1 O lenei sa i ai i le tulafono a Mosaea e faapea o tagata uma taitoatasi o e sa avea ma faamasino o le tulafono, po o i latou o e na tofia e avea ma faamasino, e tatau ona maua se totogi e tusa ma le taimi na latou galulue ai e faamasino i latou o e na aumai i o latou luma e faamasino.

2 O lenei afai sa aitalafu se tasi tagata i se isi tagata, ma sa ia lē fia totogi atu le mea na ia aitalafu ai, sa molia o ia i le faamasino; ma sa faaaoga e le faamasino le pule, ma auina atu leoleo e aumai le tagata i ona luma; ma sa ia faamasinoina le tagata e tusa ma le tulafono ma faamaoniga sa aumai e faasaga ia te ia, ma sa faapea ona faamalosia o le tagata e totogi atu le mea na ia aitalafu ai, pe ua tafiesea o ia, pe lafoa’iina i fafo mai totonu o le nuu e faapea o se gaoi ma se faomea.

3 Ma sa maua e le faamasino ona totogi e tusa ma lona taimi—o le senine auro mo le aso, po o le senuma ario, sa tutusa ma le senine auro; ma o lenei mea sa faia e tusa ma le tulafono lea na tuuina mai.

4 O lenei o igoa nei o a latou fasi auro eseese, ma a latou ario, e tusa ma o latou tau. Ma o igoa sa faia lava e sa Nifaē, ona sa latou lē faitau e tusa ma le ala a tagata Iutaia o e sa i Ierusalema; pe sa latou fua foi e tusa ma le ala a tagata Iutaia; ae sa latou sui la latou faitau ma la latou fua, e tusa ma mafaufau ma tulaga o tagata, i tupulaga uma taitasi, sei oo mai i le nofoa’iga a faamasino, ina ua ^afaatuina e le tupu o Mosaea.

5 O lenei e faapenei le faitauga o tupe—o le senine auro, o le seone auro, o le sume auro, ma le limena auro.

6 O le senuma ario, o le aminoa ario, o le eseroma ario, ma le oneti ario.

7 O le senuma ario e tutusa ma le senine auro, ma o soo se tasi o ia mea e tutusa ma le fuataga e tasi o le karite, po o le fuataga foi e tasi o ituaiga eseese o saito.

8 O lenei o le aofai o le seone auro e faaluaina le tau o le senine.

9 Ma o le sume auro e faaluaina le tau o se seone.

10 Ma o le limena auro o lo latou tau uma lena.

11 Ma o le aminoa ario e tusa lona telē ma senuma e lua.

12 Ma o le eseroma ario e tusa lona telē ma senuma e fa.

13 Ma o le oneti e tusa lona tau ma lo latou aofai uma.

14 O lenei o le tau lenei o a latou numera laiti i la latou faitauga—

15 O le sipelona o le afa lena o le senuma; o lea, o le sipelona mo le afa fuataga karite.

16 Ma o le sipelumo o le afa lena o le sipelona.

17 Ma o le lea o le afa lena o se sipelumo.

18 O lenei o la latou numera lenei, e tusa ma la latou faitauga.

19 O lenei o le anetione auro e tasi e tutusa ma sipelone e tolu.

20 O lenei, sa faia lenei mea mo le faamoemoe e tasi ia maua ai ni tupe se tele, ona sa latou maua o latou totogi e tusa ma a latou galuega, o lea, sa latou faaoso ai tagata ia vevesi, ma ituaiga uma o faasoesa ma amioleaga eseese, ina ia mafai ona faatele ai o a latou galuega, ina ia mafai ona latou ^amaua ai tupe e tusa ma tagi sa aumai i o latou luma; o lea na latou faaoso ai tagata ia tetee ia Alema ma Amoleka.

21 Ma sa amata e lenei Seseroma ona fesiligia Amoleka, fai mai: E mafai ona e tali mai i nai fesili itiiti o le a ou fesili atu ia te oe? O lenei o Seseroma o se tagata o lē sa poto tele i ^aala a le tiapolo, ina ia mafai ona ia faaumatia o mea lelei; o lea, na ia fai mai ai ia Amoleka: E te tali mai i fesili o le a ou tuu atu ia te oe?

22 Ma sa fai atu Amoleka ia te ia: Ioe, pe afai e tusa ai ma le ^aAgaga o le Alii, lea o loo i totonu ia te a’u; ona o le a ou lē fai atu se mea e lē tusa ai ma le Agaga o le Alii. Ma sa fai mai Seseroma ia te ia: Faauta, o oneti ario nei e ono, ma o nei mea uma o le a ou avatu ia te oe pe afai e te faafitia le i ai o sē Silisili.

23 O lenei sa fai atu Amoleka: E, oe o le ^atama a seoli, aisea ua e ^etofotofoina ai a’u? E te iloa e lē gauai atu e amiotonu i ni tofotofoga faapena?

24 E te talitonu ea ua leai se Atua? Ou te fai atu ia te oe, E leai, ua e iloa o loo i ai se Atua, peitai ua sili atu lou alofa i ^aoa nai lo o ia.

25 Ma o lenei ua e pepelo mai ia te a’u i luma o le Atua. Ua e fai mai ia te a’u—Faauta o oneti e ono, ua matuā tele lo latou tau, ou te avatu ia te oe—ae ua i ai i lou loto e taofi mai ia te a’u; ma ua na’o lou manao ia ou faafitia le Atua moni ma soifua, ina ia mafai ona e maua ai o se pogai e te faaumatia ai a’u. Ma o lenei faauta, ona o lenei mea leaga tele ua e faia, o le a e maua ai lava lou taui.

26 Ma sa fai mai Seseroma ia te ia: Ua e fai mai ea ua i ai se Atua moni ma soifua?

27 Ma sa fai atu Amoleka: Ioe, ua i ai se Atua moni ma soifua.

28 O lenei sa fai mai Seseroma: E sili atu ea i le tasi le Atua o i ai?

29 Ma sa ia tali atu, E leai.

30 O lenei sa toe fai mai Seseroma ia te ia: E faapefea ona e iloa o nei mea?

31 Ma sa fai atu o ia: O se ^aagelu na ia faaalia mai ia mea ia te a’u.

32 Ma sa toe fai mai Seseroma: O ai ia o le a afio mai? O le Alo ea o le Atua?

33 Ma sa fai atu o ia ia te ia, Ioe.

34 Ma sa toe fai mai Seseroma: O le a ia faaolaina ea ona tagata i a latou ^aagasala? Ma sa tali atu Amoleka ma fai atu ia te ia: Ou te fai atu ia te oe e lē faaolaina e ia, ona e lē mafai e ia ona faafitia lana upu.

35 O lenei sa fai atu Seseroma i tagata: Vaai ia outou manatua nei mea; ona ua fai mai o ia ua na’o le tasi lava le Atua; peitai ua ia fai mai o le a afio mai le Alo o le Atua, ae o le a ia lē faaolaina ona tagata—e peiseai ua ia te ia le pule e faatonu ai le Atua.

36 O lenei sa toe fai atu Amoleka ia te ia: Faauta ua e pepelo, ona ua e fai mai na ou tautala atu e peiseai ua ia te au le pule e faatonu ai le Atua ona sa ou fai atu o le a ia lē faaolaina ona tagata i a latou agasala.

37 Ma ou te toe fai atu ia te oe, e lē mafai ona ia faaolaina i latou i a latou ^aagasala; ona e lē mafai ona ou faafitia lana upu; ma ua ia fetalai mai e lē mafai e se mea ua ^elē mamā ona mautofi i le ⁱmalo o le lagi; o lea, e mafai faapefea ona faaolaina oe, vaganā ai ua e mautofi i le malo o le lagi? O lea, e lē mafai ona faaolaina oe i au agasala.

38 O lenei sa toe fai mai Seseroma ia te ia: O le Atalii ea o le Atua o le Tamā Faavavau lava lea?

39 Ma sa fai atu Amoleka ia te ia: Ioe, o ia lava lea o le ^aTamā Faavavau o le lagi ma le lalolagi, ma mea ^euma o i ai; o ia o le amataga ma le gataaga, o lē muamua ma lē mulimuli;

40 Ma o le a afio mai o ia i le ^alalolagi e ^etogiola ona tagata; ma o le a ia ⁱave i ona luga soligatulafono a i latou o e e talitonu i lona suafa; ma o i latou ia o e o le a latou maua le ola e faavavau, ma e leai se tasi e ese mai ai e oo mai i ai le olataga.

41 O lea e tumau ai e e amioleaga e peiseai e ^aleai se togiola na faia mo i latou, vaganā ai le tatalaina o fusi o le oti; auā faauta, e oo mai le aso e ^etoetutu ai tagata uma mai le oti ma laulaututu i luma o le Atua, ma ⁱfaamasinoina e tusa ma a latou galuega.

42 O lenei, ua i ai se oti ua ta’ua o le oti faaletino; ma o le maliu o Keriso o le a tatalaina ^afusi o lenei oti faaletino, o le a faatutu mai ai tagata uma mai lenei oti faaletino.

43 O le a toe ^afaatasia le agaga ma le tino i ona foliga atoatoa; o lima ma vae ma soogaoivi o le a toefuata’iina i ona tulaga e tatau ai, e pei lava ona tatou i ai nei i le taimi nei; ma o le a aumai i tatou e laulaututū i luma o le Atua, ma le iloa e pei ona tatou iloa nei, ma maua se ^etoe faamanatu manino o a tatou ⁱta’usalaga uma.

44 O lenei, o lea toefuataiga o le a oo mai i tagata uma, o e matutua ma e laiti, o e pologa ma e saoloto, o tane ma fafine, o e e amioleaga ma e e amiotonu; ma e oo lava i se lauulu e tasi o o latou ulu o le a lē toesea; ae o le a ^atoefuataiina mea taitasi i lona tino atoatoa, e pei ona i ai nei, po o i le tino, ma o le a aumai ma molia i luma o le pa faamasino a Keriso le Alo, ma le Atua le ^eTamā, ma le Agaga Paia, o le ⁱAtua Faavavau e tasi, e ^ofaamasinoina e tusa ma a latou galuega, pe ua lelei pe ua leaga.

45 O lenei, faauta, ua ou tautala atu ia te outou e uiga i le oti o le tino faaletino, ma e uiga foi i le ^atoetu mai o le tino faaletino. Ou te fai atu ia te outou o lenei tino faaletino e ^efaatu mai i se ⁱtino ola pea, o lona uiga mai le oti, mai le oti muamua lava i le ola, e lē mafai ona toe ^ooti i latou; ae faatasia o latou agaga ma o latou tino, e lē toe tuueseeseina; ma faapea ona avea ai le tino atoa ma tino ^ufaaleagaga ma ola pea, e lē mafai ona toe oo le pala ia i latou.

46 O lenei, ina ua uma ona fai atu e Amoleka nei upu, sa toe amata ona taufaiofo o tagata, ma sa amata foi ona gatete o Seseroma. Ma sa faapea ona i’u o upu a Amoleka, pe ona pau ia o upu ua ou tusia.