1 O lenei, ao faapea ona a’oa’o atu pea e Amona le nuu o Lamonae, o le a tatou toe foi atu i le tala ia Arona ma ona uso; auā, ina ua mavae ona ia alu ese mai le laueleele o Mitonae, sa ^ata’ita’i atu o ia e le Agaga i le laueleele o Nifae, i le maota lava o le tupu lea sa pule i luga o le laueleele uma ^evagana ai le laueleele o Isamaeli; ma o ia lea o le tamā o Lamonae.

2 Ma sa oo ina alu atu o ia ia te ia i totonu o le maota o le tupu, faatasi ma ona uso, ma ifo atu o ia i luma o le tupu, ma fai atu ia te ia: Faauta, le tupu e, o i matou o uso o Amona, o ē na e ^alavea’iina mai le falepuipui.

3 Ma o lenei, le tupu e, afai e te faasaoina o matou ola, o le a avea i matou ma au auauna. Ma sa fai mai le tupu ia te i latou: Tutula’i ia, ona o le a ou tuu atu ia te outou o outou ola, ma o le a ou le tuu atu outou e avea ma a’u auauna; ae o le a ou manaomia pea ia outou fesoasoani mai ia te a’u, ona ua ou atuatuvale lava i lo’u mafaufau ona o le alofa ma le silisili o upu a lou uso o Amona; ma ou te fia iloa le pogai pe aisea ua le sau ai o ia mai Mitonae faatasi ma oe.

4 Ma sa fai atu Arona i le tupu: Faauta, ua valaauina o ia e le Agaga o le Alii i se isi ala; ua alu atu o ia i le laueleele o Isamaeli, e a’oa’o le nuu o Lamonae.

5 O lenei sa fai mai le tupu ia te i latou: O le a lenei mea sa outou fai mai ai e uiga i le Agaga o le Alii? Faauta, o le mea lenei ua faaatuatuvaleina ai a’u.

6 O lenei foi, o le a lenei mea na fai mai ai Amona—^aAfai e te salamo o le a faaolaina oe, ma afai e te le salamo, o le a lafoa’i ese oe i le aso gataaga?

7 Ma sa tali atu Arona ia te ia ma fai atu ia te ia: E te talitonu o loo i ai se Atua? Ma sa fai mai le tupu: Ua ou iloa ua fai mai sa Amalekā o loo i ai se Atua, ma ua ou tuu atu ia te i latou ia latou fausia ni falesa, ina ia mafai ona latou faapotopoto faatasi i latou lava e tapuai atu ia te ia. Ma afai ua e fai mai nei o loo i ai se Atua, faauta, o le a ou ^atalitonu i ai.

8 Ma o lenei ina ua faalogo Arona i lenei mea, sa amata ona olioli lona loto, ma sa ia fai atu: Faauta, Le tupu e, e pei ona mautinoa o loo e soifua, o loo i ai se Atua.

9 Ma sa fai mai le tupu: O le Atua ea o le ^aAgaga Silisili lea na aumaia o tatou tamā mai le laueleele o Ierusalema?

10 Ma sa fai atu Arona ia te ia: Ioe, o ia lava o lena Agaga Silisili, ma o ia na ^afoafoaina mea uma i le lagi ma le lalolagi. E te talitonu i lenei mea?

11 Ma sa fai mai o ia: Ioe, ou te talitonu o le Agaga Silisili na foafoaina mea uma, ma ou te manao ia e faamatala mai ia te a’u e uiga i nei mea uma, ma o le a ou ^atalitonu i au upu.

12 Ma sa oo ina ua vaai atu Arona o le a talitonu le tupu i ana upu, sa ia amata mai i le foafoaga o Atamu, ma ^afaitau atu tusitusiga paia i le tupu—le ala na foafoa ai e le Atua le tagata i lona lava faatusa, ma e faapea na tuuina atu e le Atua ia te ia o poloaiga, ma e faapea ona o le solitulafono, ua pa’ū ai le tagata.

13 Ma sa faamatala auiliili atu e Arona ia te ia tusitusiga paia mai i le ^afoafoaga o Atamu, ma faataoto atu i ona luma le pa’ū o le tagata, ma lo latou tulaga faaletino ma le ^efuafuaga foi o le togiolaina, lea na saunia ⁱmai le faavaega o le lalolagi, e ala ia Keriso, mo soo se tasi o i latou uma o ē e talitonu i lona suafa.

14 Ma talu ai ona ua ^apa’ū le tagata, ua le mafai ona ^eagavaa o ia i soo se mea na te faia mo ia lava; ae o mafatiaga ma le maliu o Keriso ua ⁱtogiola mo a latou agasala, e ala i le faatuatua ma le salamo, ma isi mea faapena; ma ua motusi e ia noataga o le oti, o le a leai ai se manumalo o le ^otuugamau, ma o le a faatoilaloina le tui o le oti i faamoemoega o le mamalu; ma sa faamatala atu e Arona nei mea uma i le tupu.

15 Ma sa oo ina ua uma ona faamatala atu e Arona nei mea ia te ia, sa fai mai le tupu: ^aO le a se mea ou te faia ina ia mafai ona ou maua o lenei ola e faavavau ua e tautala i ai? Ioe, o le a se mea ou te faia ina ia mafai ai ona ^efanauina o a’u i la le Atua, ina ia lia’ina ese lenei agaga leaga mai lo’u fatafata, ma ou maua ai lona Agaga, ina ia mafai ona faatumuina o a’u i le olioli, ina ia le mafai ona lafoa’iina ese o a’u i le aso gataaga? Faauta, ua fai mai o ia, o le a ou tuu atu mea ⁱuma ua ou maua, ioe, o le a ou lafoa’i i lo’u malo, ina ia mafai ona ou maua lenei olioli tele.

16 Ae sa fai atu Arona ia te ia: Afai ua e ^anaunau i lenei mea, afai e te ifo atu i luma o le Atua, ioe, afai e te salamo i au agasala uma, ma ifo atu i luma o le Atua, ma valaau atu i lona suafa i le faatuatua, ma le talitonu o le a e maua, ona e maua lea o le ^efaamoemoe ua e naunau i ai.

17 Ma sa oo ina ua uma ona fai atu e Arona nei upu, sa ^aifo atu le tupu i luma o le Alii, i ona tulivae; ioe, sa faō lava o ia i luga o le eleele, ma ^etagi faatauanau atu, e faapea:

18 Le Atua e, ua ta’u mai e Arona ia te a’u o loo i ai se Atua; ma afai o loo i ai se Atua, ma afai o oe o le Atua, se’i e faailoa mai oe lava ia te a’u, ma o le a ou lafoa’i ese a’u agasala uma ina ia ou iloa oe, ma ia mafai ona faatuina o a’u mai le oti, ma faaolaina i le aso gataaga. Ma o lenei ina ua uma ona fai mai e le tupu nei upu, sa taia o ia e peiseai ua oti.

19 Ma sa oo ina taufetuli ana auauna ma ta’u atu i le masiofo mea uma ua oo i le tupu. Ma sa sau o ia i le tupu; ma ina ua vaai atu o ia ua taoto mai o ia e peiseai ua oti, ma o tutula’i atu foi Arona ma ona uso e peiseai o i latou na ala ai lona pa’ū, sa ita o ia ia te i latou, ma ia faatonu ia o ane ana auauna, po o auauna a le tupu, e ave i latou ma fasioti ia te i latou.

20 O lenei sa vaai auauna i le pogai o le pa’ū o le tupu, o lea sa latou fefefe ai e fetagofi atu o latou lima ia Arona ma ona uso; ma sa latou talosaga atu i le masiofo e faapea: Aisea ua e faatonu ai i matou ia fasioti i nei tagata, ae faauta ua ^asili atu le malosi o le toatasi o i latou nai lo i matou uma? O lea o le a matou pa’u’ū ai i o latou luma.

21 O lenei ina ua vaai atu le masiofo i le fefefe o auauna, sa amata foi ona mata’u tele o ia, ne’i oo mai se leaga i ona luga. Ma sa ia faatonu ana auauna, ia latou o atu ma valaau i le nuu, ina ia mafai ona latou fasioti ia Arona ma ona uso.

22 O lenei ina ua vaai atu Arona i le lotomau o le masiofo, o ia, i lona iloa foi o le maaa o loto o le nuu, sa fefe ne’i faapotopoto faatasi e le motu o tagata i latou lava, ma tupu mai ai se finauga tele ma se fevesia’iga i totonu o i latou; o lea na ia faaloaloa atu ai lona lima ma faatula’i le tupu mai le eleele, ma fai atu ia te ia: Tula’i ia. Ma sa tula’i mai o ia i luga i ona vae, ua maua lona malosi.

23 O lenei sa faia lenei mea i luma o le masiofo ma le toatele o auauna. Ma ina ua latou vaai atu i ai, sa latou ofo tele, ma amata ona matata’u. Ma sa tula’i mai le tupu, ma amata ona ia ^aa’oa’o atu ia te i latou. Ma sa ia a’oa’o atu ia te i latou, sa oo ina ^eliua lona auaiga atoa i le Alii.

24 O lenei sa i ai se motu o tagata sa faapotopoto faatasi ona o le poloaiga a le masiofo, ma sa amata ona i ai ni muimuiga tetele i totonu o i latou, ona o Arona ma ona uso.

25 Peitai sa tula’i atu le tupu i totonu o i latou ma faato’ato’a atu ia te i latou. Ma sa faamalilieina i latou e faasaga ia Arona ma i latou o e na faatasi ma ia.

26 Ma sa oo ina ua vaai atu le tupu ua faamalieina le nuu, sa ia faatonuina e tatau ia Arona ma ona uso ona tutula’i i totonu o le lotolotoi o le motu o tagata, ma e tatau ia i latou ona tala’i atu le upu ia te i latou.

27 Ma sa oo ina auina atu e le tupu se ^afolafolaga i le laueleele uma, i totonu o ona tagata uma o e sa i ai i lona laueleele uma, o ē sa i ai i nofoaga uma o faataamilo ai, ia sa tuaoi e oo atu lava i le sami, i le itu i sasae ma le itu i sisifo, ma lea sa vavae mai le laueleele o ^eSara’emila i se vaivao lauitiiti, lea na amata mai i le sami i sasae e oo atu i le sami i sisifo, ma taamilo ane i tuaoi o le matafaga, ma tuaoi o le vao lea sa i le itu i matu i tafatafa o le laueleele o Sara’emila, e oo atu i tuaoi o Maneti, i tafatafa o le mata o le vaitafe o Saitonu, e tafe mai sasae agai i sisifo—ma sa faapea ona vavaeina o sa Lamanā ma sa Nifaē.

28 O lenei, o le vaega sili ona ^apaie o sa Lamanā sa nonofo i le vao, ma sa mau i faleie; ma sa salalau atu i latou i le vao i le itu i sisifo, i le laueleele o Nifae; ioe, ma le itu foi i sisifo o le laueleele o Sara’emila, i tuaoi latalata i le matafaga, ma le itu i sisifo o le laueleele o Nifae, i le nofoaga o le tofi muamua o o latou tamā, ma faapea ona tuaoi ai e alu atu i tafatafa o le matafaga.

29 Ma sa toatele foi sa Lamanā sa i ai i le itu i sasae latalata i le matafaga, i le mea na tutuli i ai i latou e sa Nifaē. Ma sa faapea ona toetoe a siosiomia sa Nifaē e sa Lamanā; ae ui i lea sa ave e sa Nifaē le vaega uma i matu o le laueleele e tuaoi ma le vao, i le mata o le vaitafe o Saitonu, mai sasae i sisifo, e taamilo atu i le itu i le vao; i le itu i matu, seia oo ina latou oo atu lava i le laueleele lea sa latou ta’ua o ^aNuumau.

30 Ma sa tuaoi ma le laueleele lea sa latou ta’ua o ^aTafuna’iga, lea sa matua mamao tele lava i matu sa oo atu i le laueleele lea sa ’ainā e ni tagata ua faaumatia, o ē e ona ^eivi na matou tautatala atu ai, lea na maua e le nuu o Sara’emila, le nofoaga lea na latou ⁱtau muamua i ai.

31 Ma sa latou o a’e mai iina i le vao i saute. O lea na ta’ua ai le laueleele i matu o ^aTafuna’iga, ma o le laueleele i saute sa ta’ua o Nuumau, ona o le vao lea sa tumu i ituaiga uma o manu aivao eseese, o se vaega o ia manu na o mai mai le laueleele i matu mo ni meaai.

32 Ma o lenei, ^ao le mamao sa na’o se aso e tasi ma le afa o le malaga a se sa Nifaē i le laina tuaoi o Nuumau ma le laueleele o Tafuna’iga, i le sami mai sasae i sisifo; ma sa faapea ona toetoe a siomia ai le laueleele o Nifae ma le laueleele o Sara’emila i le vai, ona sa i ai iina se laueleele ^elauitiiti i le va o le laueleele i matu ma le laueleele i saute.

33 Ma sa oo ina ainā e sa Nifaē le laueleele o Nuumau, e mai lava i sasae e oo atu i le sami i sisifo, ma sa faapea e sa Nifaē i lo latou poto ma a latou leoleo ma a latou autau, ona pupuni i totonu sa Lamanā i le itu i saute, ina ia le mafai ai ona latou toe maua ni isi laueleele i le itu i matu, ina ia le mafai ona latou tumutumu ai i le laueleele i matu.

34 O lea sa le mafai ona toe maua e sa Lamanā ni isi laueleele ua na’o i le laueleele o Nifae, ma le vao o faataamilo ai. O lenei o le poto lea na faia ai e sa Nifaē lenei mea—talu ai ona o sa Lamanā o se fili ia te i latou, sa latou le faataga a latou faatigā ia oo mai i soo se itu, ma ina ia mafai ai foi ona latou maua o se itu-laueleele e mafai ona latou sosola atu i ai, e tusa ma o latou manao.

35 Ma o lenei o a’u, ina ua uma ona ou fai atu o lenei mea, e toe foi i le tala e uiga ia Amona ma Arona, Ominea ma Himinae, ma o latou uso.