Pāpa’ira’a mo’a
3 Nephi 5


Pene 5

’Ua tātarahapa te mau ’āti Nephi ’e ’ua fa’aru’e roa i tā rātou mau hara—’Ua pāpa’i Moromona i te ’ā’amu o tōna mau ta’ata ’e ’ua a’o atu ’oia i te parau mure ’ore ia rātou—E ha’aputuputuhia mai ’Īserā’ela i muri mai i tōna ha’apurara-maoro-ra’a-hia. Fātata 22–26 M.M.

1 ’E i teienei, inaha, ’aita roa te hō’ē a’e ta’ata ora i rotopū i te mau ta’ata ato’a o Nephi i fē’a’a noa a’e i te mau parau ’o tā te mau peropheta mo’a ato’a i parau ; nō te mea ’ua ’ite rātou ē, ’ia tupu mau ïa te reira e ti’a ai.

2 ’E ’ua ’ite rātou ē, e mea ti’a roa i te Mesia ’ia tae mai, nō te mau tāpa’o e rave rahi i fa’a’itehia, mai te au i te mau parau a te mau peropheta ; ’e nō te mau mea i tupu a’ena, ’ua ’ite rātou ē, e mea ti’a roa i te mau mea ato’a ’ia tupu mai te au i tei parauhia na.

3 Nō reira, ’ua fa’aru’e rātou i tā rātou mau hara pā’āto’a, ’e tā rātou mau ’ohipa vi’ivi’i, e tā rātou mau ’ohipa tai’ata, ’e ’ua tāvini atu ra i te Atua ma te itoito i te ao ’e i te pō.

4 ’E i teienei, i muri a’era, i muri iho i tō rātou ravera’a i te feiā ’eiā haru ’ei feiā mau-’āuri, ’aita te hō’ē ta’ata i toe ’aore i taparahihia, ’e ’ua huri atu ra i te feiā mau-’āuri i roto i te fare tāpe’ara’a, ’e ’ua a’o atu ra i te parau a te Atua ia rātou ; ’e ’o rātou pā’āto’a ’o tei tātarahapa i tā rātou mau hara ’e ’o tei fa’aoti i te hō’ē fafaura’a ē ’aita roa rātou e taparahi fa’ahou i te ta’ata, ’ua hōro’ahia ïa tō rātou ti’amāra’a ’ia haere.

5 ’Āre’a rā ’o rātou pā’āto’a ’o tei ’ore i fa’aoti i te hō’ē fafaura’a, ’e ’o tei tāpe’a noa i tō rātou mau mana’o huna i roto i tō rātou ’ā’au nō te taparahi i te ta’ata ; ’oia ïa, ’e ’o rātou pā’āto’a ’o tei ’itea i te paraura’a i te mau parau ha’amata’u i tō rātou mau taea’e, ’ua fa’ahapahia ïa rātou ’e ’ua fa’autu’ahia mai te au i te ture.

6 ’E ’ua nā reira rātou i te ha’amou i taua mau pupu ’ohipa parauti’a ’ore, ’e te ’ohipa huna, ’e te ’ohipa vi’ivi’i, ’e i roto ato’a i te reira tē vai ra te mau ’ohipa ’ī’ino rahi ’e te mau taparahira’a ta’ata e rave rahi.

7 ’E ’o te hope’a te reira nō te piti ’ahuru ’e ma piti o te matahiti, ’e te piti ’ahuru ’e ma toru ato’a o te matahiti, ’e te piti ’ahuru ’e ma maha, ’e te piti ’ahuru ’e ma pae ; ’e nō reira ’ua hope roa te matahiti e piti ’ahuru ’e ma pae.

8 E rave rahi te mau mea i tupu, ’e i roto i te hi’ora’a o te tahi pae, e mea rahi ïa ’e te fa’ahiahia ; ’āre’a rā, ’aita te reira e ti’a ’ia pāpa’ihia i roto i teie nei buka ; ’oia ïa, ’aita e ō i roto i teie nei buka te hānerera’a o te tufa’a nō te mau mea i ravehia i rotopū i te mau ta’ata e rave rahi i roto i te ārea nō te piti ’ahuru ’e ma pae matahiti.

9 Inaha rā, tē vai ra te mau pāpa’a parau ’e tei roto i te reira te mau ’ohipa i tupu i ni’a i teie mau ta’ata ; ’e ’ua pāpa’ihia ho’i te tahi ’ā’amu poto ’e te parau mau nō te reira e Nephi.

10 Nō reira, ’ua pāpa’i au i tā’u nei pāpa’a parau nō teie nei mau mea mai te au i te pāpa’a parau a Nephi ra, ’o tei ’ō’otihia i ni’a i te mau ’api i parauhia, te mau ’api a Nephi.

11 ’E inaha, tē pāpa’i nei au i teie nei pāpa’a parau i ni’a i te tahi mau ’api ’o tā’u i hāmani i tō’u iho nā rima.

12 ’E inaha, ’ua parauhia vau ’o Moromona, ’e ’ua topahia i ni’a iā’u te i’oa o te fenua ra nō Moromona, ’oia te fenua tā Alama i fa’ati’a i te ’ēkālesia i rotopū i te mau ta’ata ; ’oia ïa, te ’ēkālesia mātāmua i fa’ati’ahia i rotopū ia rātou i muri a’e i tō rātou ’ōfatira’a i te ture.

13 Inaha, e pipi au nā Iesu Mesia, te Tamaiti a te Atua. ’Ua pi’ihia vau e āna ’ia a’o atu i tāna parau i rotopū i tōna mau ta’ata, ’ia ti’a ia rātou ’ia fāri’i i te ora mure ’ore.

14 ’E ’ua ti’a roa, mai te au i tō te Atua hina’aro—’ia manuia te mau pure a te mau ta’ata i pohe na mai te au i tō rātou fa’aro’o, ’e e mau ta’ata mo’a ana’e ho’i rātou—’ia pāpa’i au i te hō’ē pāpa’a parau nō teie mau mea i ravehia.

15 ’Oia ïa, i te hō’ē pāpa’a parau iti nō te mau mea i tupu mai te taime Lehi i fa’aru’e ai i Ierusalema ē tae roa mai i teie taime.

16 Nō reira tē pāpa’i nei au i tā’u nei pāpa’a parau nō roto mai i te mau ’ā’amu i pāpa’ihia ’e te mau ta’ata nā mua atu iā’u nei, ē tae roa mai i tō’u iho nei mahana.

17 ’E i reira ho’i e pāpa’i ai au i te hō’ē pāpa’a parau nō te mau mea i ’itea e tō’u iho nei mata.

18 ’E ’ua ’ite ho’i au ē, e mea ti’a ’e e parau mau te pāpa’a parau tā’u i pāpa’i ; ’āre’a rā tē vai ra e rave rahi mau mea ’aita e ti’a ia mātou ’ia pāpa’i nō te huru o tō mātou reo.

19 ’E i teienei, tē fa’aoti nei au i tā’u parau i te mau mea nō ni’a iā’u iho nei, ’e e tāmata vau i te pāpa’i i tā’u ’ā’amu nō ni’a i te mau mea i tupu ’ē nā mua iā’u.

20 ’O Moromona vau nei, ’e e hua’ai mau vau nō Lehi. ’E ’ua ti’a roa iā’u ’ia ’ārue i tō’u Atua ’e tō’u Fa’aora ’o Iesu Mesia, i te mea ē ’ua arata’i mai ’oia i tō mātou mau metua i rāpae i te fenua ra nō Ierusalema, (’e ’aore ïa i ’iteahia i te ta’ata, maori rā ’o ’oia ’e te feiā ’o tāna i arata’i mai i rāpae i taua fenua ra) ’e ’ua hōro’a mai ’oia iā’u ’e i tō’u mau ta’ata i te ’ite rahi nō ni’a i te fa’aorara’a o tō mātou nei vārua.

21 ’Oia mau roa, ’ua ha’amaita’i mai ’oia i te ’utuāfare o Iakoba, ’e ’ua aroha mai ho’i ’oia i te hua’ai o Iosepha.

22 ’E no reira ho’i ’a ha’apa’o maita’i ai te hua’ai o Lehi i tāna ra mau fa’auera’a, ’ua ha’amaita’i mai ’oia ia rātou ’e ’ua ha’amanuia ia rātou mai te au i tāna ra parau.

23 ’Oia ïa, e fa’atae fa’ahou ’oia i te hō’ē toe’a o te hua’ai o Iosepha i te ’ite i te Fatu tō rātou Atua.

24 ’E ’oia mau roa mai te Fatu e ora nei, e ha’aputuputu mai ’oia mai nā tufa’a e maha o te ao nei i te toe’a o te hua’ai o Iakoba, ’o tei ha’apurarahia i te ātea nā roto i te ao ato’a nei.

25 ’E mai tāna i fafau atu i te ’utuāfare pā’āto’a o Iakoba, e riro ïa te fafaura’a tāna i fafau atu i te ’utuāfare o Iakoba i te tupu i tōna tau mau ra, e tae atu ai i te fa’aho’ira’ahia te ’utuāfare pā’āto’a o Iakoba i te ’ite nō te fafaura’a ’o tāna i fafau atu ia rātou ra.

26 ’E i reira rātou e ’ite ai i tō rātou Tāra’ehara, ’oia ia Iesu Mesia, te Tamaiti a te Atua ; ’e i reira rātou e ha’aputuputuhia mai ai mai nā tufa’a e maha o te ao nei i ni’a i tō rātou iho mau fenua, i te vāhi nō reira mai ho’i rātou i te ha’apurarara’ahia ; ’oia ïa, mai te Fatu e ora ra, e nā-reira-hia ïa. ’Āmene.