1 Ket ita, anakko a Helaman, bilinenka nga alaem dagiti ^akasuratan a ^bnaitalek kaniak;

2 Ken kasta met a bilinenka nga isuratmo ti salaysay maipanggep kadagitoy a tatttao, a kas iti inaramidko, kadagiti pinanid ni Nephi, ket taginayonem a sagrado amin dagitoy a bambanag, a kas met iti panangtaginayonko; agsipud ta para iti ^anainsiriban a panggep a nataginayon ida.

3 Ket dagitoy a ^apinanid a gambang, nga aglaon kadagitoy a kitkitikit, nga addaan kadagitoy dagiti naisurat a salaysay iti nasantuan a kasuratan, nga addaan ti kapuonan dagiti ammatayo, uray pay manipud pay idi punganay—

4 Kitaen, naipadton daytoy dagiti ammatayo, a nasken a maitaginayon ken maipaimada manipud iti maysa a kaputotan agingga iti sabali, ket masaluadan ken mataginayonda babaen ti ima ti Apo agingga a maiwarasda iti tunggal pagilian, puli, pagsasao, ken tattao, tapno maammuanda maipapan kadagiti ^apalimed a linaonna iti daytoy.

5 Ket ita kitaen, no nasalimetmetan ida nasken a mataginayon ti kinasilengda; wen, ket taginayonenda ti kinasilengda; wen, ken kasta met amin dagiti pinanid a naglaon iti dayta nasantuan a surat.

6 Ita mabalin nga ipagarupyo a ^aminamaag kaniak daytoy; ngem kitaen kunak kadakayo, a naindaklan a bambanag ti mapasamak babaen kadagiti ^bbabassit ken gagangay a bambanag; ket iti adu a gundaway matikaw ti masirib babaen kadagiti babassit a pamuspusan.

7 Ket agtrabaho ti Apo a Dios babaen ti ^apamuspusan a mangipatungpal kadagiti naindaklan ken awan inggana a panggep; ket babaen dayta nakabasbassit a ^bpamuspusan tikawen ti Apo ti masirib ken impatungpalna ti pannakaisalakan ti adu a kararua.

8 Ket ita, agingga ita nakemen ti Dios a nasken a mataginayon dagitoy a bambanag; agsipud ta kitaem, ^apinalawada ti lagip dagitoy a tao, wen, ket naguyugoyda ti adu a biddut dagiti wagasda, ken inturongda ida iti pannakaammo ti Diosda iti pannakaisalakan dagiti kararuada.

9 Wen, kunak kenka, no saan ^akoma a gapu kadagitoy a bambanag a linaon dagitoy a kasuratan, nga adda kadagitoy a pinanid, saan koma a ^bnaguyugoy da Ammon ken dagiti kakabsatna dagiti rinibribu a Lamanita iti kinabiddut ti kaugalian dagiti ammada; wen, inturong ida dagitoy a kasuratan ken dagiti ^cbalikasda iti panagbabawi; ket dayta, inturongna ida iti pannakaammo iti Apo a Diosda, ken tapno agrag-o ken ni Jesucristo a Mannubbotda.

10 Ken asino ti makaammo nga isudanto ti maaramat a mangiturong iti rinibribu kadakuada, wen, ken kasta met ti rinibribu a nasukir a kakabsattayo, dagiti Nephita, nga ita mangpatpatangken iti puspusoda iti basol ken kinadangkes, iti pannakaammo iti Mannubbotda?

11 Ita saan pay unay a nalawag kaniak dagitoy a palimed; ngarud agparbengak.

12 Ket umdas met ngatan no kunak laeng a nataginayonda para iti nainsiriban a panggep, nga ammo ti Dios dayta a panggep; ta ^amamalbalakad nga addaan sirib kadagiti amin nga aramidna, ken nalinteg dagiti danana, ket ^bmaysa nga awan inggana ti turongna.

13 O laglagipem, laglagipem, anakko a Helaman, no kasano ti ^akinaiget dagiti bilin ti Dios. Ket kinunana: ^bNo tungpalem dagiti bilinko ^crumang-ayka iti daga—ngem no dimo tungpalen dagiti bilinna, maisinakanto iti imatangna.

14 Ket ita laglagipem, anakko, nga ^aintalek kenka ti Dios dagitoy a bambanag, a ^bsagrado, a nataginayon a sagrado, ken kasta met a saluadan ken taginayonenna a para iti ^cnainsiriban a panggepna, tapno maipakitananto ti bilegna kadagiti masungad a kaputotan.

15 Ket ita kitaen, ibagak kenka babaen ti espiritu ti pammadto, a no aglabsingka kadagiti bilin ti Dios, kitaem, maala manipud kenka dagitoy sagrado a bambanag babaen ti bileg ti Dios, ket mayawatka ken ni Satanas, tapno yakayakennaka a kasla taep iti angin.

16 Ngem no tungpalem dagiti bilin ti Dios, ken aramidem kadagitoy a sagrado a bambanag a mayannurot iti imbilin ti Apo kenka, (ta agkiddawka iti Apo para iti amin a bambanag nga aramidem kadagitoy) kitaen, awan ti bileg iti daga wenno iti impierno a ^amakaala kadagitoy kenka, agsipud ta nabileg ti Dios iti pannakaipatungpal iti amin a balikasna.

17 Ta tungpalenna amin nga kari nga inaramidna kenka, ta tinungpalna dagiti kari nga inaramidna kadagiti ammatayo.

18 Ta inkarina kadakuada a ^ataginayonenna dagitoy a bambanag para iti nainsiriban a panggepna, tapno maipakitana ti bilegna kadagiti masungad a kaputotan.

19 Ket ita kitaem, maysa a panggep ti tinungpalna, uray pay ti pannakapasubli ti ^aadu a ribu kadagiti Lamanita iti pannakaammo iti kinapudno; ket naipakitanan ti bilegna kadakuada, ken ipakitananto pay ti bilegna kadakuada kadagiti ^bmasungad a kaputotan; ngarud mataginayondanto.

20 Ngarud bilinenka, anakko a Helaman, a naregtaka koma a mangtungpal kadagiti amin a balikasko, ken naregtaka koma met a mangtungpal kadagiti bilin ti Dios a kas iti pannakaisuratda.

21 Ket ita, ibagak kenka ti maipanggep kadagidiay ^aduapulo ket uppat a pinanid, a saluadam ida, tapno dagiti palimed ken dagiti aramid ti kinasipnget, ken dagiti ^bnalimed nga aramidda, wenno dagiti nalimed nga aramid dagidiay tattao a nadadael, mabalin a maipakita kadagitoy a tattao; wen, amin dagiti pammapatayda, ken panagtakawda, ken panagsamsamda, ken amin dagiti kinadakes ken kinarimonda, mabalin a maipakita kadagitoy a tattao; wen, ket taginayonem dagitoy nga ^cpagipatarus.

22 Ta kitaem, nakita ti Apo a rinugian dagiti taona ti agaramid iti kasipngetan, wen, agaramid kadagiti nalimed a panagpapatay ken kinarimon; ngarud kinuna ti Apo, no saanda nga agbabawi nasken a madadaelda iti rabaw ti daga.

23 Ket kinuna ti Apo: Isaganaak ti katulongak a ni Gazelem, ti maysa a ^abato, a mangted iti lawag iti kasipngetan, tapno ipakaammok kadagiti tattaok nga agserserbi kaniak, tapno ipakaammok kadakuada dagiti aramid ti kakabsatda, wen, dagiti nalimed nga aramidda, dagiti aramidda ti kinasipnget, ken dagiti kinadakes ken kinarimonda.

24 Ket ita, anakko, naisagana dagitoy a pagipatarus tapno maipatungpal ti balikas ti Dios, nga insaona, a kinunana:

25 ^aIruarkonto manipud iti kasipngetan tapno malawagan amin dagiti nalimed nga aramid ken kinarimonda; ket malaksid no agbabawida ^bdadaelekto ida iti rabaw ti daga; ket iparangarangkonto amin a palimed ken makarimon nga aramidda, iti tunggal pagilian nga agtagikuanto kalpasanna iti daga.

26 Ket ita, anakko, makitata a saanda a nagbabawi; ngarud nadadaelda, ket kasta ti pannakaipatungpal ti balikas ti Dios; wen, nairuar manipud iti kasipngetan dagiti nalimed a kinarimonda ket naipakaammo kadatayo.

27 Ket ita, anakko, bilinenka nga igawidmo amin a sapatada, ken katulagan, ken nagnanaminganda ti nalimed a kinarimonda; wen, ken amin dagiti ^atanda ken pagsidsiddaawanda ilimedmo kadagitoy a tattao, tapno saanda maammuan, amangan la ketdi a matnagda met iti kasipngetan ket madadaelda.

28 Agsipud ta kitaem, adda ^alunod amin kadagitoy a daga, a dumtengto ti pannakadadael amin kadagidiay agar-aramid iti kasipngetan, a mayannurot iti bileg ti Dios, inton naan-anayen ti pannakaluomda; ngarud tarigagayak a saan koma a madadael dagitoy a tao.

29 Ngarud ilimedmo koma dagitoy nalimed a plano a ^asapsapata ken dagiti katulaganda kadagitoy a tao, ket dagiti laeng kinadakes ken panagpapatayda ken kinarimonda ti ipakaammomto kadakuada; ket isuromto ida a ^bmanggura iti kasta a kinadakes ken kinarimon ken pammapatay; ken isuromto met kadakuada a nadadael dagitoy a tattao gapu iti kinadakes ken kinarimon ken kinamammapatayda.

30 Ta kitaem, pinapatayda amin dagiti propeta ti Apo a napan kadakuada a mangipakdaar iti maipanggep iti kinadangkesda; ket immawag iti Apo a Diosda ti dara dagiti pinapatayda para iti panagibalesda kadagiti nangpapatay kadakuada; ket iti kasta dimteng dagiti panangukom ti Dios kadagiti agar-aramid iti kasipngetan ken nalimed a kinnunsabo.

31 Wen, ket mailunod koma ti daga iti agnanayon nga awan inggana kadagiti nagtrabaho iti kasipngetan ken nalimed a kinnunsabo, agingga iti pannakadadael, malaksid no agbabawida sakbay ti naan-anay a pannakaluomda.

32 Ket ita, anakko, laglagipem dagiti balikas a naisaok kenka; saanmo nga italek dagidiay nalimed a plano kadaytoy a tattao, ngem isurom kadakuada ti awan patinggana nga ^aigugura kadagiti basol ken kinadangkes.

33 ^aIkasabam kadakuada ti panagbabawi, ken pammati iti Apo a Jesucristo; isurom ida nga agpakumbaba ken ^bnaemma ken napakumbaba ti panagpuspuso; isurom ida a supringen ti tunggal ^csulisog ti sairo, babaen ti pammatida iti Apo a Jesucristo.

34 Isurom ida a saanda koma a mauma nga agaramid iti naimbag, ngem agbalinda a naemma ken napakumbaba ti panagpuspuso; agsipud ta iti kasta masarakanda ti ^ainana dagiti kararuada.

35 O, laglagipem, anakko, ket adalem ti ^apagsiriban iti kinaagtutubom; wen, adalem iti kinaagtutubom nga agtungpal kadagiti bilin ti Dios.

36 Wen, ket ^aumawagka iti Dios iti amin a kasapulam; wen, pagbalinem a para iti Apo amin nga aramidmo, ket sadino man a papanam iturongmo koma iti Apo; wen, maiturongmo koma amin a pampanunotmo iti Apo; wen, ipaaymo koma ti pammateg ti pusom iti Apo iti agnanayon.

37 ^aAgpabalakadka iti Apo iti amin nga aramidem, ket iturongnaka iti pagsayaatam; wen, no agiddaka iti rabii agiddaka para iti Apo, tapno bantayannaka iti pannaturogmo; ket no bumangonka iti agsapa punnuem ti pusom iti ^bpanagyaman iti Dios; ket no aramidem dagitoy a bambanag, maitan-okkanto iti maudi nga aldaw.

38 Ket ita, anakko, adda maibagak maipanggep iti banag nga inawagan dagiti ammatayo iti bola, wenno pagiturong—wenno ninaganan dagiti ammatayo iti ^aLiahona, a, naipatarus iti kompas; ket insagana ti Apo daytoy.

39 Ket kitaen, awan ti asino man a tao a makaaramid ti wagas iti kasta karikut a pannakaaramidna. Ket kitaem, naisagana daytoy tapno mangipakita kadagiti ammatayo ti turongen iti panagdaliasatda iti langalang.

40 Ket naaramatda a mayannurot iti ^apammatida iti Dios; ngarud, no addaanda iti pammati a patien a mabalin a maaramid ti Dios nga itudo dagidiay pagitudo ti dana a papananda, kitaen, naaramid daytoy; ngarud naaddaanda ti kastoy a milagro, ken kasta met dagiti adu pay a sabsabali a milagro a naaramid babaen iti bileg ti Dios, iti inaldaw.

41 Nupay kasta, gapu ta naaramid dagiti milagro babaen iti ^abassit a pamuspusan impakitana kadakuada dagiti nakaskasdaaw nga aramid. Nasadutda, ket nalipatanda nga inaramat ti pammatida ken kinaregtada ket nagsardeng kalpasanna dagiti nakaskasdaaw nga aramid, ket saanda a dimmur-as iti panagdaliasatda;

42 Ngarud, naitantanda iti langalang, wenno saanda nagdaliasat iti natarus a turong, ket naparigatda iti bisin ken waw, gapu iti panaglabsingda.

43 Ket ita, anakko, kayatko a maawatam a saan a mabalin nga awan ti anniniwan dagitoy a bambanag; agsipud ta nasadut dagiti ammatayo a mangipangag kadaytoy a kompas (ita naindagaan dagitoy a banag) saanda a nagballigi; kasta met kadagiti banag a naespirituan.

44 Agsipud ta kitaen, kas iti kalaka iti panangipangag iti ^abalikas ni Cristo, a mangitudo kenka iti nalinteg a turong iti agnanayon a ragsak, a kas iti panangipangag dagiti ammatayo kadaytoy a kompas, a mangitudo kadakuada iti nalinteg a turong a mapan iti naikari a daga.

45 Ket ita kunak, awan kadi ti pagilasinan kadaytoy a banag? Ta kas awan duadua nga inturong daytoy a pangiturong dagiti ammatayo, babaen ti panangsurotda iti turongna, iti naikari a daga, dagiti balikas ni Cristo, no surotentayo dagiti turongda, itundadatayo iti labes daytoy a tanap ti leddaang nga agturong iti amang a nasaysayaat a naikari a daga.

46 O anakko, saanmo ipalubos nga agbalintayo a ^asadut gapu iti kinalaka ti ^bwagas; ta kasta kadagiti ammatayo; ta kasta ti pannakaisaganana kadakuada, a no kumitada ^cagbiagda; kasta met kadatayo. Naisagana ti wagas, ket no kumitatayo mabalintayo ti agbiag iti agnanayon.

47 Ket ita, anakko, kitaem ta aywanam dagitoy sagrado a banag, wen, kitaem a kumitaka iti Dios ken agbiag. Mapanka kadagitoy a tao ket ipakdaarmo ti balikas, ken agparbengka. Anakko, agpakadaakon.