1 Ket napasamak a kalpasan ti dua nga aldaw ken dua a rabii bagkatenda koman ti bagina ket ipaiddada iti tanem, nga inaramidda a pagitaneman iti minatayda.

2 Ita gapu ta nangngeg ti reyna ti kinalatak ni Ammon, ngarud nangibaon ken tinarigagayanna a mapan kenkuana.

3 Ket napasamak a tinungpal ni Ammon ti naibilin kenkuana, ket napan iti reyna, ket tinarigagayanna a maammuan ti kayatna a paaramid kenkuana.

4 Ket kinunana kenkuana: Imbaga kaniak dagiti katulongan ti asawak a maysaka a ^apropeta ti nasantuan a Dios, ken addaanka iti bileg nga agaramid iti adu a naindaklan nga aramid babaen iti naganna;

5 Ngarud, no umiso daytoy, kayatko a sumrekka ket kitaem ti asawak, agsipud ta nakaidda iti kamana iti las-uden ti dua nga aldaw ken dua a rabii; ket adda dagiti agkuna a saan pay a natay, ngem kuna met ti dadduma a natayen, ket mangrugin nga agangot, ket naskenen a maipan iti tanem; ngem iti biangko, para kaniak saan pay nga agangot.

6 Ita, daytoy ti tinarigagayan ni Ammon, agsipud ta ammona nasakupan ni ari Lamoni iti bileg ti Dios; ammona a maik-ikkaten ti nasipnget a ^abelo ti saan a panamati manipud iti panunotna, ket ti ^bsilaw a nanglawag ti panunotna, nga isu ti silaw ti gloria ti Dios, nga isu ti nakaskasdaaw a silaw ti kinaimbagna—wen, pinunno daytoy a silaw ti rag-o iti kararuana, ket nawakniten ti ulep ti kinasipnget, ket nasindianen iti kararuana ti silaw ti agnanayon a biag, wen, ammona a rinimbawanen daytoy ti gagangay a pakabuklanna, ket naaddaan iti naespirituan a kapadasan iti Dios—

7 Ngarud, ti tinarigagayan ti reyna kenkuana isu laeng ti tarigagayna. Ngarud, simrek isuna tapno kitaen ti ari a kas mayannurot iti tarigagay ti reyna nga aramidenna; ket nakitana ti ari, ket ammona a saan pay a natay.

8 Ket kinunana iti reyna: Saan pay a natay, ngem pinaturog ti Dios, ket bumangonto inton bigat; ngarud saanyo itantanem.

9 Ket kinuna ni Ammon kenkuana: Patiem kadi daytoy? Ket kinunana kenkuana: Awan ti sabali a saksik no saan a ti balikasmo, ken ti balikas dagiti katulonganmi; nupay kasta patiek a mapasamak a mayannurot iti imbagam.

10 Ket kinuna ni Ammon kenkuana: Bendisionanka gapu iti aglaplapusanan a pammatim; kunak kenka, babai, awan pay ti kasta a naindaklan a ^apammati kadagiti tattao dagiti Nephita.

11 Ket napasamak a nagbantay iti kama ti asawana, manipud iti dayta a kanito agingga iti oras iti kabigatanna nga inkeddeng ni Ammon nga ibabangonna.

12 Ket napasamak a bimmangon, a mayannurot kadagiti balikas ni Ammon; ket iti ibabangonna, intag-ayna ti imana iti babai, ket kinunana: Mabendisionan koma ti nagan ti Dios, ken mabendisionanka koma.

13 Agsipud ta sigurado a bayat ti panagbiagmo, kitaen, nakitak ti Mannubbotko; ket umayto, ken ^amaipasngayto iti ^bbabai, ken subbotennanto ti sangkataoan a mamati iti naganna. Ita, idi naibagana dagitoy a balikas, napigsa nga emosion ti narikna ti pusona, ket natumba manen iti rag-o; ket natumba met ti reyna, gapu iti pannakaparmek kadakuada babaen iti Espiritu.

14 Ita iti pannakakita ni Ammon a naibukbok ti Espiritu ti Apo segun‎ kadagiti ^akararagna kadagiti Lamanita, a kakabsatna, a puon ti adu a panagladingit dagiti Nephita, wenno kadagiti amin a tao ti Dios gapu kadagiti kinadangkesda ken dagiti ^bkaugalianda, nagparintumeng isuna, ket rinugianna nga ibukbok ti kararuana iti kararag ken panagyamanna iti Dios iti inaramidna kadagiti kabsatna; ken nalapunos isuna iti ^crag-o; ket ngarud ^dnatuangda a tallo iti daga.

15 Ita, idi nakita dagiti katulongan ti ari ti pannakatuangda, rinugianda met ti immawag iti Dios, agsipud ta simnek met kadakuada ti butengda iti Apo, agsipud ta ^aisuda ti nagtakder iti sango ti ari ket pinaneknekanda kenkuana ti maipanggep iti naindaklan a bileg ni Ammon.

16 Ket napasamak nga inawaganda ti nagan ti Apo, iti amin a kabaelanda, agingga a natuangda amin iti daga, malaksid ti maysa kadagiti Lamanita a babbai, nga Abish ti naganna, a namalbaliwen iti Apo iti adun a tawen, a gapu iti nakallalagip a parmata ti amana—

17 Kasta, gapu ta namalbaliw isunan iti Apo, ken saan pay a naipakaammo, ngarud, idi makitana a natuang amin dagiti katulongan ni Lamoni iti daga, kasta met ti asawana, ti reyna, ken ti ari, ken naidasay ni Ammon iti daga, ammona a bileg daytoy ti Dios; ket pagarupna daytoy a gundaway, babaen iti panangipakaammona kadagiti tattao iti napasamak kadakuada, ta babaen ti pannakakitada kadaytoy a pasamak ^aagbanagto a patienda ti bileg ti Dios, ngarud nagtaray a namalaybalay, a nagipadamag kadagiti tattao.

18 Ket rinugianda nga inummong ti bagbagida iti balay ti ari. Ket immay ti ummong, ket iti siddaawda, nakitada ti ari, ken ti reyna, ken dagiti katulonganda a naidasay iti daga, ket naidasayda amin sadiay a kasla nataydan; ken nakitada met ni Ammon, ket kitaen, maysa isuna a Nephita.

19 Ket ita nangrugi a nagtanabutob dagiti tattao iti bagbagida; sumagmamano ti nagkuna a nabileg a sairo ti immay kadakuada, wenno iti ari ken iti balayna, gapu ta impalubosna ti ^apanagnaed dagiti Nephita iti daga.

20 Ngem binabalaw ida dagiti dadduma, a kinunada: Insangpet ti ari daytoy a sairo iti balayna, gapu ta pinapatayna dagiti katulonganna a nangwarawara kadagiti arbanda iti ^adandanum ti Sebus.

21 Ken binabalawda met ida dagiti lallaki a nakapuesto iti dandanum ti Sebus ken ^anangwarawara kadagiti arban a kukua ti ari, agsipud ta kinaungetda ni Ammon gapu iti bilang a pinapatayna kadagiti kabsatda iti dandanum ti Sebus, bayat ti panangsalaknibna kadagiti arban ti ari.

22 Ita, maysa kadakuada, a ^anapapatay ti kabsatna babaen ti espada ni Ammon, gapu iti nakaro a pungtotna ken ni Ammon, ti nangasut iti espadana ket napan a mangilayat ken ni Ammon, tapno papatayenna; ket iti panangitag-ayna iti espada tapno dangranna, kitaen, natuang a natay.

23 Ita makitatayo a saan a mapapatay ni Ammon, agsipud ta imbaga ti ^aApo ken ni Mosiah, ti amana: Isalakanko, ket mapasamakto kenkuana a mayannurot iti pammatim—ngarud, ^bintalek ni Mosiah iti Apo.

24 Ket napasamak nga idi naimatangan ti ummong a natuang a natay ti lalaki, a nangitag-ay iti espada tapno patayenna ni Ammon, nagbutengda amin, ket saanda nagtured a nangsagid kenkuana wenno asino man kadagiti natuang; ket nangrugida manen a nagsiddaaw iti bagbagida no ania ti gapu daytoy naindaklan a bileg, wenno ania ti kayat a sawen amin dagitoy.

25 Ket napasamak nga adu kadakuada ti nagkuna a ni Ammon ti ^aNaindaklan nga Espiritu, ken kinuna ti dadduma nga imbaon ti Naindaklan nga Espiritu;

26 Ngem binabalaw amin ida dagiti dadduma, a kinunada a nakaam-amak nga ayup, a naibaon manipud kadagiti Nephita a mangtuok kadakuada.

27 Ken adda dagiti nagkuna nga imbaon ti Naindaklan nga Espiritu ni Ammon a mangparigat kadakuada gapu kadagiti kinadangkesda; ken ti Naindaklan nga Espiritu ti kanayon a mangtartarabay kadagiti Nephita, a nangwaywaya kadakuada manipud kadagiti imada; ken kinunada a daytoy a Naindaklan nga Espiritu ti nangdadael iti adu kadagiti kabsatda, dagiti Lamanita.

28 Ket kasta ti panangrugi ti nakaro a natadem a panagsusussik kadakuada. Ket bayat ti panagsusussikda, immasideg ti ^ababai a katulongan a nangurnos iti ummong, ket idi makitana ti panagsusussik dagiti adda iti ummong nagladingit iti kasta unay, ket uray la a nagsangit.

29 Ket napasamak a napan ket inatibayna ti reyna babaen ti imana, ta bareng no mapatakderna iti daga; ket apaman a nasagidna ti imana bimmangon ket timmakder, ket immawag iti napigsa a timek: O nabendisionan a Jesus, a nangisalakan kaniak iti ^anakaam-amak nga impierno! O nabendisionan a Dios, ^bkaasiam dagitoy a tao!

30 Ket idi nakunana daytoy, nagakub, gapu ta napno iti rag-o, a nagsasao iti balikas a saan a maawatan; ket idi maaramidna daytoy, innalana ti ari, ni Lamoni, babaen ti ima, ket kitaen bimmangon ket timmakder.

31 Ket isu, dagus, a nakakita iti panagsusussik dagiti taona, napan ket rinugianna a binabalaw ida, ken mangisuro kadakuada kadagiti ^abalikas a nangngegna manipud iti ngiwat ni Ammon; ket kas iti kaadu ti nakangngeg kadagiti balikasna ti namapati, ket namalbaliwda iti Apo.

32 Ngem adu kadakuada ti saan a dimngeg kadagiti balikasna; ngarud napanda iti kaykayatda.

33 Ket napasamak nga idi bimmangon ni Ammon inaywananna ida, kasta met amin dagiti katulongan ni Lamoni; ket inpakdaarda amin kadagiti tattao ti agpadpada a banag—a ti puspusoda ket ^anagbaliwen; nga awanen ti tarigagayda nga agaramid iti ^bdakes.

34 Ket kitaen, adu ti nangipakdaar kadagiti tattao a nakakitada kadagiti ^aanghel ken nakisarita kadakuada; ket kasta nga imbagada kadakuada dagiti aramid ti Dios, ken ti kinalintegna.

35 Ket napasamak nga adu ti namapati kadagiti balikasda; ket kas iti kaadu ti namapati ti ^anabuniagan; ket nagbalinda a nalinteg a tattao, ket nangbangonda iti maysa a simbaan kadakuada.

36 Ket kasta ti nangrugian ti aramid ti Apo kadagiti Lamanita; kasta ti panangrugi ti Apo a nangibukbok iti Espirituna kadakuada; ket makitatayo a nakatanggaya ti takiagna iti ^aamin a tao nga agbabawi ken mamati iti naganna.