1 Mo i bin hapen se Ol Man blong Nifae we oli no bin ^akilimded olgeta wetem ol tul blong faet, afta we oli berem olgeta we oli ded—nao, oli no kaontem namba blong olgeta we oli ded, from namba blong olgeta i bigwan tumas—afta we oli finis blong berem ol dedman blong olgeta, olgeta evriwan oli gobak long graon blong olgeta, mo long haos blong olgeta, mo long ol waef blong olgeta, mo long pikinini blong olgeta.

2 Nao i gat plante woman mo pikinini we oli bin kilimded olgeta wetem naef blong faet, mo plante long ol grup blong ol animol mo ol buluk blong olgeta tu; mo tu, oli prapa spolem gud plante garen blong sid blong kakae, from ol ami blong ol man oli bin purumbut long olgeta.

3 Mo nao hamas long Ol Man blong Leman mo Ol Man blong Amlisae we oli bin kilimded olgeta long graon long saed reva ia, Saedon, oli sakem olgeta i go long ol ^awota blong Saedon; mo luk, ol bun blong olgeta oli stap daon long dip ples blong ^bsolwota, mo oli plante.

4 Mo Ol ^aMan blong Amlisae oli defren long Ol Man blong Nifae, from Ol Man blong Amlisae oli bin ^bmakem olgeta long red mak long fored blong hed blong olgeta olsem Ol Man blong Leman; be oli no sevem hed blong olgeta olsem Ol Man blong Leman.

5 Nao Ol Man blong Leman oli sevem hed blong olgeta; mo oli ^aneked wetem skin blong animol nomo we oli fasem raon long wes blong olgeta, mo tu, ol klos blong faet we oli putum long olgeta, mo ol bonara blong olgeta, mo ol ara blong olgeta, mo ol ston blong olgeta, mo ol sling blong olgeta, mo samfala samting moa.

6 Mo skin blong Ol Man blong Leman oli dak, folem mak we Lod i bin putum long ol papa blong olgeta, we i wan ^astrong nogud mak we i kam long olgeta from oli bin brekem loa mo from oli bin go agensem ol brata blong olgeta, we oli Nifae, Jekob, mo Josef, mo Sam, we oli ol stret mo tabu man.

7 Mo ol brata blong olgeta oli bin lukaotem wan wei blong kilimded olgeta, from hemia Lod i sakem wan nogud samting long olgeta; mo Lod God i putum wan ^amak long olgeta, yes, long Leman mo Lemyul, mo tu, ol boe blong Ismael, mo ol woman we oli blong laen blong Ismael.

8 Mo samting ia i bin hapen, blong mekem se ol laen blong olgeta i defren long ol laen blong ol brata blong olgeta, blong mekem se Lod God i save sevem ol pipol blong hem, blong bae oli no ^amiks mo biliv long ol ^bkastom we oli rong we i save prapa spolem gud olgeta.

9 Mo i bin hapen se eni man we i miksim laen blong hem wetem laen blong Ol Man blong Leman i tekem semfala strong nogud mak ia i kam long ol laen blong hem.

10 From hemia, eni man we i letem Ol Man blong Leman i lidim hem i go nogud, oli bin singaotem hem anda long nem ia, mo i gat wan mak we Lod God i putum long hem.

11 Mo i bin hapen se eni man we oli no save biliv long ol ^akastom blong Ol Man blong Leman, be i biliv long ol histri we oli karem i kam, aot long graon blong Jerusalem, mo tu, i biliv long kastom blong ol papa blong olgeta, we oli stret, we oli biliv long ol komanmen blong God mo folem olgeta, oli singaotem olgeta Ol Man blong Nifae, o ol pipol blong Nifae, stat long tetaem ia i go—

12 Mo olgeta ia nao oli bin kipim ol rekod, we oli ^atru, abaot Ol Man blong Nifae, mo abaot Ol Man blong Leman tu.

13 Nao bae yumi gobak bakegen long Ol Man blong Amlisae, from oli bin gat wan ^amak we oli putum long olgeta; yes, oli bin putum mak long olgeta bakegen, yes, wan red mak long fored blong hed blong olgeta.

14 Olsem ia nao ol toktok blong God oli bin kam tru, from olgeta ia nao oli ol toktok we hem i talem long Nifae: “Luk, mi mi bin sakem wan strong nogud tok long Ol Man blong Leman, mo bae mi putum wan mak long olgeta, blong mekem se olgeta mo ol pikinini blong olgeta bae oli defren long yu mo ol pikinini blong yu, stat long tetaem ia i go kasem blong oltaem, hemia nomo sapos oli sakem ol fasin nogud blong olgeta mo ^atanem olgeta i kam long mi blong mekem se mi save gat sore long olgeta.”

15 Mo bakegen: “Bae mi putum wan mak long hem we i miksim pikinini blong hem wetem ol brata blong yu, mekem se bae mi sakem wan strong nogud tok long olgeta tu.”

16 Mo bakegen: “Bae mi putum wan mak long hem we i stap faet agensem yu mo laen blong yu.”

17 Mo bakegen, mi talem se man we i aot long yu bae oli nomo singaotem hem olsem laen blong yu; mo bae mi blesem yu, mo eni man we bae oli singaotem hem olsem laen blong yu, stat long taem ia i go kasem long oltaem; mo ol samting ia oli ol promes blong Lod i go long Nifae mo long laen blong hem.

18 Nao Ol Man blong Amlisae oli no bin save se oli stap mekem ol toktok blong God oli kamtru, taem we oli stat blong putum ol mak long fored blong hed blong olgeta; be, oli bin soemaot klia se oli ^aagensem God; from hemia, hem i stret nomo blong strong nogud tok ia i foldaon long olgeta.

19 Nao mi wantem se bae yufala i mas luk we olgeta nomo oli bin mekem ^astrong nogud tok ia i kam long olgetawan bakegen; mo tu, evri man we i kasem strong nogud tok ia, i putum panis i kam long hemwan bakegen.

20 Nao i bin hapen se, i no fulap dei afta long faet we i bin hapen long graon blong Sarahemla, tru long Ol Man blong Leman mo Ol Man blong Amlisae, i gat wan narafala ami blong Ol Man blong Leman we i kam long ol pipol blong Nifae, long ^asem ples we fas ami i mitim Ol Man blong Amlisae.

21 Mo i bin hapen se Ol Man blong Nifae oli sendem wan ami blong ronemaot olgeta long graon blong olgeta.

22 Nao from we Alma, hem bakegen i bin kasem ^akil, hem i no go long faet long tetaem ia agensem Ol Man blong Leman;

23 Be hem i bin sendem wan bigfala ami agensem olgeta; mo oli go mo kilimded plante long olgeta man blong Leman, mo oli ronemaot smol haf blong olgeta i kamaot long ol boda blong graon blong olgeta.

24 Mo afta, oli bin gobak bakegen mo stat blong stanemap pis long graon; oli nomo kasem trabol blong wan taem, wetem ol enemi blong olgeta.

25 Nao, oli mekem ol samting ia, yes, evri faet ia mo evri rao ia, i bin stat mo en long nambafaef yia blong rul blong ol jaj.

26 Mo long wan yia, plante taosen mo ol ten blong taosen sol oli bin go long wol ia we i no save finis, blong oli save kasem ^apraes blong olgeta folem ol wok blong olgeta, sapos oli gud, o sapos oli nogud, blong kasem glad ia we i no save finis o blong stap harem nogud ia we i no save finis, folem spirit we oli bin jusum blong obei, sapos hem i wan gudfala spirit o wan nogud wan.

27 From evri man i kasem ^apei long man we hem i jusum blong ^bobei, mo samting ia folem ol toktok blong spirit blong profesi; from hemia, bae i folem trutok. Mo olsem ia nao nambafaef yia blong rul blong ol jaj i bin en.