Ol komanmen blong Alma long boe blong hem Korianton.

Japta 39

Sin blong slip olbaot i wan rabis sin—Ol sin blong Korianton i bin blokem ol man blong Soram blong kasem trutok—Fasin blong pemaot man, blong Kraes i blong olgeta tu we oli yusum fet mo oli bin bon bifo long samting ia. Raonabaot 74 yia bifo Kraes i bon.

 Mo nao, boe blong mi, mi gat wan samting moa blong talem long yu bitim wanem we mi bin talem long brata blong yu; from luk, yu no bin luksave we brata blong yu i stap strong, ol fasin blong yusum fet blong hem, mo fasin blong lukaot gud blong hem blong holem ol komanmen blong God? Luk, hem i no bin soemaot wan gudfala eksampol long yu?

 From yu no bin folem ol toktok blong mi olsem we brata blong yu i bin mekem, long medel blong ol pipol blong Soram. Nao hemia wanem mi gat agensem yu; yu bin gohed blong flas long paoa mo waes tingting blong yu.

 Mo hemia i no evri samting, boe blong mi. Yu bin mekem wan samting we i givim wari long mi; from yu bin lego ministri ia, mo yu bin go long graon blong Saeron, long saed blong ol graon blong ol man blong Leman, blong biaen long woman blong rod ia Isabel.

 Yes, hem i bin winim ol hat blong plante man; be hemia i no wan eskius blong yu, boe blong mi. Yu sud bin lukaot gud long ministri we oli bin trastem long yu.

 Yu no save, boe blong mi, we ol samting ia i wan rabis sin long ae blong Lod; yes, i moa rabis bitim ol narafala sin, be i no bitim sin blong mekem blad blong wan man we i no gat rong i ron o tanem baksaed long Tabu Spirit?

 From luk, sapos yu tanem baksaed long Tabu Spirit afta we hem i bin gat ples insaed long yu, mo tu yu save se yu stap tanem baksaed, luk, hemia i wan sin we i no gat fogivnes long hem; yes, mo eni man we i kilim ded wan man agensem laet mo save blong God; i no isi blong hem i kasem fogivnes; yes, mi talem long yu, boe blong mi, se i no isi blong hem blong kasem wan fogivnes.

 Mo nao, boe blong mi, mi wantem tumas long fes blong God se yu no bin gat rong long wan bigfala fasin blong brekem loa olsem ia. Bae mi no gohed blong tokbaot ol sin blong yu, blong givim had taem long sol blong yu, sapos i no blong gud blong yu.

 Be luk, yu no save haedem ol sin blong yu long God; mo sapos yu no sakem sin bae oli stap olsem wan testimoni agensem yu long las dei.

 Nao boe blong mi, mi wantem se yu sakem sin, mo lego ol sin blong yu, mo nomo folem ol rabis samting we ae blong yu i wantem, be tanem baksaed blong yu long evri samting ia; from sapos yu no mekem olsem bae yu no save kasem kingdom blong God. O, yu mas tingbaot, mo mekem samting ia, mo tanem baksaed blong yu long ol samting ia.

 10 Mo mi givim wan oda long yu blong putum long yu blong askem advaes long ol fasbon brata blong yu long olgeta samting we bae yu mekem; from luk, yu stap long yangfala laef blong yu, mo yu nidim ol brata blong yu blong oli givhan long yu. Mo folem ol advaes blong olgeta.

 11 Yu no mas letem eni kaen flas o krangke samting blong lidim yu i gowe; yu no mas letem devel i tanem hat blong yu bakegen i go long ol woman blong rod. Luk, O boe blong mi, hamas bigfala rabis fasin yu bin putum long ol man blong Soram; from taem we oli bin luk fasin blong yu oli no wantem blong bilivim ol toktok blong mi.

 12 Mo nao Spirit blong Lod i stap talem long mi: Givim oda long ol pikinini blong yu blong mekem ol gudfala fasin, from sapos no bae oli lidim ol hat blong plante man i gowe; taswe mi givim oda long yu, boe blong mi, long respek blong God, se yu holembak long ol rabis fasin blong yu;

 13 Blong yu tanem i go long Lod wetem evri tingting blong yu, wetem evri strong blong yu, mo evri paoa; blong mekem se yu nomo lidim ol hat blong eni man blong mekem ol rabis samting; be yu gobak long olgeta, mo talemaot ol sin blong yu mo olgeta nogud samting we yu bin mekem.

 14 Yu no mas lukaotem ol rij o ol samting blong wol ia we oli blong nating; from luk, yu no save tekem olgeta i go wetem yu.

 15 Mo nao, boe blong mi, bae mi toktok long yu lelebet long saed blong taem we Kraes bae i kam. Luk, mi talem long yu, se i hem we bae hem i kam blong tekemaot ol sin blong wol; yes, hem i kam givim gud nius blong fasin blong sevem man, long ol pipol blong hem.

 16 Mo nao, boe blong mi, hemia i bin wok we God i bin singaotem yu from, blong talemaot gud nius ia long pipol ia, blong mekem rere ol tingting blong olgeta; o long narafala toktok blong fasin blong sevem man i save kam long olgeta, blong mekem se oli save mekem rere ol tingting blong ol pikinini blong olgeta blong harem trutok long taem we bae Kraes i kam.

 17 Mo nao bae mi mekem tingting blong yu i kam gud smol long samting ia. Luk, yu sapraes tumas from wanem ol samting ia i mas kamaot longtaem tumas, bifo long taem blong olgeta. Luk, mi talem long yu, yu ting se praes blong wan sol tede i no sas, long fes blong God, olsem wan sol bae i stap long taem we Kraes bae i kam?

 18 Yu ting se plan blong fasin blong pemaot man i no mas kam long ol pipol ia mo tu long ol pikinini blong olgeta?

 19 Yu ting se i moa strong long Lod naoia, blong sendem wan enjel blong hem blong talemaot gud nius ia long yumi mo tu long ol pikinini blong yumi, o afta taem we hem i kam?