1 Ita napasamak a kalpasan ti panagpatingga ni Amulek kadagitoy a balikas, pimmanawda manipud iti ummong ti tattao ket immayda iti daga ti Jershon.

2 Wen, ket dagiti dadduma pay a kakabsat, kalpasan ti panangikasabada iti balikas kadagiti Zoramita, immayda met iti daga ti Jershon.

3 Ket napasamak a kalpasan a nagsasarita ti nalatlatak a paset dagiti Zoramita ti maipapan kadagiti balikas a naikasaba kadakuada, nakapungtotda gapu iti balikas, gapu ta dinadaelna ti ^asaan a nalinteg a trabahoda; ngarud nagkedkedda a dumngeg kadagiti balikas.

4 Ket nangibaonda iti mensahero ket inummongda a sangsangkamaysa dagiti amin a tattao iti intero a daga, ket nakisaritada kadakuada maipanggep kadagiti balikas a naisao.

5 Ita saan nga impakaammo kadagiti tattao dagiti agtuturayda ken dagiti papadida ken dagiti mannursuroda ti maipapan kadagiti tarigagayda; ngarud naammuanda a sililimed ti panunot dagiti amin a tattao.

6 Ket napasamak a kalpasan a naammuanda ti panunot dagiti amin a tattao, napapanaw manipud iti daga dagidiay pabor kadagiti balikas nga insao ni Alma ken dagiti kakabsatna; ket aduda; ket napanda met iti daga ti Jershon.

7 Ket napasamak a nagministro kadakuada ni Alma ken dagiti kabsatna.

8 Ita, nakapungtot dagiti tattao dagiti Zoramita kadagiti tattao ti Ammon nga adda idiay Jershon, ket ti pangulo nga agturay kadagiti Zoramita, gapu ta maysa a dakes unay a tao, nangibaon kadagiti tattao ni Ammon a tarigagayanna a papanawen iti dagada amin dagidiay immay manipud kadakuada.

9 Ket adu ti inyebkasna a pamutbuteng maibusor kadakuada. Ket ita saan a kinabuteng dagiti tattao ni Ammon dagiti balikasda; ngarud saanda pinapanaw ida, ngem inawatda amin dagiti napanglaw a Zoramita nga immay kadakuada; ket ^atinaraonanda ida, ken kinawesanda ida, ken inikkanda ida iti dagdaga a tawidda; ket nagministroda kadakuada sigun kadagiti kayatda.

10 Ita daytoy ti nangsugsog kadagiti Zoramita nga agpungtot kadagiti tattao ni Ammon, ket rinugianda ti nakilaok kadagiti Lamanita ket sinugsoganda met ida nga agpungtot maibusor kadakuada.

11 Ket gapu iti daytoy nangrugi nga agsagana a makigubat dagiti Zoramita ken dagiti Lamanita maibusor kadagiti tattao ni Ammon, ken kasta met maibusor kadagiti Nephita.

12 Ket kasta ti naggibusan ti maikasangapulo ket pito a tawen a panangituray dagiti ukom kadagiti tattao ni Nephi.

13 Ket pimmanaw dagiti tattao ni Ammon iti daga ti Jershon, ket immayda iti daga ti Melek, ket nangtedda iti lugar iti daga ti Jershon para kadagiti soldado dagiti Nephita, tapno makilabanda kadagiti soldado dagiti Lamanita ken dagiti soldado dagiti Zoramita; ket iti kasta nangrugi ti gubat iti nagbaetan dagiti Lamanita ken dagiti Nephita, iti maikasangapulo ket walo a tawen a panagturay dagiti ukom; ket maitedto ti ^asalaysay maipapan kadagiti gubgubatda kalpasan daytoy.

14 Ket nagsubli ni Alma, ken ni Ammon, ken dagiti kakabsatda, ken kasta met dagiti dua a lallaki nga annak ni Alma iti daga a Zarahemla, kalpasan a nagbalinda nga instrumento kadagiti ima ti Dios a mangiyeg iti ^aadu a Zoramita iti panagbabawi; ket kas kaadu dagiti naiyeg iti panagbabawi ti napapanawda iti dagada; ngem addaanda kadagiti daga a tawidda iti daga ti Jershon, ket innalada dagiti armas a mangsalaknib iti bagbagida, ken dagiti assawada, ken annakda, ken dagiti dagdagada.

15 Ita nagladingit ni Alma, gapu iti kinadakes dagiti taona, wen gapu iti gubgubat, ken dagiti pammapatay, ken dagiti panagsususik nga adda kadakuada; ken gapu ta napan a nangideklara iti balikas, wenno nangibaon ti mangideklara iti balikas, kadagiti amin a tattao iti tunggal siudad; ket iti pannakakitana a nangrugin nga agbalin a natangken dagiti puspsuso dagiti tattao, ken ta nangrugin a ^anasairda gapu iti kinainget ti balikas, nalabes ti panagladingit ti pusona.

16 Ngarud, imbilinna a masapul a maummong a sangsangkamaysa dagiti lallaki nga annakna, tapno saggaysa a maikkanna ti tunggal maysa iti ^arebbengen, ti maipanggep kadagiti bambanag a maipapan iti kinalinteg. Ket adda kadakami ti salaysay kadagiti bilbilinna, nga intedna kadakuada sigun iti bukodna a kasuratan.