1 Luk, nao i bin hapen se king blong Ol Man blong Leman i sendem wan ^aofisol toktok long medel blong evri pipol blong hem, blong oli no mas putum han blong olgeta long Amon, o Eron, o Omna, o Himnae, mo ol brata blong olgeta we bae oli go aot blong prijim toktok blong God, long eni ples we bae oli stap long hem, long eni pat blong graon blong olgeta.

2 Yes, hem i bin sendem wan toktok long olgeta, se oli no mas putum han blong olgeta long olgeta blong fasem olgeta, o blong sakem olgeta long kalabus; mo tu, oli no mas spet long olgeta, o faetem olgeta, o sakemaot olgeta long ol haos blong prea blong olgeta, o givim hadtaem long olgeta; mo oli no mas stonem olgeta, be blong oli mas letem olgeta blong go long ol haos blong olgeta, mo tu, long ol tempol blong olgeta, mo ol ples blong wosip blong olgeta.

3 Mo olsem ia nao oli save go aot mo prijim trutok folem ol tingting blong olgeta, from king i jenisim laef blong hem i go long Lod, mo evri man insaed long haos blong hem tu; from hemia, hem i sendem ofisol toktok blong hem long evri ples long graon long ol pipol blong hem, blong mekem se toktok blong God i no save gat wan samting we i save blokem, be blong i save go aot truaot long evri graon, blong mekem se ol man blong hem oli luksave ol nogud ^akastom blong ol papa blong olgeta, mo blong oli save luksave se olgeta evriwan oli ol brata, mo se oli no mas kilim man i ded, o stil long taem blong faet, o stil, o mekem adaltri, o mekem eni kaen fasin nogud.

4 Mo nao i bin hapen se, taem we king i sendem ofisol toktok ia i go, Eron mo ol brata blong hem oli go aot long wan bigtaon i go long narafala bigtaon, mo long wan haos blong wosip i go long narafalawan, oli stanemap ol jos, mo konsekretem ol pris mo ol tija truaot long graon long medel blong Ol Man blong Leman, blong prijim mo blong tijim toktok blong God long medel blong olgeta; mo olsem ia nao oli bin stat blong gat bigfala sakses.

5 Mo i bin gat plante taosen long olgeta we oli tekem i kam long save long saed blong Lod, yes, i gat plante taosen long olgeta we oli tekem i kam blong biliv long ol ^akastom blong Ol Man blong Nifae; mo oli tijim olgeta long ol ^bhistri mo profesi we oli bin pasem i kam daon kasem naoia.

6 Mo i tru se olsem we Lod i stap laef, i tru se olgeta we oli biliv, o olgeta we oli tekem olgeta blong kam save long saed blong trutok, tru long ol prijing blong Amon mo ol brata blong hem, folem spirit blong revelesen, mo blong profesi, mo paoa blong God we i stap mekem ol merikel long olgeta—yes, mi talem long yufala se, olsem we Lod i stap laef, olgeta long Ol Man blong Leman we oli bin biliv long ol prijing blong olgeta, mo oli ^ajenisim laef blong olgeta long Lod, oli ^bneva foldaon i go lus.

7 From oli bin kam wan stret mo gud pipol; oli bin putum daon ol tul blong faet blong olgeta, we oli yusum taem oli tanem olgeta agensem man, blong oli no faet agensem God bakegen, mo agensem eni long ol brata blong olgeta.

8 Nao, hemia i ^aolgeta we oli jenisim laef blong olgeta long Lod:

9 Ol pipol blong Leman we oli stap long graon blong Ismael;

10 Mo tu, ol pipol blong Leman we oli stap long graon blong Midonae;

11 Mo tu, ol pipol blong Leman we oli stap long bigtaon blong Nifae;

12 Mo tu, ol pipol blong Leman we oli stap long graon blong ^aSaelom, mo we oli stap long graon blong Semlon, mo long bigtaon blong Lemyul, mo long bigtaon blong Simnaelom.

13 Mo hemia i olgeta nem blong ol bigtaon blong Ol Man blong Leman we oli bin ^ajenisim laef blong olgeta i go long Lod; mo hemia i olgeta ia we oli putum daon ol tul blong faet blong olgeta we oli yusum taem oli go agensem man, yes, evri tul blong faet blong olgeta; mo olgeta evriwan oli Ol Man blong Leman.

14 Mo Ol Man blong Amalekae oli no ^ajenisim laef blong olgeta, be wan nomo; mo tu, i no bin gat eni long Ol ^bMan blong Amulon; be oli mekem hat blong olgeta i kam strong, mo tu, hat blong Ol Man blong Leman long pat blong graon ia, long eni ples we oli stap, yes, mo evri vilej blong olgeta mo evri bigtaon blong olgeta.

15 From hemia, mifala i talemaot evri nem blong ol bigtaon blong Ol Man blong Leman we oli sakem sin mo oli kam blong save long saed blong trutok, mo oli jenisim laef blong olgeta.

16 Mo nao i bin hapen se king mo olgeta ia we oli bin jenisim laef blong olgeta, i bin wantem blong kasem wan nem, blong mekem se oli save kam defren long ol brata blong olgeta; nao king i askem Eron mo plante long ol pris, long saed blong wanem nem bae oli tekem long olgeta blong mekem se oli save defren long olgeta narawan.

17 Mo i bin hapen se nem we oli singaotem olgeta long hem, i ^aAntae-Nifae-Lihae; mo oli bin singaotem olgeta long nem ia, mo oli nomo singaotem olgeta Ol Man blong Leman.

18 Mo oli bin stat blong kam wan pipol we oli wok strong tumas wetem ol han blong olgeta; yes, mo oli fren gud wetem Ol Man blong Nifae; from hemia, oli statem wan fasin blong gat fren wetem olgeta, mo ^astrong nogud tok blong God i nomo folem olgeta.