ພຣະ​ຄຳ​ພີ
ແອວມາ 36


ຄຳ​ສັ່ງ​ຂອງ​ແອວມາ​ແກ່​ຮີ​ລາ​ມັນ​ລູກ​ຊາຍ​ຂອງ​ເພິ່ນ.

ມີ​ຢູ່​ໃນ​ບົດ​ທີ 36 ແລະ 37.

ບົດ​ທີ 36

ແອວມາ​ບອກ​ຮີ​ລາ​ມັນ​ໃຫ້​ຮູ້​ວ່າ ເພິ່ນ​ໄດ້​ປ່ຽນ​ໃຈ​ເຫລື້ອມ​ໃສ​ຫລັງ​ຈາກ​ໄດ້​ເຫັນ​ທູດ—ເພິ່ນ​ໄດ້​ທົນ​ຕໍ່​ຄວາມ​ເຈັບ​ປວດ​ຂອງ​ຈິດ​ວິນ​ຍານ​ທີ່​ອັບ​ປະ​ໂຫຍດ; ເພິ່ນ​ໄດ້​ເອີ້ນ​ຫາ​ພຣະ​ນາມ​ຂອງ​ພຣະ​ເຢຊູ ແລະ ໄດ້​ເກີດ​ໃໝ່​ຈາກ​ພຣະ​ເຈົ້າ—ຈິດ​ວິນ​ຍານ​ຂອງ​ເພິ່ນ​ເຕັມ​ໄປ​ດ້ວຍ​ຄວາມ​ສຸກ​ອັນ​ຫວານ​ຊື່ນ—ເພິ່ນ​ໄດ້​ເຫັນ​ເຫລົ່າ​ທູດ​ສັນ​ລະ​ເສີນ​ພຣະ​ເຈົ້າ—ຜູ້​ປ່ຽນ​ໃຈ​ເຫລື້ອມ​ໃສ​ຢ່າງ​ຫລວງ​ຫລາຍ​ໄດ້​ຊີມ​ລົດ​ຊາດ ແລະ ໄດ້​ເຫັນ​ຄື​ກັນ​ກັບ​ເພິ່ນ​ໄດ້​ຊີມ ແລະ ໄດ້​ເຫັນ. ປະ​ມານ 74 ປີ ກ່ອນ ຄ.ສ.

1 ລູກ​ຂອງ​ພໍ່ ຈົ່ງ​ຟັງ​ຄຳ​ເວົ້າ​ຂອງ​ພໍ່; ເພາະ​ວ່າ​ພໍ່​ຈະ​ສາບານ​ກັບ​ລູກ​ວ່າ, ຕາບ​ໃດ​ທີ່​ລູກ​ຈະ​ຮັກ​ສາ​ພຣະ​ບັນ​ຍັດ​ຂອງ​ພຣະ​ເຈົ້າ ລູກ​ຈະ​ຮຸ່ງ​ເຮືອງ​ຢູ່​ໃນ​ແຜ່ນ​ດິນ.

2 ພໍ່​ຢາກ​ໃຫ້​ລູກ​ເຮັດ​ດັ່ງ​ທີ່​ພໍ່​ໄດ້​ເຮັດ​ມາ​ແລ້ວ, ໃນ​ການ​ລະ​ນຶກ​ເຖິງ​ການ​ເປັນ​ຊະ​ເລີຍ​ຂອງ​ບັນ​ພະ​ບຸ​ລຸດ​ຂອງ​ພວກ​ເຮົາ; ເພາະ​ພວກ​ເຂົາ​ເຫລົ່າ​ນັ້ນ​ຢູ່​ໃນ​ຄວາມ​ເປັນ ທາດ, ແລະ ບໍ່​ມີ​ຜູ້​ໃດ​ຈະ​ປົດ​ປ່ອຍ​ພວກ​ເຂົາ​ໄດ້ ນອກ​ຈາກ ພຣະ​ເຈົ້າ​ຂອງ​ອັບ​ຣາ​ຮາມ, ແລະ ພຣະ​ເຈົ້າ​ຂອງ​ອີ​ຊາກ, ແລະ ພຣະ​ເຈົ້າ​ຂອງ​ຢາໂຄບ, ແລະ ພຣະ​ອົງ​ໄດ້​ປົດ​ປ່ອຍ​ພວກ​ເຂົາ​ເຫລົ່າ​ນັ້ນ​ອອກ​ຈາກ​ຄວາມ​ທຸກ​ຂອງ​ພວກ​ເຂົາ​ຢ່າງ​ແນ່​ນອນ.

3 ແລະ ບັດ​ນີ້, ໂອ້ ຮີ​ລາ​ມັນ​ລູກ​ຂອງ​ພໍ່, ຈົ່ງ​ເບິ່ງ, ລູກ​ຍັງ​ໜຸ່ມ​ແໜ້ນ​ຢູ່, ແລະ ສະນັ້ນ, ພໍ່​ຈຶ່ງ​ວິງ​ວອນ​ລູກ​ໃຫ້​ຟັງ​ຄຳ​ເວົ້າ​ຂອງ​ພໍ່ ແລະ ຮຽນ​ຮູ້​ຈາກ​ພໍ່; ເພາະ​ພໍ່​ຮູ້​ວ່າ​ຜູ້​ໃດ​ກໍ​ຕາມ​ທີ່​ໄວ້​ວາງ​ໃຈ​ໃນ​ພຣະ​ເຈົ້າ, ຜູ້​ນັ້ນ​ຈະ​ໄດ້​ຮັບ​ການ​ອູ້ມ​ຊູ​ໃນ ເວລາ​ຂັດ​ສົນ​ຂອງ​ພວກ​ເຂົາ, ແລະ ຄວາມ​ຫຍຸ້ງ​ຍາກ​ຂອງ​ພວກ​ເຂົາ, ແລະ ຄວາມ​ທຸກ​ຂອງ​ພວກ​ເຂົາ, ແລະ ພວກ​ເຂົາ​ຈະ​ຖືກ ຍົກ​ຂຶ້ນ​ໃນ​ວັນ​ສຸດ​ທ້າຍ.

4 ແລະ ພໍ່​ບໍ່​ຢາກ​ໃຫ້​ລູກ​ຄິດ​ວ່າ ພໍ່ ຮູ້​ຈັກ​ຈາກ​ຕົນ​ເອງ—ບໍ່​ແມ່ນ​ຈາກ​ທາງ​ໂລກ ແຕ່ຈາກ​ທາງ​ວິນ​ຍານ, ບໍ່​ແມ່ນ​ຈາກ​ຈິດ​ໃຈ​ອັນ​ເປັນ ກາມ​ມະ​ລົມ ແຕ່​ຈາກ​ພຣະ​ເຈົ້າ.

5 ບັດ​ນີ້, ຈົ່ງ​ເບິ່ງ, ພໍ່​ເວົ້າ​ກັບ​ລູກ​ວ່າ, ຖ້າ​ຫາກພໍ່​ບໍ່​ໄດ້ ເກີດ​ຈາກ​ພຣະ​ເຈົ້າ​ແລ້ວ ພໍ່​ຈະ ບໍ່​ຮູ້​ຈັກ​ເລື່ອງ​ເຫລົ່າ​ນີ້​ເລີຍ; ແຕ່​ວ່າ​ໂດຍ​ປາກ​ຂອງ​ທູດ​ຜູ້​ບໍ​ລິ​ສຸດ​ຂອງ​ພຣະ​ອົງ, ພຣະ​ເຈົ້າ​ຈຶ່ງ​ເຮັດ​ໃຫ້​ເລື່ອງ​ເຫລົ່າ​ນີ້​ເປັນ​ທີ່​ຮູ້​ຈັກ​ແກ່​ພໍ່, ບໍ່​ແມ່ນ​ວ່າ​ຈາກ ການ​ມີ​ຄ່າ​ຄວນ​ອັນ​ໃດ​ຂອງ​ພໍ່;

6 ເພາະວ່າພໍ່​ໄດ້​ທ່ອງ​ທ່ຽວ​ໄປ​ມາ​ກັບ​ພວກ​ລູກ​ຊາຍ​ຂອງ​ໂມ​ໄຊ​ຢາ, ພະ​ຍາ​ຍາມ​ທີ່​ຈະ ທຳ​ລາຍ​ສາດ​ສະ​ໜາ​ຈັກ​ຂອງ​ພຣະ​ເຈົ້າ; ແຕ່​ຈົ່ງ​ເບິ່ງ, ພຣະ​ເຈົ້າ​ໄດ້​ສົ່ງ​ທູດ​ຜູ້​ບໍ​ລິ​ສຸດ​ຂອງ​ພຣະ​ອົງ​ລົງ​ມາ​ຢັບ​ຢັ້ງ​ພວກ​ພໍ່​ໄວ້​ຕາມ​ທາງ.

7 ແລະ ຈົ່ງ​ເບິ່ງ, ທູດ​ໄດ້​ເວົ້າ​ກັບ​ພວກ​ພໍ່, ຄື​ກັບ​ວ່າ ສຽງ​ຟ້າ​ຮ້ອງ ແລະ ທັງ​ແຜ່ນ​ດິນ​ໂລກ​ໄດ້ ສັ່ນ​ສະ​ເທືອນ​ໃຕ້​ຕີນ​ຂອງ​ພວກ​ພໍ່; ແລະ ພວກ​ພໍ່​ໄດ້​ລົ້ມ​ລົງ​ຢູ່​ກັບ​ພື້ນ​ດິນ, ເພາະ​ວ່າ ຄວາມ​ຢ້ານ​ກົວ​ທີ່​ພວກ​ພໍ່​ມີ​ຕໍ່​ພຣະ​ຜູ້​ເປັນ​ເຈົ້າ.

8 ແຕ່​ຈົ່ງ​ເບິ່ງ, ສຽງ​ຂອງ​ທູດ​ໄດ້​ເວົ້າ​ກັບ​ພໍ່​ວ່າ: ຈົ່ງ​ລຸກ​ຂຶ້ນ​ເຖີດ. ແລະ ພໍ່​ໄດ້​ລຸກ​ຂຶ້ນ ແລະ ເຫັນ​ທູດ​ອົງ​ນັ້ນ.

9 ແລະ ເພິ່ນ​ໄດ້​ເວົ້າ​ກັບ​ພໍ່​ວ່າ: ຖ້າ​ບໍ່​ຢາກ​ໃຫ້​ຕົວ​ຂອງ​ເຈົ້າ​ຖືກ​ທຳ​ລາຍ, ກໍ​ຢ່າ​ພະ​ຍາ​ຍາມ​ທຳ​ລາຍ​ສາດ​ສະ​ໜາ​ຈັກ​ຂອງ​ພຣະ​ເຈົ້າ​ອີກ​ເລີຍ.

10 ແລະ ເຫດ​ການ​ໄດ້​ບັງ​ເກີດ​ຂຶ້ນ​ຄື ພໍ່​ໄດ້​ລົ້ມ​ລົງ​ຢູ່​ກັບ​ພື້ນ​ດິນ; ແລະ ເປັນ​ເວລາ ສາມ​ມື້​ກັບ​ສາມ​ຄືນ​ທີ່​ພໍ່​ເປີດ​ປາກ​ບໍ່​ໄດ້, ທັງ​ແຂນ ແລະ ຂາ​ຂອງ​ພໍ່​ກໍ​ເໜັງ​ຕີງ​ບໍ່​ໄດ້.

11 ແລະ ທູດ​ໄດ້​ເວົ້າ​ກັບ​ພໍ່​ອີກ​ຫລາຍ​ເລື່ອງ ຊຶ່ງ​ອ້າຍ​ນ້ອງ​ຂອງ​ພໍ່​ໄດ້​ຍິນ​ແຕ່​ວ່າ ພໍ່​ບໍ່​ໄດ້​ຍິນ​ເລີຍ; ພໍ່​ພຽງ​ແຕ່​ໄດ້​ຍິນ​ຄຳ​ວ່າ—ຖ້​າ​ບໍ່​ຢາກ​ໃຫ້​ຕົວ​ຂອງ​ເຈົ້າ​ຖືກ​ທຳ​ລາຍ, ກໍ​ຢ່າ​ພະ​ຍາ​ຍາມ​ທຳ​ລາຍ​ສາດ​ສະ​ໜາ​ຈັກ​ຂອງ​ພຣະ​ເຈົ້າ​ອີກ​ເລີຍ—ພໍ່​ກໍ​ເກີດ​ມີ​ຄວາມ​ຢ້ານ​ກົວ ແລະ ແປກ​ປະ​ຫລາດ​ໃຈ​ທີ່​ສຸດ ຢ້ານ​ວ່າ​ຕົວ​ເອງ​ຈະ​ຖືກ​ທຳ​ລາຍ, ພໍ່​ກໍ​ລົ້ມ​ລົງ​ຢູ່​ກັບ​ພື້ນ​ດິນ ແລະ ພໍ່​ກໍ​ບໍ່​ໄດ້​ຍິນ​ຫຍັງ​ອີກ​ເລີຍ.

12 ແຕ່​ວ່າພໍ່​ຖືກ​ທໍ​ລະ​ມານ​ດ້ວຍ​ຄວາມ​ທໍ​ລະ​ມານ ນິ​ລັນ​ດອນ, ເພາະ​ວ່າ​ຈິດ​ວິນ​ຍານ​ຂອງ​ພໍ່​ເຈັບ​ປວດ​ຈົນ​ສຸດ​ຂີດ ແລະ ຖືກ​ທໍ​ລະ​ມານ​ດ້ວຍ​ບາບ​ທັງ​ໝົດ​ຂອງ​ພໍ່.

13 ແທ້​ຈິງ​ແລ້ວ, ພໍ່​ໄດ້​ລະ​ນຶກ​ເຖິງ​ບາບ ແລະ ຄວາມ​ຊົ່ວ​ຮ້າຍ​ທັງ​ໝົດ​ຂອງ​ພໍ່, ຊຶ່ງ​ພໍ່​ຖືກ ທໍ​ລະ​ມານ​ດ້ວຍ​ຄວາມ​ເຈັບ​ປວດ​ແຫ່ງ​ນະລົກ; ແທ້​ຈິງ​ແລ້ວ, ພໍ່​ເຫັນ​ວ່າ​ພໍ່​ໄດ້​ກະ​ບົດ​ຕໍ່​ພຣະ​ເຈົ້າ​ຂອງ​ພໍ່, ແລະ​ວ່າ​ພໍ່​ບໍ່​ໄດ້​ຮັກ​ສາ​ພຣະ​ບັນ​ຍັດ​ອັນ​ສັກ​ສິດ​ຂອງ​ພຣະ​ອົງ.

14 ແທ້​ຈິງ​ແລ້ວ, ພໍ່​ໄດ້​ຂ້າ​ລູກ​ຫລານ​ຂອງ​ພຣະ​ອົງ​ມາ​ຢ່າງ​ຫລວງ​ຫລາຍ​ແລ້ວ, ຫລື ຊັກ​ນຳ​ພວກ​ເຂົາ​ໄປ​ຫາ​ຄວາມ​ທຸກ​ທໍ​ລະ​ມານ; ແທ້​ຈິງ​ແລ້ວ, ແລະ ໂດຍ​ສະ​ຫລຸບ ຄວາມ​ຊົ່ວ​ຮ້າຍ​ຂອງ​ພໍ່​ໃຫຍ່​ຫລວງ​ທີ່​ສຸດ, ພຽງ​ແຕ່​ຄິດ​ທີ່​ຈະ​ເຂົ້າ​ໄປ​ໃນ​ທີ່​ປະ​ທັບ​ຂອງ​ພຣະ​ເຈົ້າ​ຂອງ​ພໍ່, ມັນ​ກໍ​ໄດ້​ເຮັດ​ໃຫ້​ຈິດ​ວິນ​ຍານ​ຂອງ​ພໍ່​ຕ້ອງ​ທໍ​ລະ​ມານ​ດ້ວຍ​ຄວາມ​ຢ້ານ​ກົວ​ຢ່າງ​ບໍ່​ອາດ​ສາ​ມາດ​ຈະ​ວັດ​ແທກ​ໄດ້.

15 ໂອ້, ພໍ່​ຄິດ, ວ່າພໍ່ ຢາກ​ໃຫ້​ຖືກ​ກຳ​ຈັດ​ອອກ​ໄປ​ທັງ​ຈິດ​ວິນ​ຍານ ແລະ ຮ່າງ​ກາຍ​ໃຫ້​ສູນ​ຫາຍ​ໄປ, ເພື່ອ​ພໍ່​ຈະ​ບໍ່​ຖືກ​ນຳ​ມາ​ຢືນ​ຢູ່​ໃນ​ທີ່​ປະ​ທັບ​ຂອງ​ພຣະ​ເຈົ້າ​ຂອງ​ພໍ່, ເພື່ອ​ຮັບ​ການ​ພິ​ພາກ​ສາ​ກ່ຽວ​ກັບ ການ​ປະ​ພຶດ​ຂອງ​ພໍ່.

16 ແລະ ບັດ​ນີ້, ພໍ່​ຕ້ອງ​ທົນ​ທຸກ​ທໍ​ລະ​ມານ​ຢູ່​ເປັນ​ເວລາ​ສາມ​ມື້​ສາມ​ຄືນ, ດ້ວຍ​ຄວາມ​ເຈັບ​ປວດ​ຂອງ​ຈິດ​ວິນ​ຍານ​ທີ່ ອັບ​ປະ​ໂຫຍດ.

17 ແລະ ເຫດ​ການ​ໄດ້​ບັງ​ເກີດ​ຂຶ້ນ​ຄື ເວລາ​ທີ່​ພໍ່​ຕ້ອງ​ທົນ​ກັບ​ການ​ທໍ​ລະ​ມານ​ຢູ່​ນັ້ນ, ຂະນະ​ທີ່​ພໍ່ ເຈັບ​ປວດ​ຢູ່​ດ້ວຍ​ຄວາມ​ຊົງ​ຈຳ​ເຖິງ​ບາບ​ອັນ​ຫລວງ​ຫລາຍ​ຂອງ​ພໍ່​ຢູ່​ນັ້ນ, ຈົ່ງ​ເບິ່ງ, ພໍ່​ໄດ້​ລະ​ນຶກ​ເຖິງ​ຄຳ​ທຳ​ນາຍ​ຂອງ​ພໍ່​ທີ່​ເພິ່ນ​ໄດ້​ເວົ້າ​ຕໍ່​ຜູ້​ຄົນ​ກ່ຽວ​ກັບ​ການ​ສະ​ເດັດ​ມາ​ຂອງ​ພຣະ​ເຢຊູ​ຄຣິດ​ພຣະ​ບຸດ​ຂອງ​ພຣະ​ເຈົ້າ​ອົງ​ໜຶ່ງ, ເພື່ອ​ຊົດ​ໃຊ້​ແທນ​ບາບ​ຂອງ​ໂລກ.

18 ບັດ​ນີ້, ເວລາ​ພໍ່​ກຳ​ລັງ​ລະ​ນຶກ​ເຖິງ​ຄວາມ​ຄິດ​ເຫລົ່າ​ນີ້, ພໍ່​ໄດ້​ຮ້ອງ​ໄຫ້​ຢູ່​ໃນ​ໃຈ​ວ່າ: ໂອ້ ພຣະ​ເຢຊູ​ເຈົ້າ​ເອີຍ, ພຣະ​ບຸດ​ຂອງ​ພຣະ​ເຈົ້າ, ຂໍ​ຊົງ​ມີ​ເມດ​ຕາ​ປາ​ນີ​ຕໍ່​ຂ້າ​ນ້ອຍ​ຜູ້ ຢູ່​ໃນ​ນ້ຳ​ບີ​ແຫ່ງ​ຄວາມ​ຂົມ​ຂື່ນ, ແລະ ຖືກ​ປິດ​ລ້ອມ​ດ້ວຍ ສາຍ​ໂສ້​ແຫ່ງ​ຄວາມ​ຕາຍ​ອັນ​ເປັນ​ນິດ​ດ້ວຍ​ເຖີດ.

19 ແລະ ບັດ​ນີ້, ຈົ່ງ​ເບິ່ງ​ເວລາ​ທີ່​ພໍ່​ຄິດ​ແບບ​ນີ້, ພໍ່​ບໍ່​ຈື່​ຈຳ​ຄວາມ​ເຈັບ​ປວດ​ຂອງ​ພໍ່​ອີກ​ເລີຍ; ແທ້​ຈິງ​ແລ້ວ, ພໍ່​ບໍ່​ໄດ້ ທໍ​ລະ​ມານ​ດ້ວຍ​ຄວາມ​ລະ​ນຶກ​ເຖິງ​ບາບ​ຂອງ​ພໍ່​ອີກ​ຕໍ່​ໄປ.

20 ແລະ ໂອ້, ພໍ່​ບໍ່​ເຄີຍ​ເຫັນ ຄວາມ​ສຸກ ແລະ ຄວາມ​ສະ​ຫວ່າງ​ອັນ​ໃດ​ທີ່​ໜ້າ​ອັດ​ສະ​ຈັນ​ເຊັ່ນ​ນີ້; ແທ້​ຈິງ​ແລ້ວ, ຈິດ​ວິນ​ຍານ​ຂອງ​ພໍ່​ເຕັມ​ໄປ​ດ້ວຍ​ຄວາມ​ສຸກ​ທີ່​ສຸດ​ເທົ່າ​ກັບ​ຄວາມ​ເຈັບ​ປວດ​ຂອງ​ພໍ່!

21 ແທ້​ຈິງ​ແລ້ວ, ພໍ່​ເວົ້າ​ກັບ​ເຈົ້າ​ຜູ້​ເປັນ​ລູກ​ຂອງ​ພໍ່​ວ່າ, ບໍ່​ມີ​ອັນ​ໃດ​ຈະ​ໃຫຍ່​ຫລວງ ແລະ ຂົມ​ຂື່ນ​ໄດ້​ເທົ່າ​ກັບ​ຄວາມ​ເຈັບ​ປວດ​ຂອງ​ພໍ່. ແທ້​ຈິງ​ແລ້ວ, ແລະ ພໍ່​ກ່າວ​ກັບ​ເຈົ້າ​ລູກ​ຂອງ​ພໍ່​ອີກ​ວ່າ, ບໍ່​ມີ​ອັນ​ໃດ​ເລີຍ​ທີ່​ງົດ​ງາມ ແລະ ຫວານ​ຊື່ນ​ເທົ່າ​ກັບ​ຄວາມ​ສຸກ​ຂອງ​ພໍ່.

22 ແທ້​ຈິງ​ແລ້ວ, ພໍ່​ຄິດ​ວ່າພໍ່​ໄດ້​ເຫັນ​ຄື​ກັນ​ກັບ ລີໄຮ​ບັນ​ພະ​ບຸ​ລຸດ​ຂອງ​ພວກ​ເຮົາ, ຊຶ່ງ​ໄດ້​ເຫັນ​ພຣະ​ເຈົ້າ​ປະ​ທັບ​ຢູ່​ເທິງ​ພຣະ​ທີ່​ນັ່ງ​ຂອງ​ພຣະ​ອົງ, ຫຸ້ມ​ລ້ອມ​ໄປ​ດ້ວຍ​ເຫລົ່າ​ທູດ​ທັງ​ຫລາຍ​ຈົນ​ນັບ​ບໍ່​ຖ້ວນ, ຢູ່​ໃນ​ທ່າ​ທາງ​ຮ້ອງ​ເພງ ແລະ ສັນ​ລະ​ເສີນ​ພຣະ​ເຈົ້າ​ຂອງ​ພວກ​ເຂົາ; ແທ້​ຈິງ​ແລ້ວ, ແລະ ຈິດ​ວິນ​ຍານ​ຂອງ​ພໍ່​ຢາກ​ຈະ​ຢູ່​ບ່ອນ​ນັ້ນ.

23 ແຕ່​ຈົ່ງ​ເບິ່ງ, ແຂນ​ຂາ​ຂອງ​ພໍ່​ໄດ້​ຮັບ ກຳ​ລັງ​ຂອງ​ມັນ​ຄືນ​ມາ​ອີກ, ແລະ ພໍ່​ໄດ້​ຢືນ​ຂຶ້ນ​ດ້ວຍ​ຕີນ​ຂອງ​ພໍ່​ເອງ, ແລະ ໄດ້​ສະແດງ​ແກ່​ຜູ້​ຄົນ​ໃຫ້​ປະຈັກ​ວ່າ ພໍ່​ໄດ້ ເກີດ​ໃໝ່​ແລ້ວ​ຈາກ​ພຣະ​ເຈົ້າ.

24 ແທ້​ຈິງ​ແລ້ວ, ນັບ​ແຕ່​ເວລາ​ນັ້ນ​ເປັນ​ຕົ້ນ​ມາ​ຈົນ​ເຖິງ​ເວລາ​ນີ້, ພໍ່​ໄດ້​ເຮັດ​ວຽກ​ຢ່າງ​ບໍ່​ທໍ້​ຖອຍ, ເພື່ອ​ພໍ່​ຈະ​ໄດ້​ຊັກ​ນຳ​ເອົາ​ຈິດ​ວິນ​ຍານ​ຫລາຍ​ດວງ​ມາ​ຫາ​ການ​ກັບ​ໃຈ; ເພື່ອ​ພໍ່​ຈະ​ໄດ້​ນຳ​ເອົາ​ພວກ​ເຂົາ​ມາ ຊີມ​ລົດ​ຊາດ​ຂອງ​ຄວາມ​ສຸກ ຊຶ່ງ​ພໍ່​ໄດ້​ຊີມ​ມັນ​ມາ​ແລ້ວ; ເພື່ອ​ພວກ​ເຂົາ​ຈະ​ໄດ້​ເກີດ​ຈາກ​ພຣະ​ເຈົ້າ​ອີກ, ແລະ ເຕັມ​ໄປ​ດ້ວຍ​ພຣະ​ວິນ​ຍານ​ບໍ​ລິ​ສຸດ.

25 ແທ້​ຈິງ​ແລ້ວ, ແລະ ບັດ​ນີ້​ຈົ່ງ​ເບິ່ງ, ໂອ້ ລູກ​ຂອງ​ພໍ່, ພຣະ​ຜູ້​ເປັນ​ເຈົ້າ​ໄດ້​ປະທານ​ຄວາມ​ຊື່ນ​ຊົມ​ຢ່າງ​ຍິ່ງ​ໃຫ້​ພໍ່​ໃນ​ຜົນ​ງານ​ຂອງ​ພໍ່;

26 ເພາະ​ຍ້ອນ​ວ່າ ພຣະ​ຄຳ​ຊຶ່ງ​ພຣະ​ອົງ​ໃຫ້​ແກ່​ພໍ່, ຈົ່ງ​ເບິ່ງ, ຄົນ​ຢ່າງ​ຫລວງ​ຫລາຍ​ຈຶ່ງ​ເກີດ​ຈາກ​ພຣະ​ເຈົ້າ, ແລະ ໄດ້​ຊີມ​ລົດ​ຊາດ​ຄື​ກັນ​ກັບ​ພໍ່​ໄດ້​ຊີມ​ມາ, ແລະ ເຫັນ​ຄື​ກັນ​ກັບ​ທີ່​ພໍ່​ໄດ້​ເຫັນ​ມາ; ສະນັ້ນ ພວກ​ເຂົາ​ຈຶ່ງ​ຮູ້​ຈັກ​ເຖິງ​ເລື່ອງ​ເຫລົ່າ​ນີ້, ຊຶ່ງ​ພໍ່​ໄດ້​ເວົ້າ​ໄວ້​ຄື​ກັນ​ກັບ​ທີ່​ພໍ່​ໄດ້​ຮູ້​ຈັກ; ແລະ ຄວາມ​ຮູ້​ທີ່​ພໍ່​ມີ​ນັ້ນ​ເປັນ​ຂອງ​ພຣະ​ເຈົ້າ.

27 ແລະ ພໍ່​ໄດ້​ຮັບ​ການ​ອູ້ມ​ຊູ​ເວລາ​ມີ​ຄວາມ​ເດືອດ​ຮ້ອນ ແລະ ເວລາ​ມີ​ຄວາມ​ຫຍຸ້ງ​ຍາກ​ທຸກ​ຢ່າງ, ແທ້​ຈິງ​ແລ້ວ, ແລະ ໃນ​ຄວາມ​ທຸກ​ນາໆ​ປະ​ການ; ແທ້​ຈິງ​ແລ້ວ, ພຣະ​ເຈົ້າ​ໄດ້​ປົດ​ປ່ອຍ​ພໍ່​ອອກ​ຈາກ​ຄຸກ ແລະ ອອກ​ຈາກ​ພັນທະ​ການ, ແລະ ອອກ​ຈາກ​ຄວາມ​ຕາຍ; ແທ້​ຈິງ​ແລ້ວ, ພໍ່​ໄວ້​ວາງ​ໃຈ​ໃນ​ພຣະ​ອົງ, ແລະ ພຣະ​ອົງ​ໄດ້ ປົດ​ປ່ອຍ​ພໍ່​ອອກ​ໄປ.

28 ແລະ ພໍ່​ຮູ້​ວ່າ ພຣະ​ອົງ​ຈະ ຍົກ​ພໍ່​ຂຶ້ນ​ໃນ​ວັນ​ສຸດ​ທ້າຍ, ເພື່ອພໍ່​ຈະ​ໄດ້​ຢູ່​ກັບ​ພຣະ​ອົງ​ໃນ ລັດ​ສະ​ໝີ​ພາບ; ແທ້​ຈິງ​ແລ້ວ, ພໍ່​ຈະ​ສັນ​ລະ​ເສີນ​ພຣະ​ອົງ​ຕະຫລອດ​ໄປ, ເພາະ​ພຣະ​ອົງ​ໄດ້ ນຳພາ​ບັນ​ພະ​ບຸ​ລຸດ​ຂອງ​ພວກ​ເຮົາ​ອອກ​ຈາກ​ເອຢິບ ແລະ ພຣະ​ອົງ​ໄດ້​ກືນ ຊາວ​ເອຢິບ​ເຂົ້າ​ໃນ​ທະເລ​ແດງ; ແລະ ໂດຍ​ອຳນາດ​ຂອງ​ພຣະ​ອົງ, ພຣະ​ອົງ​ໄດ້​ນຳ​ເອົາ​ຄົນ​ເຫລົ່າ​ນັ້ນ​ໄປ​ຫາ​ແຜ່ນ​ດິນ​ແຫ່ງ​ຄຳ​ສັນ​ຍາ; ແທ້​ຈິງ​ແລ້ວ, ແລະ ພຣະ​ອົງ​ໄດ້​ປົດ​ປ່ອຍ​ພວກ​ເຂົາ​ໃຫ້​ອອກ​ຈາກ​ຄວາມ​ເປັນ​ທາດ ແລະ ການ​ເປັນ​ຊະ​ເລີຍ​ເປັນ​ບາງ​ຄັ້ງ.

29 ແທ້​ຈິງ​ແລ້ວ, ແລະ ພຣະ​ອົງ​ໄດ້​ນຳ​ພາ​ບັນ​ພະ​ບຸ​ລຸດ​ຂອງ​ພວກ​ເຮົາ​ອອກ​ຈາກ​ແຜ່ນ​ດິນ​ເຢຣູ​ຊາເລັມ​ມາ; ແລະ ໂດຍ​ອຳນາດ​ອັນ​ເປັນ​ນິດ​ຂອງ​ພຣະ​ອົງ, ໄດ້​ປົດ​ປ່ອ​ຍ​ພວກ​ເຂົາ​ອອກ​ຈາກ ຄວາມ​ເປັນ​ທາດ ແລະ ຄວາມ​ເປັນ​ຊະ​ເລີຍ​ເປັນ​ບາງ​ຄັ້ງ, ຈົນ​ລົງ​ມາ​ເຖິງ​ປະ​ຈຸ​ບັນ​ນີ້; ແລະ ພໍ່​ໄດ້​ເກັບ​ກຳ​ເລື່ອງ​ຄວາມ​ເປັນ​ຊະ​ເລີຍ​ຂອງ​ພວກ​ເຂົາ​ໄວ້​ໃນ​ຄວາມ​ຊົງ​ຈຳ​ສະເໝີ; ແທ້​ຈິງ​ແລ້ວ, ແລະ ລູກ​ກໍ​ຄວນ​ເກັບ​ກຳ​ຄວາມ​ເປັນ​ຊະ​ເລີຍ​ຂອງ​ພວ​ກ​ເຂົາ​ໄວ້​ໃນ​ຄວາມ​ຊົງ​ຈຳ​ເໝືອນ​ດັ່ງ​ພໍ່​ໄດ້​ເຮັດ​ມາ.

30 ແຕ່​ຈົ່ງ​ເບິ່ງ, ລູກ​ຂອງ​ພໍ່, ນີ້​ຍັງ​ບໍ່​ໝົດ; ເພາະ​ວ່າ​ລູກ​ຄວນ​ຮູ້​ຈັກ​ເໝືອນ​ດັ່ງ​ພໍ່​ໄດ້​ຮູ້​ວ່າ, ຕາບ​ໃດ​ທີ່​ລູກ​ຍັງ​ຮັກ​ສາ​ພຣະ​ບັນ​ຍັດ​ຂອງ​ພຣະ​ເຈົ້າ ລູກ​ຈະ​ຮຸ່ງ​ເຮືອງ​ຢູ່​ໃນ​ແຜ່ນ​ດິນ; ແລະ ລູກ​ຄວນ​ຈະ​ຮູ້​ຈັກ​ອີກ​ວ່າ ຕາບ​ໃດ​ທີ່​ລູກ​ບໍ່​ຮັກ​ສາ​ພຣະ​ບັນ​ຍັດ​ຂອງ​ພຣະ​ເຈົ້າ ລູກ​ຈະ​ຖືກ​ຕັດ​ອອກ​ຈາກ​ທີ່​ປະ​ທັບ​ຂອງ​ພຣະ​ອົງ. ບັດ​ນີ້, ນີ້​ເປັນ​ໄປ​ຕາມ​ພຣະ​ຄຳ​ຂອງ​ພຣະ​ອົງ.