Japta 13

Oli bin singaotem ol man blong kam hae pris from fet blong olgeta i bigwan tumas mo ol wok blong olgeta oli gud—Oli mas tijim ol komanmen—Tru long stret fasin oli mekem olgeta i kam klin aot long ol sin mo oli go insaed long kingdom blong Lod—Melkisedek i bin wan long olgeta ia—Ol enjel oli stap talemaot ol gudfala nius long evri ples long graon—Bae oli talemaot se Kraes bae i kam. Raonabaot 82 yia bifo Kraes i bon.

 Mo bakegen, ol brata blong mi, mi wantem blong tekem tingting blong yufala i gobak long taem we Lod God i bin givim ol komanmen ia long ol pikinini blong hem; mo mi wantem se yufala i tingbaot se Lod God i bin odenem ol pris, folem tabu oda blong hem, we i bin folem oda blong Pikinini blong hem, blong tijim ol samting ia long ol pipol.

 Mo oli bin odenem ol pris ia folem oda blong Pikinini blong hem, long wan fasin we, tru long wei ia, ol pipol oli save long wanem fasin blong lukluk long taem we Pikinini blong hem bae i pemaot olgeta.

 Mo hemia fasin we oli bin odenem olgeta—oli bin singaotem olgeta mo mekem olgeta i rere stat long taem we wol i bin stat folem save blong God we hem i gat finis, from fet blong olgeta i bigwan tumas mo ol wok blong olgeta oli gud; long stat, oli bin livim olgeta blong jusum gud o nogud; taswe from oli bin jusum gud, mo oli yusum fet we i bigfala tumas, oli singaotem olgeta wetem wan tabu koling, yes, wetem tabu koling ia we i bin rere wetem, mo folem wan fasin blong pemaot man we i rere i stap finis blong ol man ia.

 Mo olsem ia nao oli bin singaotem olgeta long tabu koling ia from fet blong olgeta, taem we ol narawan bae oli sakemaot Spirit blong God, from ol hat blong olgeta i strong, mo tingting blong olgeta i blaen, taem we, sapos hem i no bin from samting ia, maet oli bin gat ol bigfala raet olsem ol brata blong olgeta.

 O blong endem, long fas taem oli bin stap semak wetem ol brata blong olgeta; olsem ia nao oli bin mekem rere tabu koling ia stat long taem we wol i bin stat, blong olgeta ia we bae oli no mekem hat blong olgeta i kam strong, hem i from mo tru atonmen blong Wan Pikinini Nomo, we oli bin mekem i rere—

 Mo olsem ia nao oli bin singaotem olgeta tru long tabu koling ia, mo oli bin odenem olgeta long hae prishud blong tabu oda blong God, blong tijim ol komanmen blong hem long ol pikinini blong ol man, blong olgeta tu i save go insaed long kingdom blong hem—

 Hae prishud ia i folem oda blong Pikinini blong hem, we oda ia i bin stap stat long taem we wol i bin stat; o long narafala toktok, i no gat stat blong ol dei o en blong ol yia, oli bin mekem i rere stat long wan taem we i no save finis i go long evri taem we i no save finis, folem save blong hem we i gat finis long saed blong evri samting—

 Oli bin odenem olgeta long fasin ia nao—oli bin singaotem olgeta wetem wan tabu koling mo oli bin odenem olgeta wetem wan tabu odinens, mo oli bin tekem long olgeta hae prishud blong tabu oda, we koling, mo odinens, mo hae prishud, i no gat stat o en—

 Olsem ia nao oli kam ol hae pris blong oltaem, folem oda blong Pikinini, Wan Pikinini Nomo blong Papa, we i no gat stat blong ol dei o en blong ol yia, we i fulap long gladhat, jastis, mo trutok. Mo i olsem ia nao. Amen.

 10 Nao, olsem we mi bin talem long saed blong tabu oda, o hae prishud ia, i gat plante we oli bin odenem olgeta mo oli bin kam ol hae pris blong God; mo hem i from bigfala fet blong olgeta mo fasin blong sakem sin, mo blong stret fasin blong olgeta long fored blong God, oli bin jusum blong sakem sin mo mekem wok we i stret, oli no bin jusum blong kasem ded;

 11 Taswe oli bin singaotem olgeta long tabu oda ia, mo oli bin mekem olgeta oli klin aot long ol sin, mo oli bin wasem ol klos blong olgeta i kam waet tru long blad blong Smol Sipsip.

 12 Nao olgeta, afta we oli bin mekem olgeta oli klin aot long ol sin tru long Tabu Spirit, ol klos blong olgeta oli bin kam waet, oli bin klin mo oli no gat mak long fored blong God, oli no bin save luk sin sapos oli no gat fasin blong no laekem; mo i bin gat plante man, plante we plante tumas, we oli bin kam klin mo oli bin go insaed long kingdom blong Lod, God blong olgeta.

 13 Mo nao, ol brata blong mi, mi wantem yufala blong putum tingting blong yufala i stap daon long fored blong God, mo karem i kam ol frut ia we i soem se oli wantem blong sakem sin, blong yufala tu i save go insaed long kingdom blong hem.

 14 Yes, putum tingting blong yufala daon olsem we ol pipol long ol dei blong Melkisedek, we i bin wan hae pris tu folem semfala oda ia we mi bin tokbaot, we tu hem i bin kasem hae prishud blong oltaem.

 15 Mo hem i semfala Melkisedek ia we long hem Ebraham i bin pem taeting; yes, we hem i papa blong yumi Ebraham, hem i bin pem wan ten long evri samting we hem i bin gat olsem taeting blong hem.

 16 Nao ol odinens ia oli bin givim olgeta long fasin ia, blong wei ia ol pipol oli save luk fored long Pikinini blong God, hem i bin wan kaen samting blong oda blong hem, o hem i bin oda blong hem, mo samting ia blong oli save luk fored long hem blong kam klin aot long ol sin blong olgeta, blong oli save go insaed long kingdom blong Lod.

 17 Nao Melkisedek ia i bin king blong graon blong Salem; mo ol man blong hem i bin kam strong long rabis fasin mo ol rabis sin; yes, olgeta evriwan i bin lego ol gudfala rod; oli bin fulap long evri kaen fasin nogud;

 18 Be Melkisedek from hem i bin yusum bigfala fet, mo hem i bin kasem wok blong hae prishud folem tabu oda blong God, i bin prijim fasin blong sakem sin long ol pipol blong hem. Mo luk, oli bin sakem sin; mo Melkisedek i bin stanemap pis long graon long ol dei blong hem; taswe, oli bin singaotem hem boe blong king blong pis, from hem i bin king blong Salem; mo hem i bin rul andanit long papa blong hem.

 19 Nao, i bin gat plante bifo long hem, mo tu i bin gat plante afta, be i no gat wan we i moa hae long hem; taswe, oli bin tokbaot hem moa fulap.

 20 Nao mi no nid blong talem bak samting ia; wanem we mi bin talem, bae i inaf. Luk, ol skripja i stap long fored blong yufala; sapos yufala i twistim mining blong olgeta, bae i smasem gud yufala bakegen.

 21 Mo nao i bin hapen se, taem we Alma i bin talem ol toktok ia long olgeta, hem i bin stretem han blong hem long olgeta mo i bin singaot wetem wan strong voes, se: Naoia hem i taem blong sakem sin, from dei blong fasin blong sevem man i kam klosap.

 22 Yes, mo voes blong Lod, tru long maot blong ol enjel, i talemaot samting ia long evri kantri; yes, i talemaot samting ia, blong oli save gat ol gudfala nius blong bigfala glad; yes, hem i talemaot ol gudfala nius ia long evri pipol, yes, long olgeta tu we oli bin seraot i go olbaot long fes blong wol; from samting ia oli bin kam long yumi.

 23 Mo oli bin talemaot long yumi long wan klia fasin, blong yumi save haremsave, blong yumi no save mestem; mo samting ia from yumi stap wokbaot olbaot long wan graon we yumi no save; taswe, Lod i laekem yumi plante tumas, from yumi gat ol gudfala nius ia we oli stap talemaot long yumi long evri pat blong plantesen blong rop blong grep blong yumi.

 24 From luk, ol enjel oli stap talemaot samting ia long plante man, naoia long graon blong yumi; mo hem i stamba tingting ia blong mekem rere ol hat blong ol pikinini blong ol man blong kasem toktok blong hem, long taem we bae hem i kam long glori blong hem.

 25 Mo nao yumi wet nomo blong harem ol gudfala nius we bae oli talemaot long yumi tru long maot blong ol enjel, long saed blong taem we bae hem i kam; from taem i kam, yumi no save se i klosap olsem wanem. Mi wantem tumas long God se i save hapen long dei blong mi; be sapos hem i naoia o sam dei afta, bae mi hapi long samting ia.

 26 Mo bae oli mekem ol man we oli gud mo oli tabu oli save, tru long maot blong ol enjel, long taem we hem i kam long hem, blong ol toktok blong ol bubu blong yumi oli save hapen, folem samting ia we oli bin tokbaot long saed blong hem, we i bin folem spirit blong profesi we i bin stap long olgeta.

 27 Mo nao, ol brata blong mi, mi wantem wetem ful hat blong mi, yes, wetem wan bigfala wari we i mekem mi soa, se bae yufala i lisin long ol toktok blong mi, mo sakemaot ol sin blong yufala, mo no pusum bak dei blong sakem ol sin blong yufala;

 28 Be se, bae yufala i putum tingting blong yufala i stap daon long fes blong Lod, mo prea long tabu nem blong hem, mo lukaot mo prea oltaem, blong oli no save temptem yufala i bitim mak ia we yufala i save fesem, mo olsem ia nao oli lidim yufala tru long Tabu Spirit, mo bae yufala i kam blong putum tingting blong yufala i stap daon, no stap flas, lego tingting blong yufala blong folem tingting blong narafala man, save wet, fulap long lav mo save go tru long ol hadtaem wetem longfala tingting;

 29 Mo gat fet long Lod; mo gat wan hop blong yufala i save kasem laef we i no save finis; mo gat lav blong God oltaem long hat blong yufala, blong oli save leftemap yufala long las dei mo go insaed long kingdom blong hem.

 30 Mo bae Lod i givim long yufala fasin ia blong sakem sin, blong yufala i no save mekem kros blong hem i kam daon long yufala, blong bae oli no fasem daon yufala wetem ol jen blong hel, blong yufala i no save harem nogud long nambatu ded.

 31 Mo Alma i bin talemaot plante moa toktok long ol pipol, we oli no raetem olgeta long buk ia.