Dagiti Nasantuan a Kasuratan
Alma 30


Kapitulo 30

Uyawen ni Korihor, ti Anti-Cristo, ni Cristo, ti pannakasubbot, ken ti espiritu ti pammadto—Isurona nga awan ti Dios, awan ti pannakatnag ti tao, awan ti dusa iti basol, ken awan ti Cristo—Paneknekan ni Alma a dumtengto ni Cristo ken ipakita ti amin a banag nga adda Dios—Dawaten ni Korihor ti tanda ket pinagumel—Nagparang ti sairo ken ni Korihor a kas anghel ket insurona kenkuana ti sawenna—Mabaddebaddek ni Korihor ket matay. Agarup 76–74 B.C.

1 Kitaen, ita napasamak a kalpasan ti pannakaurnos dagiti atattao ni Ammon iti daga ti Jershon, wen, ken kasta met a kalpasan a bnapatalaw dagiti Lamanita iti daga, ket intabon dagiti tattao iti daga dagiti minatayda—

2 Ita saan a nabilang dagiti minatayda gapu iti kaadu ti bilangda; saan met nabilang dagiti minatay dagiti Nephita—ngem napasamak kalpasan a naitabonda kadagiti minatayda, ken kasta met a kalpasan dagiti aldaw a panagayuno, ken panagladladingit, ken panagkararag, (ket iti maikasangapulo ket innem a tawen idi ti panagturay dagiti ukom kadagiti tattao ni Nephi) nangrugi ti agtultuloy a kappia iti intero a daga.

3 Wen, ket talaga a tungpalen ti tattao dagiti bilin ti Apo; ket naingetda iti panangtungpal kadagiti aordinansa ti Dios, a mayannurot iti linteg ni Moises; agsipud ta naisuro kadakuada a bmangtungpal ti linteg ni Moises agingga a matungpal daytoy.

4 Ket ngarud awan ti riribuk kadagiti tattao iti unos ti maikasangapulo ket innem a tawen a panangituray dagiti ukom kadagiti tattao ni Nephi.

5 Ket napasamak nga iti panangrugi ti maikasangapulo ket pito a tawen a panagturay dagiti ukom, adda nagtultuloy a kappia.

6 Ngem napasamak iti maudi a paset ti maikasangapulo ket pito a tawen, adda dimteng a lalaki iti daga ti Zarahemla, ket isu ti aAnti-Cristo, agsipud ta rinugianna nga inkasaba kadagiti tattao ti maisuppiat kadagiti pammadto a nasaon dagiti propeta, maipanggep iti yaay ni Cristo.

7 Ita awan idi ti linteg para iti tao a maisuppiat iti apammati; agsipud ta naiget a maisupadi kadagiti bilin ti Dios a rumbeng nga adda linteg a mangiturong kadagiti tattao iti saan nga agpapada a pakaibatayan.

8 Ta kastoy ti kinuna ti nasantuan a kasuratan: aPilienyo daytoy nga aldaw, no asino ti pagserbianyo.

9 Ita no tinarigagayan ti maysa a tao nga agserbi iti Dios, karbenganna nukua; wenno, no patienna ti Dios karbenganna nga agserbi kenkuana; ngem no saanna a patien isuna awan ti linteg a mangdusa kenkuana.

10 Ngem no pimmatay isuna nadusa iti aipapatay; ket no nagtakaw nadusa met; ket no nakiabig nadusa met; wen, nadusada kadagitoy amin a kinadakes.

11 Agsipud ta adda idi linteg a maukom dagiti tattao a mayannurot kadagiti naaramidda a krimen. Nupay kasta, awan ti linteg a maisuppiat iti pammati ti tao; ngarud, nadusa laeng ti tao kadagiti krimen a naaramidna; ngarud addaan amin a tao iti aagpapada a kasasaad.

12 Ket daytoy nga Anti-Cristo, nga agnagan iti Korihor, (ket saan a matengngel isuna ti linteg) rinugianna nga inkasaba kadagiti tattao nga awanto ti maysa a Cristo. Ket kastoy ti wagas a panangasabana, a kunana:

13 O dakayo a napungo iti minamaag ken ubbaw a namnama, apay nga isangolyo ti bagbagiyo kadagita minamaag a bambanag? Apay nga agsapulkayo iti Cristo? Agsipud ta awan ti tao a makaammo iti ania man a dumteng.

14 Kitaen, dagitoy banag a kunkunayo a padpadto, a kunayo nga inyallawat kadagiti nasantuan a propeta, kitaen, minamaagda a kaugalian dagiti ammayo.

15 Kasano ti pannakaammoyo iti kinapudnoda? Kitaen, saanyo maammuan dagiti banag a saanyo amakita; ngarud saanyo maammuan nga addanto Cristo.

16 Kumitakayo iti masakbayan ket kunayo a makitayo ti pannakaugas ti basbasolyo. Ngem kitaen, parnuay dayta ti agmauyong a panunot; ket umay daytoy a panagballa ti pampanunotyo gapu dagiti kaugalian dagiti ammayo, a nangisungsong kadakayo iti pammati kadagiti banag a saan a pudno.

17 Ket adu pay a kasta a bambanag ti imbagana kadakuada, imbagbagana kadakuada nga awanto ti maaramid a pannakasubbot para kadagiti basol ti tattao, ngem mapasaran ti tunggal tao iti daytoy a biag ti mayannurot iti panangimaton ti parsua; ngarud dumur-as ti tunggal tao a mayannurot iti laingna, ken mamarmek ti tunggal tao a mayannurot iti pigsana; ken saan a krimen ti ania man nga aramiden ti tao.

18 Ket kasta ti panangasabana kadakuada, a manangallilaw iti puspuso ti adu, a namagtangig kadakuada iti kinadakesda, wen, a manangallilaw iti adu a babbai, ken kasta met dagiti lallaki, nga agaramid kadagiti kinabalangkantis—nga imbagbagana kadakuada a no natayen ti tao, daytan ti pagpatinggaanna.

19 Ita napan pay daytoy a lalaki iti daga ti Jershon, tapno mangikasaba kadagitoy a bambanag kadagiti tattao ni Ammon, a tattao idi dagiti Lamanita.

20 Ngem kitaen nasirsiribda ngem iti adu kadagiti Nephita; agsipud ta innalada, ken ingalutda, ken binagkatda isuna sa impanda iti sanguanan ni Ammon, a maysa a nangato a padi dagita a tattao.

21 Ket napasamak nga imbilinna a masapul a mabagkat isuna sa mairuar iti daga. Ket immay isuna iti daga ti Gideon, ket rinugianna met ti nangasaba kadakuada; ket saan unay a nagballigi ditoy, agsipud ta tiniliw ken inggalut ken binagatda isuna sa impanda iti sanguanan iti nangato a padi, ken kasta met iti pangulo nga ukom iti daga.

22 Ket napasamak a kinuna ti nangato a padi kenkuana: Apay a mapmapanka ​​a mangballikug kadagiti wagas ti Apo? Apay nga isurom kadagitoy a tattao nga awanto ti maysa a Cristo, tapno mangsinga iti panagragragsakda? Apay nga agsasaoka iti maisuppiat kadagiti amin a pammadto dagiti nasantuan a propeta?

23 Ita Giddonah ti nagan ti nangato a padi. Ket kinuna ni Korihor kenkuana: Agsipud ta saanko isuro dagiti awan mamaayna a tradision dagiti ammayo, ken agsipud ta saanko isuro dagitoy a tattao a paiturayan ti bagbagida kadagiti awan mamaayna nga ordinansa ken ar-aramid nga impasdek dagiti nagkauna a papadi, tapno manggun-od iti bileg ken mangituray kadakuada, tapno agtalinaedda nga ignorante, tapno saanda nga itag-ay dagiti uloda, ngem maibabada sigun kadagiti balikasmo.

24 Kunam a nawaya dagitoy a tattao. Kitaen, kunak addada iti pannakaadipen. Kunam a pudno dagidiay nagkauna a padpadto. Kitaen, kunak a saanmo ammo a pudnoda.

25 Kunam a daytoy a tattao ket maysa a nakabasol ken natnag a tattao, gapu iti salungasing ti maysa a naganak. Kitaen, kunak a saan a nagbasol ti anak gapu kadagiti nagannakna.

26 Ken kunam pay nga umayto ni Cristo. Ngem kitaen, kunak a saanmo ammo nga addanto ti maysa a Cristo. Ken kunam pay a mapapatayto isuna para kadagiti abasbasol ti lubong—

27 Ket iti kasta allilawem dagitoy a tattao babaen kadagiti awan mamaayna a tradision dagiti ammayo, ken sigun kadagiti bukodmo a tartarigagay; ket sakupem ida, uray pay a kas pannakaadipen, tapno bussogenyo dagiti bagiyo iti panagbannog dagiti imada, ta saanda maitured ti tumangad a buyogen ti kinatured, ken saanda maitured a tagiragsaken dagiti kalinteganda ken pribilehioda.

28 Wen, saanda a maitured nga usaren ti kukuada ta amangan a masairda dagiti papadida, a mangsangol kadakuada sigun kadagiti tarigagayda, ket inturongda ida a patien, babaen kadagiti tradisionda ken dagiti arapaapda ken dagiti kapritsoda ken dagiti sirmatada ken dagiti agpampammarang a misterioda, ta masapulda a, no saanda inaramid ti sigun kadagiti balikasda, masairda ti sumagmamano a saan nga ammo a parsua, nga ibagbagada a Dios—maysa a parsua a pulos a saan a nakita wenno naam-ammo, pulos nga awan ken awanto iti kaano man..

29 Ita idi nakita ti nangato a saserdote ken ti pangulo nga ukom ti kinatangken ti panagpuspusona, wen, idi nakitada nga inumsina pay uray ti Dios, saanda pulos sinungbatan dagiti balikasna; ngem imbilinda a nasken a mapungo; ket inyawatda kadagiti ima dagiti agrebbeng, ket impanda iti daga ti Zarahemla, tapno maisaklang iti sanguanan ni Alma, ken iti pangulo nga ukom a gobernador iti intero a daga.

30 Ket napasamak nga idi naisaklang iti sanguanan ni Alma ken iti pangulo nga ukom, inaramidna latta ti kas iti inaramidna iti daga ti Gideon; wen, intultuloyna ti aagtabbaaw.

31 Ket timmakder a asipapannakkel dagiti balikasna iti sanguanan ni Alma, ken inumsina dagiti saserdote ken maestro, a pinabasolna ida a mangallilaw kadagiti tattao kadagiti minamaag a kaugalian dagiti ammada, tapno laeng mabsogda iti nagbannogan dagiti tattao.

32 Ita kinuna kenkuana ni Alma: Ammom a saankami agpabpabussog babaen ti nagbannogan dagitoy a tao; agsipud ta kitaen nagtrabahuak uray pay manipud iti panangrugi ti panagturay dagiti ukom agingga ita, babaen dagiti imak para iti kasapulak, iti laksid ti adu a panagbibiahek iti aglawlaw ti daga tapno iwaragawag iti balikas ti Dios kadagiti tattaok.

33 Ken iti laksid dagiti adu a panagbannog nga inaramidko iti simbaan, pulos a saannak nga immawat iti nawadwad uray no maysa la koma a asenine para iti bannogko; wenno uray dagiti kabsatko, malaksid iti pangukoman; ket kalpasanna immawatkami laeng a mayannurot iti linteg para iti orasmi.

34 Ket ita, no saankami nga umawat iti ania man a para iti panagbannogmi iti simbaan, ania ti masagrapmi iti panagbannogmi iti simbaan malaksid iti panangiwaragawagmi iti kinapudno, tapno maaddaan kami iti pagragsakan iti aragsak dagiti kakabsatmi?

35 Kalpasanna apay a kunam a mangasabakami kadagitoy a tao tapno makaawat iti gunggona, no sika, iti bagim a mismo, ammom nga awan ti gunggonami? Ket ita, patiem kadi nga alallilawenmi dagitoy a tao, a nakaigapuan ti panagrag-o ti puspusoda?

36 Ket insungbat ni Korihor, Wen.

37 Ket kalpasanna kinuna kenkuana ni Alma: Patiem kadi nga adda Dios?

38 Ket insungbatna, Saan.

39 Ita kinuna kenkuana ni Alma: Ilibakmo manen kadi nga adda Dios, ken kasta met a ilibakmo pay ni Cristo? Ta kitaen, kunak kenka, ammok nga adda Dios, ken kasta met nga umayto ni Cristo.

40 Ket ita ania ti pammaneknekmo nga awan ti aDios, wenno saan nga umay ni Cristo? Kunak kenka nga awan, malaksid laeng ti bukodmo a balikas.

41 Ngem, kitaen, adda amin kaniak a banag a kas apammaneknek a pudno amin dagitoy a banag; ken adda met kenka amin a banag a kas pammaneknek a pudnoda; ket ilibakmo kadi ida? Patiem kadi a pudno dagitoy a banag?

42 Kitaen, ammok a patiem, ngem naikutanka iti managulbod nga espiritu, ket inwaksim ti Espiritu ti Dios ket awan ti lugarna kenka; ngem adda ti bileg ti sairo nga agturay kenka, ket isu ti mangiturturong kenka, agparnuay kadagiti pamuspusan tapno madadaelna dagiti annak ti Dios.

43 Ket ita kinuna ni Korihor ken ni Alma: No pakitaannak iti atanda, tapno mabalinnak a mapapati nga adda Dios, wen, ipakitam kaniak nga adda bilegna, ket isunto pay laeng a patiekto ti kinapudno dagiti balikasmo.

44 Ngem kinuna kenkuana ni Alma: Adda kenkan ti umdas a tanda; sulisogem kadi pay ti Diosmo? Kunam kadi, Ipakitam kaniak ti tanda, no adda kenkan ti pammaneknek aamin dagitoy kabsatmo, ken kasta met amin dagiti nasantuan a propeta? Adda iti sangom dagiti nasantuan a kasuratan, wen, ket ipamatmat bamin dagiti banag nga adda Dios; wen, uray pay ti cdaga, ken amin a banag nga adda iti rabawna, wen, ken ti dpanagpusiposna, wen, ken kasta met amin dagiti eplaneta nga aggunay iti gagangay a langada ti mangpaneknek nga adda Kangatuan a Namarsua.

45 Ket agsursorka kadi pay, a mangallilaw kadagiti puso dagitoy a tao, a paneknekam kadakuada nga awan ti Dios? Ket ilibakmo kadi pay amin dagitoy a saksi? Ket kinunana: Wen, ilibakkonto, malaksid no pakitaannak iti tanda.

46 Ket ita napasamak a kinuna kenkuana ni Alma: Kitaen, maldaanganak gapu iti kinatangken ti pusom, wen, ta pagkedkedam pay laeng ti espiritu ti kinapudno, ta madadaelto ti kararuam.

47 Ngem kitaen, anasaysayaat pay a mapukaw ti kararuam ngem ti sika ti pakaipuonan ti pannakadadael ti adu a kararua, babaen ti panagul-ulbodmo ken babaen dagiti makapatiray-ok a balikasmo; ngarud no libakem pay laeng, kitaen dusaennakanto ti Dios, nga agbalinkanto nga umel, a saanmonton maungap ti ngiwatmo iti kaano man, tapno saanmonton a maallilaw pay dagitoy a tao.

48 Ita kinuna ni Korihor kenkuana: Saanko nga ilibak ti kaadda ti Dios, ngem saanko patien nga adda ti Dios; ket kunak pay, a saanmo ammo nga adda ti Dios; ket malaksid no pakitaannak iti tanda, saankonto a patien.

49 Ita kinuna ni Alma kenkuana: Daytoy ti itedko kenka a kas tanda, ta aagbalinka nga umel, sigun kadagiti balikasko; ket kunak, nga iti nagan ti Dios, agbalinka nga umel, tapno saankan a makapagbalikas.

50 Ita idi maisao ni Alma dagitoy a balikas, nagbalin nga umel ni Korihor, ta saanen a makapagsao, sigun kadagiti balikas ni Alma.

51 Ket ita idi nakita ti pangulo nga ukom daytoy, inaramatna ti imana a nagsurat ken ni Korihor, a kinunana: Nakombinsirka kadin iti bileg ti Dios? Asino ti tarigagayam a pangipakitaan ni Alma iti tandana? Kayatmo kadi a dangranna dagiti sabali, tapno maipakitana kenka ti tanda? Kitaen, naipakitana kenkan ti tanda; ket ita suppiatem kadi pay?

52 Ket insagana ni Korihor ti imana a nagsurat, a kinunana: Ammok nga umelak, agsipud ta saanak a makapagsao; ken ammok nga awan ti sabali malaksid iti bileg ti Dios a makaaramid kaniak daytoy; wen, ken aammok a kankanayon nga adda iti Dios.

53 Ngem kitaen, ainallilawnak ti sairo; agsipud ta bnagparang kaniak iti langa ti anghel, ket kinunana kaniak: Mapanka ket pasubliem dagitoy a tao, agsipud ta nayawawanda amin iti panangsurotda iti saan nga am-ammo a Dios. Ket kinunana kaniak: cAwan ti Dios; wen, ket insurona kaniak ti rumbeng a sawek. Ket insurok dagiti balikasna; ket insurok ida agsipud ta makaay-ayoda iti dnainlubongan a panunot; ket insurok ida, uray pay nga agingga a nagballigiak, isu nga agpayso a patiek a pudnoda; ket iti daytoy a gapu dinaerak ti kinapudno, agingga a naalak daytoy nakaro a lunod kaniak.

54 Ita idi maisaona daytoy, dinawatna nga agkararag ni Alma iti Dios, tapno bareng no maikkat ti lunod kenkuana.

55 Ngem kinuna kenkuana ni Alma: No maikkat daytoy a lunod kenka allilawemto manen ti puspuso dagitoy a tao; ngarud, agtalinaed kenka a kas iti pagayatan ti Apo.

56 Ket napasamak a saan a naikkat ken ni Korihor ti lunod; ngem napapanaw, ket napan namalaybalay nga agdawat iti kanenna.

57 Ita naiwaras a dagus ti pannakaammo iti napasamak ken ni Korihor iti intero a daga; wen, imbilin ti kangatuan nga ukom ti pannakaiwaragawag kadagiti amin a tao iti daga, a naiwaragawag kadagiti namati kadagiti balikas ni Korihor a dagdagusenda ti agbabawi, wenno maipaay met kadakuada iti isu met laeng a pangngeddeng.

58 Ket napasamak a nakombinsirda amin iti kinadakes ni Korihor; ngarud namalbaliwda manen amin iti Apo; ket daytoy ti naggibusan ti kinadangkes iti wagas ni Korihor. Ket namalaybalay ni Korihor, nga agpalpalama iti taraonna.

59 Ket napasamak nga iti panagsursorna kadagiti tattao, wen, kadagiti tattao a simmina kadagiti Nephita ken nangawag iti bagbagida iti Zoramita, nga indauluan ti tao nga agnagan iti Zoram—ket iti pannakipulapolna kadakuada, kitaen, nadungpar ken naibaddebaddek, nga agingga a natay.

60 Ket iti kasta makitatayo ti paggibusan ti mangballikug kadagiti wagas ti Apo; ket iti kasta makitatayo a ti asairo saanna a bsuportaran dagiti annakna iti maudi nga aldaw, ngem sipapardas a guyodenna ida nga agpababa iti cimpierno.