1 Xcʼulmataj cʼut chi xocʼow ri junab treinta y cuatro, xukujeʼ ri junab treinta y cinco, y chiwilampeʼ, ri u tijoxelab ri Jesús qui sucʼumam ri u winakil ri Cristo pa tak conojel ri ulew chilaʼ. Conojel ri xepe cucʼ, ri kas xquiqʼuex ri qui cʼux, xekasax xeʼ jaʼ pa ri u biʼ ri Jesús, y xukujeʼ xquicʼam ri Lokʼalaj Uxlabixel.

2 Xcʼulmataj cʼut chi pa ri junab treinta y seis, conojel ri winak ri cʼo cho ronojel ri uwächulew xquicʼam ri u tzij ri Ajawaxel pa canimaʼ, ri aj Nefitas cʼu xukujeʼ ri aj Lamanitas. Man cʼo taj chʼoʼj mawi oyowal chquixol. Xechacunic kas sucʼ cachbil quib.

3 Xquijachalaʼ ri jastak qui chquiwäch. Rumal riʼ, man cʼo tä kʼinomab, man cʼo tä mebaʼib, man cʼo tä ri e ximatal mawi ri e tzokopital, xane conojel e tzokopitalic, y conojel xquicʼam ri sipanic aj chicaj.

4 Xcʼulmataj cʼut chi pa ri junab treinta y siete, xukujeʼ xtakan ri utzilal cho ri ulew.

5 Cʼu ri u tijoxelab ri Jesús xquiban nimak y mayilaj tak jastak. Xequicunaj ri yawabib, xequicʼastajisaj ri cäminakib, xquibano chi quebin ri e chʼocnajic, xquibano chi quecaʼyic ri moyab, y xquibano chi cäquita ri tʼoyab. Xquibano ronojel tak u beyal mayibal chquixol ri calcʼual que ri achijab. Xak xuwi xquiban mayibal pa ri u biʼ ri Cristo, we ma tä jeriʼ, man xquibano taj.

6 Je cʼu riʼ, xocʼow ri junab treinta y ocho, ri treinta y nueve, ri cuarenta, ri cuarenta y uno, y ri cuarenta y dos. Jeʼ, cʼä pa ri junab cuarenta y nueve, cʼu ri cincuenta y uno, ri cincuenta y dos, cʼä xocʼowic ri junab cincuenta y nueve.

7 Cʼu ri Ajawaxel sibalaj xebunimarisaj pa ri culew, jeʼ, cʼä xquiyac chic jumul tak tinimit pa ri qui cʼolibal ri e cʼatinak.

8 Jeʼ, xetzelej chic jumul ri u banic ri nimalaj tinimit Zarahemla.

9 Tzare cʼo sibalaj tinimit ri xekaj pa ri cho, cʼu wacamic xak cʼo jaʼ pa ri qui cʼolibal. Rumal riʼ, man cuyaʼ tä chi quetzelej ri qui banic we tak tinimit.

10 Xcʼulmataj chi xquicowirisaj quib ri winak re Nefi, y kas chanim xeqʼuiyaric, xebux jun jeʼlalaj winak, sibalaj cʼo quicotem chkij.

11 Xukujeʼ xecʼuliʼc, xequicʼulubaʼ ri calcʼual y sibalaj xetewichixic je jas ri cäquibij ri qʼuialaj yaal tak tzij ri u yaʼom ri Ajawaxel chke.

12 Ri e areʼ man xquiban tä chic je jas ri cubij ri u pixab ri Moisés. Xak xquinimaj ri u takbal ri qui cʼamom lok rumal ri Cajawaxel, ri qui Dios, man xecos tä chubanic ri majwaʼim, y ri u banic chʼawem rucʼ ri Dios, y xukujeʼ sibalaj xquimulij quib chubanic chʼawem rucʼ ri Dios, y chutatabexic ri u tzij ri Ajawaxel.

13 Xcʼulmataj chi xquitanabaʼ ri chʼoʼj chquixol conojel ri winak cho ronojel u wäch ri ulew. Cʼu sibalaj tak mayibal xebantajic chquixol ri u tijoxelab ri Jesús.

14 Xcʼulmataj cʼut chi xocʼow ri junab setenta y uno, xukujeʼ ri junab setenta y dos, jeʼ, cʼä pa ri junab setenta y nueve. Jeʼ, cä jun cien junab ocʼowinak chic, cʼu ri u tijoxelab ri e chaʼom rumal ri Jesús e benak chic pa ri cʼolibal que ri utzalaj uxlabal rucʼ ri Dios. Xak xuwi man e benak tä chic ri oxib ri xyataj chi quecanajic. Xjachtaj ri lokʼalaj chac pa qui kʼab nicʼaj tijoxelab chic ri xechaʼic chubanic ri qui qʼuexwäch ri e cäminak. Xukujeʼ e cäminak chic qʼui winak pa tak waʼ junab ri ocʼowinak chic.

15 Xcʼulmataj chi man cʼo tä chʼoʼj pa ri ulew rumal ri lokʼokʼebal cʼuxaj rech ri Dios ri cʼolic pa ri canimaʼ ri winak.

16 Y man cʼo tä chic ri quiäkrayibal chquixol, mawi oyowal, mawi ri macaj ri cuban jun achi rucʼ jun ixok ri man cʼulan tä rucʼ, mawi banow tak tzij, mawi ri cämisanic, mawi apachique rayibal je jas ri cäraj ri tiojilal. Kastzij man cʼo tä jun winak cäquicotic na chuwäch we winak, pune tä e cʼo nicʼaj chic winak ri xebantajic rumal ri u kʼab ri Dios.

17 Man cʼo tä elakʼomab, cämisanelab, xukujeʼ man cʼo tä aj Lamanitas, mawi apachique u cholaj jun winak cäcoj u biʼ jun achi chque. Xane conojel xak e jun, ri alcʼualab rech ri Cristo, ri cäquechebej ri rajawibal ri Dios.

18 ¡Sibalaj tewichital qui wäch ri e areʼ! Cʼu ri Ajawaxel xebutewichij pa ronojel ri qui banom. Jeʼ, sibalaj e tewichitalic, xquinimarisaj quib che utz cʼä ocʼowinak ciento diez junab. Cʼu ri nabe ijaʼlil cʼäte ri u petic ri Cristo e cäminak chic, y man cʼo tä chʼoʼj pa ronojel ri ulew.

19 Xcʼulmataj cʼut chi xcäm ri Nefi, ri cʼo rucʼ we qʼuisbal tak tzʼib, (y ri areʼ xutzʼibaj we tzij puwiʼ ri xax tak u xak chʼichʼ re ri Nefi), cʼu ri u cʼojol, Amós, xucʼamo che u qʼuexel. Y xutzʼibaj ri u banom ri u winak puwiʼ ri xax tak uu xak chʼichʼ re ri Nefi xukujeʼ.

20 Ri areʼ xutzʼibaj ri u cʼulmam ri u winak pa ochenta y cuatro junab, y cʼä xcʼojiʼ ri utzilal cho ri ulew, xak xuwi jutzʼit chque ri winak man xcaj tä chic cäquicʼam ri u tzij ri Dios pa ri u winakil ri Jesucristo. Xquicoj aj Lamanitas che ri qui biʼ. Rumal cʼu riʼ, cʼo chic jumul ri aj Lamanitas cho ri ulew.

21 Xcʼulmataj chi ri Amós xcämic xukujeʼ, (waʼ xcʼulmataj aretak ocʼowinak chic ciento noventa y cuatro junab cʼäte ri u petic ri Cristo) cʼu ri u cʼojol ri Amós xutzʼibaj cho ri xax tak u xak chʼichʼ rech ri Nefi je jas u qʼuexel. Xukujeʼ xutzʼibaj cho ri wuj re ri Nefi, are we wuj riʼ.

22 Xcʼulmataj cʼut chi ocʼowinak chic quieb cient junab, y conojel ri winak rech ri ucab ijaʼlil e cäminak chic, xak xuwi jutak winak man e cäminak tä chic.

23 Cʼu ri in, Mormón, quinwaj chi quiwetamaj chi ri winak sibalaj xeqʼuiyaric. Rumal riʼ, xejabunic cho ronojel ri uwächulew. Xukujeʼ xekʼinomaric rumal chi xenimarisax rumal ri Cristo.

24 Tzare pa ri junab waʼ, ri doscientos uno junab, xecʼojiʼ jujun chquixol ri xquichaplej qui nimarisaxic quib rumal ri pakal tak catzʼiak ri qui cojom, y xukujeʼ jeʼlalaj tak pakal abäj, y nicʼaj chi jeʼlalaj jastak re ri uwächulew.

25 Cʼäte ri kʼijal riʼ, man xquijachalaʼ tä chic ri jastak que chquiwäch.

26 Xquichaplej cäquitas quib pa nicʼaj jumulaj tak winak, y xquiyac nicʼaj chic iglesias rech quekʼinomaric cumal, y xquichapej cäquixutuj ri kastzijalaj u winakil ri Cristo.

27 Xcʼulmataj cʼut chi ocʼowinak chi ri junab doscientos diez, y cʼo chic qʼui tak iglesias pa ri ulew. Jeʼ, xecʼojiʼ qʼuialaj tak iglesias ri xquibij chi quecojon che ri Cristo, tzare xquixutuj qʼui tak jastak rech ri lokʼalaj u tzijobal. Rumal riʼ, xquicʼam ronojel beyal rech etzelal, y xquiyaʼ ri lokʼalaj tak jastak chque ri man takal tä chque rumal rech chi e ajmaquib.

28 E qʼui ri winak ri xeboquic rucʼ we iglesia. Waʼ rumal ri etzelal, y xukujeʼ rumal ri u cuinem ri itzel ri oquinak pa ri canimaʼ.

29 Xukujeʼ cʼut, cʼo chi jun iglesia ri xubij chi man cʼo tä ri Cristo. Ri e areʼ xecokataj ri e cʼo pa ri kastzijalaj u winakil ri Cristo, rumal rech chi e areʼ machʼachʼem tak winak, y cʼo ri qui cojobal che ri Cristo. Xukujeʼ xquetzelaj qui wäch rumal rech ri qʼui tak mayibal ri xbantajic chquixol.

30 Rumal riʼ, xquicoj qui chukʼab y ri qui takanic paquiwiʼ ri u tijoxelab ri Jesús ri xecanajic cucʼ, y xequiyaʼ pa cheʼ. Tzare rumal rech ri u cuinem ri u tzij ri Dios ri cʼo cucʼ, xepaxic ri tak cheʼ, y xebel ulok chquiwäch, y xquibano qʼui tak mayibal chquixol ri winak.

31 Pune tä xebantajic we tak mayibal cumal, ri winak xquicowirisaj ri canimaʼ, y xcaj cäquicämisaj, je jas xcaj ri aj Judeyib cäquicämisaj ri Jesús, je jas ri cubij ri u tzij.

32 Xequiyaʼ cʼut pa tak tuj ri cʼo kʼakʼ chupam. Xebel ulok chupam y man cʼo tä cʼäx xquiriko.

33 Xukujeʼ xequiyaʼ chupam tak jul ja ri cʼo wi cʼaʼnalaj tak awaj, xane ri e areʼ xebetzʼen cucʼ, je ri u banic jun acʼal quetzʼen rucʼ jun alaj chij. Xebel cʼu ulok y man cʼo tä cʼäx xquiriko.

34 Pune tä jeriʼ, ri winak xquicowirisaj ri canimaʼ, rumal xcʼam ri qui be cumal ri qʼui tak pareyib, y itzel tak kʼalajisanelab che ri cäpe na. Are tak waʼ xquibij chque chi cäquiban qʼui tak iglesias chic, y xukujeʼ chubanic ri etzelal. Xequichʼay ri u winak ri Jesús, tzare ri u winak ri Jesús man xquitzelej taj ri qui chʼayic. Je cʼu riʼ, xquitzak pa ri quetzelal, y man xecojon tä chic che jujun tak junab cʼä ocʼowinak chic ri junab doscientos treinta.

35 Xcʼulmataj cʼut chi pa ri junab riʼ, pa ri junab doscientos treinta y dos, xcʼulmataj chi xban jun nimalaj tasbal ib chquixol ri winak.

36 Xcʼulmataj cʼut pa ri junab waʼ, chi xwalajisax jutak winak ri aj Nefitas qui biʼ, y ri e areʼ ri kas cojonelab che ri Cristo. Chquixol ri e areʼ xecʼojiʼ ri cäbix ri aj Jacobitas, ri aj Josefitas, y ri aj Zoramitas cumal ri aj Lamanitas.

37 Rumal riʼ, ri kastzij conojelab che ri Cristo, y ri kas xquinimarisaj u kʼij ri Cristo, (xecʼojiʼ chquixol ri oxib u tijoxelab ri Jesús ri yaʼom chque quecanajic) yaʼom qui biʼ ri aj Nefitas, ri aj Jacobitas, ri aj Josefitas, y ri aj Zoramitas.

38 Xcʼulmataj cʼut chi ri winak ri xquixutuj ri u tzijobal ri Jesús, are ri aj Lamanitas, ri aj Lamuelitas, y ri aj Ismaelitas qui biʼ. Are tak waʼ man xetzak tä rumal rech chi man xecojon tä chic, xane xquicʼululaj ri u tzijobal ri Cristo je jas ri qui rayibal. Xequitijoj ri calcʼual chi man quecojon taj, je jas xquiban ri qui tat tzpa ri jekbal.

39 Waʼ rumal ri quetzelal y ri qui mac ri qui tat, xaʼ junam je jas xcʼulmataj pa ri jekbal. Xquitijoj chi cäquetzelaj qui wäch ri ralcʼual ri Dios, je jas xtijox chque ri aj Lamanitas chi quebetzelaj qui wäch ri calcʼual ri Nefi tzpa ri jekbal.

40 Xcʼulmataj cʼut chi ocʼowinak chic ri junab doscientos cuarenta y cuatro, y jeriʼ xeriktajic ri jastak que ri winak. Cʼu ri itzel tak winak xquicowirisaj quib, xebux e qʼui na chquiwäch ri u winakil ri Dios.

41 Xquiterenej ri qui yaquic tak iglesias, y xquicoj jeʼlalaj tak jastak chupam. Je cʼu riʼ xocʼow ri junab doscientos cincuenta, y xukujeʼ ri junab doscientos sesenta.

42 Xcʼulmataj chi ri itzel tak winak xquichaplej ri qui tacʼabaxic itzel yabal tak tzij chi cʼuyal, y jumulaj tak winak chi cʼuyal je jas u beyal ri Gadiantón.

43 Xukujeʼ xquichaplej ri winak re Nefi cäquinimarisaj quib pa canimaʼ, rumal ri nimalaj qui kʼinomal. Y xquibanic jastak ri man cʼo tä qui patan je jas xquibano ri cachalal, ri aj Lamanitas.

44 Cʼäte cʼu riʼ, ri u tijoxelab ri Jesús xquichaplej qui bisonic pa canimaʼ rumal rech ri macaj rech ri uwächulew.

45 Xocʼow cʼut oxib cient junab, cʼäte riʼ, ri aj Nefitas, y xukujeʼ ri aj Lamanitas, xebux kas itzel winak, ri jun waʼ junam chuwäch ri jun chic.

46 Xcʼulmataj cʼut chi ri elakʼomab re Gadiantón xquijabuj quib cho ronojel ri uwächulew. Xak ri u tijoxelab ri Jesús xecanajic pa suqʼuilal. Cʼu ri winak sibalaj xquimulij ri kʼän puak, ri sak puak, y xquiban cʼayinic cachbil quib cucʼ conojel jastak.

47 Cʼäte ocʼowinak chic ri junab trescientos cinco (y cʼä cʼo na ri quetzelal ri winak), xcäm ri Amós, cʼu ri rachalal, Ammarón, xucʼolo ri ojer tzij che jujun junab che u qʼuexel ri Amós.

48 Xocʼow cʼut ri junab trescientos veinte, cʼäte riʼ, xcʼulmataj chi ri Ammarón xucʼuʼ ri lokʼalaj tak tzʼibatal je jas ri bim che rumal ri Lokʼalaj Uxlabixel, jeʼ, conojel ri lokʼalaj tak tzʼibatal che jujun junab ri e kʼaxinak cumal conojel ri tak ijaʼlil ri ocʼowinak chic, cʼä pa ri junab trescientos veinte tzpa ri u petic ri Cristo.

49 Xucʼuʼ canok che u banic ri cäraj ri Ajawaxel, rech cätzelej chic jumul cucʼ ri nicʼaj chic winak rech ri rachoch ri Jacob, ri man e sachinak tä qui wäch. Waʼ je jas ri cubij ri tak kʼalajisabal che ri cäpe na y ri yabal tak tzij rech ri Ajawaxel. Jeriʼ cäqʼuis canok ri tzʼibatal che jujun junab rech ri Ammarón.