Pukfel
3 Nifai 7


Sopun 7

Ewe sou apung mi nap a ninnino, ewe government a tano, iwe ekkewe aramas ra kinikinitiw non einang—Jacob, emon chon koum ngeni Kraist, a winiti kingen ew mwicheich mi monomon—Nifai a afanafana aier me nuku non Kraist—Chon nang ra angang ngeni i iteiten ran, me a amanauata pwin we seni mano—Chommong ra aier me papatais. Arap ngeni Ierin ewe Samon 30–33.

1 Iei nengeni, upwe pwari ngenikemi pwe rese forata emon king won ewe fonu; nge non ei pwan chok ier, ewer, ewe inik ier, ra ninni won ewe nenien mwottun kapung, ewer, ra nii manauei ewe sou apung mi nap won ewe fonu.

2 Iwe ekkewe aramas ra keimufesen emon ngeni pwan emon; iwe ra keimufesen emon seni pwan emon ngeni non einang, emon me emon mwan anongonong won an famini me aramasan me chiechian; iwe iei ra atano ewe government an ewe fonu.

3 Iwe ew me ew einang a finata emon mi nap are emon sou emmwen wor; iwe iei ra winiti einang me sou emmwenin einang.

4 Iei nengeni, ese wor emon me neir tiwenon chok ika a wor an chommong famini me chommong aramasan me chiechian; iei minne ar kewe einang ra fokkun watte chochor.

5 Iei ekkei meinisin ra fis, iwe iei ese mwo wor maun me neir; iwe ekkei angangangaw meinisin ra fen fis won ekkewe aramas pokiten ra fangeta inisir ngeni manamanen ewe Setan.

6 Iwe ekkewe annukun ewe government ra tano, pokiten ewe mwicheich mi monomon an chiechien me aramasen ir ekkewe ra nii manauen ekkewe soufos.

7 Iwe ra efisi ew ennetin anini fengen non ewe fonu, ina popun pwe napengeni meinisin kinikinin ekkewe aramas mi kon tupwon ra winiti aramas mi ngaw; ewer, a chok wor ekkoch aramas mi tupwon me neir.

8 Iwe iei wonu ier esamo fen wesino seni ewe fansoun napengeni kinikinin ekkewe aramas ra kunnuno seni ar wenechar, usun ewe konak ngeni mwusan, are usun ewe pik ngeni an a sokopen non ewe pwakak.

9 Iei ei mwicheich mi monomon, minne a fen efisi unusen angangangaw won ekkewe aramas, ra ionfengeni inisir, me ra enenia mwer emon mwan ewe ra eita ngeni Jacob;

10 Iwe ra eita ngeni i nour king; iei minne a winiti emon king won ei mwicheich mi ngaw; iwe i emon me nein ekkewe mi unusen nap ewe a fen kapas ne ungeni ekkewe soufos ekkewe ra pwarata usun Jises.

11 Iwe non ewe fansoun pwe rese kon pochokun non chochor usun ekkewe einangen ekkewe aramas, ekkewe ra chufengen tiwenon chok nour kewe sou emmwen ne forata ar kewe annuk, emon me emon anongonong won an einang; nge inamo ir chon koum fengen; me nukun ar rese aramas tupwon, ra chok chufengen non koputen ir ekkewe ra tonong non ew pwon pwe repwe atano ewe government.

12 Iei minne, Jacob a kuna pwe ekkewe chon koum ngeni ir ra kon chommong nap senir, i ewe kingen ewe mwicheich, iei minne a annuku noun kewe aramas pwe repwe poputani ar su ngeni non ewe kinikinin ennefenin ewe fonu, iwe ikewe repwe aueta ngeni ir pwisin ew muu, tori ar repwe chufengen me ren chon rikino, (pun a otupereno pwe epwe chommong chon rikino) iwe ar pochokun a naf ne fiu ngeni ekkewe einangen ekkewe aramas; iwe ra fori.

13 Iwe a kon mwitir ar we karis ina popun ese tongeni kouno tori ar ra fen towaweno seni an ekkewe aramas repwe tori ir. Iwe iei a muchuno ewe inik ier; iwe iei ekkewe mwokutukutun ekkewe aramasen Nifai.

14 Iwe non ewe fansoun non ewe inik me ewin ier pwe ra keimufesen non einang, emon me emon mwan anongonong won an famini, aramasan me chiechian; nge inamo ra etipeew pwe resap maun emon ngeni pwan emon; nge rese tipefengen usun ar kewe annuk, me napanapen ar we government, pun ra forireta anongonong won ekiekin ekkewe ir nour mi nap me nour sou emmwen. Nge ra forata annuk mi fokkun tichik pwe esap wor ew einang epwe ungeni pwan ew, ina popun pwe non ekkoch ukukun a wor ar kinamwe non ewe fonu; nge inamo, netiper ra kunnuno seni ewe Samon ar Kot, me ra monei ngeni fau ekkewe soufos me aturareu seni me neir.

15 Iwe non ewe fansoun pwe Nifai—pokiten a fen chu me ren chon nang me pwan mongungun ewe Samon, iei minne pokiten a kuna chon nang, me pokiten i emon chon kuna, me pokiten a wor manaman a kawor ngeni i pwe i epwe tongeni sinei usun ewe angangen Kraist, me pwan i emon chon kuna ar mwitir niwin seni wenechar ngeni ar fofforungaw me angang mi anieput;

16 Iei minne, pokiten a netipengaw ren pochokunen netiper me chunnunon ar ekiek—a feino neir non ena pwan chok ier, me poputa ne pwarata, non pwaracho, aier me omusomusen tipis non nuku non ewe Samon Jises Kraist.

17 Iwe a afanafana chommong mettoch ngeni ir; iwe meinisin ir rese tongeni makketiw, me ew kinikinin me neir esap naf, iei minne rese makketiw non ei puk. Iwe Nifai a afanafan fiti pochokun me fiti watten nemenem.

18 Iwe non ewe fansoun pwe ra song ren, pwan mwo pokiten a wor an manaman mi napanap nap seni ir, pun ese tufich pwe repwe tongeni nukunukumangei an kewe kapas, pun a fokkun pochokun an we nuku non ewe Samon Jises Kraist ina minne chon nang ra angang ngeni i iteiten ran.

19 Iwe non iten Jises a asueno ekkewe tefin me ngun mi nimengaw; me pwan pwin we i a amanauata seni mano, mwirin ar monei ngeni fau me riaffouni mano me ren ekkewe aramas.

20 Iwe ekkewe aramas ra kuna, me nenengeni, me ra song ren pokiten an we manaman; me a pwan fori chommong manaman, me mwen mesen ekkewe aramas, non iten Jises.

21 Iwe non ewe fansoun pwe ewe inik me ewin ier a wesino, me mi wor nge ekkoch ekkewe ra siwin ngeni ewe Samon; nge meinisin ekkewe ra siwin ra ennetin pwomengeni ekkewe aramas pwe ra fen chu me ren ewe manaman me Ngunun Kot, minne a nom non Jises Kraist, i ewe ra nuku non.

22 Me meinisin ekkewe ra katuruu tefin me non ir, ra chikareta seni ar kewe semwen me ar kewe apwangapwang, me ra ennetin pwarata ngeni ekkewe aramas pwe ra fen memef me ren ewe Ngunun Kot, me ra fen chikareta; me ra pwan pwarano ekkoch esisin me fori ekkoch manaman me nein ekkewe aramas.

23 Iei a pwan wesino ewe inik me ruen ier. Iwe Nifai a afanafan ngeni ekkewe aramas non nepoputan ewe inik me unungatin ier; me a afanafan ngeni ir aier me omusomusen tipis.

24 Iei ua mochen pwe oupwe pwan chechemeni, pwe ese wor emon a emmwen ngeni aier ewe ese papatais ren konik.

25 Iei minne, mi wor ra seikita me ren Nifai, mwan ngeni ei angang, pwe ir meinisin repwe feito ngeni ir repwe papatais ren konik, iwe ei pwe epwe ew pisekin pwarata me ew pwarata me mwen Kot, me ngeni ekkewe aramas, pwe ra fen aier me angei ew omusomusen ar kewe tipis.

26 Iwe mi wor chommong non nepoputan ei ier ekkewe ra papatais ngeni aier; me iei unusen kinikinin ewe ier a wesino.