Pāpa’ira’a mo’a
Alama 13


Pene 13

’Ua pi’ihia te mau tāne ’ei mau tahu’a rahi nō tō rātou fa’aro’o rahi ’e tā rātou mau ’ohipa maita’i—’Ua tītauhia rātou ’ia ha’api’i i te mau fa’auera’a—Nā roto i te parauti’a e ha’amo’ahia rātou ’e e tomo atu rātou i roto i te fa’aeara’a o te Fatu—’O Melehizedeka te hō’ē o rātou—Tē fa’a’ite haere ra te mau melahi i te mau parau nō te ’oa’oa nā roto i te mau fenua ē ’ati noa a’e—E parau mai rātou nō te taera’a mai te Mesia. Fātata 82 H.M.

1 ’E teie fa’ahou, e tō’u mau taea’e, ’ua hina’aro vau ’ia hi’o ’outou i muri i te tau i tu’u mai ai te Fatu te Atua i teie mau fa’auera’a i tāna ra mau tamari’i ; ’e ’ua hina’aro ho’i au ’ia ha’amana’o ’outou ē, ’ua fa’atōro’a te Fatu te Atua i te mau tahu’a, ’ia au i tāna ra fa’anahora’a mo’a, ’oia ho’i te fa’anahora’a a tāna Tamaiti, ’ia ha’api’i mai i taua mau mea nei i te ta’ata nei.

2 ’E ’ua fa’atōro’ahia taua mau tahu’a ra ’ia au i te fa’anahora’a a tāna ra Tamaiti, nā roto i te hō’ē rāve’a e ti’a ai i te mau ta’ata ’ia ’ite i te rāve’a nō te hi’o atu i tāna ra Tamaiti nō te fa’aorara’a.

3 ’E teie te huru nō tō rātou fa’atōro’ara’ahia—’ua pi’ihia ’e ’ua fa’aineinehia rātou mai te ha’amatara’a mai ā o te ao nei mai te au i te ’ite-ātea-ra’a o te Atua, nō tō rātou fa’aro’o rahi ’e tā rātou mau ’ohipa maitata’i ; ’e i te ha’amatara’a ’ua vaiihohia rātou ’ia mā’iti i te maita’i ’e ’aore rā i te ’ino ; ’e nō te mea ’ua mā’iti rātou i te maita’i, ’e ’ua fa’a’ohipa i te fa’aro’o rahi roa, ’ua pi’ihia rātou i te hō’ē pi’ira’a mo’a, ’oia ïa, i taua pi’ira’a mo’a i fa’aineinehia mai te au i te fa’aorara’a i fa’aineinehia nō te feiā mai te reira te huru.

4 ’E ’ua nā reira rātou i te pi’ihia nō teie pi’ira’a mo’a mai te au i tō rātou fa’aro’o, ’a pāto’i ai te tahi pae i te Vārua o te Atua nō te ’eta’eta o tō rātou ’ā’au ’e te pōiri ho’i o tō rātou mana’o ; ’e ’āhiri ē ’aita i nā-reira-hia, ’ua fāri’i ïa rātou i te fāna’o rahi mai tō rātou ra mau taea’e.

5 ’Oia ho’i, i te mātāmua hō’ē ā ïa tō rātou ti’ara’a ’e tō rātou mau taea’e ; nō reira ’ua fa’aineinehia teie nei pi’ira’a mo’a mai te ha’amatara’a mai ā o te ao nei nō te feiā ’o tei ’ore i fa’a’eta’eta i tō rātou ’ā’au ; ’e ’ua nā-reira-hia i roto ’e nā roto i te tāra’ehara a te Tamaiti fānau tahi, ’o tei fa’aineinehia—

6 ’E ’ua nā reira rātou i te pi’ihia i teie nei pi’ira’a mo’a, ’e i te fa’atōro’ahia i te autahu’ara’a rahi ’ia au i te fa’anahora’a mo’a a te Atua, nō te ha’api’i atu i tāna mau fa’auera’a i te mau tamari’i a te ta’ata nei, ’ia ti’a ato’a ia rātou ’ia tomo atu i roto i tōna ra fa’aeara’a—

7 ’Ua fa’anahohia teie autahu’ara’a rahi ’ia au i te fa’anahora’a a tāna ra Tamaiti, ’e taua fa’anahora’a ra i vai na ïa mai te ha’amatara’a mai ā o te ao nei ; ’oia ho’i, ’aita tōna e mahana ha’amatara’a ’e ’aita ho’i e matahiti fa’ahope’ara’a, ’ua fa’aineinehia ho’i mai te tau mure ’ore ē tae atu i te tau mure ’ore, mai te au i tōna ’ite-ātea-ra’a i te mau mea ato’a ra—

8 I teienei ’ua fa’atōro’ahia rātou mai teie te huru—’ua pi’ihia rātou i te hō’ē pi’ira’a mo’a, ’e ’ua fa’atōro’ahia ho’i i te hō’ē tōro’a mo’a, ’e ’ua rave ho’i i ni’a ia rātou i te autahu’ara’a rahi nō te fa’anahora’a mo’a, ’e taua pi’ira’a ra, ’e tōro’a ra, ’e autahu’ara’a rahi ra ’aita ïa e ha’amatara’a ’e ’aita ho’i e fa’ahope’ara’a—

9 Nō reira ’ua riro atu ra rātou ’ei mau tahu’a rahi ē a muri noa atu, ’ia au i te fa’anahora’a a te Tamaiti, te Fānau tahi a te Metua, ’aita e mau mahana ha’amatara’a ’e ’aita ho’i e mau matahiti fa’ahope’ara’a, ’e tei ’ī i te maita’i, ’e te fāito ti’a, ’e te parau mau. ’E ’oia mau roa ïa. ’Āmene.

10 I teienei, mai tā’u i parau nō ni’a i te fa’anahora’a mo’a, ’oia ho’i teie nei autahu’ara’a rahi, e rave rahi tei fa’atōro’ahia ’e ’ua riro ho’i ’ei mau tahu’a rahi nā te Atua ; ’e nō tō rātou fa’aro’o rahi ’e te tātarahapara’a, ’e tō rātou parauti’a i mua i te Atua, ’ua mā’iti rātou ’ia tātarahapa ’e ’ia rave i te ’ohipa parauti’a, ’e ’eiaha ’ia pohe.

11 Nō reira ’ua pi’ihia rātou ’ia au i teie nei fa’anahora’a mo’a, ’e ’ua ha’amo’ahia, ’e ’ua horoihia tō rātou mau ’ahu ’ia teatea nā roto i te toto o te ’Ārenio.

12 I teienei, i muri iho i tō rātou ha’amo’ara’ahia e te Vārua Maita’i, ’e i muri iho i te fa’ateateara’ahia tō rātou mau ’ahu, ’e i muri iho i tō rātou rirora’a ’ei mea mā ’e te pōra’o ’ore i mua i te Atua, ’aita roa i ti’a ia rātou ’ia hi’o noa atu i te hara, ma te ’ore e au ’ore rahi atu i te reira ; e rave rahi, ’e e rave rahi roa atu tei tāmāhia ’e tei tomo atu i roto i te fa’aeara’a o te Fatu tō rātou Atua.

13 ’E i teienei, e tō’u mau taea’e, ’ua hina’aro vau ’ia fa’aha’eha’a ’outou ia ’outou iho i mua i te Atua, ’e ’ia fa’ahotu mai i te hotu e au nō te tātarahapa, ’ia ti’a ato’a ia ’outou ’ia tomo i roto i taua fa’aeara’a ra.

14 ’Oia ïa, ’a fa’aha’eha’a na ia ’outou iho mai tā te feiā i te mau mahana o Melehizedeka, ’oia te tahu’a rahi i roto i teie ato’a iho fa’anahora’a o tā’u i parau iho nei, ’e ’o tei rave ato’a i ni’a iho iāna i te autahu’ara’a rahi ē a muri noa atu.

15 ’E ’o teie ato’a iho ā Melehizedeka tā Aberahama i ’aufau atu i te tufa’a ’ahuru ; ’oia ïa, ’ua ’aufau ato’a atu tō tātou metua tāne ra ’o Aberahama i te tufa’a ’ahuru ’oia ho’i i te ’ahuru nō te tufa’a nō tāna ra mau tao’a ato’a.

16 I teienei ’ua hōro’ahia mai teie mau ’ōro’a mai teie te huru, ’ia ti’a i te mau ta’ata ’ia hi’o atu i te Tamaiti a te Atua, e taipe ho’i te reira nō tāna ra fa’anahora’a, ’e ’o tāna fa’anahora’a ïa, ’e ’ua ravehia te reira ’ia ti’a ia rātou ’ia hi’o atu iāna nō te ha’amatarara’a i tā rātou ra mau hara, ’e ’ia ti’a ia rātou ’ia tomo atu i roto i te fa’aeara’a o te Fatu.

17 I teienei, ’o taua Melehizedeka ra, ’o te ari’i ïa i ni’a i fenua ra nō Salema ; ’e ’ua pūai roa ho’i tōna ra mau ta’ata i roto i te mau ’ohipa ’ī’ino ’e te mau ’ohipa vi’ivi’i ; ’oia ïa, ’ua haere ’ē rātou ato’a ra ; ’e ’ua ’ī ho’i rātou i te mau huru ’ohipa ’ī’ino ato’a ra.

18 ’E nō te mea e fa’aro’o rahi tō Melehizedeka, ’e ’ua fāri’i ’oia i te tōro’a i roto i te autahu’ara’a rahi mai te au i te fa’anahora’a mo’a a te Atua, ’ua a’o atu ’oia i te parau nō te tātarahapa i tōna ra mau ta’ata. ’E inaha, ’ua tātarahapa rātou ; ’e ’ua fa’atupu Melehizedeka i te hau i ni’a i te fenua i tōna ra mau pu’e mahana ; nō reira ’ua parauhia ’oia te ari’i nō te hau ; e ari’i ho’i ’oia nō Salema ; ’e ’ua fa’atere ’oia i raro a’e i tōna ra metua tāne.

19 I teienei, e rave rahi tei nā mua iāna, e rave rahi ho’i tei nā muri, ’aita rā te tahi i hau atu i te rahi iāna ; nō reira, ’ua fa’a’ite-pāpū-hia te parau nōna.

20 I teienei, e mea faufa’a ’ore ’ia parau fa’ahou vau i taua mau mea ra ; te mau mea tā’u i parau iho nei ’ua nava’i ïa. Inaha, tei mua ia ’outou te mau pāpa’ira’a mo’a ; ’e mai te mea e fa’ahuru ’ē ’outou i te reira, e ha’amouhia ïa ’outou.

21 ’E i teienei, i muri a’era, ’ia oti a’era tā Alama paraura’a i teie mau parau ia rātou, ’ua fa’atoro atu ra ’oia i tōna rima i ni’a ia rātou, ’e ’ua ti’aoro atu ra ma te reo rahi, i te nā-’ō-ra’a atu ē : ’O teie nei te taime nō te tātarahapa, tē fātata mai nei ho’i te mahana nō te fa’aorara’a.

22 ’Oia ïa, tē fa’a’ite mai ra te reo o te Fatu i te reira i tō te mau nūna’a ato’a, nā roto i te vaha o te mau melahi ; ’oia ïa, tē fa’a’ite mai ra ’oia i te reira ’ia roa’a ia rātou te mau parau ’oa’oa nō te ’oa’oa rahi ; ’oia ïa, ’e tē pi’i ra ’oia i teie mau parau ’oa’oa i rotopū i tōna mau ta’ata ato’a, ’oia ïa, i te feiā ato’a i ha’apurarahia i ni’a i te fenua nei ; nō reira, ’ua tae mai te reira ia tātou nei.

23 ’E ’ua fa’a’itehia mai te reira ia tātou ma te pāpū maita’i, ’ia māramarama maita’i tātou, ’ia ’ore tātou ’ia hape ; ’e ’ua nā-reira-hia nō te mea e feiā purutia tātou i roto i te hō’ē fenua ’ē ; nō reira ’ua ha’amaita’i-rahi-hia tātou, ’e ’ua fa’a’itehia mai ho’i teie nei mau parau ’oa’oa ia tātou nei, ē hope roa a’e tā tātou nei ’ō vine.

24 Inaha ho’i, tē fa’a’ite noa mai nei ā te mau melahi i te reira i te mau ta’ata e rave rahi i tō tātou nei fenua ; ’e ’ua nā-reira-hia ’ia fa’aineinehia te ’ā’au o te mau tamari’i a te ta’ata nei ’ia fāri’i i tāna ra parau i te tau e tae mai ai ’oia i roto i tōna ra hanahana.

25 ’E i teienei, tē tīa’i nei tātou nō te fa’aro’o i te mau parau ’āpī ’oa’oa nō tōna taera’a mai, ’o tē fa’a’itehia mai ia tātou nā roto i te vaha o te mau melahi ; tē tae mai ra ho’i te tau, ’aita rā tātou i ’ite i te ’oi’oira’a nō te reira. ’Ua hina’aro roa ho’i au ’ia tupu te reira i tō’u nei mau mahana ; ’āre’a rā poto noa atu te tau, ’e maoro noa atu, e ’oa’oa ïa vau i te reira.

26 ’E e fa’a’itehia ho’i te reira i te feiā parauti’a ’e te mo’a, nā roto i te vaha o te mau melahi, i te tau e tae mai ai ’oia ra, ’ia tupu te mau parau a tō tātou mau metua, mai tā rātou i parau nō ni’a iāna, ’ia au i te vārua nō te tohu tei roto ia rātou ra.

27 ’E i teienei, e tō’u mau taea’e, ’ua hina’aro vau ma tō’u ’ā’au ato’a, ’oia ïa, ma te hepohepo rahi ē tae noa atu i te māuiui, ’ia fa’aro’o mai ’outou i tā’u nei mau parau, ’e ’ia fa’aru’e i tā ’outou mau hara, ’e ’eiaha e fa’atāere i te mahana nō tā ’outou tātarahapara’a.

28 ’Ia fa’aha’eha’a rā ’outou ia ’outou iho i mua i te Fatu, ’e ’ia ti’aoro atu i tōna ra i’oa mo’a, ’e ’ia ara ’e ’ia pure tāmau noa, ’ia ’ore tō ’outou fa’ahemara’a ’ia hau i tō ’outou pūai, ’e ’ia arata’ihia ’outou e te Vārua Mo’a, ’e ’ia riro ’outou ’ei feiā ha’eha’a, ’e te marū, ’e te auraro māite, ’e te fa’a’oroma’i, ’e te ’ī ho’i i te aroha ’e te fa’a’oroma’i roa.

29 Ma te ti’aturi i te Fatu, ’e ma te ti’aturi e fāri’i ’outou i te ora mure ’ore ; ’e ma te fāri’i noa i te aroha o te Atua i roto i tō ’outou ’ā’au, ’ia ti’a ia ’outou ’ia fa’ateiteihia i te mahana hope’a ’e ’ia tomo atu i roto i tōna ra fa’aeara’a.

30 ’E ’ia hōro’a mai te Fatu i te tātarahapa ia ’outou, ’ia ’ore ’outou ’ia fa’atae mai i tōna riri ’ū’ana i ni’a iho ia ’outou, ’ia ’ore ’outou ia ru’uru’uhia i raro i te mau fifi o hade, ’e ’ia ’ore ho’i ’outou ’ia fāri’i i te piti o te pohe.

31 ’E ’ua parau atu Alama i te mau ta’ata, i te mau parau e rave rahi ’o tei ’ore i pāpa’ihia i roto i teie nei buka.