1 Ug nahitabo nga sa pagsugod sa ikalima nga tuig sa ilang paghari dihay nagsugod nga panagbingkil sa katawhan; kay ang usa ka tawo, nga gitawag og Amlici, siya nga usa ka malimbongon kaayo nga tawo, oo, usa ka maalamon nga tawo sumala sa kaalam sa kalibotan, kay sumusunod siya sa kapunongan sa tawo nga mipatay kang ^aGideon pinaagi sa espada, kinsa gisilotan sa kamatayon sumala sa balaod—

2 Karon kini si Amlici, pinaagi sa iyang kamalimbongon, nakadani og daghan nga katawhan nga mosunod kaniya; gani hilabihan kadaghan nga nagsugod sila sa pagkagamhanan kaayo; ug nagsugod sila sa pagpaninguha aron sa pagpalingkod kang Amlici nga mahimong hari sa katawhan.

3 Karon nakapahadlok kini sa katawhan sa simbahan, ug usab ngadto sa tanan kinsa wala madani sa mga pagpamugos ni Amlici; kay nasayod sila nga sumala sa ilang balaod nga ang maong mga butang kinahanglan matukod pinaagi sa ^atingog sa katawhan.

4 Busa, kon makuha ni Amlici ang tingog sa katawhan, siya, nga usa ka daotan nga tawo, ^amohikaw kanila sa ilang mga katungod ug mga kahigayonan sa simbahan; kay maoy iyang tuyo nga malaglag ang simbahan sa Dios.

5 Ug nahitabo nga ang katawhan nagpundok sa ilang mga kaugalingon sa tibuok yuta, matag tawo sumala sa iyang hunahuna, kon alang ba kini o batok kang Amlici, sa nagkalain-lain nga mga pundok, nga adunay daghan nga panaglalis ug katingalahan nga mga ^apanagbingkil sa usag usa.

6 Ug sa ingon niana sila nagpundok sa ilang mga kaugalingon aron ipaabot ang ilang mga tingog mahitungod sa hitabo; ug gipaatubang sila sa mga maghuhukom.

7 Ug nahitabo nga ang tingog sa katawhan mibatok kang Amlici, nga siya wala mahimong hari sa katawhan.

8 Karon nakahimo kini og dakong kalipay sa mga kasingkasing niadtong kinsa batok kaniya; apan si Amlici misulsol niadtong midapig kaniya aron masuko batok niadtong wala modapig kaniya.

9 Ug nahitabo nga sila nagpundok sa ilang mga kaugalingon, ug mitudlo kang Amlici nga mahimong ilang hari.

10 Karon sa dihang si Amlici nahimo nilang hari siya misugo kanila nga mogamit sa ilang mga hinagiban batok sa ilang kaigsoonan; ug kini iyang gibuhat aron siya moulipon kanila nganha kaniya.

11 Karon ang katawhan ni Amlici nailhan pinaagi sa ngalan ni Amlici, nga gitawag og ^amga Amlicita; ug ang nahibilin gitawag og ^bmga Nephita, o katawhan sa Dios.

12 Busa ang katawhan sa mga Nephita nasayod sa tuyo sa mga Amlicita, ug busa sila nangandam sa pagpakigsangka kanila; oo, sila misangkap sa ilang mga kaugalingon og mga espada, ug mga sundang, ug mga gapasan, ug mga panâ, ug mga bato, ug mga saplong, ug sa tanan nga matang sa ^ahinagiban sa gubat, sa matag matang.

13 Ug sa ingon niana naandam sila sa pagpakigsangka sa mga Amlicita sa panahon sa ilang pagsulong. Ug dihay gipanudlo nga mga kapitan, ug labaw nga mga kapitan, ug dako-dako nga mga kapitan, sumala sa ilang gidaghanon.

14 Ug nahitabo nga gisangkapan ni Amlici ang iyang mga tawo sa tanan nga matang sa hinagiban sa gubat sa matag matang; ug siya usab mitudlo og mga magmamando ug mga pangulo sa iyang katawhan, aron sa pagpangulo kanila sa pakiggubat batok sa ilang kaigsoonan.

15 Ug nahitabo nga ang mga Amlicita miabot sa bungtod sa Amnihu, nga dapit sa silangan sa ^asuba sa Sidon, diin midagayday ngadto sa ^byuta sa Zarahemla, ug didto gisugdan nila ang pagpakiggubat sa mga Nephita.

16 Karon kay si Alma, mao man ang ^alabaw nga maghuhukom ug gobernador sa katawhan ni Nephi, busa mitungas siya uban sa iyang katawhan, oo, uban sa iyang mga kapitan, ug dako-dako nga mga kapitan, oo, sa pangunahan sa iyang mga kasundalohan, sa pagpakig-away batok sa mga Amlicita.

17 Ug gisugdan nila ang pagpatay sa mga Amlicita didto sa bungtod sa silangan sa Sidon. Ug ang mga Amlicita nakig-away sa mga Nephita sa tibuok kusog, hangtod nga daghan sa mga Nephita ang nangapokan atubangan sa mga Amlicita.

18 Bisan pa niana ang Ginoo mihatag og kusog sa kamot sa mga Nephita, nga sila mipatay sa mga Amlicita sa hilabihan nga pagpamatay, nga sila misugod sa pag-ikyas sa ilang atubangan.

19 Ug nahitabo nga ang mga Nephita migukod sa mga Amlicita sa tibuok niana nga adlaw, ug mipatay kanila sa hilabihang pagpamatay, hangtod nga dihay ^anapatay sa mga Amlicita nga napulog duha ka libo ug lima ka gatos ug katloan ug duha ka tawo; ug dihay napatay sa mga Nephita nga unom ka libo lima ka gatos ug kan-uman ug duha ka tawo.

20 Ug nahitabo nga dihang dili na magukdan ni Alma ang mga Amlicita iyang gisugo ang iyang katawhan nga motukod sa ilang mga tolda sa ^awalog sa Gideon, sa walog nga gitawag sunod kang Gideon kinsa gipatay sa mga kamot ni ^bNehor pinaagi sa espada; ug dinhi niini nga walog ang mga Nephita mitukod sa ilang mga tolda alang nianang gabhiona.

21 Ug si Alma mipadala og mga espiya aron sundan ang salin sa mga Amlicita, aron mahibaloan niya ang ilang mga plano ug mga tinago nga laraw, aron iyang mapanalipdan ang iyang kaugalingon batok kanila, nga siya makapanalipod sa iyang katawhan nga dili mapatay.

22 Karon kadtong iyang gipadala aron maniid sa kampo sa mga Amlicita gitawag og Zeram, ug Amnor, ug Manti, ug Limher; kini sila ang mikuyog sa ilang mga tawo aron sa pagpaniid sa kampo sa mga Amlicita.

23 Ug nahitabo nga sa pagkaugma namalik sila ngadto sa kampo sa mga Nephita nga nagdali sa hilabihan, nga nahibulong og dako, ug mibati og tumang kahadlok, nga nag-ingon:

24 Tan-awa, gisundan namo ang kampo sa ^amga Amlicita, ug sa among dako nga kahibulong, didto sa yuta sa Minon, ibabaw sa yuta sa Zarahemla, didto sa agianan sa yuta sa ^bNephi, nakita namo ang daghan kaayo nga panon sa mga Lamanita; ug tan-awa, ang mga Amlicita mitipon kanila;

25 Ug gisulong nila ang atong kaigsoonan niana nga yuta; ug miikyas sila gikan kanila dala ang ilang mga panon, ug ilang mga asawa, ug ilang mga anak, paingon sa atong siyudad; ug gawas kon kita magdali maangkon nila ang atong siyudad, ug ang atong mga amahan, ug ang atong mga asawa, ug ang atong mga anak mapatay.

26 Ug nahitabo nga ang katawhan ni Nephi midala sa ilang mga tolda, ug mibiya gikan sa walog sa Gideon paingon sa ilang siyudad, nga mao ang siyudad sa ^aZarahemla.

27 Ug tan-awa, samtang nanabok sila sa suba sa Sidon, ang mga Lamanita ug ang mga Amlicita, nga ang ^agidaghanon hapit sama sa gidaghanon sa mga balas sa dagat, misulong kanila aron sa pagpatay kanila.

28 Bisan pa niana, ang mga Nephita nga ^agilig-on pinaagi sa kamot sa Ginoo, kay nakaampo nga mainiton ngadto kaniya nga siya moluwas kanila gikan sa mga kamot sa ilang mga kaaway, busa ang Ginoo namati sa ilang mga pangamuyo, ug milig-on kanila, ug ang mga Lamanita ug mga Amlicita nangapukan sa ilang atubangan.

29 Ug nahitabo nga si Alma nakig-away kang Amlici gamit ang espada, sa inatubangay; ug sila nag-away sa hilabihan, sa usag usa.

30 Ug nahitabo nga si Alma, nga usa ka tawo sa Dios, nga nabansay uban sa hugot nga ^apagtuo, nangamuyo, nga nag-ingon: O Ginoo, kaloy-i ug luwasa ang akong kinabuhi, aron ako mahimong himan sa imong mga kamot sa pagluwas ug pagpanalipod niini nga katawhan.

31 Karon sa diha nga nasulti ni Alma kini nga mga pulong nakig-away siya pag-usab kang Amlici; ug nalig-on siya, hangtod nga iyang napatay si Amlici gamit ang espada.

32 Ug siya usab nakig-away sa hari sa mga Lamanita; apan ang hari sa mga Lamanita misibog gikan sa atubangan ni Alma ug mipadala sa iyang mga magbalantay aron sa pagpakig-away kang Alma.

33 Apan si Alma, uban sa iyang mga magbalantay, nakig-away sa mga magbalantay sa hari sa mga Lamanita hangtod nga siya mipatay ug miabog kanila pagbalik.

34 Ug sa ingon niana gihawanan niya ang yuta, o ang daplin sa suba, diin nahimutang sa kasadpan sa suba sa Sidon, gipanglabay ang mga lawas sa mga Lamanita nga nangamatay ngadto sa katubigan sa Sidon, aron ang iyang katawhan adunay kaagian sa pagtabok ug sa pagpakig-away sa mga Lamanita ug sa mga Amlicita sa kasadpan nga bahin sa suba sa Sidon.

35 Ug nahitabo nga dihang nakatabok na silang tanan sa suba sa Sidon ang mga Lamanita ug ang mga Amlicita misugod sa pag-ikyas gikan kanila, bisan pa sa ilang hilabihan ka daghan nga sila dili maihap.

36 Ug miikyas sila gikan sa mga Nephita paingon sa kamingawan nga anaa sa kasadpan ug amihanan, palayo gikan sa mga utlanan sa yuta; ug ang mga Nephita migukod kanila sa ilang tibuok kusog, ug mipatay kanila.

37 Oo, gisugat sila sa bisan asang direksyon, ug gipatay ug giabog, hangtod nga sila nagkatibulaag sa kasadpan, ug didto sa amihanan, hangtod sila nangabot sa kamingawan, nga gitawag og Hermounts; ug kini mao ang dapit sa kamingawan nga gihugpaan sa ihalas ug manunukob nga mga mananap.

38 Ug nahitabo nga daghan ang nangamatay didto sa kamingawan tungod sa ilang mga samad, ug gipangaon sa mga mananap ug usab sa mga magdadagit sa kahanginan; ug ang ilang mga bukog nakit-an, ug nagtipun-og sa yuta.