1 Karon, samtang si Ammon padayong nagtudlo sa katawhan ni Lamoni, balikan nato ang asoy ni Aaron ug sa iyang kaigsoonan; kay human siya mohawa gikan sa yuta sa Middoni ^agigiyahan siya sa Espiritu ngadto sa yuta sa Nephi, gani ngadto sa balay sa hari nga mao ang labaw sa tibuok yuta ^bgawas sa yuta sa Ishmael; ug siya ang amahan ni Lamoni.

2 Ug nahitabo nga misulod siya sa palasyo sa hari, uban sa iyang kaigsoonan, ug miyukbo sa atubangan sa hari, ug miingon kaniya: Tan-awa, O hari, kami ang kaigsoonan ni Ammon, kinsa imong ^agiluwas gikan sa prisohan.

3 Ug karon, O hari, kon dili nimo kutloon ang among kinabuhi, kami mahimo nimong mga sulugoon. Ug ang hari miingon kanila: Tindog, kay akong itugot nga padayon kamong mabuhi, ug dili ako motugot nga kamo mahimo nakong mga sulugoon; apan akong panghingusgan nga mangalagad kamo kanako; kay nahasol na ang akong hunahuna tungod sa pagkamaayo ug sa pagkatalagsaon sa mga pulong sa inyong igsoon nga si Ammon; ug nagtinguha ako nga masayod sa hinungdan ngano nga wala siya mobiya sa Middoni uban kaninyo.

4 Ug si Aaron miingon sa hari: Tan-awa, ang Espiritu sa Ginoo mitawag kaniya sa lain nga agianan; miadto siya sa yuta sa Ishmael, aron tudloan ang katawhan ni Lamoni.

5 Karon ang hari miingon kanila: Unsa kining inyong gisulti kabahin sa Espiritu sa Ginoo? Tan-awa, mao kini ang butang nga nakahasol kanako.

6 Ug usab, unsa kining gisulti ni Ammon—^aKon kamo maghinulsol kamo maluwas, ug kon kamo dili maghinulsol, kamo isalikway sa kataposan nga adlaw?

7 Ug gitubag siya ni Aaron ug miingon kaniya: Motuo ba ikaw nga adunay Dios? Ug ang hari miingon: Nasayod ako nga ang mga Amalekita miingon nga adunay Dios, ug gitugotan nako sila nga magtukod sila og mga santuwaryo, aron magkapundok sila sa ilang kaugalingon sa pagsimba kaniya. Ug kon karon moingon ikaw nga adunay Dios, tan-awa ako ^amotuo.

8 Ug karon sa dihang nadungog kini ni Aaron, ang iyang kasingkasing nagsugod sa pagmaya, ug siya miingon: Tan-awa, sa walay pagduhaduha sama nga ikaw buhi, O hari, adunay Dios.

9 Ug ang hari miingon: Ang Dios mao ba kanang ^aGamhanang Espiritu nga midala sa atong mga amahan gikan sa yuta sa Jerusalem?

10 Ug si Aaron miingon kaniya: Oo, mao kana siya ang Gamhanang Espiritu, ug siya ang ^amilalang sa tanan nga butang sa langit ug sa yuta. Motuo ba ikaw niini?

11 Ug miingon siya: Oo, mituo ako nga ang Gamhanang Espiritu milalang sa tanan nga butang, ug nagtinguha ako nga sultihan ko nimo kabahin niining tanan nga butang, ug ^amotuo ako sa imong mga pulong.

12 Ug nahitabo nga sa dihang nakita ni Aaron nga ang hari motuo sa iyang mga pulong, gisugdan niya gikan sa paglalang ni Adan, ^amibasa sa mga kasulatan ngadto sa hari—kon giunsa sa Dios paglalang ang tawo sunod sa iyang kaugalingon nga hitsura, ug nga ang Dios mihatag kaniya og mga sugo, ug nga tungod sa kalapasan, ang tawo napukan.

13 Ug si Aaron mipasabot kaniya sa mga kasulatan gikan sa ^apaglalang ni Adan, naghan-ay sa pagkapukan sa tawo sa iyang atubangan, ug sa ilang kalibotanon nga kahimtang ug usab sa ^bplano sa katubsanan, nga giandam ^cgikan sa katukoran sa kalibotan, pinaagi ni Kristo, alang sa tanan nga motuo sa iyang ngalan.

14 Ug kay ang tawo ^anapukan dili siya ^btakos sa bisan unsa alang sa iyang kaugalingon; apan ang mga pag-antos ug kamatayon ni Kristo ^cmiula alang sa ilang mga sala, pinaagi sa pagtuo ug paghinulsol, ug uban pa; ug nga giputol niya ang mga higot sa kamatayon, aron ang ^dlubnganan walay kadaogan, ug aron ang kahapdos sa kamatayon pagalamyon sa mga paglaom sa himaya; ug si Aaron mipasabot niining tanan nga butang ngadto sa hari.

15 Ug nahitabo nga human si Aaron nakapasabot niining mga butanga kaniya, ang hari miingon: ^aUnsay akong buhaton aron akong maangkon kining kinabuhing dayon nga imong gipamulong? Oo, unsay akong buhaton nga ako ^bmatawo sa Dios, aron kining daotan nga espiritu makuha gikan sa akong dughan, ug makadawat sa iyang Espiritu, aron mapuno ako sa kamaya, aron ako dili isalikway sa kataposang adlaw? Tan-awa, miingon siya, biyaan nako ang ^ctanan nakong gipanag-iya, oo, ako mobiya sa akong gingharian, aron akong madawat kining hingpit nga kamaya.

16 Apan si Aaron miingon kaniya: Kon ^anagtinguha ka niining butanga, kon moyukbo ka sa atubangan sa Dios, oo, kon ikaw maghinulsol sa tanan nimong mga sala, ug moyukbo sa atubangan sa Dios, ug motawag sa iyang ngalan pinaagi sa pagtuo, motuo nga ikaw makadawat, nan imong madawat ang ^bpaglaom nga imong gitinguha.

17 Ug nahitabo nga sa dihang nasulti ni Aaron kini nga mga pulong, ang hari ^amiyukbo sa atubangan sa Ginoo, nga nagluhod; oo, gani mihapa siya sa yuta, ug ^bmisinggit og kusog, nga nag-ingon:

18 O Dios, gisultihan ako ni Aaron nga adunay Dios; ug kon adunay Dios, ug kon ikaw mao ang Dios, mahimo bang ipaila nimo ang imong kaugalingon ngari kanako, ug biyaan nako ang tanan nakong sala aron makaila kanimo, ug aron ako mabangon gikan sa mga patay, ug maluwas sa kataposang adlaw. Ug karon sa dihang nasulti sa hari kini nga mga pulong, natumba siya ingon og patay.

19 Ug nahitabo nga ang iyang mga sulugoon midagan ug misulti sa rayna sa tanang nahitabo sa hari. Ug miduol siya sa hari; ug sa dihang nakita niya nga siya naghigda ingon og siya patay, ug usab si Aaron ug ang iyang kaigsoonan nga nagbarog ingon og sila ang hinungdan sa iyang pagkatumba, nasuko siya kanila, ug misugo nga ang iyang mga sulugoon, o ang mga sulugoon sa hari, modakop kanila ug mopatay kanila.

20 Karon ang mga sulugoon nakakita sa hinungdan sa pagkatumba sa hari, busa wala sila mangahas sa pagbakyaw sa ilang mga kamot kang Aaron ug sa iyang kaigsoonan; ug mihangyo sila sa rayna nga nag-ingon: Nganong mosugo man ka nga among patyon kining mga tawhana, kay tan-awa ang usa kanila ^amas gamhanan kay kanatong tanan? Busa mangamatay kita sa ilang atubangan.

21 Karon sa dihang nakita sa rayna ang kahadlok sa mga sulugoon siya usab nagsugod sa hilabihan nga pagkahadlok, basin pa unya kon adunay daotan nga modangat kaniya. Ug gisugo niya ang iyang mga sulugoon nga ilang adtoon ug tawgon ang katawhan, aron ilang mapatay si Aaron ug ang iyang kaigsoonan.

22 Karon sa dihang nakita ni Aaron ang hugot nga tinguha sa rayna, siya nga nasayod usab sa katig-a sa mga kasingkasing sa katawhan, nahadlok basin pa unya nga ang pundok sa katawhan magkapundok, ug adunay dako nga panagbingkil ug kasamok taliwala kanila; busa gikab-ot niya ang iyang kamot ug mipatindog sa hari gikan sa yuta, ug miingon kaniya: Tindog. Ug mitindog siya, nga naulian sa iyang kusog.

23 Karon nahitabo kini sa atubangan sa rayna ug sa daghang sulugoon. Ug sa dihang nakita nila kini nahibulong sila sa hilabihan, ug nagsugod sa pagkahadlok. Ug ang hari mibarog, ug misugod sa ^apagpangalagad kanila. Ug nangalagad siya kanila, hangtod nga ang tibuok niya nga panimalay ^bnakabig ngadto sa Ginoo.

24 Karon dihay pundok sa katawhan nga nagkapundok tungod sa sugo sa rayna, ug dihay nagsugod nga hilabihang pagbagulbol sa ilang taliwala tungod kang Aaron ug sa iyang kaigsoonan.

25 Apan mibarog ang hari taliwala kanila ug nangalagad kanila. Ug nahupay ang ilang kasuko kang Aaron ug sa iyang mga kauban.

26 Ug nahitabo nga sa dihang nakita sa hari nga ang katawhan nahupay, misugo siya nga si Aaron ug ang iyang kaigsoonan mobarog taliwala sa pundok sa katawhan, ug aron ilang masangyaw ang pulong ngadto kanila.

27 Ug nahitabo nga ang hari nagpadala og ^apahibalo sa tibuok yuta, ngadto sa iyang tanang katawhan nga anaa sa iyang tanang yuta, nga anaa sa tanan nga rehiyon libot niini, diin kini nag-utlanan gani hangtod sa dagat, sa silangan ug sa kasadpan, ug nabahin gikan sa yuta sa ^bZarahemla pinaagi sa usa ka gamay kaayo nga bahin sa kamingawan, nga milugway gikan sa dagat sa silangan gani hangtod sa dagat sa kasadpan, ug libot sa mga utlanan sa baybayon, ug sa mga utlanan sa kamingawan nga anaa sa amihanan nga dapit sa yuta sa Zarahemla, lahos sa mga utlanan sa Manti, dapit sa ulohan sa suba sa Sidon, nga naglugway gikan sa silangan paingon sa kasadpan—ug sa ingon niana nabahinbahin ang mga Lamanita ug mga Nephita.

28 Karon, ang mas ^atapolan nga bahin sa mga Lamanita nagpuyo sa kamingawan, ug nagpuyo sa mga tolda; ug nagkatag sila sa kamingawan dapit sa kasadpan, sa yuta sa Nephi; oo, ug usab sa kasadpan sa yuta sa Zarahemla, sa mga utlanan sa baybayon, ug didto sa kasadpan sa yuta sa Nephi, sa dapit sa unang kabilin sa ilang mga amahan, ug sa ingon niana nahimo nga utlanan subay sa baybayon.

29 Ug usab dihay daghan nga Lamanita sa silangan nga bahin sa baybayon, bisan asa nga dapit nga giabog sila sa mga Nephita. Ug sa ingon niana hapit maliyoki ang mga Nephita sa mga Lamanita; bisan pa niana ang mga Nephita nanag-iya sa tanang bahin sa amihanan nga yuta nga nag-utlanan diha sa kamingawan, sa ulohan sa suba sa Sidon, gikan sa silangan ngadto sa kasadpan, libot sa kamingawan nga bahin; didto sa amihanan, gani hangtod nga sila miabot sa yuta nga ilang gitawag og ^aMabungahon.

30 Ug ang utlanan niini hangtod sa yuta nga ilang gitawag og ^aBiniyaan, nga layo kaayo nga dapit sa amihanan nga kini miabot ngadto sa yuta nga gipuy-an ug gilaglag, kansang mga ^bbukog nga atong gihisgotan, nga nakaplagan sa katawhan ni Zarahemla, kini isip dapit sa ilang ^cuna nga pagdunggo.

31 Ug didto sila naggikan hangtod miabot sa habagatang bahin sa kamingawan. Sa ingon niana ang yuta dapit sa amihanang bahin gitawag og ^aBiniyaan, ug ang yuta dapit sa habagatang bahin gitawag og Mabungahon, ingon nga mao ang kamingawan nga puno sa tanang matang sa ihalas nga mga mananap sa matag klase, usa ka bahin nga gikan sa yuta sa amihanang bahin alang sa pagkaon.

32 Ug karon, ang ^agilay-on niini usa lamang ka adlaw ug tunga nga panaw alang sa usa ka Nephita, sa utlanan sa Mabungahon ug sa yuta sa Biniyaan, gikan sa silangan ngadto sa kasadpan sa dagat; ug sa ingon niana ang yuta sa Nephi ug ang yuta sa Zarahemla hapit maliyoki og tubig, nga kadto may usa ka gamay nga ^blawis sa yuta tali sa yuta sa amihanang bahin ug sa yuta sa habagatang bahin.

33 Ug nahitabo nga ang mga Nephita nagpuyo sa yuta sa Mabungahon, bisan gikan sa silangan ngadto sa kasadpan nga dagat, ug sa ingon ang mga Nephita sa ilang kaalam, uban sa ilang mga magbalantay ug sa ilang mga kasundalohan, milibot sa mga Lamanita sa habagatan, nga niana sila dili na makapanag-iya sa amihanan, aron dili na sila magkatag sa yuta sa amihanang bahin.

34 Busa ang mga Lamanita dili na makapanag-iya gawas sa yuta sa Nephi, ug sa kamingawan libot niini. Karon tungod kini sa kaalam sa mga Nephita—kay ang mga Lamanita ilang mga kaaway, dili sila makatugot nga sakiton sila sa tanang higayon, ug usab aron sila makaangkon og nasod nga ilang kadangpan, sumala sa ilang mga tinguha.

35 Ug karon ako, human makasulti niini, mobalik pag-usab sa estorya ni Ammon ug ni Aaron, ni Omner ug ni Himni, ug sa ilang kaigsoonan.