1 Ao ngkai, natiu ae te mwaane, e mwaiti riki te bwai ae N na tuangko nakon are N na tuanga tarim; bwa nooria, ko aki noora matoatoan tarim, ana kakaonimaki, ma ana botumwaaka ni kaawakin ana tua te Atua? Nooria, tiaki bwa e a tia ni katea te banna ni katoto nakoim?

2 Bwa ko aki rang ongo n au taeka n aiaron tarim, i buakoia ^aTioramwaite. Ngkai aio te bwai are I aki kukurei iai iroum; ko bon nakonako ni kamoamoaa korakoram ma wanawanam.

3 Ao tiaki ti aio, natiu ae te mwaane. Ko bon karaoa naba te bwai ae rang rawawata nanou iai; bwa ko kitana te mwakuri ae tabu, man nakon te aba are Tiron i buakon tian abaia Reimwanaite, n rimwin te ^akabekaau are Itabera.

4 Eng, bwa e bon ^akabwakai nanoia aika a mwaiti; ma e na aki reke te anga are ko na kamaiuko iai ibukin aei, natiu te mwaane. Bwa ko riai ni kawakina te mwakuri ae tabu are ko bon onimakinaki iai.

5 Ko aki ataia, natiu ae te mwaane, bwa ^abwaai aikai bon mwakuri aika bati n ribaki i matan te Uea, eng, e bon rang kammaira iaon bure nako ma ti kawawaean te raraa ae akea burena ke kaakean te Tamnei ae Raoiroi.

6 Bwa nooria, ngkana ko ^akaakea te Tamnei ae Raoiroi ngkana e a tia n reke nnena iroum, ao ko bon ataia bwa ko kaakea, nooria, aio bon te bure ae e ^baki kona ni kabwaraki; eng, ao anne e tiritiri ni kaitaraa te oota ma ana rabakau te Atua, ao e bon aki beebete reken ^ckabwaran ana bure; eng, I taku nakoim, natiu ae te mwaane, bwa e aki beebete reken kabwaran ana bure.

7 Ao ngkai natiu ae te mwaane, I tang nakon te Atua bwa teraa ngke arona bwa ko aki tia ni ^aburena te bure ae rang korakora aio. I aki kan maan n taetae iaon am bure, bwa e na maraki iai tamneim, ngke arona bwa e aki raoiroi aio ibukim.

8 Ma nooria, ko bon aki kona ni karabai am bure mai iroun te Atua; ma ngkana ko aki rairananom ao a na tei bwa bwaai ni kakoaua ni kaaitarako n te kabanea ni bong.

9 Ngkai natiu ae te mwaane, I tangiria bwa ko na rairananom ma ni mwanuokin am bure nako, man aki manga ririmwin ana ^akaibwabwaru am taratara, ma ^bkaakeai mai iroum bwaai aikai; bwa ngkana ko aki karaoi bwaai aikai ao ko bon aki kona n rin n uean te Atua. O uringnga ma ni kariaia, ma ni kaakeai bwaai aikai mai iroum.

10 Ao I anganiko te tua bwa ko na kariaia bwa ko na babaire ma tarim ake a ikawai riki n am waaki ni kabane; bwa nooria, ko bon riki rake, ao ko bon kainnanoa te tararuaki irouia tarim. Ao ongo nakon aia reirei.

11 Ao tai kariaia bwa ko na kairaki nako n te bwai ae akea bongana ma ni burababa; tai kariaia bwa te riaboro e na kaakabwaka riki nanom bwa ko na rimwia kabekaau aika a buakaka. Nooria, O natiu ae te mwaane, korakora ra te bure ae ko uotia nako aoia ^aTioramwaite; bwa ngke a noora ^barom ao a bon aki kakoauai au taeka.

12 Ao ngkai tamnein te Uea e taku nakoiu: ^aAnga te tua nakoia natim bwa a na karaoa ae raoiroi, bwa mwiina a kairia nako nanoia aomata aika a mwaiti nakon te kamaunaki; ngaia are I anganiko te tua, natiu ae te mwaane, ni maakan te Atua, bwa ko na toki man bure.

13 Bwa ko na rairaki nakon te Uea ma am iango, nanom, ao korakoram ni kabane; bwa ko na aki manga oki ni kairiia nako naano bwa a na karaoa ae buakaka, ma ko na okiria, ma ni ^akaota am kairua ma te bure are ko a tia ni karaoia.

14 ^aTai ukoukora te kaubwai ma bwain te aonaba ae akea manenaia; bwa nooria, ko bon aki kona n uoti ma ngkoe.

15 Ao ngkai, natiu ae te mwaane, I tangiria bwa N na taekina teutana nakoim aron rokon Kristo. Nooria, I taku nakoim, bwa bon ngaia are e na bon roko n anaa buren te aonaba; eng, e na roko n taekina te rongorongo ni kamaiu ae kakukurei nakoia ana aomata.

16 Ao ngkai, natiu ae te mwaane, aio bon te mwakuri are ko weteaki nako iai, bwa ko na taekina te rongorongo ae kakukurei aio nakoia te botanaomata aio, bwa ko na katauraoa aia iango; ke bwa e aonga n roko te kamaiuaki irouia, bwa a na katauraoi aia iango ^anatiia bwa a na ongo te taeka n te tai are e roko iai.

17 Ao ngkanne N na kabebetea am i ango teutana iaon te bwai aei. Nooria, ko miimii bwa e aera ngkai a kaotaki bwaai aikai ni maan i mwaain taia. Nooria, I taku nakoim, bwa tiaki bwa e kakawaki te aomata n te tai aei iroun te Atua n aron naba kakawakin te aomata n te tai are e na roko iai?

18 Tiaki bwa e riai bwa e na kaotaki te babaire ni kabomwi nakoia te botanaomata aio ao nakoia naba natiia?

19 Tiaki bwa e beebete iroun te Uea n te tai aei bwa e na kanakoia ana anera bwa a na taekin rongorongo aika a kakukurei aikai nakoira ao nakoia natira, ke are i mwin te tai ae e a tia n roko iai?