1 Ut kik’ulman naq kinume’ li xkaalaju xka’k’aal chihab’, ut jo’kan ajwi’ li ro’laju xka’k’aal, ut k’ehomaq reetal, eb’ lix tzolom li Jesus ke’xk’uub’ chaq jun lix iglees li Kristo sa’ chixjunileb’ li ch’och’ sa’ xsutam. Ut jo’ k’ihaleb’ li ke’wulak rik’ineb’, ut ke’xjal xk’a’uxl chi yaal chirix xmaakeb’, ke’kub’e xha’ sa’ lix k’ab’a’ li Jesus; ut ke’xk’ul ajwi’ li Santil Musiq’ej.

2 Ut kik’ulman sa’ li xwaqlaju xka’k’aal chihab’, chixjunileb’ li tenamit ak ke’jalman xch’ool choq’ re li Qaawa’, chiru chixjunil lix b’een li ch’och’, eb’ laj Nefita jo’eb’ ajwi’ laj Lamanita, ut moko ke’wan ta li wech’ok-ib’ ut li jachok-ib’ sa’ xyanqeb’, ut li junjunq chi winq kixb’aanu li k’a’ru tiik chirib’ileb’ rib’.

3 Ut kiwan ^achixjunil li k’a’aq re ru reheb’ sa’ komonil sa’ xyanqeb’, jo’kan naq maak’a’ ani b’ihom ut neb’a’, sa’ moosil ut chi ach’ab’anb’il; chixjunileb’ b’an ke’ach’ab’aak, ut ke’tz’aqon sa’ li choxahil maatan.

4 Ut kik’ulman naq kinume’ ajwi’ li xwuqlaju xka’k’aal chihab’, ut toj kikana li tuqtuukilal sa’ li ch’och’.

5 Ut ke’wan li xninqal ru ut sachb’a-ch’oolejil k’anjel k’anjelanb’il xb’aaneb’ lix tzolom li Jesus, jo’kan naq ^ake’xk’irtesiheb’ li yaj, ut ke’xwaklesiheb’ li kamenaq, ut ke’xk’e chi b’eek li yeeq roq, ut chixk’ulb’al rilob’aal li mutz’, ut chi ab’ink li tz’ap xik; ut li k’iila paay chi ^bsachb’a-ch’oolej ke’xk’anjela sa’ xyanqeb’ li ralal xk’ajoleb’ li winq; ut maak’a’ chik li ke’xk’anjela wi’ li sachb’a-ch’oolej, ka’ajwi’ sa’ lix k’ab’a’ li Jesus.

6 Ut chi jo’kan kinume’ li xwaqxaqlaju xka’k’aal chihab’, ut jo’kan ajwi’ li xb’elelaju xka’k’aal, ut li xb’een roxk’aal, ut li xkab’ roxk’aal, relik chi yaal, toj reetal ajwi’ naq numenaq b’eleeb’ roxk’aal chihab’, ut jo’kan ajwi’ li xjunlaju roxk’aal, ut li xkab’laju roxk’aal; relik chi yaal, toj reetal ajwi’ naq kinume’ b’elelaju roxk’aal chihab’.

7 Ut li Qaawa’ kixk’eheb’ chi usaak chi numtajenaq sa’ li ch’och’; relik chi yaal, jo’kan naq ke’xkab’laheb’ wi’chik li tenamit b’ar wi’ ke’wan chaq chi k’atb’il li tenamit.

8 Relik chi yaal, li nimla tenamit ajwi’ a’an ^aTzarahemla ke’xk’e wi’chik chi kab’lamank.

9 A’b’an ke’wan k’iila tenamit li ^ake’sub’e’ chaq, ut kitaqe’ li ha’ sa’ xna’ajeb’ a’an, jo’kan naq ink’a’ ke’ru chi ak’ob’resiik li tenamit a’in.

10 Ut anajwan, k’ehomaq reetal, kik’ulman naq ke’kawu xmetz’ew lix tenamit laj Nefi, ut q’axal sa’ junpaat ke’k’ihan, ut ke’ok choq’ jun tenamit q’axal ^achaq’aleb’ ru ut sa rilb’aleb’.

11 Ut ke’sumla ut ke’k’ehe’ chi sumlaak, ut ke’osob’tesiik jo’ chanru lix k’ihal li yeechi’ihom li kixk’e chaq li Qaawa’ choq’ reheb’.

12 Ut moko ke’b’eek ta chik chirix li ^ab’aanunb’il na’leb’ ut li k’ojob’anb’il k’anjel re lix ^bchaq’rab’ laj Moises; ke’b’eek b’an chirix li taqlahom li ke’xk’ul chaq rik’in lix Qaawa’ ut lix Dios, ut ke’kana sa’ li ^ckuyuk sa’ ut li tijok, ut sa’ xch’utub’ankil rib’ chi kok’ aj xsa’ re te’tijoq ut te’rab’i li raatin li Qaawa’.

13 Ut kik’ulman naq moko kiwan ta li wech’ok-ib’ sa’ xyanq chixjunil li tenamit, sa’ chixjunil li ch’och’; a’ut ke’wan xninqal ru sachb’a-ch’oolej k’anjelanb’il sa’ xyanqeb’ lix tzolom li Jesus.

14 Ut kik’ulman naq kinume’ li xjunlaju xkaak’al chihab’, ut jo’kan ajwi’ li xkab’laju xkaak’al, relik chi yaal ut, toj reetal naq numenaq b’elelaju xkaak’al chihab’; relik chi yaal, kinume’ ajwi’ jun cient chihab’, ut eb’ lix tzolom li Jesus, li kixsik’eb’ chaq ru, ak xikenaqeb’ chixjunil sa’ lix ^ahilob’aal li Dios, ka’ajwi’ naq ke’wan li ^boxib’ li toj te’kanaaq; ut ke’wan chik li ^ctzolom ^dk’ojob’anb’il sa’ xna’ajeb’ a’an; ut jo’kan ajwi’ naab’al re li tasal tenamit a’an ak xe’kam.

15 Ut kik’ulman naq ^amaak’a’ li wech’ok-ib’ sa’ li ch’och’, xb’aan lix rahom li Dios li kiwan sa’ xch’ooleb’ li tenamit.

16 Ut ^amaak’a’ li kaqalink, chi moko li wech’ij-ib’, chi moko li choqink, chi moko li ko’b’eetak yumb’eetak, chi moko li tik’ti’ik, chi moko li kamsink, chi moko k’a’ruhaq paay chi ^byib’ ru k’a’uxlej; ut relik chi yaal naq moko kiru ta kiwan junaq tenamit li ^csa wi’chik xch’ool sa’ xyanq chixjunileb’ li tenamit li yo’ob’tesinb’ileb’ xb’aan ruq’ li Dios.

17 Maak’a’eb’ aj elq’, chi moko aj kamsinel, chi moko ke’wan aj Lamanita, chi moko k’a’ruhaq paay chik chi aj -ita; ^ajunajeb’ b’an naq ke’wan, ralal xk’ajoleb’ li Kristo, ut aj eechanihomeb’ re li rawa’b’ejihom li Dios.

18 Ut k’a’jo’ naq osob’tesinb’ileb’! Xb’aan naq li Qaawa’ kirosob’tesiheb’ sa’ chixjunil lix b’aanuhomeb’; relik chi yaal, ke’osob’tesiik ajwi’ ut ke’k’ehe’ chi usaak toj reetal naq numenaq jun cient rik’in lajeeb’ chihab’; ut li xb’een tasal tenamit chirix li Kristo ak kamenaqeb’ chik, ut maajun wech’ok-ib’ kiwan sa’ chixjunil li ch’och’.

19 Ut kik’ulman naq laj Nefi, a’an li kitz’iib’ank re li esil a’in sa’ roso’jik (ut kixtz’iib’a chiruheb’ lix ^aperel ch’iich’ laj Nefi) kikam, ut laj Amos li ralal kixtz’iib’a sa’ xna’aj; ut kixtz’iib’a ajwi’ chiruheb’ lix perel ch’iich’ laj Nefi.

20 Ut kixk’am chiru kaahib’ ro’k’aal chihab’, ut toj kiwan tuqtuukilal sa’ li ch’och’, ka’ajwi’ naq kiwan jun ch’ina raqal re li tenamit li ke’risi chaq rib’ rik’in li iglees, ut ke’xk’ul sa’ xb’eeneb’ li k’ab’a’ej aj Lamanita; jo’kan naq ke’ok wi’chik chi wank aj Lamanita sa’ li ch’och’.

21 Ut kik’ulman naq kikam ajwi’ laj Amos, (ut ak jun cient rik’in kaalaju ro’k’aal chihab’ xk’ulunik chaq li Kristo) ut laj Amos li ralal kixtz’iib’a li esil sa’ xna’aj; ut a’an kixtz’iib’a ajwi’ chiruheb’ lix perel ch’iich’ laj Nefi; ut kitz’iib’aman ajwi’ sa’ lix hu laj Nefi, a’an li hu a’in.

22 Ut kik’ulman naq ak numenaq wiib’ cient chihab’; ut li xkab’ tasal tenamit ak xe’kam, ka’ajwi’ junjunq ink’a’.

23 Ut anajwan laa’in, aj Mormon, nawaj raj naq teenaw naq xe’k’ihan chaq li tenamit, jo’kan naq ke’wan chi jek’inb’il chiru chixjunil lix b’een li ch’och’, ut naq ke’b’ihomo’ chaq chi numtajenaq, xb’aan li usaak ke’xk’ul rik’in li Kristo.

24 Ut anajwan, sa’ li xkab’ cient rik’in jun chihab’ a’in, ke’ok chi wank sa’ xyanqeb’ li ani taqsinb’ileb’ sa’ li ^aq’etq’etil, jo’ xtiqib’ankil rib’ rik’in aq’ej terto xtz’aq, ut li k’iila paay chi chaab’il saqi lemtz’ q’ol, ut xkomon li k’a’aq re ru chaq’al ru re li ruchich’och’.

25 Ut chirix chik a’an li k’a’ru wan reheb’ ut li nak’anjelak reheb’ moko kiwan ta chik ^asa’ komonil sa’ xyanqeb’.

26 Ut ke’ok chixjachinkil rib’ sa’ li tastookil jachal; ut ke’ok chixwaklesinkil choq’ reheb’ li junjunq chi ^aiglees re xk’ulb’al ^bxtumineb’, ut ke’ok chixtz’eqtaanankil lix tz’aqal iglees li Kristo.

27 Ut kik’ulman naq chirix naq numenaq wiib’ cient rik’in lajeeb’ chihab’ ke’wan k’iila iglees sa’ li ch’och’; relik chi yaal, ke’wan k’iila iglees li neke’xye rib’ naq neke’xnaw ru li Kristo, a’b’an ^ake’xtz’eqtaana xyaalal lix k’ihal lix evangelio, jo’kan naq ke’xk’ul li k’iila paay chi maa’usilal, ut ke’xk’e li k’a’ru loq’ re li ani ^bramb’il chiru xb’aan naq moko k’ulub’ej ta.

28 Ut li ^aiglees a’in kik’ihan chi numtajenaq xb’aan li maa’usilal, ut xb’aan xwankil laj Satanas, li kiru chixchapb’al xch’ooleb’.

29 Ut jo’kan wi’chik, kiwan jun chik iglees li natz’eqtaanan xyaalal li Kristo, ut eb’ a’an ^ake’xrahob’tesi lix tz’aqal iglees li Kristo, xb’aan xtuulanileb’ xch’ool ut xb’aan naq neke’xpaab’ li Kristo, ut xik’ ke’ile’ xb’aaneb’, xb’aan li k’iila sachb’a-ch’oolej li nak’anjelaman sa’ xyanqeb’.

30 Jo’kan naq ke’xk’anjela li wankilal ut li awa’b’ejil sa’ xb’eeneb’ lix tzolom li Kristo li ke’kana rik’ineb’, ut ke’xtz’apeb’ sa’ ^atz’alam; a’b’anan rik’in lix wankil li raatin li Dios, li kiwan rik’ineb’, ke’jache’ li tz’alam sa’ xyi, ut eb’ a’an xkoheb’ ut ke’xb’aanu xninqal ru sachb’a-ch’oolej sa’ xyanqeb’.

31 A’b’anan ut, us ta ke’b’aanuman chixjunil li sachb’a-ch’oolej a’in, eb’ li tenamit ke’xkawob’resi li raam, ut ke’xsik’ xkamsinkileb’, jo’ chanru ajwi’ naq eb’ laj Judio aran Jerusalen ke’xsik’ chaq xkamsinkil li Jesus, jo’ chanru li raatin.

32 Ut ke’xkuteb’ sa’eb’ li ^ak’atleb’aal re ^bxam, ut ke’el chaq chi maajun ra ke’xk’ul.

33 Ut ke’xkuteb’ ajwi’ sa’ ^arochocheb’ li k’iche’ xul, ut ke’batz’un rik’ineb’ li k’iche’ xul jo’ chanru jun ch’ina al rik’in jun ral karneer; ut ke’el chaq sa’ xyanqeb’, chi maajun ra ke’xk’ul.

34 A’b’anan eb’ li tenamit ke’xkawob’resi li raameb’, xb’aan naq ke’b’eresiik xb’aaneb’ naab’al laj tij ut li b’alaq’il profeet, naq te’xwaklesi k’iila iglees, ut te’xb’aanu li k’iila paay chi maa’usilal. Ut ^ake’xsak’eb’ lix tenamit li Jesus; a’b’an eb’ lix tenamit li Jesus ink’a’ ke’sak’ok wi’chik. Ut chi jo’kan ke’laj chi maak’a’eb’ xpaab’aal ut sa’ li maa’usilal, chiru li junjunq chihab’, toj reetal naq numenaq ajwi’ wiib’ cient rik’in lajeeb’ xka’k’aal chihab’.

35 Ut anajwan kik’ulman sa’ li chihab’ a’in, relik chi yaal, sa’ li xkab’ cient rik’in junlaju xka’k’aal chihab’, kiwan jun nimla jachok sa’ xyanqeb’ li tenamit.

36 Ut kik’ulman naq sa’ li chihab’ a’in kiwakli jun tenamit, a’aneb’ aj Nefita neke’yehe’ re, ut a’aneb’ li tz’aqal neke’paab’ank re li Kristo; ut sa’ xyanqeb’ wankeb’ li yeeb’ileb’ re xb’aaneb’ laj Lamanita—eb’ laj Jakobita, ut laj Josefita, ut laj Tzoramita;

37 Jo’kan naq li tz’aqal neke’paab’ank re li Kristo, ut li tz’aqal neke’loq’onink re li Kristo, (ut sa’ xyanqeb’ a’an wankeb’ ^aoxib’al lix tzolom li Jesus li te’kanaaq) aj Nefita yeeb’ileb’ re, ut aj Jakobita, ut aj Josefita, ut aj Tzoramita.

38 Ut kik’ulman naq eb’ li ke’tz’eqtaanank re li evangelio, a’aneb’ aj Lamanita yeeb’ileb’ re, ut aj Lemuelita, ut aj Ismaelita; ut ink’a’ ke’laj chi maak’a’eb’ xpaab’aal; ^ake’xpo’resi b’an xch’ool chirix lix evangelio li Kristo chi k’oxlanb’il; ut ke’xk’ut chiruheb’ lix kok’al naq ink’a’ te’paab’anq, jo’ chanru naq eb’ lix yuwa’, chalen chaq sa’ xtiklajik, ke’laj chaq.

39 Ut a’an xb’aan xmaa’usilaleb’ ut xtz’eqb’eetalileb’ lix yuwa’eb’, jo’ chanru ajwi’ naq kiwan chaq sa’ xtiklajik. Ut ke’tzole’ re naq ^axik’ te’ril li ralal xk’ajol li Dios, jo’ chanru ajwi’ naq eb’ laj Lamanita ke’tzole’ re naq xik’ te’rileb’ laj Nefita chalen chaq xtiklajik.

40 Ut kik’ulman naq ak kinume’ wiib’ cient rik’in kaahib’ roxk’aal chihab’, ut jo’ka’in li ki’uxman sa’ xyanq li tenamit. Ut li jun raqal reheb’ li tenamit li q’axaleb’ aj maak ke’kawu xmetz’ew, ut q’axal wi’chik ke’k’ihan chiru lix tenamit li Dios.

41 Ut ink’a’ ke’xkanab’ xwaklesinkileb’ li iglees choq’ reheb’, ut rutz’u’ujinkil rik’in k’iila paay li k’a’aq re ru terto xtz’aq. Ut chi jo’kan kinume’ wiib’ cient rik’in lajeeb’ roxk’aal chihab’, jo’ ajwi’ wiib’ cient rik’in oxk’aal chihab’.

42 Ut kik’ulman naq li jun raqal aj maak re li tenamit ke’ok wi’chik chixwaklesinkil li muqmuukil xaqab’anb’il aatin ut ^amolam re laj Gadianton.

43 Ut jo’kan ajwi’ eb’ li ani xtenamit laj Nefi yeeb’ileb’ re, ke’ok chi q’etq’eto’k sa’ xch’ooleb’, xb’aan xq’axalil lix b’ihomaleb’, ut chi ok sa’ li jo’maajo’il na’leb’ jo’eb’ li ras riitz’ineb’, laj Lamanita.

44 Ut chirix sa’ li kutan a’in eb’ li tzolom ke’ok chi raho’k xch’ool sa’ xk’ab’a’ lix ^amaak li ruchich’och’.

45 Ut kik’ulman naq chirix naq numenaq oxib’ cient chihab’, eb’ lix tenamit laj Nefi jo’ ajwi’ eb’ laj Lamanita q’axaleb’ aj maak ke’kana, li jun jo’ li jun chik.

46 Ut kik’ulman naq eb’ laj elq’ re laj Gadianton ke’jek’iman chiru chixjunil lix b’een li ch’och’; ut maajun kiwan li tiik xch’ool, ka’ajeb’ wi’ lix tzolom li Jesus. Ut li oor ut li plaat ke’xtamresi chi naab’al sa’ k’uuleb’aal, ut ke’xyak li k’iila paay chi yakom.

47 Ut kik’ulman naq chirix naq numenaq oxib’ cient rik’in oob’ chihab’ (ut eb’ li tenamit toj ke’kana sa’ li maa’usilal) kikam laj Amos; ut li riitz’in, aj Ammaron, kixtz’iib’a li esil sa’ xna’aj.

48 Ut kik’ulman naq chirix naq numenaq oxib’ cient rik’in junmay chihab’, laj Ammaron, chi elajinb’il xb’aan li Santil Musiq’ej, kixmuq li ^atz’iib’anb’il esil li wan xloq’al—relik chi yaal, chixjunileb’ ajwi’ li loq’laj tz’iib’anb’il esil li ke’numsiman chaq chiru li junjunq tasal tenamit, li wankeb’ xloq’al—toj reetal ajwi’ li rox cient rik’in junmay chihab’ xk’ulunik chaq li Kristo.

49 Ut kixmuq chaq choq’ re li Qaawa’, re naq ^ataachalq wi’chik rik’in li rela’ lix junkab’al laj Jakob, jo’ chanru lix profeetil aatin ut lix yeechi’ihom li Qaawa’. Ut jo’ka’in xraqik li esil kixtz’iib’a laj Ammaron.