1 Pea naʻe hoko ʻo pehē naʻe ʻosi ʻa e ʻaho ʻe ua pea mo e pō ʻe ua, pea nau te u ke ʻave hono sinó ʻo tuku ʻi ha fonualoto, ʻa ia kuo nau foa koeʻuhi ke tanu ai honau kakai pekiá.

2 Kuo fanongo foki ʻa e kuiní ki he ongoongoa ʻo ʻĀmoní, ko ia naʻá ne fekau atu ai ha taha, ʻo kole ke haʻu kiate ia.

3 Pea naʻe hoko ʻo pehē naʻe fai ʻe ʻĀmoni ʻo hangē ko e fekau kiate iá, ʻo ne hū atu ki he kuiní, ʻo ʻeke ki ai ke ʻilo pe ko e hā ʻa e meʻa ʻokú ne loto ke ne faí.

4 Pea naʻe meʻa ange ia kiate ia: Kuo fakahā mai kiate au ʻe he kau tamaioʻeiki ʻa hoku husepānití ko ha ^apalōfita koe ʻa ha ʻOtua māʻoniʻoni, pea ʻoku ʻiate koe ʻa e mālohi ke fai ha ngaahi fuʻu ngāue lalahi ʻi hono huafá;

5 Ko ia, kapau ʻoku moʻoni ʻeni, ko hoku lotó ke ke hū atu ʻo vakai ki hoku husepānití, he kuo fakatoka ia ʻi hono tokaʻangá ʻi he ʻaho ʻe ua pea mo e pō ʻe ua; pea ʻoku pehē ʻe ha niʻihi kuo ʻikai pekia ia, ka ʻoku lau ʻe ha niʻihi tokua kuó ne pekia, pea ʻoku namu hāhā ia, pea ʻoku totonu ke tuku ia ki ha fonualoto; ka ko au ʻoku ʻikai te u tui ʻoku namu hāhā ia.

6 Ko ʻeni, ko meʻa ia naʻe fie maʻu ʻe ʻĀmoní, he naʻá ne ʻiloʻi ʻoku moʻulaloa ʻa e tuʻi ko Lamōnaí ki he mālohi ʻo e ʻOtuá; pea naʻá ne ʻiloʻi ʻoku toʻo atu ʻa e ^aveili fakapoʻuli ʻo e taʻetuí mei hono ʻatamaí, pea ko e ^bmaama ʻa ia ʻoku fakamaama hono ʻatamaí, ko e maama ia ʻo e nāunau ʻo e ʻOtuá ʻa ia ko e maama fakaofo ia ʻo ʻene angaleleí—ʻio, kuo hanga ʻe he maama ko iá ʻo fakafonu ha fiefia lahi fau ki hono laumālié, pea kuo mole atu ai ʻa e ʻao fakapoʻulí, pea kuo tutu ʻa e maama ʻo e moʻui taʻengatá ʻi hono laumālié, ʻio, naʻá ne ʻiloʻi kuo maʻu ʻe ia ʻa e mālohi ki hono sino fakamāmaní, pea kuó ne moʻulaloa ai ki he mālohi ʻo e ʻOtuá—

7 Ko ia, ko meʻa kotoa pe naʻe loto ʻa e kuiní ke ne fakahā ange kiate iá ko e meʻa pē ia naʻá ne fakaʻamu ki aí. Ko ia naʻá ne hū atu ke vakai ki he tuʻí ʻo hangē kuo kole kiate ia ʻe he kuiní; peá ne vakai ki he tuʻí, ʻo ne ʻiloʻi kuo ʻikai ke pekia ia.

8 Pea naʻá ne pehē ange ki he kuiní: ʻOku ʻikai ke pekia ia, ka ʻokú ne mohe pē ʻi he ʻOtuá, pea te ne toe tuʻu hake ʻapongipongi; ko ia, ʻoua naʻá ke telio ia.

9 Pea naʻe pehē ange ʻe ʻĀmoni kiate ia: ʻOkú ke tui koā ki he meʻá ni? Peá ne pehē ange kiate ia: ʻOku ʻikai haʻaku fakamoʻoni ka ko hoʻo leá pē, pea mo e lea ʻa ʻema kau tamaioʻeikí; ka ʻoku ou tui pē ʻe hoko ʻo hangē ko hoʻo leá.

10 Pea naʻe pehē ange ʻe ʻĀmoni kiate ia: ʻOkú ke monūʻia koe ko e meʻa ʻi hoʻo fuʻu tui lahí; ʻoku ou pehē kiate koe, ʻe fefine, kuo ʻikai ke ʻi ai ha fuʻu ^atui lahi pehē ʻi he kakai kotoa ʻo e kau Nīfaí.

11 Pea naʻe hoko ʻo pehē naʻá ne tauhi ki he tokaʻanga ʻo hono husepānití, ʻo fai atu mei he feituʻulaʻā ko iá ʻo aʻu ki he feituʻulaʻā ʻi he ʻapongipongí ʻa ia kuo fakahā ʻe ʻĀmoni te ne tuʻu hake aí.

12 Pea naʻe hoko ʻo pehē naʻa ne tuʻu hake ʻo hangē ko e ngaahi lea ʻa ʻĀmoní; pea ʻi heʻene tuʻu haké naʻá ne mafao atu hono nimá ki he fefiné, ʻo ne pehē: Ke monūʻia ʻa e huafa ʻo e ʻOtuá, pea ʻokú ke monūʻia mo koe foki.

13 He hangē ʻokú ke moʻuí, vakai, kuó u mamata ki hoku Huhuʻí; pea te ne hāʻele mai, pea ^aʻaloʻi ʻi ha ^bfefine, pea te ne huhuʻi ʻa e faʻahinga kotoa ʻo e tangatá ʻa ia ʻoku tui ki hono huafá. Pea ko ʻeni, ʻi he ʻosi leva ʻene folofola ʻaki ʻa e ngaahi meʻa ní, kuo fonu hono loto ʻiate ia, ʻo ne toe tō ki lalo ʻi he fiefia; pea naʻe tō ki lalo foki mo e kuiní kuo fakavaivaiʻi ia ʻe he Laumālié.

14 Ko ʻeni ʻi he vakai ʻe ʻĀmoni kuo lilingi hifo ʻa e Laumālie ʻo e ʻEikí ki he kau Leimana ko hono kāingá ʻo fakatatau ki heʻene ngaahi ^alotú, ʻa ia kuo nau hoko ko e tupuʻanga ʻo ha fuʻu mamahi lahi ʻi he kau Nīfaí, pe ko e kakai kotoa ʻo e ʻOtuá koeʻuhi ko ʻenau ngaahi angahalá pea mo ʻenau ngaahi ^btalatukufakaholó, naʻá ne tō hifo ʻi hono ongo tuí, ʻo ne kamata ke lotu fakamātoato mo fai ʻa e fakafetaʻi ki he ʻOtuá koeʻuhi ko e ngaahi meʻa kuó ne fai maʻa hono kāingá; pea naʻe fakavaivaia foki mo ia ʻi he ^cfiefia; pea ko ia kuo nau ^dngoto hifo, ʻa e toko tolu kātoa ko iá ki he kelekelé.

15 Ko ʻeni, ʻi he vakai ʻe he kau tamaioʻeiki ʻa e tuʻí kuo nau tō hifó, naʻa nau kamata foki ke kalanga ki he ʻOtuá, he kuo tō kiate kinautolu foki ʻa e manavahē ki he ʻEikí, he ko ^akinautolu foki naʻa nau tuʻu ʻi he ʻao ʻo e tuʻí ʻo fakamoʻoniʻi kiate ia ʻa e fuʻu mālohi lahi ʻo ʻĀmoní.

16 Pea naʻe hoko ʻo pehē naʻa nau ui ki he huafa ʻo e ʻEikí, ʻaki honau tūkuingatá, kae ʻoua kuo nau tō hifo kātoa ki he kelekelé, tuku kehe pe ʻa e toko taha ʻo e kau fefine Leimaná, ko hono hingoá ko ʻĀpisi, kuó ne ului ki he ʻEikí ʻi ha ngaahi taʻu lahi, ko e tupu mei ha meʻa-hā-mai fakaofo naʻe hā ki heʻene tamaí—

17 Ko ia, kuo ʻosi ʻene ului ki he ʻEikí, kae ʻikai te ne fakahā ia, ko ia, ʻi heʻene vakai kuo tō hifo ki he kelekelé ʻa e kau tamaioʻeiki kātoa ʻa Lamōnaí, kae ʻumaʻā foki ʻene fineʻeiki, ko e kuiní, mo e tuʻí pea mo ʻĀmoni kuo nau tokoto ʻi he funga kelekelé, naʻá ne ʻiloʻi ko e māfimafi ia ʻo e ʻOtuá; pea ʻi heʻene mahalo ko e faingamālie ʻeni, ke fakahā ki he kakaí ʻa e meʻa kuo hoko ʻiate kinautolú, pea ʻi heʻenau vakai ki he meʻa ní ʻe ^angaohi kinautolu ke nau tui ki he māfimafi ʻo e ʻOtuá, ko ia naʻá ne lele holo mei he fale ki he fale ʻo fakahā ia ki he kakaí.

18 Pea nau kamata ke fakataha mai ki he fale ʻo e tuʻí. Pea naʻe haʻu ha fuʻu kakai tokolahi, pea naʻa nau ofo ʻi heʻenau vakai ki he tuʻí, mo e kuiní, pea mo ʻena kau tamaioʻeikí kuo tākoto ʻi he kelekelé, pea naʻa nau tokoto kotoa pē ʻo hangē kuo nau maté; pea naʻa nau mamata foki kia ʻĀmoni, pea vakai, ko ha tangata Nīfai ia.

19 Pea ko ʻeni naʻe kamata lāunga ʻa e kakaí ʻiate kinautolu; naʻe pehē ʻe he niʻihi kuo tō kiate kinautolu ha fuʻu kovi lahi, pe ki he tuʻí mo hono falé, ko e meʻa ʻi heʻene tuku ke ^anofo ʻa e tangata Nīfaí ʻi he fonua.

20 Ka naʻe valokiʻi ʻa kinautolu ʻe ha niʻihi kehe, ʻo nau pehē: Kuo fakahoko ʻe he tuʻí ʻa e koví ni ki hono falé, ko e meʻa ʻi heʻene tāmateʻi ʻa ʻene kau tamaioʻeiki ʻa ia naʻe fakamoveteveteʻi ʻenau ngaahi takanga monumanu īkí ʻi he ngaahi ^avai ʻo Sēpusí.

21 Pea naʻe valokiʻi ʻa kinautolu foki ʻe he kau tangata ko ia naʻa nau tuʻu ʻi he vai ʻo Sēpusí, ʻo ^afakamoveteveteʻi ʻa e ngaahi takanga monumanu iiki ʻa e tuʻí, he naʻa nau ʻita kia ʻĀmoni ko e meʻa ʻi he tokolahi ʻo honau kāinga kuó ne tāmateʻi ʻi he vai ʻo Sēpusí, ʻi heʻene maluʻi ʻa e ngaahi takanga monumanu iiki ʻa e tuʻí.

22 Ko ʻeni, ko honau toko taha, naʻe ^amate hono tokoua ʻi he heletā ʻa ʻĀmoní, kuó ne fuʻu ʻita lahi kia ʻĀmoni, ko ia naʻá ne unuhi ʻene heletaá ʻo ʻalu atu koeʻuhi ke ne ʻai ia ke tō kia ʻĀmoni, ke tāmateʻi ia; pea ʻi heʻene hiki hake ʻa e heletaá ke taaʻi iá, ʻiloange naʻá ne tō ʻo mate.

23 Ko ʻeni, ʻoku tau vakai naʻe ʻikai lava ʻo tāmateʻi ʻa ʻĀmoni, koeʻuhi kuo folofola ʻe he ^aʻEikí kia Mōsaia, ko ʻene tamaí: Te u fakahaofi ia, pea ʻe fai ʻeni kiate ia koeʻuhi ko hoʻo tuí—ko ia, naʻe ^btuku ia ʻe Mōsaia ki he ʻEikí ke ne maluʻi.

24 Pea naʻe hoko ʻo pehē ʻi he vakai ʻe he fuʻu kakaí kuo tō ʻa e tangatá ʻo mate, ʻa ia naʻe hiki hake ʻa e heletā ke taaʻi ʻa ʻĀmoní, naʻe tō ʻa e manavahē kiate kinautolu kotoa pē, pea naʻe ʻikai te nau toʻa ke ala honau nimá kiate ia pe ko ha tokotaha kuo tō hifo; pea naʻa nau toe kamata ke fakatumutumu ʻiate kinautolu ki hono tupuʻanga ʻo e fuʻu mālohí ni, pe ko hono ʻuhinga ʻo e ngaahi meʻá ni kotoa.

25 Pea naʻe hoko ʻo pehē naʻe ʻi ai hanau tokolahi ʻa ia naʻa nau pehē tokua ko ʻĀmoni ʻa e ^aLaumālie Lahí, kae pehē ʻe ha niʻihi kehe tokua kuo fekau mai ia ʻe he Laumālie Lahí;

26 Ka naʻe valokiʻi ʻa kinautolu kātoa ʻe ha niʻihi kehe, ʻo nau lau ko e fuʻu tangata fakaʻulia ia kuo fekauʻi mei he kau Nīfaí ke fakamamahiʻi ʻa kinautolu.

27 Pea naʻe ʻi ai ha niʻihi naʻa nau pehē tokua kuo fekauʻi mai ʻa ʻĀmoni ʻe he Laumālie Lahí ke fakamamahiʻi ʻa kinautolu koeʻuhi ko ʻenau ngaahi angahalá; pea ko e Laumālie Lahi ko iá kuó ne kau maʻu ai pē mo e kau Nīfaí, ʻa ia kuó ne fakahaofi maʻu ai pē ʻa kinautolu mei honau nimá; pea naʻa nau pehē tokua ko e Laumālie Lahi ko iá, ʻa ia kuó ne fakaʻauha ʻa e fuʻu tokolahi ʻo honau kāinga, ko e kau Leimaná.

28 Pea ko ia naʻe fakaʻau ke fuʻu mālohi ʻaupito ʻa e fefakakikihiʻakí ʻiate kinautolu. Pea lolotonga ʻenau fefakakikihiʻaki peheé, naʻe haʻu ʻa e ^afefine kaunanga ʻa ia naʻá ne talaki ke kātoa mai ʻa e fuʻu kakaí, pea ʻi heʻene vakai ki he fefakakikihiʻaki naʻe fai ʻi he kakaí naʻá ne fuʻu loto-mamahi ʻaupito, peá ne tangi.

29 Pea naʻe hoko ʻo pehē naʻá ne ʻalu atu ʻo puke ʻa e kuiní ʻi hono nimá, koeʻuhi ke ne lava nai ʻo fokotuʻu hake ia mei he kelekelé; pea ʻi heʻene ala pē ki hono nimá naʻá ne tuʻu hake ʻo tuʻu ʻi hono vaʻé ʻo kalanga ʻi he leʻo-lahi, ʻo pehē: Ke monūʻia ʻa Sīsū, ʻa ia kuó ke fakamoʻui au mei he heli ^afakaʻuliá! Ke monūʻia ʻa e ʻOtuá, ke ke ^bʻaloʻofa mai ki he kakaí ni!

30 Pea ʻi he ʻosi ʻene lea ʻaki ʻení, naʻá ne kuku hono ongo nimá, kuó ne fonu ʻi he fiefia, mo lea ʻaki ha ngaahi lea lahi naʻe taʻemahino; pea hili ʻene fai ʻení, naʻá ne puke ʻa e tuʻi, ko Lamōnaí, ʻi hono nimá, pea ʻiloange naʻá ne tuʻu hake ʻo tuʻu ʻi hono vaʻé.

31 Pea ʻi heʻene, vakai leva, ki he fefakakikihiʻaki ʻa hono kakaí, naʻá ne ʻalu atu ʻo kamata ke valokiʻi ʻa kinautolu, mo akonaki ʻaki kiate kinautolu ʻa e ngaahi ^alea ʻa ia kuó ne fanongo ki ai ʻi he ngutu ʻo ʻĀmoní; pea ʻilonga ʻa kinautolu naʻe fanongo ki heʻene ngaahi leá, naʻa nau tui ʻo nau ului ki he ʻEikí.

32 Ka naʻe ai hanau tokolahi naʻe ʻikai ke fie fanongo ki heʻene ngaahi leá; ko ia naʻa nau tafoki ʻo ʻalu.

33 Pea naʻe hoko ʻo pehē ʻi he tuʻu hake ʻa ʻĀmoní naʻá ne lea foki mo ia kiate kinautolu, pea mo e kau tamaioʻeiki kotoa foki ʻa Lamōnaí; pea naʻa nau fakahā kotoa pē ki he kakaí ʻa e meʻa tatau—kuo ^aliliu honau lotó; pea ʻoku ʻikai ke nau toe maʻu ha holi ke ^bfaikovi.

34 Pea vakai, naʻe fakamoʻoni ʻe he tokolahi ki he kakaí kuo nau mamata ki ha kau ^aʻāngelo, ʻo nau fetalanoaʻaki mo kinautolu; pea ko ia kuo nau fakamatala kiate kinautolu ʻa e ngaahi meʻa ʻa e ʻOtuá, pea mo ʻene māʻoniʻoní.

35 Pea naʻe hoko ʻo pehē naʻe ʻi ai ha tokolahi naʻe tui ki heʻenau ngaahi leá; pea ʻilonga ʻa kinautolu naʻe tuí naʻe ^apapitaiso ʻa kinautolu; pea naʻa nau hoko ko ha kakai māʻoniʻoni, ʻo nau fokotuʻu ha siasi ʻiate kinautolu.

36 Pea ko ia naʻe kamata pehē ʻa e ngāue ʻa e ʻEikí ʻi he kau Leimaná; ko ia naʻe kamata pehē hono lingi hifo ʻe he ʻEikí ʻa hono Laumālié kiate kinautolu; pea ʻoku tau vakai ʻoku hōifua ʻa e ʻEikí ke tali ʻa e kakai ^afulipē ʻa ia ʻe fakatomala mo tui ki hono huafá.