1 Ma lenei sa oo ina tusa ma la matou talafaamaumau, ma ua matou iloa ua moni la matou talafaamaumau, aua faauta, o se tagata amiotonu na tausia le talafaamaumau—ona sa ia faia moni lava ^avavega e tele i le ^esuafa o Iesu; ma sa leai se tagata sa mafai ona ia faia o se vavega i le suafa o Iesu vagana ai ua faamamaina o ia mai i mea uma mai lana amioletonu—

2 Ma o lenei sa oo ina afai e leai se sese na faia e lenei tagata i le faitauina o lo matou taimi, ua mavae atu nei le ^atolusefulu ma le tolu o tausaga;

3 Ma sa amata ona tulimatai atu tagata ma le naunautai tele mo le faailoga lea sa tuuina mai e le perofeta o Samuelu, le sa Lamanā, ioe, mo le taimi lea o le a oo mai ai le ^apogisa mo aso e tolu i luga o le laueleele.

4 Ma sa amata ona i ai o masalosaloga ma finauga tetele i totonu o tagata, e ui i le tele naua o ^afaailoga ua uma ona tuuina mai.

5 Ma sa oo i le tolusefulu ma le fa o tausaga, i le masina muamua, i le aso lona fa o le masina, sa to mai ai se uaga tele, o se ituaiga sa lei iloa muamua lava i le laueleele atoa.

6 Ma sa i ai foi se matagi tele ma le matautia na oso mai; ma sa i ai le ^afaititili matautia, sa oo ina ^eluluina ai le eleele atoa e peiseai a vaevaeina ai.

7 Ma sa i ai uila malama tetele, o ni ituaiga sa lei iloa muamua lava i le laueleele atoa.

8 Ma sa mu le ^aaai o Sara’emila.

9 Ma sa goto le aai o Moronae i totonu o le loloto o le sami, ma sa malelemo ai e na nonofo ai.

10 Ma sa ava’e i luga eleele o le aai o Moronaea, sa oo ina avea le mea sa i ai le aai ma mauga tele.

11 Ma sa i ai se faafanoga tele i le laueleele i saute.

12 Ae faauta, sa i ai se faafanoga tele ma matautia sili atu i le laueleele i matu; aua faauta, sa suia foliga o le laueleele atoa, ona o le matagi ma asiosio, ma faititili ma uila, ma le luluina tele naua o le laueleele atoa;

13 Ma sa malepelepe ^aaualatetele, ma faaleagaina ala laugatasi, ma sa faagaoaina le tele o mea laugatasi.

14 Ma sa tele aai tetele ma tautaua na ^agogoto, ma e tele na mu, ma e tele na luluina seia oo ina pa’u’ū ifo o latou fale i le eleele, ma fasiotia ai e na nonofo ai, ma tuufua ai nofoaga.

15 Ma sa i ai ni isi o aai sa tutu pea; ae sa matua tele lava naua lo latou faaleagaina, ma e toatele e sa i ai i na aai sa fasiotia.

16 Ma sa i ai ni isi o e na lelea ese i le asiosio; ma pe o fea ua latou o atu i ai, e leai se tagata na te iloaina, pau o le mea ua latou iloa na lelea ese i latou.

17 Ma sa faapea ona suia o foliga o le eleele atoa, ona o matagi, ma faititili, ma uila, ma le luluina o le eleele.

18 Ma faauta, sa mavaevae ^apapa; sa nuti i luga o le eleele atoa, sa oo ina maua i fasi maa ta’eta’ei, ma i matofitofi ma mavetevete, i luga o le laueleele atoa.

19 Ma sa oo ina ua uma faititili, ma uila, ma le timu, ma le matagi, ma le luluina o le eleele—aua faauta, sa oo mai nei mea mo le tusa ma le umi e ^atolu itula; ma ua fai mai ni isi sa tele atu le taimi i lo lena; ae ui i lea, o nei mea tetele ma matautia sa faia e tusa ma le umi e tolu itula—ma aua faauta foi, ua oo mai se pouliuli i luga o le laueleele atoa.

20 Ma sa oo ina i ai se pouliuli taaligoligoa i luga o le laueleele atoa, sa oo ina mafai ai e tagata sa aumau ai o e sa lei pa’u’ū ona ^alagona le ^eausa o le pouliuli;

21 Ma sa le mafai ona i ai o se malamalama, ona o le pouliuli, po o ni moli gao, po o ni sulu; pe na mafai foi ona tutu o se afi ia latou fafie lelei tele ma le mamago, ina ia le mafai lava ona i ai o se malamalama;

22 Ma sa leai se malamalama sa vaaia, po o se afi, po o sina emoemo, po o le la, po o le masina, po o fetu, ona o le tetele naua o le pouliuli lea sa i ai i luga o le laueleele.

23 Ma sa oo ina i ai pea lenei pouliuli mo le umi e ^atolu aso ma sa leai se malamalama na vaaia; ma sa i ai le auega tele ma le uio ma le tagitu’i i totonu o tagata uma e le aunoa; ioe, sa tele lava le oi o tagata, ona o le pouliuli ma le faafanoga tele lea ua oo mai i o latou luga.

24 Ma i se tasi nofoaga sa faalogoina i latou o fetagisi, fai mai: E, pe a na tatou salamo ae lei oo mai lenei aso tele ma le matautia, po ua faasaoina o tatou uso, ma po ua le mu i latou i lena aai tele o ^aSara’emila.

25 Ma i se tasi foi nofoaga sa faalogoina i latou o fetagisi ma faanoanoa, fai mai: E, pe a na tatou salamo ae lei oo mai lenei aso tele ma le matautia, ma tatou le fasiotia ma fetogi perofeta, ma tutuli ese i latou; semanu po ua faasaoina o tatou tinā ma o tatou afafine lalelei, ma a tatou fanau, ma po ua le tanumia i lena aai tele o Moronaea. Ma sa faapea foi ona tele ma matautia o le uio o tagata.