1 Ita adda iti linteg ni Mosiah a ti tunggal tao nga ukom ti linteg, wenno dagiti natudingan nga ukom, ti nasken nga umawat ti tangdan a mayannurot iti oras a nagbannoganda a mangukom kadagiti naidatag iti sanguananda tapno maukom.

2 Ita no nakautang ti tao iti sabali, ket agkedked a bayadan ti inutangna, maidarum iti ukom; ket ipatungpal ti ukom ti turayna, ket mangibaon kadagiti opisial a mangsukon kadaytoy a tao tapno maisaklang kenkuana; ket kednganna ti tao a mayannurot iti linteg ken pammaneknek a maidatag a maibusor kenkuana, ket iti kasta mapilit ti tao nga agbayad iti utangna, wenno makamkam amin a sanikuana, wenno mapatalaw manipud kadagiti tattao a kas mannanakaw ken tulisan.

3 Ket awaten ti ukom ti tangdanna mayannurot ti orasna—maysa a senine a balitok ti para iti maysa nga aldaw, wenno maysa a senum ti pirak, a kapada ti maysa a senine a balitok; ket mayannurot daytoy iti naipaulog a linteg.

4 Ita dagitoy ti nagan dagiti nadumaduma a pidaso ti balitokda, ken ti pirakda, maibatay iti pategda. Dagiti Nephita ti nangnagan kadagitoy, agsipud ta saanda a nagbilang a kas iti wagas dagiti Hudio nga adda iti Jerusalem; wenno nagrukod babaen ti wagas dagiti Hudio; ngem binaliwanda ti panagbilang ken panagrukodda, maibatay kadagiti kapanunotan ken kasasaad dagiti tattao, iti tunggal sangkaputotan, agingga iti panagturay dagiti ukom, nga isuda ti ^aimpasdek ni ari Mosiah.

5 Ita kastoy ti pananggatad—maysa a senine a balitok, maysa a seon a balitok, maysa a shum a balitok, ken maysa a limnah a balitok.

6 Maysa a senum a pirak, maysa nga amnor a pirak, maysa nga ezrom a pirak, ken maysa nga onti a pirak.

7 Maipada ti maysa a senum ti pirak iti maysa a senine ti balitok, ket wenno para iti sangasukat a sebada, ken kasta met iti sangasukat ti tunggal kita a bukel.

8 Ita mamindua a gatad ti senine ti kantidad ti maysa a seon ti balitok.

9 Ket mamindua a gatad ti seon ti maysa a shum ti balitok.

10 Ket maysa a limnah ti balitok ti gatadda amin.

11 Ket katukad ti dua a senum ti maysa nga amnor ti pirak.

12 Ket katukad ti uppat a senum ti maysa nga ezrom ti pirak.

13 Ket maysa nga onti ti katukadda amin.

14 Ita daytoy ti gatad dagiti nababbaba a numero ti panagbilangda—

15 Kagudua ti senum ti maysa a shiblon; ngarud, maysa a shiblon para iti kagudua a sukat ti sebada.

16 Ket kagudua ti maysa a shiblon ti maysa a shiblum.

17 Ket kagudua ti maysa a shiblum ti maysa a leah.

18 Ita daytoy ti bilangda, maibatay ti pananggatadda.

19 Ita maipada ti tallo a shiblon ti maysa nga antion ti balitok.

20 Ita, panggep laeng daytoy ti makaawat iti gunggona, gapu ta immawatda kadagiti tangdanda mayannurot iti trabahoda, ngarud, sinugsuganda dagiti tattao nga aggugulo, ken amin a kita ti panangriribuk ken kinadakes, tapno maaddaanda iti ad-adu pay a trabaho, tapno ^amakaalada iti kuarta maibatay kadagiti darum a maisaklang kadakuada; ngarud sinugsuganda dagiti tattao a maibusor kada Alma ken Amulek.

21 Ket nangrugi a nagsaludsod daytoy a Zeezrom ken ni Amulek, a kunkunana: Sungbatam kadi ti sumagmamano a saludsod a saludsodek kenka? Ita maysa a lalaki ni Zeezrom nga eksperto kadagiti ^apamuspusan ti sairo, tapno madadaelna ti naimbag, ngarud, kinunana ken ni Amulek: Sungbatamto kadi dagiti saludsodko kenka?

22 Ket kinuna ni Amulek kenkuana: Wen, no mayannurot iti ^aEspiritu ti Apo, nga adda kaniak; agsipud ta awanto ti kunaek a maikanniwas iti Espiritu ti Apo. Ket kinuna ni Zeezrom kenkuana; Kitaen, kitaen ti innem nga onti ti pirak, ket itedko amin dagitoy kenka no ilibakmo ti kaadda iti Kangatuan a Persona.

23 Ita kinuna ni Amulek: O sika nga ^aanak ti impierno, apay a ^bsulisogennak aya? Saanmo kadi ammo a saan a tumulok ti nalinteg iti kasta a pannulisog?

24 Mamatika kadi nga awan ti Dios? Kunak kenka, Saan, ammom nga adda Dios, ngem ad-adda ti panagayatmo iti dayta a ^akinabaknang ngem kenkuana.

25 Ket ita nagulbodka kaniak iti sango ti Dios. Kinunam kaniak—Kitaen ti innem nga onti, a dakkel a kantidad, itedko kenka—idinto nga addan iti pusom a tagikuaen dagitoy; ket tarigagayam laeng nga ilibakko ti pudno ken sibibiag a Dios, tapno adda panggapuanam a mangdadael kaniak. Ket ita kitaen, gapu iti daytoy dakkel a kinadakes maaddaanka iti gunggona.

26 Ket kinuna ni Zeezrom kenkuana: Kunam kadi nga adda pudno ken sibibiag a Dios?

27 Ket kinuna ni Amulek: Wen, adda pudno ken sibibiag a Dios.

28 Ita kinuna ni Zeezrom: Nasursurok kadi ngem maysa ti Dios?

29 Ket insungbatna, Saan.

30 Ita kinuna manen ni Zeezrom kenkuana: Kasano ti pannakaammom kadagitoy a banag?

31 Ket kinunana: Maysa nga ^aanghel ti nangipakaammo kaniak.

32 Ket kinuna manen ni Zeezrom: Siasino dayta nga umayto? Isu kadi ti Anak ti Dios?

33 Ket kinunana kenkuana, Wen.

34 Ket kinuna manen ni Zeezrom: Isalakanna kadi dagiti taona ^aiti basbasolda? Ket insungbat ni Amulek kenkuana: Kunak kenka a saannanto nga aramiden, agsipud ta saan a mabalin para kenkuana nga ilibakna ti balikasna.

35 Ita kinuna ni Zeezrom kadagiti tattao: Pennekenyo a lagipen dagitoy a banag; agsipud ta kinunana a maymaysa laeng ti Dios; ngem kinunana met nga umayto ti Anak ti Dios, ngem saannanto nga isalakan dagiti taona—a kasla ketdin adda turayna a mangbilin iti Dios.

36 Ita kinuna manen ni Amulek kenkuana: Kitaen nagulbodka, agsipud ta kinunam nga insaok a kasla adda turayko a mangbilin iti Dios agsipud ta kinunak a saannanto nga isalakan dagiti taona no sibabasolda.

37 Ket kunak manen kenka a saanna maisalakan ida no ^asibabasolda; agsipud ta saanko a mailibak ti balikasna, ken kinunana nga ^bawan ti narugit a banag a makatawid iti ^cpagarian ti langit; ngarud, kasano ti pannakaisalakanmo, malaksid no tawidem iti pagarian ti langit? Ngarud, saanka a maisalakan no sibabasolkayo.

38 Ita kinuna manen ni Zeezrom kenkuana: Ti kadi Anak ti Dios ti Agnanayon nga Ama?

39 Ket kinuna kenkuana ni Amulek: Wen, isu ti ^aAgnanayon nga Ama iti langit ken iti daga, ken ^bamin a banag nga adda kadakuada; isu ti punganay ken panungpalan, ti umuna ken ti maudi;

40 Ket umayto ditoy ^alubong a ^bmangsubbot kadagiti taona; ket ^cawatennanto dagiti naglabsingan dagidiay mamati iti naganna; ket dagitoyto ti maaddaan iti agnanayon a biag, ket awanto iti sabali pay a makaawat iti pannakaisalakan.

41 Ngarud agtalinaed dagiti dakes a kasla ^aawan ti pannakasubbot a naaramid, malaksid ti pannakawarwar ti bedbed ti patay; gapu ta kitaen, umayto ti aldaw a bumangonto ti ^bamin manipud iti patay ket tumakderdanto iti sango ti Dios, ket ^cmaukomda mayannurot kadagiti aramidda.

42 Ita, adda pannakatay a maawagan iti naindagaan a pannakatay; ket ti ipapatay ni Cristo ti mangwarwarto kadagiti ^abedbed daytoy naindagaan a pannakatay, tapno agungarto ti amin manipud iti daytoy naindagaan a pannakatay.

43 Ti Espiritu ken ti bagi ket ^aagtiponto manen iti naan-anay a langana; agpada a maisublinto dagiti saka ken ima ken nagsusuopan iti umiso a pannakasukogna, a kas met laeng iti kitatayo iti daytoy a kanito; ket maisaklangtayonto iti sango ti Dios, nga ammotayo kas iti pannakaammotayo ita, ket maaddaantayonto iti nalawag a ^bpannakalagip iti amin a ^cbidduttayo.

44 Ita, maipaayto daytoy a pannakaisubli iti amin, agpada a nataengan ken ubing, agpada nga adipen ken siwayawaya, agpada a lalaki ken babai, agpada a dakes ken nalinteg, ken kasta met nga awanto ti uray maysa a buok ti uloda a mapukaw; ngem ^amaisublinto ti amin iti naan-anay a pannakasukogna, a kas ita, wenno iti bagi, ket maisaklangto ken mausig iti pangukoman ni Cristo nga Anak, ken ti Dios nga ^bAma, ken ti Nasantuan nga Espiritu, a ^cmaymaysa nga Agnanayon a Dios, tapno ^dmaukom mayannurot kadagiti aramidda, naimbagda man wenno dakesda.

45 Ita, kitaen, naisaokon kadakayo ti maipapan iti ipapatay ti matay a bagi, ken kasta met ti maipapan iti ^apanagungar ti matay a bagi. Kunak kadakayo a daytoy a matay a bagi ket ^bmaibangon iti ^csaan a matay a bagi, dayta ti manipud iti patay, uray manipud iti immuna nga ipapatay nga agturong iti biag, ta saandanto a ^dmatay pay; makitiponton dagiti espirituda kadagiti bagida, a saanen a maisina; isu nga agbalin ti sibubukel a ^enaespirituan ken saan a matay, ket saandanton makita ti panagrupsa.

46 Ita, nangrugi manen a nasdaaw dagiti umili idi nalpas nga imbaga ni Amulek dagitoy a balikas kadakuada, ket nangrugi met a nagtigerger ni Zeezrom. Ket kasta ti panaggibus dagiti balikas ni Amulek, wenno daytoy laeng ti naisuratko.