïa ’e i rotopū ho’i i te mau ’Ētene e ’ohipa rahi ’e te māere tē ravehia e rātou, hou taua mahana ha’avāra’a ra.

33 ’E ’āhiri tei ia ’outou ra te mau pāpa’ira’a mo’a ato’a ’o tē fa’a’ite ra i te ’ā’amu nō te mau ’ohipa māere ato’a a te Mesia, e ’ite ïa ’outou, ’ia au i te mau parau a te Mesia ē, e tupu mau teie mau mea.

34 ’E ’auē ho’i ’oia ’o tē ore e ha’apa’o i te mau parau a Iesu, ’e ’ia rātou ato’a ’o tāna i mā’iti ’e i tono atu i rotopū ia rātou ra ; ’e ’o ’oia ’o tē ’ore e fāri’i i te mau parau a Iesu ’e i te mau parau a te feiā ’o tāna i tono mai ra, e ’ore ato’a ïa rātou e fāri’i iāna ; ’e nō reira, e ’ore ato’a ’oia e fāri’i iāna ’ia tae i te mahana hope’a ra.

35 E mea huru maita’i a’e ’āhiri ’aita rātou i fānauhia mai. Tē mana’o ra ānei ho’i ’outou ē, e ti’a ia ’outou ’ia fa’a’ore i te fa’autu’ara’a a te Atua ’o tei fa’aririhia ’ia tae mai i ni’a iho ia ’outou, ’e ’o tei ta’ata’ahihia e te ’āvae ta’ata, e noa’a ai te fa’aorara’a i te ta’ata ?

36 ’E i teienei, inaha, i parau na vau nō ni’a ia rātou ’o tei mā’itihia e te Fatu, ’oia ïa, i te to’otoru i hōpoi-roa-hia i ni’a i roto i te mau ra’i, ’e ’aita vau i ’ite ē ’āhiri ’ua tāmāhia ānei tō rātou tino tāhuti ’ei tino tāhuti ’ore—

37 Inaha rā, mai te taime au i pāpa’i ai i te reira, ’ua ui atu vau i te Fatu, ’e ’ua fa’a’ite mai ’oia iā’u ē, e mea ti’a roa ’ia fa’ahuru-’ē-hia tō rātou mau tino, ’e ’ia ’ore rā e mea ti’a roa ïa ia rātou ’ia tāota i te pohe.

38 Nō reira, ’ia ’ore rātou ’ia tāota i te pohe, e mea ti’a roa ’ia fa’ahuru-’ē-hia tō rātou mau tino, ’ia ’ore rātou ’ia fāri’i i te māuiui ’e te ’oto, maori rā nō te mau hara a tō te ao nei.

39 I teienei, ’aita teie fa’ahuru-’ē-ra’a i ’aifāito i te fa’ahuru-’ē-ra’a ’o tē tupu i te mahana hope’a ; ’āre’a rā ’ua tupu te hō’ē fa’ahuru-’ē-ra’a i ni’a iho ia rātou, ’e nō reira ho’i ’aita roa tō Sātane e mana i ni’a ia rātou, e ti’a ai iāna ’ia fa’ahema ia rātou ; ’e ’ua ha’amo’ahia rātou i te tino, ’e e mea mo’a rātou, ’e ’aita roa e ti’a i te mau mana nō te fenua nei ’ia tāpe’a ia rātou.

40 ’E e vai noa rātou mai te reira te huru ē tae noa atu i te mahana ha’avāra’a a te Mesia ; ’e i taua mahana ra e fāri’i ai rātou i te fa’ahuru-’ē-ra’a rahi a’e, ’e e fāri’ihia ai i roto i te bāsileia o te Metua ’e e ’ore roa e haere fa’ahou i rāpae, e pārahi rā i pīha’i iho i te Atua ē a muri noa atu i roto i te mau ra’i.