1 Ma o lenei sa oo ina toe foi atu tagata sa Nifaē i o latou lava laueleele i le tausaga e luasefulu ma le ono, o tane taitoatasi uma, ma lona aiga, ana lafu ma ana fagaga, ana solofanua, ma ana povi, ma soo se mea o mea uma lava sa ia i latou.

2 Ma sa oo ina sa latou le i faaaogaina a latou meaai uma; o lea sa latou ave ai faatasi ma i latou mea uma sa latou le i faaaogaina, o a latou saito uma o ituaiga eseese, ma a latou auro, ma a latou ario, ma a latou mea taua uma, ma latou toe foi atu i o latou lava laueleele ma a latou meatotino, i le itu i matu ma le itu i saute, i le laueleele i matu ma le laueleele foi i saute.

3 Ma sa latou tuu atu i tagata faomea na o e na ulu i se feagaiga e tausi le filemu o le laueleele, o e na mananao ia tumau pea o ni sā Lamanā, ni laueleele, e tusa ma lo latou toatele, ina ia mafai ona latou maua, ia latou galuega, ni mea e ola ai; ma sa faapea ona latou faatuina o le filemu i le laueleele atoa.

4 Ma sa toe amata ona latou manuia ma faasolo ina uluuluola tele; ma sa oo ina mavae atu le tausaga e luasefulu ma le ono ma le luasefulu ma le fitu, ma sa i ai le maopoopo tele i le laueleele; ma sa latou faia a latou tulafono e tusa ma le aiā tutusa ma le fai mea tonu.

5 Ma o lenei sa leai se mea e tasi i le laueleele atoa e taofia ai tagata mai le manuia e le aunoa, vagana ai ua latou pa’u’ū atu i le solitulafono.

6 Ma o lenei o Kitekitonae, ma le faamasino, o Lakoneu, ma i latou uma o e na tofia e avea ma taitai, o i latou ia na faatuina lenei filemu tele i le laueleele.

7 Ma sa oo ina tele ni aai fou sa faatutuina, ma sa tele foi aai tuai sa toe faafouina.

8 Ma sa tele aualatetele na fausia, ma tele auala na faia, ia sa fesootai atu ai mai lea aai i lea aai, ma mai lea laueleele i lea laueleele, ma mai lea nofoaga i lea nofoaga.

9 Ma sa faapea ona mavae atu o le tausaga e luasefulu ma le valu, ma sa i ai pea i tagata le filemu e le aunoa.

10 Peitai ina ua oo i le tausaga e luasefulu ma le iva sa amata ona i ai o ni finauga i totonu o tagata; ma o ni isi sa faafefeteina i le ^afaamaualuluga ma le mitamitavale ona o a latou oa sa matua tele naua, ioe, sa oo lava i le faia o sauaga tetele;

11 Ona sa toatele tagata faatauoloa sa i ai i le laueleele, ma tele foi loia, ma le au mautofi e toatele.

12 Ma sa amata ona faailoga tagata i o latou tulaga, e tusa ma a latou ^aoa ma o latou avanoa mo aoaoga; ioe, e i ai ni isi sa le malamalama ona o lo latou matitiva, ma ni isi sa latou maua aoaoga tetele ona o a latou oa.

13 O isi sa faafefeteina i le faamaualuluga, ma o isi sa lotomaualalalo lava; o isi sa latou faafoi atu le faatiga mo le faatiga mai, a o isi sa latou talia faatiga ma ^asauaga ma puapuaga uiga eseese uma, ma le fia liliu ma toe ^efaatiga atu, ae sa lotomaualalalo ma salamo i luma o le Atua.

14 Ma sa faapea ona oo mai o se le tutusa tele i le laueleele atoa, sa oo ina amata ona vaevaeina le ekalesia; ioe, sa oo lava ina lepetia le ekalesia i le laueleele atoa i le tausaga e tolusefulu, vagana ai nai tagata toaitiiti o sa Lamanā o e na liliu mai i le faatuatuaga moni; ma sa latou le fia o ese mai ai, ona sa latou mausali, ma le maluelueina, ma sa latou loto ma le ^afiliga atoatoa e tausi poloaiga a le Alii.

15 O lenei o le pogai lenei o le amioletonu o tagata—sa maua e Satani le mana tele, e faaoso ai tagata e fai uiga amioletonu eseese uma, ma faafefete ai i latou i le faamaualuluga, ma faaosooso i latou e saili mo le mana, ma le pule, ma oa, ma mea lē aoga o le lalolagi.

16 Ma sa faapea ona taitai ese e Satani loto o tagata e fai uiga amioletonu eseese uma; o lea na latou olioli ai i le filemu mo nai tausaga itiiti.

17 Ma sa faapea, i le amataga o le tausaga e tolusefulu—ona tuuina atu o tagata mo le va o se taimi umi lava ia taitaiina solo e ^atofotofoga a le tiapolo i soo se mea e loto o ia e taitai i ai i latou, ma fai soo se amioletonu sa manao i ai o ia ia latou faia—ma sa faapea lava i le amataga o lenei tausaga, le tausaga lea e tolusefulu, ona latou i ai i se tulaga o le amioleaga matautia tele.

18 O lenei sa latou le agasala i le ^ale malamalama, ona sa latou iloa le finagalo o le Atua e faatatau ia te i latou, ona sa a’oa’o atu ia te i latou; o lea na latou ^efouvale ai e faasaga i le Atua ma le loto i ai.

19 Ma o lenei o aso o Lakoneu, le atalii o Lakoneu, ona sa nofo Lakoneu i le nofoa o lona tamā ma ia pulea le nuu i le tausaga lena, na i ai lenei amioleaga tele.

20 Ma sa amata ona i ai o ni tagata sa ^amusuia mai le lagi ma auina atu, ma tutulai i le lotolotoi o tagata i laueleele uma, ma tala’i ma molimau atu ma le lotoa e uiga i agasala ma amioletonu a tagata, ma molimau atu ia te i latou e uiga i le togiola lea o le a faia e le Alii mo ona tagata, pe faapea, o le toetu mai lea o Keriso; ma sa latou molimau atu ma le faamaoni e uiga i lona ^emaliu ma ona mafatiaga.

21 O lenei sa toatele tagata sa i ai sa feita tele ona o i latou o e na molimau atu e uiga i nei mea; ma o i latou o e na feitai sa faapitoa lava i faamasino sili, ma i latou o e ^asa avea ma faitaulaga sili ma loia; ioe, o i latou uma lava sa avea ma loia sa feitai ia te i latou o e sa molimau atu e uiga i nei mea.

22 O lenei sa leai se loia po o se faamasino po o se faitaulaga sili sa i ai se pule e faasala ai se tasi i le oti vagana ai ua sainia lo latou faasalaga e le kovana o le laueleele.

23 O lenei e toatele i latou sa i ai o e sa latou molimau atu ma le lotoa i mea e faatatau ia Keriso, o e na ave ma fasioti faalilolilo e faamasino, sa le iloa e le kovana o le laueleele lo latou oti seia mavae lo latou oti.

24 O lenei faauta, o lenei mea sa le tusa ai ma tulafono o le laueleele, le tatau lea ona fasiotia o se tagata vagana ai ua ia i latou se pule mai le kovana o le laueleele—

25 O lea na oo mai ai se faitioga i le laueleele o Sara’emila, i le kovana o le laueleele, e faasaga i faamasino ia o e na latou faasalaina i le oti perofeta a le Alii, sa le tusa ai ma le tulafono.

26 O lenei sa oo ina ave i latou ma aumai i luma o le faamasino, ina ia faamasinoina i latou mo le solitulafono lea na latou faia, e tusa ma le ^atulafono lea na tuuina mai e le nuu.

27 O lenei sa oo ina sa i ai i faamasino le toatele o a latou uo ma aiga; ma o e na totoe, ioe, toetoe lava o loia ma faitaulaga sili uma, sa latou faapotopoto faatasi i latou lava, ma ua ’au’au faatasi ma aiga o faamasino na o e o le a faamasinoina e tusa ma le tulafono.

28 Ma sa latou ulu atu i se ^afeagaiga o le tasi ma le isi, ioe, i lena lava feagaiga na tuuina mai e i latou o anamua, o se feagaiga lea na tuuina mai ma faia e le ^etiapolo, e ’au’au faatasi e faasaga i le amiotonu uma lava.

29 O lea sa latou aufaatasi ai e faasaga i tagata o le Alii, ma latou ulu atu i se feagaiga e faaumatia i latou, ma laveai i latou o e na agasala i le fasioti tagata mai le taofimau a le faamasinotonu, lea o le a tuuina atu e tusa ma le tulafono.

30 Ma sa latou faatautee i le tulafono ma aia a lo latou atunuu; ma sa latou osifeagaiga o le tasi ma le isi e fasioti le kovana, ma faatuina se ^atupu i luga o le laueleele, ina ia le toe saoloto le laueleele ae ia pulea e tupu.