1 O bwa ngke ngai te anera, ao e kona n reke te bwai are e tangiria nanou, bwa ni waaki nako ma n taetae ni bwanan te Atua, ma te bwanaa ae na ioa te aba, ao man takaruaea te rairannano nakoia aomata ni kabane.

2 Eng, N na taekina nakoia aomata ni kabane, n te bwanaa ae aron te baa, te rairannano ao te babaire ni kaboaki, bwa a na riai n rairananoia man ^anakon Atuara, bwa e aonga n akea te manga nanokawaki iaon te aba.

3 Ma nooria, bon ngai te aomata, ao I bure n ae I tangiria; bwa I riai n rauaki ni bwaai ake e a tia n anganai te Uea.

4 Bwa I riai n aki bita ana tua te Atua ae motiraoi ibukin nanou, bwa I ataia bwa e angania aomata n aron ^ananoia, tao nakon te mate ke te maiu; eng, I ataia bwa e angania aomata, eng, e anga te tua nakoia aika tua aika aki kona ni bitaki, n aron ^bnanoia, tao nakon te kamaiuaki ke te tiringaki.

5 Eng, I ataia bwa te raoiroi ao te buakaka a bon roko nakoia aomata; are aki ataa te raoiroi ma n te buakaka e aki bukintaeka; ma ane e ^aataa te raoiroi ma n te buakaka, e na bon anganaki nakon are e tangiria, bwa tao e tangira te raoiroi ke te buakaka, te maiu ke te mate, te kimwareirei ke te ^biango n nanokawaki.

6 Ao ngkanne, kioina bwa I atai baikai, e aera ngkai N na manga tangira riki ae i rarikin au mwakuri are I a tia ni weteaki bwa N na karaoia?

7 E aera ngkai N na tangiria bwa N na riki bwa te anera, bwa N na kona n taetae nakoia kaain tabon aonaba.

8 Bwa nooria, te Uea e bon angaanga nakoia aaba ^anako, bwa tabemwaang ake bon kaain te aba ma ^bneweia, a na bon reirei ana taeka, eng, ni wanawanana, bwaai ni kabane ake a ^cnoori bwa a riai ni karekei; ngaia are ti nooria bwa te Uea e babaire ma te wanawana, n aron ae eti ma ni koaua.

9 I ataia bwa te Uea e a tia n anganai te tua, ao I kakatonga iai. I aki ^akakatonga I bon irou, ma I kakatonga n are e a tia n tuangai te Uea; eng, ao aio au kakatonga, bwa N na kona n riki bwa te bwai ni mwakuri i nanon bain te Atua bwa N na kairia aomata tabemwaang nakon te rairannano; ao aio kimwareireiu.

10 Ao nooria, ngkana I nooria tariu aika a mwaiti bwa a bon raraoma raoi, man roko nakon te Uea ae Atuaia, ao ngkanne e kaonaki tamneiu n te kimwareirei; Ao ngkanne I uringnga bwa ^atera are e a tia ni karaoia te Uea ibukiu, eng, are e a tia naba n ongo au tataro; eng, ao ngkanne I a uringa baina n nanoanga are e aroria nakoira.

11 Eng, ao I uringa naba kabureakia au bakatibu; bwa I ataia ma te koaua bwa e kainaomataia te ^aUea man te kabureaki, ao man aei e bon katea ana ekaretia; eng, te Uea ae te Atua, ae Atuan Aberaam, ae Atuan Itaaka, ao Atuan Iakobwa, e bon kainaomataia man te kabureaki.

12 Eng, I aki toki n uringa kabureakia au bakatibu; ao bon te Atua naba anne are e ^akainaomataia mai i nanon baia I-Aikubita e bon kainaomataia man te tautoronaki.

13 Eng, ao te Atua naba anne e katea ana ekaretia i buakoia; eng, ao te Atua naba anne e a tia ni weteai n te wewete ae tabu, bwa N na kabwarabwara te taeka nakoia te botanaomata aio, ao e a tia n anganai te nakoraoi ae bati, are e a bon onrake iai ^akimwareireiu.

14 Ma I aki kimwareirei n nakoraoin au waaki n ti ngai, ma e onrake riki kimwareireiu ibukin ^anakoraoin aia waaki tariu, ake a nakon te aba are Nibwaai.

15 Nooria, a tia ni beku korakora, ma ni kariki uaa aika a bati, ao tao korakora ra kanuangaia!

16 Ao ngkanne, ngkana I iangoi nakoraoin aia waaki tariu ao e uotaki nako tamneiu, n te aro are e a kamaenakoaki ma te rabwata, ao n aei, are e a korakora iai au kimwareirei.

17 Ao ngkanne teraa ngke te Atua e anganiia naakai, aika tariu, bwa a na tekateka n uean te Atua; eng, ao ni kabane naba ake uaan aia mwakuri bwa aonga n aki manga kitana uean te Atua, ma ana neboia n aki toki. Ao teraa ngke e kariaia te Atua bwa e na karaoaki n aron au taeka, ake I a tia n taekin.