Tusitusiga Paia
Alema 24


Mataupu 24

Ua o mai sa Lamanā e faasagatau i tagata o le Atua—Ua olioli sa Aneti-Nifae-Liae ia Keriso ma ua asiasi mai agelu ia te i latou—Ua latou filifili e mafatia i le oti nai lo le puipuia o i latou lava—Ua liua isi sa Lamanā e toatele. E tusa o le 90–77 T.L.M.

1 Ma sa oo ina o sa Amalekā ma sa Amulonā ma sa Lamanā o e sa i le laueleele o Amulona, ma e foi sa i le laueleele o Helama, ma e sa i le laueleele o aIerusalema, ma i se aotelega, sa i le laueleele atoa o faataamilo ai, o e sa le’i liua ma sa le’i avea i o latou luga le igoa o eAneti-Nifae-Liae, sa faaoso e sa Amalekā ma sa Amulonā ia feita faasaga i o latou uso.

2 Ma sa oo ina matuā tetele lava lo latou feita e faasaga ia te i latou, sa oo lava ina amata ona latou fouvale faasaga i lo latou tupu, sa oo ina latou le mananao ia avea o ia mo o latou tupu; o lea, na latou ave ai auupega o taua e faasagatau i le nuu o Aneti-Nifae-Liae.

3 Sa faaee atu nei e le tupu le malo i luga o lona atalii, ma sa ia faaigoa ia te ia o Aneti-Nifae-Liae.

4 Ma sa maliu le tupu i le tausaga lava lena na amata ai ona faia e sa Lamanā sauniuniga mo le taua e faasagatau i tagata o le Atua.

5 O lenei ina ua vaai Amona ma ona uso ma i latou uma o e na o a’e faatasi ma ia i sauniuniga a sa Lamanā e faaumatia o latou uso, sa latou o mai i le laueleele o Mitiana, ma o iina na feiloai ai Amona ma ona uso uma; ma mai iina sa latou o mai ai i le laueleele o Isamaeli ina ia mafai ona latou faia o se afono faatasi ma Lamonae ma lona uso foi o Aneti-Nifae-Liae, po o se a se mea e tatau ona latou faia e puipui ai i latou lava mai i a sa Lamanā.

6 O lenei sa leai se tagata e toatasi i totonu o tagata uma o e na liua i le Alii, na manao e ave auupega o taua e faasaga i o latou uso; e leai, sa latou le fia faia foi ni sauniuniga mo le taua; ioe, ma sa poloaiina foi i latou e lo latou tupu ia aua latou te faia.

7 O lenei, o upu nei sa ia fai atu i le nuu e uiga i le mataupu: Ou te faafetai i lo’u Atua, lo’u nuu pele e, ua auina mai ia te i tatou e lo tatou Atua silisili i lona agalelei, o tatou uso nei, o sa Nifaē, e tala’i mai ia te i tatou, ma faatalitonu i tatou e uiga i auputuu a o tatou tamā amioleaga.

8 Ma faauta, ou te faafetai i lo’u Atua silisili ona ua ia tuuina mai ia te i tatou se vaega o lona Agaga, e faamalulu o tatou loto, ua tatou amata ai se fesootaiga ma nei uso, o sa Nifaē.

9 Ma faauta, ou te faafetai foi i lo’u Atua, ona o le amataina o lenei fesootaiga ua tatou talitonu ai e uiga ia tatou aagasala, ma e uiga i le tele o le fasioti tagata sa tatou faia.

10 Ma ou te faafetai foi i lo’u Atua, ioe, lo’u Atua silisili, ona ua ia tuuina mai ia te i tatou ina ia mafai ona tatou salamo i nei mea, ma ua ia afaamagaloina foi i tatou mai ia tatou agasala ma le fasioti tagata e tele na tatou faia, ma aveese le lagona eta’usalaina mai i o tatou loto, e ala i galuega a lona Alo.

11 Ma o lenei faauta, ou uso e, talu ai ona pau lea o le mea e mafai ona tatou faia (ona sa avea i tatou ma tagata sili ona sē mamao ese i tagata uma) tatou te salamo ai mai i a tatou agasala uma ma le fasioti tagata e tele sa tatou faia, ma faia i le Atua ia ona aaveese i latou mai o tatou loto, auā ona pau lea o le mea sa mafai ona tatou faia ia lava ai lo tatou salamo i luma o le Atua e aveese ai e ia o tatou pisia—

12 O lenei, o’u uso e ua sili ona pele, talu ai ona ua aveese e le Atua o tatou pisia, ma ua iila a tatou pelu, o lea ia tatou le toe faapisipisia ai a tatou pelu i le toto o o tatou uso.

13 Faauta, ou te fai atu ia te outou, E leai, a ia tatou taofi a tatou pelu ina ia le pisia i le toto o o tatou uso; auā atonu, afai tatou te toe faapisipisia a tatou pelu o le a le mafai ona toe afufulu mamāina i latou e ala i le toto o le Alo o lo tatou Atua silisili, lea o le a faamaligi mo le togiolaina o a tatou agasala.

14 Ma ua alofa mutimutivale mai le Atua silisili ia te i tatou, ma faailoa mai nei mea ia i tatou ina ia tatou le fano; ioe, ma ua ia muai faailoa mai nei mea ia i tatou, ona ua alofa o ia i o tatou aagaga e pei ona alofa o ia i a tatou fanau; o lea, o lona alofa mutimutivale ua ia asiasi mai ai ia i tatou e ala i ana agelu, ina ia mafai ona faaali mai ia te i tatou le efuafuaga o le faaolataga, e faapea foi i tupulaga i le lumanai.

15 E, ua alofa mutimutivale tele lo tatou Atua! Ma o lenei faauta, talu ai ona ua pau lea o se mea ua mafai ona tatou faia e aveese ai o tatou pisia mai ia i tatou, ma faaiila ai a tatou pelu, ia tatou natia i latou ina ia mafai ona tausia pea lo latou iila, o se molimau i lo tatou Atua, i le aso gataaga, po o le aso o le a aumai ai i tatou e tutula’i i ona luma e faamasinoina, sa tatou le faapisipisiaina a tatou pelu i le toto o o tatou uso talu ona ia tuuina mai lana afioga ia te i tatou ma ia faamamāina ai i tatou.

16 Ma o lenei, o’u uso e, afai e saili o tatou uso e faaumatia i tatou, faauta, o le a tatou natia ese a tatou pelu, ioe, o le a tatou tanu loloto i latou i le eleele, ina ia tausia pea lo latou iila, o se molimau, i le aso gataaga, sa tatou le faaaogaina lava i latou; ma afai e faaumatia i tatou e o tatou uso, faauta, o le a tatou ao atu i lo tatou Atua ma o le a faaolaina i tatou.

17 Ma o lenei sa oo ina ua uma ona faaiu atu e le tupu nei upu, ma sa faapotopoto faatasi le nuu atoa, sa latou ave a latou pelu, ma auupega uma ia sa faaaoga i le faamaligiina o toto o tagata, ma ua latou atanumia loloto i latou i le eleele.

18 Ma sa latou faia lenei, o se mea sa avea i la latou vaaiga o se molimau i le Atua, ma i tagata foi, o le a latou ale toe faaaogaina auupega mo le faamaligiina o le toto o tagata; ma sa latou faia lenei mea, e faamaonia ma eosifeagaiga ai ma le Atua, nai lo le faamaligiina o le toto o o latou uso, o le a latou ituuina atu o latou lava ola; ma nai lo le aveese mai i se uso, o le a latou foai atu ia te ia; ma nai lo le faama’umau o o latou aso i le paie, o le a latou galulue malolosi i o latou lava lima.

19 Ma ua faapea ona tatou iloa ai, ina ua aumai nei sa Lamanā ia talitonu ma ia latou iloa le upumoni, sa atutumau i latou, ma latou tuu ia oo mai lava le oti ia te i latou, nai lo le faia o le agasala; ma ua faapea ona tatou vaai ai ua latou tanumia a latou auupega o le filemu, pe ua latou tanumia auupega o taua, mo le filemu.

20 Ma sa oo ina faia e o latou uso, o sa Lamanā, sauniuniga mo le taua, ma sa o a’e i le laueleele o Nifae mo le faamoemoe e fasioti le tupu, ma tuu se tasi e sui ia te ia, ma le faamoemoe foi e faaumatia ese tagata o Aneti-Nifae-Liae mai le laueleele.

21 O lenei ina ua vaai atu le nuu ua o mai i latou e faasaga ia te i latou sa latou o atu e faafeiloai i latou, ma sa latou afaapa’u’ū fao i latou lava i le eleele i o latou luma, ma sa amata ona latou valaau atu i le suafa o le Alii; ma o le tulaga lea sa faapea ona latou i ai ina ua amata ona oo mai o sa Lamanā i o latou luga, ma amata ona fasioti o i latou i le pelu.

22 Ma sa faapea, e aunoa ma lo latou feagai ma se tetee, ona latou fasioti o le tasi le afe ma le lima o i latou; ma ua tatou iloa ua faamanuiaina i latou, ona ua latou o atu e mau faatasi ma lo latou Atua.

23 O lenei ina ua vaai mai sa Lamanā ua le sosola ese o latou uso mai le pelu, pe liliu faatafa foi i latou i le itu taumatau po o le itu tauagavale, ae ua latou taooto i lalo ma afano, ma vivii atu i le Atua i le taimi lava o fano ai i le pelu—

24 O lenei ina ua vaai mai sa Lamanā i lenei mea, sa latou ataofi mai le fasiotia o i latou; ma sa toatele i latou o e na eootia o latou loto i totonu o i latou, mo i latou o o latou uso o e ua pa’u’ū ifo i le pelu, ona ua latou salamo i mea na latou faia.

25 Ma sa oo ina latou lafo i lalo a latou auupega o taua, ma sa latou le toe fia avea lava, ona ua tuia i latou ona o le fasioti tagata ua latou faia; ma sa latou o ifo i lalo e pei lava o o latou uso, ma faalagolago i le mutimuti alofa o i latou o e na sii a’e o latou lima e fasioti i latou.

26 Ma sa oo ina faatasi atu i tagata o le Atua i lena aso ni tagata e sili atu nai lo le aofai o e na fasiotia; ma o i latou o e na fasiotia o ni tagata sa amiotonu, o lea ua leai ai se pogai tatou te masalosalo ai ae ua afaaolaina i latou.

27 Ma sa leai se tagata amioleaga sa i totonu o i latou o e na fasiotia; ae sa sili atu i le afe i latou o e na aumai i le malamalama o le upumoni; ua faapea ona tatou vaai ai e tele aauala e galue ai le Alii e aumai ai le faaolataga i ona tagata.

28 O lenei o le aofai sili ona toatele o i latou o sa Lamanā o e na latou fasiotia le toatele naua o o latou uso, o sa Amalekā ma sa Amulonā, o le toatele o i latou sa mulimuli i le afaatulagaga a ’au eNe’oa.

29 O lenei, i totonu o i latou o e na aufaatasi mai i tagata o le Alii, sa aleai se sa Amalekā po o se sa Amulonā sa i ai, po o ni e sa i ai i le faatulagaga a Ne’oa, ae na o i latou o e na tupuga moni mai ia Lamana ma Lemuelu.

30 Ma ua faapea ona tatou iloa manino ai, pe a uma ona afaamalamalamaina o se nuu e ala i le Agaga o le Atua, ma latou maua le epoto tele e uiga i mea tau i le amiotonu, ma ona ipa’u’ū ese atu ai lea i le agasala ma le solitulafono, o le a sili atu lo latou maaa, ma faapea ona sili atu ai ona oleaga lo latou tulaga nai lo le faapea ifo na latou le iloaina lava nei mea.