1 Ao e koro bukina bwa a waaki nako, ma ni kabwarabwara ana taeka te Atua nakoia aomata, n rin i nanon aia tinakaoke, ao i nanon mwengaia; eng, ao a bon kabwarabwara naba te taeka i nanon te kawai.

2 Ao e koro bukina bwa i mwin aia mwakuri korakora i buakoia, ao e nakoraoi aia waaki i buakoia te koraki n aomata ake a ^akainnano; bwa nooria, a teweaki nako man taian tinakaoke ibukin aki tamaroan kunnikaia.

3 Ngaia are aki kariaiakaki bwa a na rin i nanon aia tinakaoke bwa a na taromauria te Atua, bwa a taraaki bwa a kammaira; ngaia are a kainnano; eng, a taraaki irouia tariia bwa akea bongaia; ngaia are a ^akainnano ni bwain te aonaba; ao a kainnano naba inanoia.

4 Ao ngkanne, ngke Aramwa e a reirei man taetae ni kawai nakoia aomata n te tabuki are Onita, ao a roko aomata aika a uanao nakoina, ake bon naake ti taekinia, ake a ^akainnano inanoia, ibukin aki kaubwaia ni bwain te aonaba.

5 Ao a roko nakon Aramwa; ao temanna are te kabanea ni kakannato mai i buakoia e taku nakoina: Nooria, ^ateraa ae a na karaoia tariu aikai, bwa a ribaki irouia aomata nako ibukin aki kaubwaia, eng, ao moaraara riki irouia ara ibonga; bwa a tia n ^bteweira nako man ara tinakaoke are ti a tia ni korakai ni mwakuri bwa ti na katei n oin baira; ao a tia n teweira nako ibukin rianakon aki kaubwaira; ao akea ara tabo n taromauria Atuara; ao nooria, ^cteraa ae ti na karaoia?

6 Ao ngkai, ngke Aramwa e ongo aio, e rairaki, ma ni kaitaraa moana nakoina ngkekei naba, ao e nooria ma te kimwareirei ae korakora; bwa e nooria bwa ^akarawawatakia e a bon tia ni ^bkananorinanoia, ao a ^ctauraoi n ongoraeakina te taeka.

7 Ngaia are e toki ana taetae nakoia aomata ake a uanao; ma e arora baina, man tang nakoia ake e nooria, bwa a bon nanomaraki raoi, ao e taku nakoia:

8 I nooria, bwa kam ^ananorinano inanomi; ao ngkana ngaia anne, kam na kakabwaiaki.

9 Nooria tarimi e kangai, Teraa ae ti na karaoia?—bwa ti teweaki nako mai nanon ara auti n nebo, ao ti aki kona n taromauria Atuara.

10 Nooria I taku nakoimi, kam kataua bwa kam aki kona n ^ataromauria te Atua ma ti i nanon ami auti n nebo?

11 Ao moaraa riki, N na titirakiningkami, kam kataua bwa kam riai n taromauria te Atua ti te taina n te wiiki?

12 I taku nakoimi, e raoiroi ngkai kam teweaki nako man ami tinakaoke bwa kam aonga n nanorinano ao bwa kam aonga ni karekea te ^awanawana; bwa e riai bwa kam na karekea te wanawana; bwa ibukina kam teweaki nako, ao kam ribaki irouia tarimi ibukin rianakon ^baki kaubwaimi, ae ngaia ae kam a karekea te nano rinano n nanomi; bwa kam a kananorinanoaki.

13 Ao ngkanne, ibukina bwa kam a kairoroaki bwa kam na nanorinano kam na kakabwaiaki; bwa n tabetai te aomata ngkana e kairoroaki bwa e na nano rinano, ao e ukora te rairannano; ao ngkai e koaua, bwa ane e rairananona e na karekea te nanoangaaki; ao ane e kunea te nanoangaaki man ^ateimatoa n uaa te toki ao e na bon kamaiuaki.

14 Ao ngkai, n aron are I taku nakoimi, ibukina bwa kam a kairoroaki bwa kam na nanorinano kam a kakabwaiaki, kam aki kataua bwa a kakabwaiaki riki ake a bon kananorinanoia ibukin te taeka?

15 Eng, ane e kananorinanoa raoi, man rairananona man ana bure, ma n teimatoa n uaa te toki, ao e na bon kakabwaiaki—eng, e na kakabwaiaki riki nakoia ake a kairoroaki bwa a na nano rinano ibukin rianakon aki kaubwaia.

16 Ngaia are, a na kakabwaiaki ake a ^akananorinanoia ma n aki kairoroaki bwa a na nanorinano; ke n taeka riki tabeua, e na kakabwaiaki te aomata are e kakoaua ana taeka te Atua, ma ni bwabetitoaki n akea matoatoan nanona, eng, n aki kairaki bwa e na ataa te taeka, ke ni kairoroaki bwa e na ataia, i mwaain ae a na kakoaua.

17 Eng, a mwaiti ake a taku: Ngkana ko kaota nakoira te ^akanikina mai karawa, ao ngkanne ti na ataia ma te koaua raoi; ao ngkanne ti na kakoaua.

18 Ao ngkanne I titiraki, aio te onimaki? Nooria, I taku nakoim, Tiaki; bwa ngkana te aomata e ataa te bwai ao bon akea bukina bwa e na ^akakoaua, bwa e bon ataia.

19 Ao ngkanne, ai mwaitira riki maraian te aomata are e ^aataa nanon te Atua ao e aki karaoia, nakon are e bon ti kakoaua, ke iai bukin kakoauana, ao e bwaka n riaoan te tua?

20 Ao ngkanne te bwai aei kam na baireia. Nooria, I taku nakoimi, aio bwa e mena n te itera are teuana n aron naba te itera are teuana; ao e na baireaki nakon te aomata n aron ana mwakuri.

21 Ao ngkai n aron are I taku ni kaineti ma te onimaki—te ^aonimaki bon tiaki karekean te ataibwai ae kororaoi ibukin bwaai nako; ngaia are ngkana iai am onimaki ko ^bkantaningai bwaai aika ^caki nooraki, aika a koaua.

22 Ao ngkai, nooria, I taku nakoimi, I tangiria bwa kam na uringnga, bwa te Atua e nanoanga nakoia ni kabane ake a kakoaua arana; ngaia are e tangiria, n te moan tai, bwa kam na kakoaua, eng, ana taeka naba.

23 Ao ngkai, e kanakoa ana taeka irouia ana anera nakoia mwaane, eng, ^atiaki ti mwaane ma aine naba. Ma tiaki ti aio; ^bataei naba aika a uarereke a bon karekea naba te taeka are a anganaki ni mwaitin te tai, are a kaminoa nanoia naake a wanawana man rabakau.

24 Ao ngkai, tariu aika kam tangiraki, ngkai kam a tia n tangiria bwa kam na ataia mai irou bwa teraa ae kam na karaoia ibukina bwa kam karawawataki man teweaki nako—ngkanne I aki tangiria bwa kam na kataua inanomi bwa N na motika taekami ni kaineti ma te bwai are e koaua—

25 Bwa I aki kananonaa bwa ngkami ni kabane kam kairoroaki bwa kam na kananorinanoingkami; bwa I kakoaua bwa iai tabemwaang ake a na kona ni kananorinanoia, e ngae ngke enga te itera ake a mena iai.

26 Ao ngkanne, n aron are I taku ni kaineti ma te onimaki—bwa bon tiaki te atatai ae kororaoi—ao ai aekan naba au taeka. Kam aki kona n ataa koauaia n te moan tai, n ae kororaoi, nakon ae kam na ataia bwa te onimaki bon te atatai ae kororaoi.

27 Ma nooria, ngkana kam kauti matami ma ni kamwakuri ami konabwai, ma ni kakatai iaon au taeka, ma ni kamwakura teutana te onimaki, eng, e ngae ngke akea te bwai ae kam ^atangiria bwa kam ti kan kakoaua, kamwakura te nano aio inanomi, ni karokoa ae kam kakoaua n te aro ae e a kona n reke nnen teutana au taeka.

28 Ngkai, ti na kabootaua te taeka ma te ^akoraa. Ao ngkanne, ngkana ti angan te ^bkoraa nnena, bwa e na unikaki ^cinanom, nooria, ngkana bon te koraa ni koaua, ke te koraa ae raoiroi, ngkana ko aki tewenakoa n am ^dkakewekewe, bwa kam na kaitaraa Tamnein te Uea, nooria, e na bon rikirake inanom; ao ngkana ko namakini namakin aika a kakamwakuri, kam na kangai inanomi—E na bon riai bwa te koraa ae raoiroi aio, ke bwa e raoiroi te taeka, bwa e moanna ni kabubura tamneiu; eng, e moanna ni kaota riki ^eootau, eng, e moanna ni kangkang irou.

29 Ngkai nooria, tiaki bwa e na karikirakea am onimaki aio? I taku nakoimi, Eng; ma e ngae n anne e bon tuai n rikirake bwa te atatai ae kororaoi.

30 Bwa nooria, ngkana e rikirake te koraa, ma ni bwebwerake, ma ni moanna ni maiu, ngkanne ko riai n taekinna bwa e raoiroi te koraa; bwa nooria e rikirake, ma ni bwebwerake, ma ni moanna n maiu. Ao ngkai, nooria, tiaki bwa e na kamatoatoa am onimaki aio? Eng, e na bon kamatoatoa am onimaki: bwa ko na kangai I ataia bwa te koraa ae raoiroi aio; bwa nooria e bwebwerake ao e moanna ni maiu.

31 Ao ngkai, nooria, ko koaua raoi bwa te koraa ae raoiroi aio? I kangai nakoim, Eng; bwa ni kabane taian koraa a karika ae bon ^aaekakiia.

32 Ngaia are, ngkana e maiu te koraa e bon raoiroi, ma ngkana e aki maiu, nooria e bon aki raoiroi, ngaia are e teweaki nako.

33 Ao ngkai, nooria, ibukina bwa kam a tia ni kata te kakatai, man unika te koraa, ao e rikirake ma ni bwebwerake, ma ni moanna ni maiu, ko na bon ataia bwa e raoiroi te koraa.

34 Ao ngkai, nooria, e kororaoi ami ^aatatai? Eng, e kororaoi ami atatai n te bwai anne, ao ami ^bonimaki a matu; ao aio ibukina bwa kam ataia, bwa kam ataia bwa te taeka e a rikirake inanomi, ao kam ataia naba bwa e a tia ni bwebwerake, bwa ootami e a moanna ni kaotaki riki, ao ami ^ciango e a karababaki.

35 O ngkanne, tiaki bwa e koaua aio? I kangai nakoimi, Eng, ibukina bwa e ^aoota; ao te bwai ae e oota, e raoiroi, ibukina bwa ko kona n ataia, ngaia are ko na riai n ataia bwa e raoiroi; ao ngkai nooria, i mwin ae kam a tia n noora kangkangin te oota aio e a kororaoi ami atatai?

36 Nooria I kangai nakoimi, Tiaki; ao kam na aki naba kanakoa ami onimaki, bwa kam a tibwa kamwakura ami onimaki n unika te koraa bwa kam na kataa te kakatai bwa kam kan ataia bwa e raoiroi te koraa.

37 Ao nooria, ngkana e rikirake te koraa, kam na kangai: Ti na kamwarakea raoi man tararuaia raoi, bwa e aonga ni wakaa, bwa e na maiu, ma ni kariki uaa nakoira. Ao ngkanne nooria, ngkana ko kamwarakea raoi man tararuaia raoi e na karekea wakaana, ma ni maiu, ma ni karika uaana.

38 Ma ngkana ko ^amwanuokina te kai, man aki iangoa kamwarakeana, nooria e na bon aki reke wakaana; ao ngkana e roko kabuebuen taai ma ni kabuekia, ibukina bwa akea wakaana e na bon rai, ao ko na routia man tewenakoa.

39 Ngkai, tiaki bukina bwa e aki raoiroi te koraa, ao tiaki naba bwa uaana e aki tangiraki; ma bon ibukina bwa e aki kona ni kariki uaa ami ^atano, ao kam bon aki kamwarakea te kai, ngaia are kam aki kona ni karekea uaana.

40 Ao ngaia are, ngkana kam aki kamwarakea te taeka, n ingainga ma te mata n onimaki nakon uaana, kam bon aki kona ni kinika uaan te ^akai ni kamaiu.

41 Ma ngkana kam kamwarakea te taeka, eng, kamwarakea te kai ngkana e waaki ni maiu, n ami onimaki ma te botumwaaka ae korakora, ma te ^ataotaonannano, n ingaingan nakon uaana, ao e na bon karika wakaana; ao nooria e na riki bwa te kai ae ^bbwebwerake nakon te maiu ae aki totoki.

42 Ao ibukin ami ^abotumwaaka ma ami onimaki ma ami taotaonannano nakon te taeka ni kamwarakeana, bwa e aonga ni wakaa inanomi, nooria, n te tai ae aki maan kam na kinika ^buaana, are bon moan te kakawaki, are e karewerewe riki nakon bwaai aika a karewerewe, ao e mainaina riki iaon bwaai ni kabane aika a mainaina, eng, man itiaki riki iaon bwaai ni kabane aika a itiaki; ao kam na amwarake n te uaa aei ni karokoa ae kam a nuai, bwa kam aonga n aki baki, man aki taka naba.

43 Ao ngkanne, tariu, kam na ataa kanuangan ami onimaki, ma ami botumwaaka, ma ami taotaonannano, ma taonan nanomi n te tai ae maan, n tataninga te kai bwa e na kariki uaa nakoimi.