O Le Tusi a Alema
O Le Atalii o Alema

1 O lenei sa oo i le tausaga muamua o le nofoa’iga a faamasino i le nuu o Nifae, mai le taimi nei ma le agai i luma, ona ua ^auia e le tupu o Mosaea le ala o le lalolagi uma, ina ua uma ona tau e ia o se taua lelei, ma savali sa’o i luma o le Atua, ma lē tuua se tasi e nofotupu e sui ia te ia; ae ui i lea sa faavae e ia ^etulafono, ma sa talia ia tulafono e le nuu; o lea na faamalosia ai i latou ia latou ola e tusa ai ma tulafono na faia e ia.

2 Ma sa oo i le tausaga muamua o le nofoa’iga a Alema i le nofoa-faamasino, sa i ai se ^atagata sa aumai i ona luma ina ia faamasinoina, o se tagata tino ese, ma sa lauiloa i lona malosi tele.

3 Ma sa fealua’i solo o ia i totonu o le nuu, ma tala’i atu ia te i latou se mea sa ia ^ata’ua o le afioga a le Atua, e tu’ua’ia malosi ai le ^efaasagatau i le ekalesia; ma folafola atu i tagata e tatau i faitaulaga ma a’oa’o uma ona avea ma ⁱtagata lauiloa; ma e ^olē tatau ona latou galulue i o latou lima, ae tatau ona lagolagoina i latou e le nuu.

4 Ma sa molimau atu foi o ia i le nuu o le a faaolaina tagata uma i le aso gataaga; ma e lē tatau ona latou fefefe pe gatete, ae ia ea i luga o latou ulu ma olioli; ona na foafoa e le Alii tagata uma, ma ua togiola foi e ia tagata uma; ma, i le ’uga, o le a maua e tagata uma le ola e faavavau.

5 Ma sa oo ina sa matuā tele ona ia a’oa’o atu o nei mea o lea sa toatele na’uā i latou sa talitonu i ana upu, sa matuā toatele lava sa amata ona latou lagolagoina o ia ma avatu tupe ia te ia.

6 Ma sa amata ona faafefeteina o ia i le faamaualuga o lona loto, ma ofu i ofu e sili ona taugata, ioe, ma sa oo lava ina amata ona ia faatuina se ^aekalesia e tusa ma le ala o lana talaiga.

7 Ma sa oo ina a’o alu atu o ia e talai atu ia i latou o e na talitonu i ana upu, sa fetaia’i o ia ma se tagata o sē na auai i le ekalesia a le Atua, ioe, o se tasi lava o o latou a’oa’o; ma sa amata ona ia finau malosi ma ia, ina ia mafai ona ia ta’ita’i ese tagata o le ekalesia; peitai sa tetee malosi atu lenei tagata ia te ia, ma lapatai malosi o ia i ^aafioga a le Atua.

8 O lenei o le igoa o lenei tagata o ^aKitiona; ma o ia lea o lē na avea ma auupega i aao o le Atua i le lavea’iina o le nuu o Limae mai le pologa.

9 O lenei, ona sa tetee malosi atu Kitiona ia te ia e ala i afioga a le Atua, sa oo ina ita o ia ia Kitiona, ma sa se’i lana pelu ma amata ona taia o ia. O lenei ona ua toeaina lava Kitiona i le tele o ona tausaga, o lea sa lē mafai ai e ia ona talitalia ana ta, o lea na ^afasiotia ai o ia i le pelu.

10 Ma o le tagata o lē na fasiotia o ia sa ave e tagata o le ekalesia, ma aumai o ia i luma o Alema, ina ia ^afaamasinoina e tusa ma solitulafono na ia faia.

11 Ma sa oo ina tulai atu o ia i luma o Alema ma tali atu mo ia lava ma le lotoa tele.

12 Peitai sa fai atu Alema ia te ia: Faauta, o le taimi muamua lenei ua tulai mai ai ^afaitaulaga pepelo i totonu o le nuu lenei. Ma faauta, ua lē gata ona e sala i le faitaulaga pepelo, ae ua e taumafai foi e faamalosia i le pelu; ma afai e faamalosia le faitaulaga pepelo i totonu o le nuu lenei, o le a faamaonia ai le faaumatiaina atoa o i latou.

13 Ma ua e faamaligiina le toto o se tagata amiotonu, ioe, o se tagata o lē na faia mea lelei e tele i totonu o lenei nuu; ma afai matou te faasaoina oe, o le a oo mai lona toto i o matou luga ia ^atauimasui.

14 O le mea lea ua ^afaasala ai oe i le oti, e tusa ma le tulafono na tuu mai ia te i tatou e Mosaea, lo tatou tupu mulimuli; ma ua talia e lenei nuu; o lea e ao ai i lenei nuu ona ola e tusa ai ma le tulafono.

15 Ma sa oo ina latou ave o ia; ma o lona igoa o ^aNe’oa; ma sa latou ave o ia i luga i le tumutumu o le maupu’epu’e o Maneti, ma o iina na uunaiina ai o ia, pe na ia ta’utino mai ai, i le va o le lagi ma le lalolagi, o mea sa ia a’oa’o atu i tagata sa fete’enai ma le afioga a le Atua; ma o iina na ia mafatia ai i se ^eoti maasiasi lava.

16 Ae ui i lea, sa lē i’u i lenei mea le sosolo o le faitaulaga pepelo i le laueleele; ona e toatele e sa fiafia i mea lē aoga a le lalolagi, ma sa latou o atu ma tala’i atu aoaoga faavae sesē; ma sa latou faia lenei mea mo le faamoemoe mo ni ^a’oa ma le mamalu.

17 Ae ui i lea, sa latou fefefe e ^apepelo, pe afai e iloa, ona o le fefefe i le tulafono, ona sa faasalaina tagata pepelo; o lea sa latou faatagā tala’i atu ai e faapea e tusa ai ma o latou talitonuga; ma o lenei sa lē mafai ona i ai i le tulafono se pule i soo se tagata ona o ^elona talitonuga.

18 Ma sa latou fefefe e ^agaoi, ona o le matata’u i le tulafono, ona o tagata faapena sa faasalaina; pe sa latou totoa e faomea, pe fasioti tagata, ona o ia o lē e ^efasioti tagata, sa faasalaina i le ⁱoti.

19 Peitai sa oo ina o soo se tasi lava sa lē auai i le ekalesia a le Atua, sa amata ona latou sauaina i latou o e sa auai i le ekalesia a le Atua, ma ua ave i o latou luga le suafa o Keriso.

20 Ioe, sa latou sauaina i latou, ma faatigā ia te i latou i ituaiga o upu eseese uma, ma o lenei ona o lo latou lotomaualalo; ona sa latou lē faamaualuluga i la latou lava vaai, ma ona sa latou faasoa atu le afioga a le Atua, o le tasi i le isi, e aunoa ma se ^atupe ma aunoa ma se tau.

21 O lenei sa i ai se tulafono patino i totonu o tagata o le ekalesia, e faapea e leai se tagata e auai i le ekalesia, e tula’i ma ^asauaina i latou o e e lē auai i le ekalesia, ma ia leai ni sauaga e i ai i totonu o i latou lava.

22 Ae ui i lea, sa i ai le toatele i totonu o i latou o e sa amata ona faamaualuluga, ma amata ona finau malosi ma o latou fili, na oo lava ina fepa’ia’i ai; ioe, sa latou taua’ifusu.

23 O lenei sa tupu lenei mea i le tausaga lona lua o le nofoa’iga a Alema, ma sa avea ma pogai o le puapuaga tele i le ekalesia; ioe, sa avea ma pogai o tofotofoga tele i le ekalesia.

24 Ona sa faamaaa loto o le toatele, ma sa ^asoloia ese o latou igoa, sa lē toe manatua ai i latou i totonu o le nuu o le Atua. Ma e toatele foi sa latou ^eaveese i latou lava mai totonu o i latou.

25 O lenei mea sa avea ma tofotofoga tele ia te i latou o e sa tutumau i le faatuatua; ae ui i lea, sa latou tutumau ma le lē mafaagaeetia i le tausiga o poloaiga a le Atua, ma sa latou talia ma le ^aonosai sauaga sa faaputu a’e i o latou luga.

26 Ma a tuu e faitaulaga a latou ^agaluega ina ia tala’i atu le afioga a le Atua i tagata, sa tuu foi e tagata a latou galuega ina ia faalogologo atu i le afioga a le Atua. Ma a uma ona tala’i atu e le faitaulaga ia te i latou le afioga a le Atua, sa latou toe foi atu uma ma le filiga i a latou galuega; ma o le faitaulaga, sa lē manatu ua sili a’e o ia lava nai e na faalogologo mai ia te ia, ona sa lē sili a’e le lelei o lē sa tala’i nai lo lē sa faalogologo mai ia te ia, pe sa sili a’e foi le lelei o lē na a’oa’o atu, i lē na a’oa’oina; ma sa faapea ona latou tutusa uma, ma sa latou galulue uma, o tagata taitoatasi uma e ^etusa ma lona lava malosi.

27 Ma sa latou ^afaasoa atu a latou mea, o tagata taitoatasi uma e tusa ma mea sa ia te ia, i e ua ^ematitiva, ma e ua lē tagolima, ma e ua mama’i, ma e ua puapuagatia; ma sa latou lē oofu i ofu taugata, ae sa mamā ma lalelei i latou.

28 Ma sa faapea ona latou faatulaga o mataupu o le ekalesia; ma sa faapea ona amata ona latou toe maua o le filemu faifai pea, e ui i o latou puapuaga uma.

29 Ma o lenei, ona o le mautū o le ekalesia sa amata ona latou ^amauoa tele ai, i le mau tele i soo se mea o mea uma sa latou mana’omia—o le mau i lafu ma fagaga, ma manu pepeti o ituaiga uma, ma le mau foi i saito, ma auro, ma ario, ma mea taua, ma le mau i le ^esilika ma ie lino miloa lelei, ma ituaiga uma o ie anagofie lelei.

30 Ma sa faapea, i o latou tulaga ^atamaoaiga, ona latou lē auina ese atu soo se tasi sa ^elē lavalavā po o se sa fia ’ai, po o se sa fia inu, po o se sa ma’i, po o se sa lē tausia; ma sa latou lē tuu atu o latou loto i luga o oa; o lea sa latou limafoai i tagata uma, o e matutua ma e laiti, o e pologa ma e saoloto, o tane ma fafine, pe e i fafo o le ekalesia pe e i totonu o le ekalesia, sa leai so latou ⁱfaailoga tagata e faatatau ia te i latou o e na mana’omia le fesoasoani.

31 Ma sa faapea ona latou manuia ma sili atu ona mauoa nai lo i latou o e sa lē auai i la latou ekalesia.

32 Ona o i latou o e sa lē auai i la latou ekalesia, sa latou auai i le faia o mea faataulaitu, ma le ^aifo i tupua po o le ^epaie, ma le ⁱfai o tala lē aoga, ma i ^olosilosivalega ma finauga; ma oofu i ofu taugata; ma ^ufaafefeteina i le faamaualuluga i la latou lava vaai; ma faasaua, pepelo, gaoi, faomea ma le faitaaga, ma fasioti tagata, ma ituaiga amioleaga uma; ae ui i lea, sa faamalosia le tulafono i luga o i latou uma o e sa solia, e tusa ma le mafai sa talafeagai ai.

33 Ma sa oo ina faapea o le faatinoina pea o le tulafono i luga o i latou, e mafatia tagata taitoatasi e tusa ai ma le mea na ia faia, sa faateleina ona latou fifilemu, ma fefefe ai e fai se amioleaga pe afai e iloa; o lea, sa i ai le filemu tele i totonu o le nuu o Nifae seia oo i le lona lima o tausaga o le nofoaiga a faamasino.