1 Karon nahitabo nga human si Amulek makatapos niini nga mga pulong, mipalayo sila gikan sa pundok sa katawhan ug miadto sa yuta sa Jershon.

2 Oo, ug ang uban sa kaigsoonan, human sila makasangyaw sa pulong ngadto sa mga Zoramita, miadto usab sa yuta sa Jershon.

3 Ug nahitabo nga human magtinambagay ang mas inila nga bahin sa mga Zoramita kabahin sa mga pulong nga gisangyaw ngadto kanila, nangasuko sila tungod sa pulong, kay mibungkag kini sa ilang ^adili maayong binuhatan; busa dili sila mopatalinghog sa mga pulong.

4 Ug nagpadala sila og tawo ug mipundok sa tanang katawhan sa tibuok yuta, ug nangayo og opinyon kanila kabahin sa mga pulong nga gipamulong.

5 Karon ang ilang mga magmamando ug ang ilang mga pari ug ang ilang mga magtutudlo wala motugot nga masayran sa katawhan ang kabahin sa ilang mga tinguha; busa hilom silang nagpakisayod sa mga hunahuna sa tanang katawhan.

6 Ug nahitabo nga human sila masayod sa mga hunahuna sa tanang katawhan, kadtong midapig sa mga pulong nga gipamulong ni Alma ug sa iyang kaigsoonan gihinginlan gikan sa maong yuta; ug daghan sila; ug nangadto usab sila sa yuta sa Jershon.

7 Ug nahitabo nga si Alma ug ang iyang kaigsoonan nangalagad kanila.

8 Karon ang katawhan nga Zoramita nasuko sa katawhan ni Ammon nga didto sa Jershon, ug ang labaw nga magmamando sa mga Zoramita, nga usa ka daotan kaayo nga tawo, mipahibalo ngadto sa katawhan ni Ammon nga nagtinguha nga ilang palayason gikan sa ilang yuta kadtong tanan nga gikan kanila nga mianha sa ilang yuta.

9 Ug militok siya og daghang pagpanghulga batok kanila. Ug karon ang katawhan ni Ammon wala mahadlok sa ilang mga pulong; busa wala sila mosalikway kanila, apan sila midawat sa tanang kabos nga mga Zoramita nga miduol kanila; ug sila ^amiamuma kanila, ug misinina kanila, ug mihatag kanila og mga yuta alang sa ilang kabilin; ug sila mialagad kanila sumala sa ilang mga gikinahanglan.

10 Karon nakapasuko kini sa mga Zoramita batok sa katawhan ni Ammon, ug misugod sila sa pakigsagol sa mga Lamanita ug aron usab masuko sila batok kanila.

11 Ug sa ingon niana ang mga Zoramita ug ang mga Lamanita misugod sa paghimo og mga pagpangandam alang sa gubat batok sa katawhan ni Ammon, ug usab batok sa mga Nephita.

12 Ug sa ingon niana natapos ang ikanapulo ug pito nga tuig sa paghari sa mga maghuhukom sa katawhan ni Nephi.

13 Ug ang katawhan ni Ammon mibiya gikan sa yuta sa Jershon, ug nangadto sa yuta sa Melek, ug mihatag og luna sa Jershon alang sa kasundalohan sa mga Nephita, aron makig-away sila sa kasundalohan sa mga Lamanita ug sa kasundalohan sa mga Zoramita; ug sa ingon niana nagsugod ang usa ka gubat tali sa mga Lamanita ug sa mga Nephita, sa ikanapulo ug walo nga tuig sa paghari sa mga maghuhukom; ug usa ka ^aasoy sa ilang mga gubat ihatag human niini.

14 Ug si Alma, ug si Ammon, ug ang ilang kaigsoonan, ug usab ang duha ka anak ni Alma nga lalaki mibalik sa yuta sa Zarahemla, human mahimong mga instrumento sa mga kamot sa Dios sa pagdala og ^adaghan nga Zoramita ngadto sa paghinulsol; ug ingon ka daghan sa nadala sa paghinulsol gipapahawa gikan sa ilang yuta; apan sila adunay mga yuta alang sa ilang kabilin sa yuta sa Jershon, ug mikuha sila og mga hinagiban aron sa pagpanalipod sa ilang mga kaugalingon, ug sa ilang mga asawa, ug mga anak, ug sa ilang mga yuta.

15 Karon si Alma, nga magul-anon tungod sa kadaotan sa iyang katawhan, oo tungod sa mga gubat, ug mga pagpaagas sa dugo, ug sa mga panagbingkil nga anaa taliwala kanila; ug tungod kay nakapahayag na sa pulong, o gipadala aron sa pagsangyaw sa pulong, taliwala sa tanang katawhan sa matag siyudad; ug nagtan-aw nga ang mga kasingkasing sa katawhan misugod sa pagkatig-a, ug nga sila misugod sa ^apagkasilo tungod sa pagkahigpit sa pulong, ang iyang kasingkasing nagmasulub-on sa hilabihan.

16 Busa, misugo siya nga ang iyang mga anak nga lalaki magpundok, aron makahatag siya sa matag usa kanila sa iyang ^akatungdanan, sa tinagsa-tagsa, mahitungod sa mga butang kabahin sa pagkamatarong. Ug kami adunay asoy sa iyang mga sugo, nga iyang gihatag kanila sumala sa iyang kaugalingon nga talaan.