1 Ngkai e mena n ana tua Motiaea bwa ni kabane te mwaane are e riki bwa te tia moti n te tua, ke naake a rineaki bwa taan moti, a riai ni karekea booia ni kaineti ma te tai are a mwakuri iai ni motiki taekaia ake a uotaki nako mataia bwa a na motikaki taekaia.

2 Ngkai ngkana te aomata e tarau iroun temanna, ao e rawa ni kabwara are e tarau iai, e na bon tang te aba ibukina ao te tia moti e kabongana mwaakana, ao e kanakoia ana taan mwakuri bwa e na uotaki te aomata anne nako matana; ao e motika taekan te aomata anne ni kaineti ma te tua ao bwaai ni kakoaua ake a uotaki bwa kaitaraana, ao ngkanne te aomata anne e a bon riai ni kabwaka are e tarau iai, ke e na kuribwaiaki, ke e na teweaki nako mai i buakoia te botanaomata bwa te tia iraa ke te tia kimoa.

3 Ao te tia moti e na karekea boona n aron ana tai—te tienin ni koora ibukin te bongina, ke te tenum n tirewa, are e bon boraoi ma te tienin ni koora; ao aio are e kaineti ma te tua are anganaki.

4 Ngkai aikai aran mwakorokoron aia koora aika a kakaokoro, ao aia tirewa, n aron kanoaia. Ao aara aikai bon mai irouia Nibwaite, bwa aki babairea kanoan aia mwane n aroia Iutaia ake a mena i Ierutarem; ao aki naba baire n aroia Iutaia, ma a bita aron aia babaire, ni kaineti ma aia iango ao aroia aomata, n rooro nako, ni karokoa aia tautaeka taan moti, ngkai a bon ^akateaki iroun te uea are Motiaea.

5 Ngkai aio aron te babaire—te tienin ni koora, te tean ni koora, te tiam ni koora, ao te rimna ni koora.

6 Te tenum n tirewa, te amna n tirewa, te etirom n tirewa, ao te onti n tirewa.

7 Te tenum n tirewa e boraoi ma te tienin ni koora, bon ibukin bairean te bwaare, ao ibukin naba bairean koraa ni kai aika a kakanaki n aekaia nako.

8 Ngkai kanoan te tean ni koora bon uoua mwaitin kanoan te tienin.

9 Ao te tiam ni koora bon uoua mwaitin kanoan te tean.

10 Ao te rimna ni koora bon titebo ma mwaitin kanoaia ni kabane.

11 Ao te amna n tirewa titebo mwaitina ma uoua te tenum.

12 Ao te etirom n tirewa titebo mwaitina ma aua te tenum

13 Ao te onti bon titebo ma mwaitin kanoaia ni kabane.

14 Ngkai aio kanoan ware ake a karako riki n aia babaire ni kanoan te mwane.

15 Te tiburon bon iteran te tenum; ngaia ae, ngaia ae te tiburon bon ibukin bairean teiterana te bwaare.

16 Ao te tiburum bon iteran te tiburon.

17 Ao teuana te reea bon iteran te tiburum.

18 Ao ngkanne aio aia ware, n aron aia babaire.

19 Ao te antean ni koora titebo ma teniua te tiburon.

20 Ngkai aio bon oin bukin karekean rakaia, ibukina bwa a karekea booia n aron aia mwakuri, ngaia ae a kakiriwei nanoia aomata nakon te urubwai, ao aekan mwakuri n aki rau ao aika a buakaka, bwa e aonga n ae e mwaiti riki aia mwakuri, bwa e aonga n ae e na ^areke riki aia mwane n aron kateakia n te tua ake a uotaki nako mataia; ngaia ae a kakiriwei nanoia aomata ni kaitaraa Aramwa ma Amureki.

21 Ao teuare Teeterom e a waaki n titirakina Amureki, ni kangai: Ko kona ni kaekai tabeua au titiraki aika N na titirakiniko? Ao ngkanne teuare Teeterom bon te aomata ae rang mwaatai n ana ^akawai te riaboro, bwa e aonga ni kamauna te bwai ae raoiroi; ngaia ae, e taku nakon Amureki: Ko kona ni kaekai titiraki aika N na anganiko?

22 Ao Amureki e taku nakoina: Eng, ngkana e boraoi ma ^aTamnein te Uea, are e mena irou; bwa akea te bwai ae N na taekinna ae aki boraoi ma Tamnein te Uea. Ao Teeterom e taku nakoina: Nooria, aikai onoua te onti n tirewa, ao N na anganiko ngkana ko kakewea ae iai Teuare Moan te Mwaaka.

23 Ao ngkanne e taku Amureki: O ngkoe ^anatin moone, E aera ngkai ko ^bkaririai? Ko aki ataia ae naake a raoiroi aki bwaka n te kariri?

24 Ko kakoaua ae iai te Atua? I taku nakoim, Tiaki, ko ataia ae iai te Atua, ma ko tangira riki te ^amwane nakoina.

25 Ao ngkai ko a tia ni kewe i matan te Atua nakoiu; Ko taku nakoiu—Nooria aikai onoua taian onti, aika a korakora kanoaia, ao N na anganiko—ma ko a tia ni kataua inanom bwa ko na tauii mai irou; ao bon ti oin am kantaninga bwa N na kakewea te Atua ae koaua ae maiu, bwa e aonga n ae e reke am anga bwa ko na kamaunai. Ao ngkai nooria, bwa ko na bon kana uaan te mwakuri ae rang buakaka aio.

26 Ao Teeterom e taku nakoina: Ko taku bwa iai te Atua ae koaua ao e maiu?

27 Ao Amureki e taku: Eng, iai te Atua ae koaua ao e maiu.

28 Ao ngkanne e taku Teeterom: E raka iaon temanna te Atua?

29 Ao e kaeka, E aki.

30 Ao ngkanne Teeterom e a manga taku riki nakoina: Ko kanga n atai bwaai aikai?

31 Ao e taku: E kaoti nakoiu te ^aanera.

32 Ao Teeterom e taku riki: Antai teuare e na roko? Natin te Atua?

33 Ao e taku nakoina, Eng.

34 Ao e taku riki Teeterom: E na kona ni kamaiuia ana aomata ^ai nanon aia bure? Ao Amureki e kaeka ao e taku nakoina: I taku nakoim e aki kona, bwa e bon kaangaanga irouna bwa e na kakewei ana taeka.

35 Ao ngkanne Teeterom e taku nakoia te botanaomata: Taraia bwa kam na uring bwaai aikai; bwa e taku bwa akea bwa ti temanna te Atua; ma e a manga taku bwa e na roko Natin te Atua, ma e na aki kamaiuia ana aomata—bwa aiaron ae iai mwaakana n anga te tua nakon te Atua.

36 Ao Amureki e a manga taetae riki nakoina: Nooria ko a tia ni kewe, bwa ko taku bwa I taetae n aiaron ae iai mwaakau n anga te tua nakon te Atua ibukin ae I taku bwa e na aki kona ni kamaiuia ana aomata i nanon aia bure.

37 Ao I taku riki nakoim bwa e aki kona ni kamaiuia n aia ^abure; bwa I aki kona ni kakewei ana taeka, ao e a tia n taku bwa ^bakea te bwai ae bareka ae kona ni karekea ^cuean karawa; ngaia ae, kam na kanga ni kamaiuaki, ma ti ngkana kam karekea uean karawa? Ngaia ae kam aki kona ni kamaiuaki i nanon ami bure.

38 Ao ngkanne Teeterom e a manga taku riki nakoina: Natin te Atua bon te Tama ae Akea Tokina?

39 Ao Amureki e taku nakoina: Eng, bon ngaia ^aTe Tama ae Akea Tokina i karawa ao i aon te aba, ao bwaai ni ^bkabane ake a mena i nanoia, bon ngaia moan waakin bwaai ao te toki, te moan ao te kabane.

40 Ao e na roko nakon te ^aaonaba bwa e na ^bkaboia ana aomata, ao e na ^ckatoka iaona riaoan te tua irouia naake a kakoaua arana; ao aikai ae a na reke irouia te maiu ae akea tokina, ao te kamaiuaki e aki reke riki nakoia tabemwaang.

41 Ngaia ae naake a buakaka a tiku n aroia ae titebo ma ^aakea te kaboaki ae a tia ni karekea, ma ti kabwarakin ana kabaebae te mate, bwa nooria, e na roko te bong are ni ^bkabane aomata a na teirake man te mate ao a na tei i matan te Atua ma ni ^cmotikaki taekaia n aron aia mwakuri.

42 Ngkai, iai te mate are e aranaki bwa te mate n rabwata; ao maten Kristo e na kabwara ana ^akabaebae te mate n rabwata, bwa ni kabane aomata a na kateirakeaki man te mate n rabwata.

43 Te tamnei ao te rabwata a na ^amanga ikotaki riki n aroia ae kororaoi; baai ma wae ma toman te rabwata ana manga kaokaki nakon teia ni koaua, n aron ae iroura n te tai aei; ao ti na uotaki bwa ti na tei i matan te Atua, n ataa naba ae ti ataia ngkai, ao man ^buring ara ^ckairua ni kabane.

44 Ao ngkanne, kaokakin bwaai nako e na reke nakoira ni kabane, nakoia ake a kara ao ake a uarereke, ake a kabaeaki ao ake a inaomata, nakon te mwaane ao te aine, nakoia ake a buakaka ao ake a raoiroi; ao a na akea naba iran atuuia ae e na bua; ao bwaai ni kabane a na manga ^akaokaki nakon aroia ae kororaoi, n aron ae ngkai, ke n te rabwata, ao a na uotaki ma ni kateaki i matan ana kai ni motikitaeka Kristo are Natin te Atua, ao te Atua te ^bTama, ao te Tamnei ae Tabu, are bon ^cte Atua ae temanna ae Akea Tokina, bwa a na ^dmotikaki taekaia n aron aia mwakuri, bwa a raoiroi ke a buakaka.

45 Ngkai, nooria, I a tia n taetae nakoimi ibukin maten te rabwata ae maamate, ao ibukin naba ^amangautin te rabwata ae maamate. I taku nakoimi bwa te rabwata ae maamate aio, e na ^bkateirakeaki bwa te rabwata ae ^caki maamate, ao aio bon man te mate, are man te moan mate nakon te maiu, bwa a na aki kona ni manga ^dmate; tamneia e na ikotaki ma rabwataia, aki kona ni manga kamaenakoaki; are nanona bwa te aomata iai ^etamneina ao e aki maamate ao a na aki manga noora te mka.

46 Ngkai, ngke Amureki e a tia n taekin taeka aikai aomata a rangi ni mimi, ao Teeterom naba e a ruru. Ao ikai are e a toki ana taeka Amureki, ke ti aio ae I a tia ni koroi.