1 Mo nao, boe blong mi, mi gat sam samting moa blong talem long yu bitim wanem we mi talem long brata blong yu; from luk, ?yu no bin luksave we brata blong yu i stap strong, hem i fetful, mo hem i wok strong blong obei ol komanmen blong God? Luk, ?hem i no bin soemaot wan gudfala eksampol long yu?

2 From yu no bin mekem folem ol toktok blong mi olsem we brata blong yu i bin mekem, long medel blong ol pipol blong Ol ^aMan blong Soram. Nao hemia i wanem we mi gat agensem yu; yu bin gohed blong tokflas from paoa mo waes tingting blong yu.

3 Mo hemia i no evri samting, boe blong mi. Yu bin mekem wan samting we i givim wari long mi; from yu lego fogud seves ia, mo yu go long graon blong Saeron, long saed blong ol boda blong Ol Man blong Leman, blong yu biaen long ^awoman blong rod ia Isabel.

4 Yes, hem i ^astilim hat blong plante man; be hemia i no wan eskius blong yu, boe blong mi. Yu sapos blong lukaotem gud seves ia we oli bin trastem yu wetem.

5 ?Yu no save, boe blong mi, se ol ^asamting ia oli wan rabis sin long ae blong Lod? Yes, i moa rabis bitim evri sin, be i no bitim sin blong mekem blad blong wan man we i no gat rong i ron o hemia blong tanem baksaed long Tabu Spirit.

6 From luk, sapos yu ^atanem baksaed long Tabu Spirit afta we hem i gat wan ples insaed long yu, mo tu, yu save se yu stap tanem baksaed, luk, hemia i wan sin we i ^bno gat fogivnes long hem; yes, mo eni man we i kilimded wan man agensem laet mo save blong God, i no isi blong hem i kasem ^dfogivnes; yes, mi talem long yu, boe blong mi, se i no isi long hem blong kasem wan fogivnes.

7 Mo nao, boe blong mi, mi wantem tumas long fes blong God se yu no ^arong long wan bigfala fasin blong brekem loa olsem ia. Bae mi no gohed blong tokbaot ol sin blong yu, blong givim hadtaem long sol blong yu, sapos i no blong gud blong yu.

8 Be luk, yu no save haedem ol sin blong yu long God; mo sapos yu no sakem sin bae oli stap olsem wan testemoni agensem yu long las dei.

9 Nao boe blong mi, mi wantem se yu sakem sin, mo lego fogud ol sin blong yu, mo nomo folem ol ^arabis tingting we ae blong yu i wantem, be yu ^bkrosemaot yuwan long evri samting ia; from sapos yu no mekem olsem bae yu no save kasem kingdom blong God. O, yu mas tingbaot, mo mekem samting ia, mo krosemaot yuwan long ol samting ia.

10 Mo mi givim wan oda long yu blong yu mekem, blong yu askem advaes long ol fasbon brata blong yu long olgeta samting we bae yu mekem; from luk, yu stap long yangfala laef blong yu, mo yu nidim ol brata blong yu blong oli givhan long yu. Mo folem ol advaes blong olgeta.

11 Yu no mas letem eni kaen flas o krangke samting i lidim yu i gowe; yu no mas letem devel i tanem hat blong yu bakegen i go long ol woman blong rod. Luk, O boe blong mi, hamas bigfala rabis fasin yu bin putum long Ol ^aMan blong Soram; from taem we oli luk ^bfasin blong yu, oli no wantem bilivim ol toktok blong mi.

12 Mo nao Spirit blong Lod i stap talem long mi: “^aGivim oda long ol pikinini blong yu blong oli mekem ol gudfala fasin, from sapos no bae oli lidim hat blong plante man oli go lus;” from hemia mi givim oda long yu, boe blong mi, wetem respek long God, se yu holembak ol rabis fasin blong yu;

13 Blong yu tanem yu i go long Lod wetem evri maen, evri paoa blong tingting, mo evri paoa blong yu; blong mekem se yu nomo lidim hat blong eni man blong mekem ol rabis samting; be yu gobak long olgeta, mo ^atalemaot ol rong blong yu mo wanem rong samting ia we yu bin mekem.

14 Yu ^ano mas lukaotem ol rij o ol samting nating blong wol ia; from luk, yu no save tekem olgeta oli go wetem yu.

15 Mo nao, boe blong mi, bae mi toktok long yu lelebet long saed blong taem we Kraes bae i kam. Luk, mi talem long yu, se i hem nao bae i kam blong tekemaot ol sin blong wol; yes, hem i kam talem gud nius blong fasin blong sevem man, long ol pipol blong hem.

16 Mo nao, boe blong mi, hemia i seves we God i bin singaotem yu from, blong talemaot gud nius ia long ol pipol ia, blong mekem rere ol tingting blong olgeta; o, long narafala toktok, blong fasin blong sevem man i save kam long olgeta, blong oli save mekem rere ol tingting blong ol ^apikinini blong olgeta blong harem trutok long taem we bae Kraes i kam.

17 Mo nao bae mi mekem tingting blong yu i kam gud smol long samting ia. Luk, yu sapraes tumas from wanem ol samting ia oli mas kamaot longlongtaem, bifo long taem blong olgeta. Luk, mi talem long yu, ?yu ting se praes blong wan sol tedei i no sas, long fes blong God, semmak long wan sol we bae i stap long taem we Kraes bae i kam?

18 ?Yu ting se plan blong fasin blong pemaot man i no mas kam long ol pipol ia, mo tu, long ol pikinini blong olgeta?

19 ?Yu ting se i moa strong long Lod naoia, blong sendem wan enjel blong hem blong talemaot gud nius ia long yumi, mo tu, long ol pikinini blong yumi, o afta taem we hem i kam?