1 O lenei faauta, o le a ou faaali atu ia te outou sa latou le faatuina se tupu i luga o le laueleele; ae i le tausaga lava lenei, ioe, le tausaga lea e tolusefulu, sa latou faaumatia ai i luga o le nofoa-faamasino, ioe, sa latou fasiotia ai le faamasino sili o le laueleele.

2 Ma sa fevaevaeai le nuu, o le tasi e faasaga i le isi; ma sa latou o eseese, o le tasi mai le isi, i ni ituaiga, ua taitasi le tagata ma alu e tusa ma lona aiga ma lona auaiga ma uo; ma sa faapea ona latou lepeti o le malo o le laueleele.

3 Ma sa tofi e ituaiga taitasi se alii po o se taitai i luga o i latou; ma sa faapea ona avea o i latou ma ituaiga ma taitai o ituaiga.

4 O lenei faauta, sa leai se tasi sa i totonu ia te i latou sa le ia te ia se aiga toatele ma ni auaiga tetele ma ni uo e toatele; o lea na matua toatele ai lava o latou ituaiga.

5 O lenei o nei mea uma sa faia, ma sa lei i ai lava ni taua i totonu ia te i latou; ma sa oo mai lenei amioletonu atoa i luga o tagata ona ua latou ^atuu atu i latou lava i le mana o Satani.

6 Ma sa lepeti ala faatonuina o le malo, ona o le ^afaalapotopotoga faalilolilo a uo ma auaiga o i latou o e na fasiotia perofeta.

7 Ma sa latou faatupuina se finauga tele i le laueleele, sa oo ina toetoe a amioleaga uma ai le vaega toatele o e na amiotonu; ioe, sa toaitiiti lava e amiotonu sa i ai i totonu ia te i latou.

8 Ma sa faapea ona lei mavae atu o le ono tausaga talu ona fuli ese o le vaega toatele o tagata mai lo latou amiotonu, e pei o le uli i ona ^apua’iga, pe e pei o le ‘aumatua i lona lopala.

9 O lenei o le faalapotopotoga faalilolilo lenei, lea na aumaia lenei amioletonu tele i luga o le nuu, sa latou faapotopoto faatasi i latou lava, ma latou tuu i lo latou ulu, se tagata sa latou ta’ua o Iakopo;

10 Ma sa latou ta’ua o ia o lo latou tupu; o lea na avea ai o ia o se tupu i luga o lenei vaega amioleaga; ma o ia o se tasi o tagata sili o le na tuu atu lona leo e tetee ai i perofeta o e na molimau mai ia Iesu.

11 Ma sa oo ina sa le tusa lo latou malosi i le fuainumera aofai e pei o ituaiga o le nuu, o e sa aufaatasi vagana ai le faatutuina e o latou taitai o a latou tulafono, o tagata taitoatasi e tusa mo lona lava ituaiga; ae ui i lea sa fai i latou ma fili; e ui ina sa le o i latou o ni tagata amiotonu, ae sa latou lotogatasi i lo latou inoino ia te i latou o e na osi feagaiga e lepeti le malo.

12 O lea, ina ua vaai atu Iakopo ua sili atu ona toatele o o latou fili nai lo i latou, ona o ia o le tupu o le vaega, o lea na ia faatonu ai ona tagata ia latou ave la latou solaaga i le vaega aupito mamao o le laueleele i matu, ma latou faatuina iina se ^amalo mo i latou lava, seia oo ina faatasi atu ia te i latou tagata faatuiese, (ona sa ia faaseeina i latou e faapea e toatele tagata faatuiese o le a i ai) ma lava ai lo latou malosi e tau ai ma ituaiga o le nuu; ma sa faapea lava ona latou faia.

13 Ma sa televave tele la latou savaliga sa le mafai ona taofia seia oo ina latou o atu i se mea na le mafai ona oo atu i ai le nuu ia te i latou. Ma sa faapea ona iu o le tausaga e tolusefulu; ma sa faapea tulaga o le nuu o Nifae.

14 Ma sa oo i le tausaga e tolusefulu ma le tasi, sa vaevaeina i latou i ituaiga, o tagata taitasi e tusa ma lona aiga, auaiga ma uo; ae ui i lea sa latou faia se maliega latou te le sii taua o le tasi i le isi; peitai sa latou le lotogatasi e faatatau ia latou tulafono, ma lo latou ituaiga o malo, ona sa faatutuina e tusa ma manatu o i latou o e na avea mo o latou alii ma o latou taitai. Peitai sa latou faatutuina ni tulafono patino ia le sopo atu le tasi i le isi, sa oo ina latou maua ai i se tulaga o le filemu i le laueleele; ae ui i lea, sa fuli ese o latou loto mai le Alii lo latou Atua, ma sa latou fetogia perofeta ma tutuli ese i latou mai totonu ia te i latou.

15 Ma sa oo ina ua asia o ^aNifae—e agelu ma le siufofoga foi o le Alii, o lea ina ua vaai o ia i agelu, ma avea o ia o se molimau-vaaitino, ma ina ua uma ona tuuina mai ia te ia o le mana e mafai ai ona ia malamalama e uiga i le misiona a Keriso, ma i le avea ai foi o ia ma molimau-vaaitino i le vave o lo latou foi mai le amiotonu i lo latou amioleaga ma mea inosia;

16 O lea, i lona faanoanoa ona o le maaa o o latou loto ma le tauaso o o latou mafaufau—na alu atu ai o ia ia te i latou i lena lava tausaga, ma amata ona molimau atu, ma le lotoa, le salamo ma le faamagaloina o agasala e ala i le faatuatua i le Alii o Iesu Keriso.

17 Ma e tele mea sa ia auauna atu ai ia te i latou; ma e le mafai ona tusia ia mea uma, ma ua le lava foi na’o se vaega o i latou, o lea ua le tusia ai ia mea i lenei tusi. Ma sa auauna atu Nifae i le ^amana ma le pule tele.

18 Ma sa oo ina latou feitai ia te ia, e oo lava ona ua ia te ia le mana sili atu nai lo i latou, ona sa ^ale mafai ona latou le talitonu i ana upu, ona sa auauna mai agelu ia te ia i aso taitasi, ona o le malosi tele o lona faatuatua i le Alii o Iesu Keriso.

19 Ma sa ia tutuli ese temoni ma ^aagaga lē mama i le suafa o Iesu; ma e oo i lona uso sa ia faatuina mai le oti, ina ua uma ona fetogi o ia e tagata i maa ma mafatia ai i le oti.

20 Ma sa vaai i ai tagata, ma latou molimauina, ma latou feitai ai ia te ia ona o lona mana; ma sa ia faia foi isi vavega e ^atele, i luma o mata o tagata, i le suafa o Iesu.

21 Ma sa oo ina mavae atu le tausaga e tolusefulu ma le tasi, ma sa i ai ni isi ae toaitiiti o e sa liliu mai i le Alii; ae o le toatele o i latou na liliu mai sa latou faailoa moni atu i tagata sa asia i latou e le mana ma le Agaga o le Atua, lea sa ia Iesu Keriso, o le ua latou talitonu i ai.

22 Ma o le toatele o i latou o e na tutuli ese mai ia te i latou o temoni, ma e na faamaloloina mai i o latou ma’i ma o latou vaivaiga, sa latou faaali moni atu i tagata sa galue le Agaga o le Atua i luga o i latou, ma ua faamaloloina i latou; ma sa latou faailoa atu foi faailoga ma sa latou faia ni vavega i totonu o tagata.

23 Sa faapea foi ona mavae atu o le tausaga e tolusefulu ma le lua. Ma sa alaga atu Nifae i tagata i le amataga o le tausaga e tolusefulu ma le tolu; ma sa ia talai atu ia te i latou le salamo ma le faamagaloina o agasala.

24 O lenei ou te manao ia outou manatua foi, sa leai se tasi o e na aumai i le salamo sa lei ^apapatisoina i le vai.

25 O lea, sa faauu e Nifae, ni tagata i lenei auaunaga, ina ia papatisoina i le vai i latou uma o e e o mai ia te i latou, ma e fai lenei mea o se mau ma se molimau i luma o le Atua, ma i tagata, ua latou salamo ma maua se ^afaamagaloga o a latou agasala.

26 Ma e toatele na i ai i le amataga o lenei tausaga sa papatisoina i le salamo; ma sa faapea ona mavae atu o le vaega tele o le tausaga.