Japta 4

Alma i baptaesem plante taosen man we oli jenisim laef—Rabis fasin i go insaed long Jos mo gru blong Jos i no save gohed—Nifaeha i kam jif jaj—Alma, olsem hae pris, i givim taem blong hem long wok blong God. Raonabaot 86–83 yia bifo Kraes i bon.

 Nao i bin hapen se, long nambasikis yia blong rul blong ol jaj long ol pipol blong Nifae, i no bin gat ol rao o ol faet long graon blong Sarahemla.

 Be tingting blong ol pipol i bin trabol tumas, yes, oli bin trabol plante from oli bin lusum ol brata blong olgeta, mo from oli bin lusum ol grup blong anamol blong olgeta mo ol buluk tu, mo tu from oli bin lusum ol garen blong olgeta we oli planem ol sid long hem, o we ol man blong Leman i bin purumbut antap long olgeta mo smasem gud olgeta gud.

 Mo ol hadtaem blong olgeta i bin bigwan tumas, mekem se evri sol i bin gat wan samting we oli save krae long hem; mo oli bin biliv se hem i ol jajmen blong God we hem i bin sendem i kam long olgeta from ol fasin nogud blong olgeta mo ol rabis sin blong olgeta; taswe oli bin wekap blong tingbaot ol wok blong olgeta.

 Mo oli bin stat blong stanemap jos i kam moa fulwan; yes, mo plante oli bin baptaes long wota blong Saedon mo oli joenem jos blong God; yes, Alma i bin baptaesem olgeta wetem han blong hem, sem man ia we papa blong hem, Alma, i bin konsekretem hem i kam hae pris blong ol man blong jos, wetem han blong hem.

 Mo i bin hapen se long nambaseven yia blong rul blong ol jaj, i bin gat raonabaot tri taosen faef handred sol we oli kam joen tugeta long jos blong God mo oli bin baptaes. Mo olsem ia nao nambaseven yia we ol jaj oli stap rulum ava long ol pipol blong Nifae i bin en; mo i bin gohed blong gat pis long ol taem ia.

 Mo i bin hapen se long nambaeit yia blong rul blong ol jaj, we ol pipol blong jos oli bin stat blong kam praod, from oli bin gat plante rij samting, mo plante flas silik, mo ol gudfala kaliko we i tintin, mo from plante grup blong ol anamol blong olgeta mo ol buluk, mo gol blong olgeta mo silva blong olgeta, mo evri kaen gudgudfala samting, we oli bin kasem tru long had wok blong olgeta; mo tingting blong ae blong olgeta i kam antap long evri samting ia, from oli bin stat blong werem ol klos we oli sas tumas.

 Nao samting ia i bin samting we i bin givim hadtaem long Alma, yes, mo long plante pipol we Alma i bin konsekretem olgeta blong kam ol tija, mo ol pris, mo ol elda ova long jos; yes, plante long olgeta oli bin harem nogud tumas long ol fasin nogud we oli bin luk we i bin stat blong kam antap long medel blong ol pipol blong olgeta.

 From oli bin luk mo oli luk save wetem wan bigfala sore we ol man blong jos oli bin stat blong kam antap long tingting blong ae blong olgeta, mo blong putum hat blong olgeta long ol rij samting mo long ol samting blong wol we i blong nating, mo oli bin stat blong gat tingting ia se ol man oli no hae long olgeta, oli stap mekem olsem long wan wan long olgeta, mo oli bin stat blong givim hadtaem long olgeta we oli no biliv long saed blong wantem mo ol glad blong olgeta.

 Mo olsem ia nao, long nambaeit yia blong rul blong ol jaj, i bin stat blong gat ol bigfala rao long ol pipol blong jos; yes, i bin gat tingting ia blong wantem ol samting blong narafala man, mo rao, mo tingting ia blong mekem nogud long wan man, mo fasin ia blong givim hadtaem, mo praod, i go bitim hae tingting blong olgeta ia we oli no blong jos blong God.

 10 Mo olsem ia nao nambaeit yia blong rul blong ol jaj i bin en; mo ol fasin nogud blong jos i olsem wan ston we i blokem rod blong olgeta we oli no blong jos; mo olsem ia nao jos i bin stat blong stop blong muv i go long fored.

 11 Mo i bin hapen se long stat blong nambanaen yia, Alma i bin luk fasin nogud blong jos, mo hem i bin luk tu we eksampol blong jos i bin stat blong lidim olgeta ia we oli no bin biliv i go long wan pis blong rabis fasin i go long narawan, olsem ia nao samting ia i bin mekem ol pipol oli ded.

 12 Yes, hem i bin luk se fasin ia blong no stap semak i bigwan tumas long medel blong ol pipol, sam oli bin leftemap olgeta i go antap wetem hae tingting blong olgeta, oli lukluk daon long ol narafala wan, oli tanem baksaed blong olgeta long ol puaman, mo olgeta we oli bin neked, mo olgeta we oli bin hanggri, mo olgeta we oli bin tosta, mo olgeta we oli bin sik mo oli bin gat hadtaem.

 13 Nao bigfala samting ia nao i bin mekem ol sore long medel blong ol pipol, taem we ol narafala wan oli bin mekem tingting blong olgeta oli stap daon, oli bin helpem olgeta we oli bin nidim help blong olgeta, olsem givim sam samting blong olgeta long ol man we oli pua mo olgeta we oli gat nid, mo fidim olgeta we oli hanggri, mo olgeta we oli harem nogud long evri kaen hadtaem, from nem blong Kraes, we bae i kam folem spirit blong profesi.

 14 Lukluk i go fored long dei ia, olsem ia nao oli bin holem taet fasin blong kam klin aot long ol sin blong olgeta; oli fulap wetem bigfala glad from laef bakegen blong ol ded, folem wantem mo paoa mo long taem we Jisas Kraes i mekem ol man oli fri long ol rop blong ded.

 15 Mo nao i bin hapen se Alma, from i bin luk ol hadtaem blong olgeta we tingting blong olgeta i stap daon we oli stap folem God, mo ol hadtaem mo we ol smol haf blong ol man blong hem oli kavremap olgeta wetem, mo i bin luk se oli no stap semak, i bin stat blong gat bigfala sore; be, Spirit blong Lod i no bin livim hem.

 16 Mo hem i bin jusum wan waes man long medel blong olgeta elda blong jos, mo i bin givim paoa long hem folem voes blong ol pipol, mekem se hem i save gat paoa blong pasem ol loa folem ol loa we oli bin givimaot finis, mo blong yusum olgeta folem fasin nogud mo ol loa we ol pipol i brekem.

 17 Nao nem blong man ia hemi Nifaeha, mo oli bin jusum hem blong kam jif jaj; mo hem i bin sidaon long jea blong jajmen blong jajem mo lidim ol pipol.

 18 Nao Alma i no bin givim long hem wok blong hae pris blong jos, be hem i bin holem taet wok blong hae pris long hem wan; be hem i givim jea blong jajmen long Nifaeha.

 19 Mo hem i bin mekem samting ia blong mekem se hemwan i save go aot long ol pipol blong hem, o long medel blong ol pipol blong Nifae, blong mekem se hem i save prijim toktok blong God long olgeta, blong stretem olgeta blong tingbaot wok blong olgeta, mo blong hem i save putum daon, wetem toktok blong God, evri hae tingting mo fasin blong giaman mo evri rao we i bin stap long medel blong ol pipol blong hem, from hem i bin luk se i no gat wei, we hem i save tekembak olgeta sapos hem i no talemaot strong wetem klin testemoni agensem olgeta.

 20 Mo olsem ia nao long stat blong nambanaen yia blong rul blong ol jaj ova long ol pipol blong Nifae, Alma i bin givim jea blong jajmen long Nifaeha, mo hem i bin putum evri taem blong hemwan long hae prishud blong tabu oda blong God, long testemoni blong trutok, folem spirit blong revelesen mo profesi.