Balaan ng mga Kasulatan
Alma 26


Kapitulo 26

Si Amon nagkasadya sa Ginuo—Ang mga matutum ginapabakod sang Ginuo kag ginahatagan sang kaalam—Paagi sa pagtuo ang mga tawo makadala sang linibo ka mga kalag padulong sa paghinulsol—Ang Dios may tanan nga gahum kag nakahangop sang tanan nga butang. Mga 90–77 B.C.

1 Kag karon, amo ini ang mga pulong ni Amon sa iya mga kauturan nga nagasiling sang amo sini: Mga utod ko kag mga kaupdanan ko, tan-awa ginasiling ko sa inyo, daw ano kadako nga kabangdanan agud magkasadya kita; kay napanghunahuna bala naton sang nagsugod kita halin sa duta sang Zarahemla nga ang Dios magahatag sa aton sang amo kadako nga mga bugay?

2 Kag karon, nagapamangkot ako, ano nga dalagko nga mga bugay ang iya ginhatag sa aton? Makasugid bala kamo?

3 Tan-awa, ako ang magasabat para sa inyo; kay ang aton mga kauturan, ang mga Lamanhon, yara sa kadudulman, huo, bisan sa pinakamadulom nga kadadalman, apang tan-awa, daw ano kadamo sa ila ang nadala nga makita ang dalayawon nga kasanag sang Dios! Kag amo ini ang bugay nga ginhatag sa aton, nga ginhimo kita nga mga instrumento sa mga kamot sang Dios nga ipahanabo ining dako nga buluhaton.

4 Tan-awa, linibo sa ila ang nagakasadya, kag nadala sa panong sang Dios.

5 Tan-awa, ang uma gulang na, kag bulahan kamo, kay ginduso ninyo ang garab, kag nag-ani sa inyo ikasarang, huo, sa bug-os nga adlaw kamo nagpangabudlay; kag tan-awa ang kadamuon sang inyo mga binugkos! Kag panipunon ang mga ini pasulod sa mga balay-talagoan agud indi mausik ang mga ini.

6 Huo, indi sila paghapayon sang unos sa katapusan nga adlaw; huo, indi man sila pagbati-batihon sang mga buhawi; kundi nga kon mag-abot ang unos pagatiponon sila sa ila lugar, nga indi sila maabtan sang unos; huo, indi man sila mapalid sang mabaskog nga hangin kon sa diin man sila luyag dal-on sang kaaway.

7 Apang tan-awa, yara sila sa mga kamot sang Ginuo sang ani, kag iya sila; kag bangonon niya sila sa katapusan nga adlaw.

8 Bulahan ang ngalan sang aton Dios; magkanta kita sang pagdayaw sa iya, huo, maghatag kita sing pagpasalamat sa iya balaan nga ngalan, kay nagahimo sia sang pagkamatarong sa wala’y katapusan.

9 Kay kon wala kita nagtaklad halin sa duta sang Zarahemla, ining aton labing pinalangga nga mga kauturan, nga labi nga nagpalangga sa aton, ginasakit pa kuntani gihapon sang pagdumot batok sa aton, huo, kag nangin mga estranghero man sila kuntani sa Dios.

10 Kag natabo ini nga sang nasiling ni Amon ining mga pulong, ginsaway sia sang iya utod nga si Aaron nga nagasiling: Amon, nagaduda ako nga ang imo kalipay nagadala sa imo sa pagpabugal.

11 Apang si Amon nagsiling sa iya: Wala ako nagapabugal sa akon kaugalingon nga kusog, kag sa akon kaugalingon nga kaalam; apang tan-awa, lubos ang akon kalipay, huo, ang akon tagipusuon nagalumapaw sa kalipay, kag magakasadya ako sa akon Dios.

12 Huo, nahibal-an ko nga wala ako sing kapuslanan; kon sa akon lamang kusog maluya ako; gani indi ako magpabugal sang akon kaugalingon, kundi nga magapabugal ako sang akon Dios, kay sa iya kusog mahimo ko ang tanan nga butang; huo, tan-awa, madamo nga gamhanan nga mga milagro ang aton nahikot sa sini nga duta, nga sa sini dayawon naton ang iya ngalan sa wala’y katapusan.

13 Tan-awa, pila ka libo sang aton mga kauturan ang iya nahilway halin sa mga kasakit sang impiyerno; kag gindala sila sa pagkanta sang nagatubos nga gugma, kag ini tungod sang gahum sang iya pulong nga yari sa aton, gani wala bala kita sing dako nga kabangdanan sa pagkasadya?

14 Huo, may kabangdanan kita sa pagdayaw sa iya sa wala’y katapusan, kay sia ang Labing Mataas nga Dios, kag naghilway sa aton mga kauturan halin sa mga kadena sang impiyerno.

15 Huo, nalikupan sila sang wala’y katubtuban nga kadudulman kag kalaglagan; apang tan-awa, gindala niya sila sa iya wala’y katubtuban nga kasanag, huo, sa wala’y katubtuban nga kaluwasan; kag nalikupan sila sang wala’y tupong nga kabugana sang iya gugma; huo, kag nangin mga instrumento kita sa iya mga kamot sa paghimo sining dako kag dalayawon nga buluhaton.

16 Gani, magkasadya kita, huo, magkasadya kita sa Ginuo; huo, magkasadya kita kay lubos ang aton kalipay; huo, dayawon naton ang aton Dios sa wala’y katapusan. Tan-awa, sin-o ang mahimo nga magkasadya sing tuman sa Ginuo? Huo, sin-o ang makahambal sing tuman parte sa iya dako nga gahum, kag sa iya kaluoy, kag sa iya pagkamainantuson tuhoy sa mga anak sang katawhan? Tan-awa, ginasiling ko sa inyo, indi ko masiling ang pinakadiutay nga bahin nga akon ginabatyag.

17 Sin-o ang nakapanghunahuna nga ang aton Dios nangin tuman kamaluluy-on agud nga makasabnit sa aton halin sa aton makahaladlok, makasasala, kag mahigko nga kahimtangan?

18 Tan-awa, naglakat kita bisan sa kaakig upod ang tuman nga pagpamahog nga gub-on ang iya simbahan.

19 O gani, ngaa wala niya kita pag-itugyan sa isa ka makahaladlok nga kalaglagan, huo, ngaa wala niya pag-itugot ang espada sang iya hustisya nga magtupa sa aton, kag itugyan kita sa wala’y katapusan nga kawala’y paglaum?

20 O, ang akon kalag, halos nga ini, daw malagyo sa pagpanghunahuna. Tan-awa, wala niya pag-ipatuman ang iya hustisya sa aton, kundi nga sa iya dako nga kaluoy gindala kita patabok sinang wala’y katubtuban nga kadadalman sang kamatayon kag kalisud, bisan sa kaluwasan sang aton mga kalag.

21 Kag karon tan-awa, mga kauturan ko, sin-o nga kinaandan nga tawo ang nakahibalo sining mga butang? Ginasiling ko sa inyo, wala sing isa nga nakahibalo sining mga butang luwas sa mahinulsulon.

22 Huo, sia nga nagahinulsol kag nagagamit sang pagtuo, kag nagahimo sang maayo nga mga binuhatan, kag nagapangamuyo sing dalayon nga wala’y untat—sa iya ginahatag nga mahibal-an ang mga misteryo sang Dios; huo, sa iya igahatag nga ipahayag ang mga butang nga wala pa gid napahayag; huo, kag ihatag sa iya nga dal-on ang linibo ka mga kalag sa paghinulsol, bisan pareho nga ginhatag sa aton nga dal-on ining aton mga kauturan sa paghinulsol.

23 Karon nadumduman bala ninyo, mga kauturan ko, nga nagsiling kita sa aton mga kauturan sa duta sang Zarahemla, magataklad kita sa duta sang Nefi, agud magwali sa aton mga kauturan, ang mga Lamanhon, kag ginkadlawan nila kita?

24 Kay nagsiling sila sa aton: Nagahunahuna bala kamo nga madala ninyo ang mga Lamanhon sa ihibalo parte sa kamatuoran? Nagahunahuna bala kamo nga mapapati ninyo ang mga Lamanhon nga indi husto ang mga tradisyon sang ila mga amay, sila nga isa ka batinggilan nga katawhan; nga ang ila mga tagipusuon nagakalipay sa pagpaagay sang dugo; nga ang ila mga inadlaw ginahinguyang sa pinakagrabe nga kalainan; nga ang mga dalanon nangin mga dalanon sing isa ka makasasala halin sa ginsuguran? Karon mga kauturan ko, nadumduman ninyo nga amo ini ang ila ginhambal.

25 Kag dugang pa sina nagsiling sila: Magkapot kita sang mga armas batok sa ila, agud malaglag naton sila kag ang ila kalainan pagwa sa duta, kay basi daugon nila kita kag laglagon kita.

26 Apang tan-awa, pinalangga kong mga kauturan, nagkadto kita sa kamingawan indi sa tuyo nga laglagon ang aton mga kauturan, kundi sa tuyo nga basi pa lang maluwas naton ang pila sang ila mga kalag.

27 Karon sang ang aton mga tagipusuon nangasubo, kag naghana na kita nga magbalik, tan-awa, ginpaumpawan kita sang Ginuo, kag nagsiling: Lakat sa inyo mga kauturan, ang mga Lamanhon, kag batasa sing may pagpaumod ang inyo mga pag-antos, kag ihatag ko sa inyo ang kadalag-an.

28 Kag karon tan-awa, nag-abot kita, kag nakigsimpon sa ila; kag nangin mapainumuron kita sa aton mga pag-antos, kag nag-antos kita sang tagsa ka kinawala; huo, nagkadto kita sa tagsa ka balay, nga nagasandig sa mga kaluoy sang kalibutan—indi sa mga kaluoy sang kalibutan lamang kundi sa mga kaluoy sang Dios.

29 Kag nagsulod kita sa ila mga balay kag gintudloan sila, kag gintudloan naton sila sa ila mga dalanon; huo, kag gintudloan naton sila sa ila mga bungyod; kag nagsulod man kita sa ila mga templo kag sa ila mga sinagoga kag gintudloan sila; kag ginpanabog kita, kag ginyaguta, kag ginduplaan, kag gintampa ang aton mga guya; kag ginbato kita, kag ginpangdakop kag ginpanggapos sang mabakod nga mga higot, kag ginhunong sa bilanggoan; kag paagi sa gahum kag kaalam sang Dios nahilway kita liwat.

30 Kag nag-antos kita sang tanan nga sari sang pag-antos, kag ini tanan, agud basi pa lang nga mangin mga paagi kita sa pagluwas sang pila ka kalag; kag naghunahuna kita nga ang aton kalipay mangin lubos kon basi pa lang nga mangin paagi kita sa pagluwas sang pila.

31 Karon tan-awa, makatulok kita kag makita ang mga bunga sang aton mga pagpangabudlay; kag diutay bala ang mga ini? Ginasiling ko sa inyo, Indi, madamo ang mga ini; huo, kag masaksihan naton ang ila pagkasinsero tungod sang ila gugma sa ila mga kauturan kag amo man sa aton.

32 Kay tan-awa, mas ginpasulabi pa nila nga itugyan ang ila mga kabuhi sangsa kuhaon ang kabuhi sang ila kaaway; kag ginpanglubong nila ang ila mga armas sa inaway sing madalom sa duta, tungod sang ila gugma sa ila mga kauturan.

33 Kag karon tan-awa ginasiling ko sa inyo, may nangin amo na bala sina kadako nga gugma sa bug-os nga kadutaan? Tan-awa, ginasiling ko sa inyo, Wala, wala pa, bisan sa mga Nefinhon.

34 Kay tan-awa, magakapot sila sing armas batok sa ila mga kauturan; indi nila pagtugtan ang ila mga kaugalingon nga pamatyon. Apang tan-awa daw ano kadamo sang mga ini ang nagtugyan sang ila mga kabuhi; kag nahibal-an naton nga nagkadto na sila sa ila Dios tungod sang ila gugma kag sang ila pagdumot sa sala.

35 Karon wala bala kita sing kabangdanan sa pagkasadya? Huo, ginasiling ko sa inyo, wala pa gid halin sadto sang mga tawo nga may amo kadako nga kabangdanan sa pagkasadya pareho sa aton, halin sa ginsuguran sang kalibutan; huo, kag ang akon kalipay nagasulobra, bisan tuhoy sa pagpabugal sa akon Dios; kay may tanan sia nga gahum, tanan nga kaalam, kag tanan nga paghangop; nahangpan niya ang tanan nga butang, kag isa sia ka maluluy-on nga Persona, bisan tubtob sa kaluwasan, sa sinang mga magahinulsol kag magapati sa iya ngalan.

36 Karon kon pagpabugal ini, sa gihapon, magapabugal ako; kay amo ini ang akon kabuhi kag ang akon kasanag, ang akon kalipay kag ang akon kaluwasan, kag ang akon pagtubos halin sa wala’y katubtuban nga kasubo. Huo, bulahan ang ngalan sang akon Dios, nga nangin madinumdumon sa sining katawhan, nga isa ka sanga sang kahoy sang Israel, kag nadula halin sa iya sini lawas sa isa ka bag-o nga duta; huo, ginasiling ko, bulahan ang ngalan sang akon Dios, nga nangin madinumdumon sa aton, nga mga dalang-dalang sa isa ka bag-o nga duta.

37 Karon mga kauturan ko, makita naton nga ang Dios madinumdumon sang tagsa ka katawhan, sa bisan diin man nga duta nga yara sila; huo, ginaisip niya ang iya katawhan, kag ang iya tagipusuon sang kaluoy nagalikop sang bug-os nga duta. Karon amo ini ang akon kalipay, kag ang akon dako nga kapasalamatan; huo, kag magahatag ako sang pagpasalamat sa akon Dios sa wala’y katapusan. Amen.