1 Ket napasamak a napanda, ket rinugianda nga inkasaba ti balikas ti Dios kadagiti tattao, simrekda kadagiti sinagogada, ken kadagiti balbalayda; wen, ken inkasabada ti balikas uray iti kalkalsada.

2 Ket napasamak a kalpasan ti adu a panagbannogda kadakuada, nangrugi a nagsagrapda iti balligi kadagiti ummong dagiti ^anapanglaw a tattao; gapu ta kitaen, naparuarda kadagiti sinagoga agsipud iti kinanumo ti kawesda—

3 Ngarud saanda a napalubosan a sumrek kadagiti sinagogada nga agdayaw iti Dios, ta imbilangda a kas kinarugit; ngarud napanglawda; wen imbilangna ida dagiti kabsatda a kas rugit; ngarud ^anapanglawda kadagiti banag iti lubong; ken kasta met a napanglawda pay iti puso.

4 Ita, bayat a mangisursuro ken agsasao ni Alma kadagiti tattao iti tuktok ti turod Onidah, adda dakkel a bunggoy nga immasideg kenkuana, nga isuda dagiti sarsaritaenmi, a ^anapanglaw ti puso, gapu iti kinapanglawda iti bambanag iti lubong.

5 Ket immasidegda ken ni Alma; ket kinuna ti dadauloda kenkuana: Kitaen, ^aania ti aramiden dagitoy a kakabsatko, agsipud ta mauy-uyawda kadagiti amin a tao gapu iti kinapanglawda, wen, ken nangnangruna dagiti saserdotemi; agsipud ta ^bpinapanawdakami manipud iti sinagogami a nagbannoganmi kadagiti bukodmi nga ima; ket pinapanawdakami gapu iti nalabes a kinapanglawmi; ket awan ti lugar a pagdaydayawanmi iti Diosmi; ket kitaen, ^cania ti aramidenmi?

6 Ket ita idi nangngeg ni Alma daytoy, timmaliaw, a sinangona a dagus, ket naimatanganna iti naindaklan a rag-o; agsipud ta naimatanganna a pudno a dagiti ^apanagrigatda ket ^bpinagpakumbabana ida, ket ^csisasaganadan a dumngeg iti balikas.

7 Ngarud awanen ti naisaona kadagiti dadduma nga ummong; ngem inyunnatna ti imana, ket impukkawna kadagiti nakitana, a pudno a nagbabawi, ket kinunana kadakuada:

8 Makitak a ^anapakumbaba ti pusoyo; ket no kasta, nagasatkayo.

9 Kitaen kinuna ti kabsatyo, Ania ti aramidenmi?—agsipud ta napapanawkami kadagiti sinagogami, isu a saankami a makapagdaydayaw iti Dios.

10 Kitaen kunak kadakayo, pagarupenyo kadi a saankayo a ^amakapagdaydayaw iti Dios malaksid laeng kadagiti sinagogayo?

11 Ket kasta met, kayatko a saludsoden, pagarupenyo kadi a nasken a dayawenyo ti Dios a mamimpinsan iti makalawas laeng?

12 Kunak kadakayo, nasayaat ta napapanawkayo kadagiti sinagogayo, tapno agpakumbabakayo, ken tapno maadalyo ti ^apagsiriban; agsipud ta kasapulan nga adalenyo ti pagsiriban; ket gapu iti pannakapapanawyo, nga uy-uyawendakayo dagiti kakabsatyo gapu iti nalabes a ^bkinapanglawyo, a nagpakumbaba ti puspusoyo; gapu ta kasapulan a mapagbalinkayo a napakumbaba.

13 Ket ita, nagasatkayo ta napilitkayo nga agpakumbaba; agsipud ta ti tao no dadduma, no mapilit nga agpakumbaba, birokenna ti agbabawi; ket ita pudno, masarakanto ti siasino man nga agbabawi ti kaasi; ket maisalakanto ti siasino man a mangsapul iti kaasi ken ^aagibtur agingga iti panungpalan.

14 Ket ita, kas naibagakon kadakayo, a nabendisionankayo gapu ta napilitkayo nga agpakumbaba, saanyo kadi a pagarupen a nagasgasat dagiti pudno a mangipakumbaba iti bagbagida gapu iti balikas?

15 Wen, nagasat ti pudno a nangipakumbaba iti bagina, ken nagbabawi kadagiti basolna, ken nagibtur agingga iti panungpalan—wen, nagasgasat pay ngem dagiti napilit nga agpakumbaba gapu iti nalabes a kinapanglawda.

16 Ngarud, nagasat dagiti ^amangipakumbaba iti bagbagida a saan a napilit nga agpakumbaba; wenno, iti sabali a pannao, nagasat ti mamati iti balikas ti Dios, ken nabuniagan nga awan sukir ti pusona, wen, ti saan a napakaammuan iti balikas, wenno uray napilitan a mangammo, sakbay a namatida.

17 Wen, adu dagiti agkunkuna: No ipakitam kadakami ti ^atanda nga aggapu sadi langit, kalpasan dayta maamuanminto ti kinapudnona; kalpasan dayta patienminto.

18 Ita saludsodek, pammati kadi daytoy? Kitaen, kunak kadakayo, Saan; gapu ta no ammo ti tao ti maysa a banag awan ti panggapuanna a ^amamati, agsipud ta ammona daytoy.

19 Ket ita, anian nga ad-adda a mailunod dayta ^amakaammo iti pagayatan ti Dios ngem saanna met nga aramiden daytoy, ngem kenkuana a patien laeng, wenno addaan laeng iti panggapuan a mamati, ket matnag nga aglabsing?

20 Ita ukomenyo daytoy a banag. Kitaen, kunak kadakayo, nga adda iti maysa a kasasaad ket kasta met iti sabali; ket kastanto iti tunggal tao mayannurot iti aramidna.

21 Ket ita kas nasaokon maipapan iti pammati ti—^apammati saan a ti kaadda ti naan-anay a pannakaammo kadagiti banag; ngarud no adda pammatim ^bmangnamnamaka kadagiti banag a ^csaan a makita, ngem pudno.

22 Ket ita, kitaen, kunak kadakayo, ket kayatko a nasken a laglagipenyo, a manangngaasi ti Dios kadagiti amin a mamati iti naganna; ngarud tarigagayanna, kangrunaanna, a mamatikayo, wen, uray iti balikasna.

23 Ket ita, ipakaammona ti balikasna kadagiti tattao babaen kadagiti anghel, wen, ^asaan laeng a dagiti lallaki, ngem kasta met kadagiti babbai. Ita saan laeng a dagitoy; namin-adu a daras met a naikkan dagiti babassit nga ^bubbing kadagiti balikas, a mangburibor kadagiti masirib ken nakaadal.

24 Ket ita, ay-ayatek a kakabsatko, gapu ta tinarigagayanyo a maammuan kaniak no ania ti aramidenyo gapu ta naparigatkayo ken napapanaw—ita saanko a tarigagayan nga ipapanyo a panggepek ti mangeddeng kadakayo a mayannurot laeng iti pudno—

25 Gapu ta saanko kayat a sawen a napilitkayo amin a mangipakumbaba iti bagbagiyo; gapu ta pudno a patiek nga adda sumagmamano kadakayo a mangipakumbaba iti bagbagida, bay-anyo ida no aniaman ti nalabit a kasasaadda.

26 Ita, kas iti nasaokon maipapan iti pammati—a saan a naan-anay a pannakaammo daytoy—kasta met kadagiti balikasko. Saanyo maammuan ti kinapudno iti damo, agpapan iti kinaan-anay, kasta met a saan a naan-anay a pannakaammo ti pammati.

27 Ngem kitaen, no riingen ken bangonenyo dagiti pannakabalin ti pampanunotyo, uray iti maysa a pamadasan dagiti balikasko, ken aramatem ti bassit a pammati, wen, uray no saanyo ^atarigagayan ti ad-adu a panamati, bay-anyo dayta a tarigagay a mangtignay kadakayo, uray pay aginggana a patienyo iti wagas a maikkanyo ti lugar para iti maysa a paset dagiti balikasko.

28 Ita, yarigtayo ti balikas iti maysa a ^abukel. Ita, no ikkanyo ti maysa a ^bbukel iti lugar a pakaimulaanna iti ^cpusoyo, kitaen, no pudno a bukel, wenno nasayaat a bukel, no saanyo ibelleng dayta gapu iti ^dawan a panamatiyo, ta suppiatenyo ti Espiritu ti Apo, kitaen, mangruginto a bumlad iti barukongyo; ket inton mariknayo bumbumlad, rugianyo a kunaen iti bagbagiyo—nasken a nasayaat daytoy a bukel, wenno naimbag ti balikas, gapu ta rugiannan ti mangpadakkel iti kararuak; wen, rugiannan a malawlawagan ti ^epanunotko, wen, mangrugin a nananam kaniak.

29 Ita kitaen, saan kadi a daytoy ti mangnayon iti pammatiyo? Kunak kadakayo, Wen; nupay kasta saan a dimmur-as iti naan-anay a pannakaammo.

30 Ngem kitaen, bayat a bumlad ti bukel, ken agtubo, ken mangrugi a dumakkel, ngarud masapul a kunaenyo a nasayaat ti bukel; agsipud ta kitaen, bimlad, ken nagtubo, ken nangrugi a dumakkel. Ket ita, kitaen, saan kadi a papigsaenna daytoy iti pammatiyo? Wen, papigsaenna ti pammatiyo: agsipud ta kunaenyonto nga ammok a nasayaat daytoy a bukel; agsipud ta kitaen nagtubo ken nangrugi a dumakkel.

31 Ket ita, kitaen, awan duaduayo kadi a nasayaat daytoy a bukel? Kunak kadakayo, Wen; agsipud ta ti tunggal bukel agtaud iti bukodna a ^akakikitana.

32 Ngarud, nasayaat ti bukel no dumakkel, ngem no saan a dumakkel, kitaen, saan a nasayaat, ngarud maibelleng daytoy.

33 Ket ita, kitaen, agsipud ta pinadasyo ti eksperimento, ket inmulayo ti bukel, ket dummakkel ken agsagibsib, ken mangrugi nga agtubo, nasken a kasapulan nga ammoyo a nasayaat ti bukel.

34 Ket ita, kitaen, ti ^apannakaammoyo naan-anay kadi? Wen, naan-anay ti pannakaammoyo maipapan iti dayta a banag, ken ti ^bpammatiyo ket saan a maus-usar; ket gapu ta ammoyo daytoy, gapu ta ammoyo a pinabussog ti balikas dagiti kararuayo, ket ammoyo met a nagtubo daytoy, ta mangrugi a nalawlawagan ti pannakaawatyo, ken ti ^cpanunotyo ket talaga mangrugi a lumawa.

35 O, no kasta, saan kadi a pudno daytoy? Kunak kadakayo, Wen, agsipud ta daytoy ket ^asilaw; ket ania man a lawag, nasayaat, gapu ta mailasin, ngarud masapul nga ammoyo a nasayaat daytoy; ket ita kitaen, kalpasan a napadasanyo daytoy a lawag naan-anay kadi ti pannakaammoyo?

36 Kitaen kunak kadakayo, Saan; wenno saanyo a masapul a tallikudan ti pammatiyo, agsipud ta inusaryo laeng ti pammatiyo a mangimula iti bukel tapno padasenyo ti eksperimento tapno maammuan no nasayaat ti bukel.

37 Ket kitaen, bayat ti panangrugi ti kayo nga agtubo, kunaenyo: Taraonantayo daytoy buyogen ti adu a panangaywan, tapno makaramut, tapno dumakkel, ken agbunga para kadatayo. Ket ita kitaen, no taraonanyo daytoy a buyogen ti adu a panangaywan makaramutto, ket dumakkel, ket agbunga.

38 Ngem no ^abaybay-anyo ti kayo, ken saanyo panunoten ti pannakataraonna, kitaen saanto maaddaan iti aniaman a ramut; ken no dumteng ti pudot iti init ket uramena daytoy, malaylayto gapu ta awan iti ramutna, ket parutenyo ken ibellengyo.

39 Ita, saan a gapu ta saan a nasayaat a bukel daytoy, wenno gapu ta saan a matarigagayan ti bungana; ngem gapu ta ti ^adagayo ket natikag, ken saanyonto a taraonan ti kayo, ngarud saanyo malak-aman ti bungana.

40 Ket iti kasta, no saanyo taraonan ti balikas, a mangnamnama babaen iti mata ti pammati para iti bungana, pulos a saanyo mabalin a mapuros ti bunga ti ^akayo ti biag.

41 Ngem no taraonanyo ti balikas, wen, taraonanyo ti kayo bayat ti panagdakkelna, babaen ti pammatiyo nga addaan iti naindaklan a kinaregta, ken addaan iti ^akinaanus, a mangnamnama iti bungana, agramutto, ket kitaen agbalinto a kayo a ^brumangrangpaya nga agturong iti agnanayon a biag.

42 Ket gapu iti ^akinaregtayo ken ti pammatiyo ken iti kinaanusyo iti panangtaraon iti balikas, tapno agramut kadakayo, kitaen, iti saan a mabayag purosenyonto ti ^bbungana daytoy, nga isu ti kapatgan, nga isu ti kasam-itan iti amin a nasam-it, ken isu ti kapurawan iti amin a puraw, wen, ken puro iti amin a puro; ket agpiestakayo iti daytoy a bunga uray agingga a mapnekkayo, tapno saankayo ​​a mabisin, ken saankayo mawaw.

43 Iti dayta a tiempo, kakabsatko, apitenyonto dagiti gunggona ti pammatiyo, ken ti kinaregtayo, ken kinaanusyo, ken naunday a panagibturyo, nga agur-uray iti kayo nga agbunga para kadakayo.