Pāpa’ira’a mo’a
Alama 17


Te ’ā’amu nō te mau tamari’i tamāroa a Mosia, ’o tei pāto’i atu i tō rātou ti’ara’a nō te bāsileia nō te parau a te Atua, ’e tei haere atu i ni’a i te fenua ra nō Nephi nō te a’o atu i te mau ’āti Lamana ; tō rātou mau ’ati ’e tō rātou fa’aorara’ahia—mai te au i te pāpa’a parau a Alama.

Mai te pene 17 ē oti noa atu te pene 27.

Pene 17

’Ua fāri’i te mau tamari’i tamāroa a Mosia i te vārua nō te tohu ’e te heheura’a—’Ua haere rātou i tō rātou mau haere’a ta’a ’ē nō te a’o atu i te parau i te mau ’āti Lamana—’Ua haere atu Amona i te fenua nō Isema’ela ’e ’ua riro ’oia ’ei tāvini nō te ari’i Lamoni—’Ua fa’aora Amona i te mau nana māmoe a te ari’i ’e ’ua taparahi i tōna mau ’enemi i te pae pape nō Sebusa. ’Īrava 1–3, fātata 77 H.M. ; ’īrava 4, fātata 91–77 H.M. ; ’īrava 5–39, fātata 91 H.M.

1 ’E i teienei, i muri a’era, ’a tere atu ai Alama mai te fenua atu o Gideona i te pae apato’a, ’ia tae i te fenua ra nō Maniti, inaha, ’ua māere roa ’oia i te fārereira’a i te mau tamari’i tamāroa a Mosia ’o tē haere ra i te fenua ra nō Zarahemela.

2 I teienei, tei pīha’i ato’a iho teie nei mau tamari’i tamāroa a Mosia ia Alama i te taime i fā mātāmua mai ai te melahi iāna ; nō reira ’ua ’oa’oa roa Alama i te ’itera’a i tōna ra mau taea’e ; ’e ’ua rahi roa atu tōna ’oa’oa i te mea e mau taea’e noa ā rātou nōna i te Fatu ; ’oia ïa, ’ua tupu tō rātou ’ite i te parau mau i te rahi ; e mau ta’ata mana’o pāpū ho’i rātou ’e ’ua ’imi māite rātou i te mau pāpa’ira’a mo’a, ’ia ’ite rātou i te parau a te Atua.

3 E ’ere rā i te reira ana’e ; ’ua pinepine rātou i te pure, ’e i te ha’apae i te mā’a ; nō reira ’ua fāri’i rātou i te vārua nō te tohu, ’e te vārua nō te heheura’a ; ’e ’ia ha’api’i rātou, ’ua ha’api’i ïa ma te mana ’e te ha’amanara’a nō ’ō mai i te Atua.

4 ’E i ha’api’i na rātou i te parau a te Atua nō te ārea e hō’ē ’ahuru ’e ma maha matahiti te maoro i rotopū i te mau ’āti Lamana, ma te manuia rahi i te fa’afāriu mai i te mau ta’ata e rave rahi i te ’ite i te parau mau ; ’oia ïa, nā roto i te mana nō tā rātou mau parau ’ua arata’ihia mai te mau ta’ata e rave rahi i mua i te fata a te Atua, nō te ti’aoro atu i tōna ra i’oa ’e nō te fā’i atu i tā rātou mau hara i mua iāna.

5 I teienei, ’o te mau mea teie ’o tei tae i ni’a ia rātou i tō rātou mau tere, ’e ’ua ro’ohia rātou i te mau ’ati e rave rahi ; ’ua ro’ohia rātou i te ’ati rahi, i te tino ’e te mana’o ato’a ho’i, ’oia ho’i, te po’ia, te po’ihā ’e te rohirohi, ’e te māuiui rahi i te pae vārua.

6 I teienei, ’o teie tō rātou mau tere : I muri iho i tō rātou fa’aru’era’a atu i tō rātou metua tāne, ia Mosia, i te matahiti mātāmua nō te fa’aterera’a o te mau ha’avā ; ’e i muri iho i tō rātou fa’aru’era’a i te bāsileia tā tō rātou metua tāne i hina’aro ’ia hōro’a mai ia rātou ; ’e ’o te hina’aro ato’a ho’i ïa o te mau ta’ata.

7 ’Āre’a rā ’ua reva atu ra rātou i rāpae i te fenua ra nō Zarahemela, ’e ’ua rave atu rātou i tā rātou mau ’o’e, ’e tā rātou mau mahae, ’e tā rātou mau fana, ’e tā rātou mau te’a, ’e tā rātou mau ma’a ; ’e i nā reira rātou ’ia noa’a tā rātou mā’a ’a fa’aea ai rātou i roto i te mēdēbara.

8 ’E ’ua reva atu ra rātou ’e te mau ta’ata ato’a i mā’itihia e rātou i roto i te mēdēbara, nō te haere atu i ni’a i te fenua ra nō Nephi, nō te poro atu i te parau a te Atua i te mau ’āti Lamana.

9 ’E i muri a’era, e rave rahi mahana tō rātou haerera’a atu i roto i te mēdēbara, ’e ’ua ha’apae rahi rātou i te mā’a ’e ’ua pure rahi rātou i te Fatu ’ia hōro’a mai i te hō’ē tufa’a nō tōna Vārua ’ia ’āpe’e ia rātou, ’e ’ia vai noa i roto ia rātou, ’ia riro rātou ’ei mauha’a i te rima o te Atua nō te arata’i, mai te mea e ti’a, i tō rātou mau taea’e, i te mau ’āti Lamana, i te ’ite i te parau mau, i te ’ite ho’i i te vi’ivi’i nō te mau peu tumu tano ’ore a tō rātou mau metua.

10 ’E i muri a’era, ’ua fa’atae mai te Fatu i tōna Vārua i ni’a ia rātou, ’e ’ua nā ’ō mai ra ia rātou : ’Ia tāmāhanahanahia ’outou. ’E ’ua tāmāhanahanahia rātou.

11 ’E ’ua nā ’ō ato’a mai ra te Fatu ia rātou : ’A haere atu i rotopū i te mau ’āti Lamana, i tō ’outou mau taea’e, ’e ’a fa’ati’a i tā’u parau ; ’e ’ia fa’a’oroma’i ’outou i te fa’a’oroma’ira’a roa ’e te mau ’ati, ’e ’ia fa’ariro ’outou ia ’outou iho ’ei hi’ora’a maita’i nō rātou i roto iā’u, ’e e fa’ariro vau ia ’outou ’ei mauha’a i roto i tō’u nei rima nō te fa’aorara’a i te mau ta’ata e rave rahi.

12 ’E i muri a’era, ’ua itoito ihora te ’ā’au o te mau tamari’i tamāroa a Mosia, ’e rātou ato’a i pīha’i iho ia rātou ra, ’ia haere atu i te mau ’āti Lamana nō te fa’a’ite atu ia rātou i te parau a te Atua.

13 ’E i muri a’era, ’ia tae atu ra rātou i te mau ’ōti’a nō te fenua o te mau ’āti Lamana, ’ua fa’ata’a ’ē atu ra rātou ia rātou iho, ’e ’ua ta’a ’ē atu ra te tahi i te tahi, ma te ti’aturi i te Fatu nō te fa’afārerei fa’ahou ia rātou i te hope’a nō tā rātou ’ō’otira’a ; ’e ’ua mana’o ho’i rātou ē, e ’ohipa rahi tā rātou i rave.

14 ’E e mea rahi mau ïa te reira, ’e ’ua ha’amata ho’i rātou i te poro atu i te parau a te Atua i te hō’ē pupu ta’ata ’ōviri ’e te ’ā’au ’eta’eta ’e te taehae, te hō’ē pupu ta’ata i hina’aro i te taparahi i te mau ’āti Nephi, ’e i te ’eiā ’e i te ’eiā haru ho’i i tā rātou ; ’e tei ni’a tō rātou ’ā’au i te mau mea tao’a rahi, ’oia ho’i, i te ’auro ’e te ’ārio, ’e te mau ’ōfa’i tao’a rahi ; ’e ’ua tītau rātou ’ia fāri’i i teie mau mea nā roto i te taparahira’a ta’ata ’e te harura’a tao’a, ’ia ’ore rātou ’ia rave i te ’ohipa i tō rātou iho rima.

15 ’Oia ïa e feiā fa’atau roa ho’i rātou, ’e e rave rahi tō rātou e ha’amori ra i te mau ’īdolo, ’e ’ua ma’iri mai te ’anatemara’a a te Atua i ni’a iho ia rātou nō te mau peu tumu a tō rātou mau metua ; noa atu te mau fafaura’a tā te Fatu i fa’atae mai i ni’a iho ia rātou ’ia au i te mau tītaura’a nō te tātarahapara’a.

16 Nō reira, teie te tumu i tāmata ai te mau tamaiti a Mosia ’ia rave i te reira ’ohipa, penei a’e ’o te fa’afāriu mai rātou ia rātou i te tātarahapa ; ’e penei a’e ’o te fa’afāriu mai rātou ia rātou ’ia ’ite i te ’ōpuara’a nō te fa’aorara’a.

17 Nō reira i fa’ata’a ’ē ai rātou ia rātou iho, ’e i haere atu ai i rotopū ia rātou, te ta’ata tata’ihō’ē, mai te au i te parau ’e te mana o te Atua ’o tei hōro’ahia mai iāna ra.

18 I teienei ’o Amona te ra’atira i rotopū ia rātou, ’oia ho’i tei tauturu ia rātou, ’e ’ua fa’aru’e mai ra ’oia ia rātou, i muri iho i tōna ha’amaita’ira’a ia rātou mai te au i tō rātou mau tōro’a e rave rahi, ’e i muri iho i tōna fa’a’itera’a i te parau a te Atua ia rātou, ’e ’aore rā i te ha’api’ira’a ia rātou hou tōna revara’a atu ; ’e i nā reira rātou i te rave i tō rātou mau tere e rave rahi ē ’ati noa a’e te fenua.

19 ’E ’ua haere atu Amona i te fenua ra nō Isema’ela, te fenua i ma’irihia te i’oa o te mau tamari’i tamāroa a Isema’ela, ’o tei riro ato’a ’ei mau ’āti Lamana.

20 ’E ’a tae atu ai Amona i te fenua ra nō Isema’ela, ’ua rave mai ra te mau ’āti Lamana iāna ’e ’ua ru’uru’u ihora iāna, mai te au i tā rātou peu ’ia ru’uru’u i te mau ’āti Nephi ato’a ’o tei ma’iri mai i roto i tō rātou mau rima, ’e ’ia hōpoi atu ia rātou i mua i te ari’i ; ’e tei te ari’i te parau ’ia taparahi ia rātou, ’e ’aore rā ’ia tāpe’a ia rātou i roto i te fa’atītīra’a, ’e ’aore rā ’ia huri ia rātou i roto i te fare tāpe’ara’a, ’e ’aore rā ’ia ti’avaru atu ia rātou i rāpae i tōna fenua, mai te au i tōna hina’aro ’e tōna mana’o.

21 ’E nō reira ’ua hōpoihia atu Amona i mua i te ari’i ’o tē fa’atere ra i te fenua ra nō Isema’ela ; ’e ’o Lamoni tōna i’oa ; ’e e hua’ai ’oia nō Isema’ela.

22 ’E ’ua ani mai ra te ari’i ia Amona ē mai te mea e hina’aro ānei ’oia ’ia pārahi mai i teie fenua i rotopū i te mau ’āti Lamana, ’oia ho’i i rotopū i tōna mau ta’ata.

23 ’E ’ua parau atu ra Amona iāna : ’Ē, ’ua hina’aro vau ’ia pārahi i rotopū i teie nei feiā nō te hō’ē taime ri’i ; ’oia ïa, ē tae atu paha i te mahana e pohe ai au ra.

24 ’E i muri a’era, ’ua māuruuru roa te ari’i ra o Lamoni ia Amona, ’e ’ua fa’aue atu ra ’oia ’ia tātarahia tōna mau tā’amu ; ’e ’ua hina’aro ’oia ’ia rave Amona i te hō’ē o tāna ra mau tamāhine ’ei vahine nāna.

25 ’Āre’a rā ’ua parau atu ra Amona iāna : ’Eiaha roa, ’ia riro rā vau ’ei tāvini nō ’oe. Nō reira ’ua riro Amona ’ei tāvini nō te ari’i ra ’o Lamoni. ’E i muri a’era, ’ua tu’uhia ’oia i rotopū i te tahi atu mau tāvini nō te tīa’i i te mau nana māmoe a Lamoni, mai te au i te peu a te mau ’āti Lamana.

26 ’E ’ia hope a’era nā mahana e toru nō tōna tāvinira’a i te ari’i, tē haere ra ’oia ’e te mau tāvini ’āti Lamana ’e tā rātou mau nana māmoe i te vāhi nō te pape, ’o tei parauhia te pape o Sebusa, ’e ’ua mātau te mau ’āti Lamana ato’a i te fa’ahaere mai i tā rātou mau nana māmoe i teie vāhi nō te fa’ainu ia rātou i te pape—

27 Nō reira, ’a fa’ahaere atu ai Amona ’e te mau tāvini o te ari’i i tā rātou mau nana māmoe i teie vāhi nō te pape, inaha, ’ua ti’a mai ra te tahi mau ta’ata ’āti Lamana, tei tae na i te pape nō te fa’ainu i tā rātou mau nana, ’e ’ua ha’apurara a’era i te mau nana māmoe a Amona ’e tā te mau tāvini o te ari’i, ’e ’ua ha’apurara roa a’era ia rātou, ’e nō reira ’ua horo haere noa atu ra rātou i te mau vāhi e rave rahi.

28 I teienei, ’ua ha’amata ihora te mau tāvini o te ari’i i te amuamu, i te nā-’ō-ra’a ē : I teienei, e taparahi te ari’i ia tātou mai tāna i nā reira i tō tātou mau taea’e, nō te mea ’ua ha’apurarahia tā rātou mau nana māmoe nā roto i te mau ’ohipa ’ī’ino a teie mau ta’ata. ’E ’ua ha’amata ihora rātou i te ’oto rahi, i te nā-’ō-ra’a ē : Inaha, ’ua purara roa tā tātou mau nana i teienei.

29 I teienei, ’ua ’oto ihora rātou nō te mata’u ’o te taparahihia rātou. I teienei, ’ia ’ite a’era Amona i te reira, ’ua ’ī roa ihora tōna ’ā’au i te oaoa ; ’e ’ua nā ’ō ihora ’oia iāna iho : E fa’a’ite atu vau i tō’u mana i tō’u mau ta’ata tāvini nei, ’oia ho’i te mana i roto iā’u nei, i te fa’aho’ira’a i teie nei mau nana māmoe i te ari’i ra, ’ia noa’a mai iā’u te ’ā’au o tō’u mau ta’ata tāvini nei, ’e ’ia arata’i au ia rātou ’ia ti’aturi i tā’u nei mau parau.

30 ’E i teienei, ’o teie ïa te mau mana’o o Amona, ’a hi’o atu ai ’oia i te mau ’ati o teie mau ta’ata ’o tāna i parau e mau taea’e nōna.

31 ’E i muri a’era, ’ua tāvaimanino ’oia ia rātou nā roto i tāna mau parau, i te nā-’ō-ra’a ē : E tō’u mau taea’e, ’a fa’aitoito, mai haere tātou e ’imi i te mau nana māmoe, ’e e ha’aputuputu ’āmui tātou ia rātou ’e e fa’ahaere mai ia rātou i te vāhi nō te pape nei ; e nā reira tātou i te fa’aherehere i te mau nana māmoe a te ari’i ’e ’aita ’oia e taparahi ia tātou.

32 ’E i muri a’era, ’ua haere atu ra rātou e ’imi haere i te mau nana māmoe ; ’e ’ua pe’e atu rātou ia Amona, ’e ’ua horo ’oi’oi rātou ’e tae atu ra i mua i te mau nana māmoe a te ari’i, ’e ’ua ha’aputuputu fa’ahou mai ra ia rātou i te vāhi nō te pape ra.

33 ’E ’ua ti’a fa’ahou mai ra taua mau ta’ata ra nō te ha’apurara i tā rātou mau nana māmoe ; ’e ’ua parau atu ra Amona i tōna mau taea’e : ’A ha’a’ati ’outou i te mau nana māmoe ’ia ’ore rātou ’ia horo ’ē atu ; ’e e haere atu vau e ’aro i teie mau ta’ata ’o tē ha’apurara i tā tātou mau nana māmoe.

34 Nō reira, ’ua nā reira rātou mai tā Amona i fa’aue mai ia rātou, ’e ’ua haere atu ra ’oia ’e ’ua ti’a atu ra nō te ’aro ia rātou ’o tē ti’a ra i pīha’i iho i te mau pape nō Sebusa ; ’e e ’ere rātou i te mea iti.

35 Nō reira ’aita rātou i mata’u ia Amona, nō te mea ’ua mana’o rātou ē, e ti’a i te hō’ē o tō rātou mau ta’ata ’ia taparahi iāna mai te au i tō rātou hina’aro, ’e ’aita ho’i rātou i ’ite ē, ’ua fafau mai te Fatu ia Mosia ē, e fa’aora ’oia i tāna mau tamari’i tamāroa i tō rātou rima ; ’e ’aita ato’a rātou i ’ite i te hō’ē mea nō ni’a i te Fatu ; nō reira rātou i ’oa’oa ai i te taparahira’a i tō rātou mau taea’e ; ’e nō reira ho’i ’ua tītau rātou ’ia ha’apurara i te mau nana māmoe a te ari’i.

36 ’Āre’a rā ’ua ti’a atu ra Amona ’e ’ua ma’a atu ra i te ’ōfa’i i ni’a ia rātou ma te fa’a’ohipa i tāna ma’a ; ’oia ïa, ’ua ma’a ’ū’ana atu ra ’oia i te ’ōfa’i i ni’a ia rātou ma te pūai rahi ; ’e ’ua taparahi ’oia i te tahi pae o rātou ’e nō reira ’ua tupu ihora tō rātou māere rahi i tōna mana ; ’ua riri rā rātou nō tō rātou mau taea’e i taparahihia, ’e ’ua ’ōpua māite ihora rātou ’ia pohe ’oia ; nō reira, ’ia ’ite a’era rātou ē, ’aita ’oia e tano ia rātou i tā rātou mau ’ōfa’i, ’ua haere mai ra rātou ’e te mau rā’au tā’iri nō te taparahi iāna.

37 Inaha rā, ’ua fa’a’ohipa Amona i tāna ’o’e nō te tāpū i te rima o te mau ta’ata tāta’itahi i fa’ateitei mai i tāna rā’au tā’iri nō te tā’iri mai iāna ; ’e ’ua pāruru atu ’oia i tā rātou mau tā’irira’a nā roto i te tāpūra’a atu i tō rātou mau rima i te ’oira’a nō tāna ’o’e, ’e nō reira ho’i ’ua māere roa ihora rātou, ’e ’ua ha’amata ihora rātou i te horo ’ē atu mai mua atu iāna ; ’oia ïa, e ’ere rātou i te mea iti, ’e ’ua tīahi atu ’oia ia rātou ’ia horo ’ē atu nā roto i te pūai o tōna ra rima.

38 I teienei, ’ua pohe e ono i te ma’a, ’aita rā ’oia i taparahi ia rātou i te ’o’e, maori rā tō rātou ta’ata fa’atere ana’e ; ’e ’ua tāpū fa’ata’a ’ē ’oia i te mau rima ato’a i fa’ateiteihia i ni’a nō te tā’iri mai iāna, e ’ere ho’i te reira i te mea iti.

39 ’E ’a tīahi ’ē atu ai ’oia ia rātou i te ātea, ’ua ho’i fa’ahou mai ra ’oia ’e ’ua fa’ainu ihora rātou i tā rātou mau nana māmoe ’e ’ua fa’aho’i atu ra ia rātou i roto i te ’āua a te ari’i ; ’e i reira ’ua haere atu ra rātou i mua i te ari’i, ma te amo atu i te mau rima i tāpūhia i te ’o’e a Amona ra, nō te feiā ’o tei tītau ’ia taparahi iāna ; ’e ’ua ’āfa’ihia te reira i mua i te ari’i ’ei fa’a’itera’a pāpū i te mau mea tā rātou i rave.