1 Nao i bin hapen se, afta we Amulek i endem ol toktok ia, oli kamaot long ol pipol mo oli go long graon blong Jerson.

2 Yes, mo ol narafala brata, olgeta tu oli prijim toktok ia long Ol Man blong Soram, mo afta, oli go long graon blong Jerson.

3 Mo i bin hapen se afta we ol bigman blong Ol Man blong Soram oli kam tugeta mo tokbaot ol toktok ia we Alma i bin prijim long olgeta, oli kros from trutok ia, from hem i prapa spolem gud ^agiaman wok blong olgeta; from hemia, oli no wantem blong lisin long ol toktok ia.

4 Mo oli pasem mesej blong karem evri pipol long evri ples oli kam tugeta, mo tokbaot long olgeta ol toktok ia we Alma i bin talemaot.

5 Nao, ol man blong rul blong olgeta mo ol pris blong olgeta mo ol tija blong olgeta oli no bin letem ol pipol oli save wanem oli wantem; from hemia, oli bin faenemaot ol tingting blong ol pipol long wan sikret fasin.

6 Mo i bin hapen se afta we oli faenemaot tingting blong ol pipol, oli sakemaot long kantri olgeta we oli sapotem ol toktok we Alma mo ol brata blong hem oli bin talem; mo oli plante; mo oli kam tu long graon blong Jerson.

7 Mo i bin hapen se Alma mo ol brata blong hem oli tijim olgeta.

8 Nao ol pipol blong Ol Man blong Soram oli bin kros long ol pipol blong Amon we oli stap long Jerson, mo jif man blong rul blong Ol Man blong Soram, hem i wan nogud man, i sendem toktok i go long Ol Man blong Amon se hem i wantem blong oli sakemaot evri Man blong Soram long graon blong olgeta, evriwan we oli kamaot long olgeta mo go long graon blong Ol Man blong Amon.

9 Mo hem i talem plante nogud samting agensem olgeta. Mo nao Ol Man blong Amon oli no fraet long ol toktok blong olgeta; from hemia, oli no sakemaot olgeta, be oli tekem olgeta puaman blong Ol Man blong Soram we oli bin go long olgeta; mo oli ^agivim kaekae long olgeta mo oli givim klos long olgeta, mo oli givim ol graon long olgeta olsem graon we i kam long ol papa; mo oli givhan long olgeta long ol samting we oli wantem.

10 Nao, samting ia i mekem Ol Man blong Soram oli kros agensem Ol Man blong Amon, mo oli stat blong joen wetem Ol Man blong Leman mo blong mekem olgeta tu oli kros agensem olgeta.

11 Mo from hemia, Ol Man blong Soram mo Ol Man blong Leman oli stat blong rere blong faet agensem Ol Man blong Amon, mo tu, agensem Ol Man blong Nifae.

12 Mo olsem ia nao nambaseventin yia blong ol jaj ova long ol pipol blong Nifae i bin finis.

13 Mo Ol Man blong Amon oli aot long graon blong Jerson, mo oli go insaed long graon blong Melek, mo oli livim spes long graon blong Jerson blong ol ami blong Ol Man blong Nifae, blong oli save faet wetem ol ami blong Ol Man blong Leman mo ol ami blong Ol Man blong Soram; mo olsem ia nao wan faet i bin stat bitwin Ol Man blong Leman mo Ol Man blong Nifae, long namba-eitin yia blong rul blong ol jaj; mo bae wan ^ahistri blong ol faet blong olgeta i kamaot afta.

14 Mo Alma, mo Amon, mo ol brata blong tufala, mo tu, tufala boe blong Alma oli gobak long graon blong Sarahemla, afta we oli stap olsem ol tul long ol han blong God blong tekem ^aplante long Ol Man blong Soram oli kam blong sakem sin; mo olgeta evriwan we oli bin kam blong sakem sin, oli ronemaot olgeta long graon blong olgeta; be oli gat ol graon we i kam long ol papa long graon blong Jerson, mo oli tekem ol tul blong faet blong difendem olgeta bakegen, wetem ol waef blong olgeta, mo ol pikinini blong olgeta, mo ol graon blong olgeta.

15 Nao Alma, i bin harem nogud from rabis fasin blong ol pipol blong hem, yes from ol faet, mo ol blad we oli ron, mo ol rao we i stap long medel blong olgeta; mo hem i stap blong talemaot trutok, o God i sendem hem blong talemaot trutok, long ol pipol long evri bigtaon; mo taem hem i luk we hat blong ol pipol i stat blong kam strong, mo oli stat blong ^akros from we trutok ia i strong, nao hat blong hem i harem nogud tumas.

16 From hemia, hem i bin mekem se ol boe blong hem oli mas kam tugeta, blong hem i save givim long wanwan long olgeta, wan afta wan, ^awok we hem i gat long saed blong ol samting blong stret mo gud fasin. Mo mifala i gat wan histri blong ol komanmen blong hem, we hem i bin givim long olgeta folem histri blong hem nomo.